𐴌𐴟𐴇𐴝𐴙𐴚𐴒𐴙𐴝 𐴀𐴠𐴑𐴎𐴡𐴕 𐴄𐴠𐴑𐴕𐴝𐴉𐴡𐴃𐴢 𐴔𐴝𐴌𐴝 𐴒𐴞𐴘𐴠 𐴱𐴱

𐴀𐴥𐴠 𐴔𐴝𐴔𐴠𐴓𐴝𐴃𐴢 𐴀𐴝𐴌𐴀𐴥𐴡 𐴈𐴡 𐴀𐴠𐴑𐴎𐴡𐴕 𐴒𐴤𐴝𐴙𐴓𐴢 𐴀𐴥𐴡𐴘𐴧𐴠 ٬ 𐴎𐴞𐴃𐴝𐴌𐴥𐴝 𐴌𐴠 𐴑𐴝𐴑𐴏𐴢 𐴁𐴝𐴎𐴝𐴌𐴡𐴌𐴢 𐴏𐴥𐴡𐴊𐴡𐴌𐴢 𐴇𐴥𐴝𐴐𐴉𐴝𐴃𐴝 𐴓𐴡𐴃𐴢 𐴊𐴝𐴁𐴝𐴘𐴢 𐴒𐴡𐴌𐴥𐴠𐴌𐴢 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴝𐴃𐴡𐴚𐴁𐴝𐴊𐴞 𐴋𐴦𐴝𐴘𐴢 𐴀𐴥𐴡𐴑𐴧𐴡𐴓𐴠 ٬ 𐴑𐴝𐴑𐴏𐴢 𐴁𐴝𐴎𐴝𐴌𐴢 𐴀𐴠𐴓𐴝𐴑𐴝𐴌𐴢 𐴄𐴠𐴑𐴕𐴝𐴉𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 ٬ 𐴊𐴝𐴊𐴝𐴒𐴞𐴌𐴞 𐴁𐴝𐴑𐴞 𐴌𐴝𐴑𐴤𐴞 𐴁𐴡𐴓𐴧𐴝 𐴔𐴝𐴌𐴝 𐴔𐴝𐴌𐴞 𐴊𐴞𐴀𐴞 ٬ 𐴱 𐴲 𐴁𐴡𐴏𐴥𐴡𐴌𐴢 𐴁𐴡𐴐𐴢 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴠𐴑𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱 𐴔𐴝𐴔𐴠𐴓𐴝 𐴘𐴦𐴝𐴕 𐴄𐴠𐴑𐴕𐴝𐴉𐴢 𐴕𐴡𐴘𐴧𐴝 𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 ٬ 𐴌𐴦𐴡𐴘𐴢 𐴁𐴝𐴌𐴠 𐴁𐴞𐴀𐴞𐴕𐴧𐴙𐴝 𐴀𐴥𐴡𐴘𐴧𐴠𐴊𐴠 𐴁𐴡𐴓𐴞 ٬ 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴠 𐴌𐴠𐴂𐴟𐴄𐴝𐴌𐴢 𐴀𐴥𐴡𐴑𐴧𐴡𐴓𐴡𐴌𐴠 𐴎𐴝𐴀𐴝𐴕𐴝𐴘𐴧𐴠 𐴱𐴱

𐴔𐴡𐴙𐴅𐴧𐴤𐴙𐴠 𐴊𐴠 𐴉𐴟𐴖𐴝 𐴀𐴥𐴞𐴁𐴝 𐴀𐴥𐴡𐴙𐴓𐴊𐴠 ٬ 𐴄𐴠𐴑𐴕𐴝𐴉𐴢 𐴕𐴡𐴘𐴧𐴝 𐴉𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 ( 𐴏𐴞 𐴁𐴡𐴓𐴡𐴑𐴡𐴃𐴢 ) 𐴃𐴤𐴝𐴑𐴠𐴊𐴠 𐴊𐴞𐴓𐴢 𐴔𐴟𐴇𐴝𐴔𐴧𐴡𐴊𐴡𐴌𐴢 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊𐴢 𐴎𐴟𐴁𐴝𐴙𐴌𐴢 𐴁𐴡𐴐𐴢 𐴱 𐴲 𐴁𐴡𐴏𐴥𐴡𐴌𐴢 ٬ 𐴑𐴠𐴀𐴠𐴔𐴡𐴌𐴢 𐴏𐴥𐴡𐴓𐴔𐴕𐴝𐴕 𐴐𐴤𐴝 𐴀𐴝𐴃𐴡𐴚𐴁𐴝𐴊𐴞 𐴋𐴦𐴝𐴙𐴌𐴢 𐴔𐴞𐴔𐴁𐴤𐴡𐴌 𐴱𐴱 𐴄𐴠𐴑𐴕𐴝𐴉𐴡𐴌𐴢 ( 𐴀𐴠𐴏𐴢 𐴂𐴞 𐴶 𐴱 𐴀𐴠 𐴂𐴞 𐴁𐴞 𐴀𐴠𐴕 ) 𐴡𐴌 𐴑𐴡𐴔𐴦𐴝𐴕𐴋𐴝𐴌𐴢 𐴃𐴝𐴌𐴞𐴑𐴟𐴓𐴢 𐴀𐴞𐴏𐴓𐴝𐴔𐴠 𐴔𐴦𐴝𐴔𐴠𐴓𐴝 𐴘𐴦𐴝𐴕 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 𐴱 𐴕𐴡𐴘𐴧𐴝 𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴊𐴠𐴌𐴞 𐴉𐴥𐴝𐴀𐴝𐴕 𐴊𐴝𐴊𐴝𐴒𐴞𐴌𐴞 𐴁𐴝𐴑𐴞 𐴌𐴝𐴑𐴤𐴞 𐴁𐴡𐴓𐴧𐴝 ٬ 𐴉𐴟𐴃𐴤𐴞𐴘𐴝 𐴒𐴟𐴌𐴥𐴟𐴂𐴢 𐴀𐴝𐴌𐴢 𐴏𐴥𐴡𐴓𐴔𐴝𐴕 𐴐𐴤𐴝 𐴒𐴟𐴌𐴟𐴂𐴢 ٬ 𐴊𐴟𐴕𐴥𐴞 𐴒𐴟𐴌𐴥𐴟𐴂𐴡𐴌𐴢 𐴔𐴝𐴎𐴤𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴔𐴝𐴌𐴝 𐴔𐴝𐴌𐴞 𐴀𐴥𐴡𐴘𐴧𐴠𐴊𐴠 𐴱𐴱

𐴀𐴝𐴌 𐴊𐴟𐴕𐴥𐴞 𐴒𐴟𐴌𐴥𐴟𐴂𐴠 𐴑𐴠𐴀𐴠𐴔𐴡𐴌𐴢 𐴁𐴤𐴟𐴃𐴡𐴌𐴠 𐴉𐴟𐴖𐴝𐴙𐴕 𐴁𐴠𐴍𐴝𐴀𐴝𐴙𐴕 𐴎𐴝𐴌𐴥𐴠 𐴉𐴝𐴀𐴝 𐴑𐴞𐴋𐴕𐴥𐴝𐴂𐴢 𐴒𐴡𐴌𐴥𐴠 𐴀𐴝𐴌 𐴄𐴞𐴛𐴝 𐴓𐴟𐴄𐴢 𐴒𐴡𐴌𐴥𐴠 𐴁𐴡𐴓𐴞 𐴘𐴥𐴡 / 𐴃𐴝𐴌𐴞𐴑𐴟𐴓𐴢 𐴀𐴞𐴏𐴓𐴝𐴔𐴠 𐴈𐴡𐴘𐴧𐴠 𐴱 𐴌𐴦𐴡𐴘𐴢 𐴁𐴝𐴌𐴠 𐴁𐴞𐴀𐴞𐴕𐴧𐴙𐴝 𐴏𐴥𐴡𐴀𐴡𐴌𐴠 𐴉𐴟𐴃𐴤𐴞𐴘𐴝 𐴒𐴟𐴌𐴥𐴟𐴂𐴠 ٬ 𐴏𐴥𐴡𐴓𐴔𐴝𐴕 𐴐𐴤𐴝 𐴒𐴟𐴌𐴥𐴟𐴂𐴡𐴌𐴢 𐴎𐴟𐴁𐴝𐴙𐴌𐴡𐴌𐴥𐴠 𐴑𐴞𐴋𐴕𐴥𐴝𐴂𐴢 𐴒𐴡𐴌𐴞 𐴉𐴝𐴀𐴝𐴌𐴡𐴌𐴢 𐴈𐴝𐴣𐴏𐴝𐴃𐴢 𐴓𐴡𐴘𐴢 𐴎𐴝𐴀𐴝𐴘𐴢 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱 𐴁𐴦𐴝𐴊𐴠 𐴏𐴥𐴡𐴓𐴔𐴝𐴕 𐴐𐴤𐴝 𐴒𐴟𐴌𐴥𐴟𐴂𐴡𐴌𐴢 𐴔𐴝𐴙𐴕𐴐𐴤𐴠 𐴉𐴟𐴃𐴤𐴞𐴘𐴝 𐴒𐴟𐴌𐴥𐴟𐴂𐴡𐴌𐴢 𐴔𐴟𐴇𐴝𐴔𐴧𐴡𐴊𐴢 𐴅𐴡𐴓𐴞𐴓𐴡𐴌𐴠 𐴊𐴤𐴡𐴌𐴞 𐴓𐴡𐴘𐴢 𐴎𐴝𐴀𐴝𐴘𐴢 𐴔𐴝𐴌𐴞 𐴊𐴤𐴡𐴌𐴞 𐴒𐴤𐴝𐴙𐴓𐴢 𐴒𐴡𐴌𐴞 𐴊𐴞𐴘𐴧𐴠 ٬ 𐴀𐴥𐴞𐴃𐴝𐴌𐴠 𐴀𐴠𐴈𐴥𐴡𐴕 𐴑𐴝𐴑𐴏𐴢 𐴁𐴝𐴎𐴝𐴌𐴢 𐴏𐴥𐴡𐴊𐴡𐴌𐴢 𐴇𐴥𐴝𐴐𐴉𐴝𐴃𐴝𐴓𐴡𐴃𐴢 𐴊𐴝𐴁𐴝𐴘𐴢 𐴒𐴡𐴌𐴥𐴠𐴌𐴢 𐴱 𐴑𐴤𐴟𐴕𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴤𐴡𐴌𐴞𐴁𐴝𐴌𐴢 𐴑𐴟𐴐𐴤𐴞𐴐𐴢 𐴅𐴝𐴌𐴞 𐴀𐴝𐴏𐴥𐴠 𐴁𐴡𐴓𐴞 / 𐴃𐴝𐴌𐴞𐴑𐴟𐴓𐴢 𐴀𐴞𐴏𐴓𐴝𐴔𐴠 𐴈𐴡𐴘𐴧𐴠 𐴱𐴱

Sources : Dhakatribune