𐴁𐴤𐴝𐴐𐴡𐴕 𐴏𐴡𐴌 𐴃𐴤𐴝𐴑𐴞𐴁𐴡𐴓𐴧𐴝 𐴁𐴤𐴝𐴓𐴝 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴖𐴡𐴌𐴠 𐴈𐴥𐴝𐴔𐴝𐴑𐴤𐴝 𐴊𐴤𐴞𐴘𐴝𐴕 𐴌𐴝𐴑𐴤𐴝 𐴉𐴡𐴌𐴞𐴁𐴡 𐴱𐴱

𐴊𐴠𐴐𐴁𐴞𐴊𐴠𐴐𐴤𐴡𐴌 𐴃𐴟 ‘ 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴠𐴌 𐴊𐴠 𐴂𐴡𐴌𐴟𐴒𐴠𐴌𐴝𐴔𐴡𐴌 𐴇𐴠𐴔𐴝𐴘𐴡𐴃 𐴒𐴡𐴌𐴡𐴀𐴡𐴕 𐴏𐴝𐴀𐴝 , 𐴀𐴝𐴌 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴖𐴝𐴉𐴠𐴏𐴢 𐴕𐴞𐴁𐴡𐴓𐴧𐴝 𐴁𐴡𐴌𐴔𐴥𐴝 𐴌𐴠 𐴏𐴞𐴁𐴢 𐴊𐴡𐴀𐴡𐴕 𐴏𐴝𐴀𐴝 𐴁𐴡𐴓𐴞 𐴔𐴝𐴇𐴠𐴌𐴦𐴞𐴕 𐴀𐴥𐴡𐴑𐴧𐴡𐴓𐴠 𐴀𐴟𐴒𐴧𐴤𐴗𐴝 𐴏𐴞𐴔𐴞𐴕𐴝𐴌𐴡𐴃 𐴈𐴡𐴘𐴧𐴠 𐴱 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴌𐴃𐴟 𐴁𐴤𐴝𐴌𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴃𐴤𐴝𐴑𐴞𐴁𐴡𐴓𐴧𐴝 𐴁𐴤𐴝𐴐𐴡𐴕 𐴏𐴡𐴌 𐴁𐴠𐴐𐴤𐴞 𐴁𐴤𐴝𐴓𐴝 , 𐴔𐴡𐴕𐴃𐴡𐴌 𐴏𐴥𐴝𐴀𐴝𐴌𐴝 𐴊𐴞𐴘𐴝 𐴎𐴝𐴊𐴧𐴠 𐴀𐴞𐴀𐴞𐴕 𐴃𐴡𐴀𐴡𐴙𐴃𐴧𐴝 , 𐴀𐴝𐴌 𐴀𐴝𐴣𐴀𐴝𐴌𐴝𐴌 𐴉𐴟𐴌𐴝 𐴊𐴤𐴞𐴘𐴝𐴕 (𐴉𐴟𐴑𐴤𐴝𐴎) 𐴈𐴥𐴝𐴔𐴝𐴑𐴤𐴝 𐴁𐴡𐴌𐴔𐴥𐴝 𐴘𐴠 𐴀𐴝𐴌𐴑𐴝𐴕𐴡𐴌𐴃𐴟 𐴕𐴠𐴓𐴝𐴘 𐴊𐴞𐴘𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴖𐴡𐴌𐴠 𐴌𐴝𐴑𐴤𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴱𐴱

𐴏𐴞𐴔𐴞𐴕𐴝𐴌𐴡𐴌 𐴀𐴠𐴏𐴂𐴞𐴑𐴝𐴌𐴠 𐴐𐴤𐴡𐴕𐴞 𐴁𐴝𐴌𐴠 𐴈𐴡𐴘𐴧𐴠 𐴱 𐴊𐴠𐴐𐴁𐴞𐴊𐴠𐴐𐴤𐴠 ‘ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴎𐴝𐴒𐴝 𐴓𐴝𐴌𐴝 𐴂𐴡𐴌𐴟𐴒𐴠𐴌𐴝𐴔𐴡𐴌 𐴀𐴟𐴓𐴋𐴝 𐴕𐴡 𐴒𐴡𐴌𐴥𐴞 , 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴀𐴞𐴎𐴧𐴡𐴃 𐴀𐴝𐴌 𐴇𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴖𐴝𐴉𐴠𐴏𐴢 𐴕𐴞𐴎𐴝𐴘 𐴁𐴡𐴓𐴧𐴝 𐴊𐴠𐴐𐴁𐴞𐴊𐴠𐴐𐴤𐴡𐴌 𐴃𐴟 𐴁𐴡𐴔𐴥𐴝𐴌𐴠 𐴏𐴞𐴁 𐴊𐴞𐴁𐴡𐴓𐴧𐴝 𐴘𐴥𐴡 𐴈𐴡𐴘𐴧𐴠 𐴱 𐴋𐴤𐴝𐴑𐴝 𐴘𐴟𐴕𐴞𐴁𐴝𐴌𐴏𐴞𐴄𐴤𐴞𐴌 𐴕𐴡𐴁𐴝𐴁𐴢 𐴕𐴡𐴖𐴝𐴁𐴢 𐴀𐴝𐴓𐴞 𐴏𐴡𐴘𐴊𐴡𐴌𐴞 𐴏𐴠𐴕𐴥𐴠𐴄 𐴁𐴤𐴡𐴁𐴡𐴕𐴡𐴃 , ( 𐴂𐴞 𐴏𐴞 𐴀𐴠𐴏𐴢 𐴋𐴞 𐴘𐴟 ) 𐴘𐴠 ( 𐴏𐴞 𐴀𐴠𐴉𐴢 𐴀𐴝𐴘 𐴀𐴠𐴏𐴢 𐴀𐴠𐴏𐴢 ) 𐴋𐴞𐴂𐴝𐴌𐴔𐴥𐴠𐴕 𐴓𐴡𐴘 𐴔𐴞𐴓𐴞 , 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴃𐴟 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴠 𐴱𐴱

𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴞𐴁𐴝𐴌 𐴕𐴝𐴔 𐴊𐴞𐴀𐴞 , 𐴁𐴝𐴕𐴝𐴘𐴧𐴠𐴊𐴠 𐴂𐴡𐴌𐴡𐴅𐴤𐴠𐴑𐴄𐴡𐴌𐴠 𐴔𐴡𐴐𐴦𐴟𐴌 𐴒𐴡𐴌𐴞𐴁𐴡𐴓𐴧𐴝 𐴒𐴡𐴙𐴅𐴧𐴙𐴠𐴊𐴠 𐴏𐴞𐴔𐴞𐴕𐴝𐴌𐴡𐴃 𐴈𐴡𐴘𐴧𐴠𐴊𐴠 𐴱 𐴎𐴠𐴍𐴥𐴠 𐴋𐴤𐴝𐴑𐴝 𐴘𐴟𐴕𐴞𐴁𐴝𐴌 𐴏𐴞𐴄𐴤𐴞𐴌 𐴊𐴟𐴘𐴀𐴡𐴔 𐴆𐴝𐴕𐴏𐴞𐴓𐴝𐴌 𐴋𐴝𐴑𐴄𐴡𐴌 𐴀𐴠 𐴀𐴠𐴏𐴢 𐴀𐴠𐴔 / 𐴔𐴡𐴑𐴏𐴟𐴊𐴢 𐴑𐴡𐴔𐴝𐴓 𐴀𐴝𐴌 ( 𐴏𐴞 𐴀𐴠𐴉𐴢 𐴀𐴝𐴘𐴢 𐴀𐴠𐴏𐴢 𐴀𐴠𐴏𐴢 ) 𐴡𐴌 𐴀𐴠𐴔 𐴀𐴠𐴕 / 𐴀𐴝𐴁𐴏𐴝𐴌 , 𐴈𐴥𐴝𐴏𐴢 𐴔𐴠𐴇𐴔𐴦𐴝𐴕 𐴀𐴥𐴞𐴏𐴝𐴉𐴠 𐴏𐴞𐴔𐴞𐴕𐴝𐴌𐴡𐴃 𐴇𐴝𐴎𐴠𐴌 𐴀𐴥𐴡𐴀𐴡𐴙𐴓 𐴱 𐴌𐴞𐴏𐴥𐴝𐴆𐴝𐴌 / 𐴋𐴝𐴑𐴄𐴡𐴌 𐴃𐴡𐴖𐴇𐴞𐴊𐴟𐴓 𐴀𐴞𐴏𐴓𐴝𐴔 𐴀𐴝𐴌 𐴀𐴥𐴞𐴁𐴝𐴌 𐴓𐴝𐴔𐴃𐴝 𐴂𐴡𐴌𐴡𐴉𐴥𐴞𐴏𐴝𐴌 𐴐𐴤𐴡𐴣𐴀𐴡 𐴁𐴠𐴒𐴧𐴤𐴟𐴕𐴠 , 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴃𐴧𐴟 𐴁𐴤𐴝𐴌𐴡 𐴁𐴤𐴝𐴐𐴡𐴕 𐴏𐴡𐴌𐴡𐴃𐴢 𐴃𐴤𐴝𐴑𐴝 𐴁𐴤𐴝𐴓𐴝 𐴀𐴥𐴡𐴘𐴁𐴡𐴊𐴠 𐴁𐴟𐴎𐴤𐴞 , 𐴁𐴝𐴚𐴓𐴝𐴊𐴠𐴐𐴢 𐴕𐴠𐴁𐴤𐴞𐴌 𐴉𐴡𐴖𐴏𐴡𐴌 𐴊𐴟𐴖𐴝𐴌𐴝 𐴰 𐴰 𐴱 𐴳 𐴑𐴟𐴌𐴟𐴓𐴢 𐴄𐴞𐴛𐴝 𐴈𐴥𐴡𐴏𐴧𐴝 𐴒𐴡𐴌𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴒𐴤𐴡𐴌𐴢 𐴁𐴝𐴕𐴝𐴘𐴧𐴠𐴊𐴠 𐴱𐴱

Sources : Dhakatribune