𐴀𐴡𐴚 𐴏𐴥𐴝𐴕 𐴏𐴥𐴟𐴆𐴞 𐴁𐴡𐴕 𐴀𐴥𐴡𐴘 𐴁𐴦𐴝𐴊𐴠 , 𐴕𐴟𐴖𐴝 𐴀𐴡𐴉𐴌𐴝𐴊𐴢 𐴓𐴡𐴘 𐴀𐴠𐴑𐴀𐴡𐴔 𐴁𐴝𐴌 𐴑𐴦𐴟𐴍𐴡𐴃 𐴇𐴝𐴎𐴞𐴌 𐴀𐴥𐴡𐴘𐴧𐴠 𐴱𐴱

𐴀𐴠𐴑 𐴔𐴥𐴝𐴐𐴢 𐴀𐴝𐴒𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴑𐴦𐴟𐴂𐴢 𐴒𐴡𐴌𐴥𐴞 𐴏𐴥𐴟𐴆𐴞 𐴌𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘 𐴁𐴦𐴝𐴊𐴠 𐴀𐴠𐴑𐴡𐴔 𐴁𐴝𐴌 𐴑𐴦𐴟𐴍𐴡𐴃 𐴊𐴠𐴈𐴥𐴝 𐴒𐴞𐴘𐴠𐴊𐴠 𐴱 𐴏𐴥𐴟𐴆𐴞𐴌 𐴀𐴟𐴑𐴞𐴓𐴡𐴌 𐴈𐴡𐴃𐴤𐴝 𐴔𐴡𐴎𐴞𐴕 , 𐴀𐴥𐴞𐴁𐴝 𐴏𐴠𐴇𐴠𐴃𐴠 𐴀𐴝𐴌 𐴏𐴥𐴟𐴐𐴃𐴡 𐴀𐴝𐴏𐴠 𐴱 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 , 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴦𐴟𐴂𐴢 𐴒𐴡𐴌𐴞 𐴁𐴦𐴝𐴊𐴠 , 𐴏𐴥𐴟𐴆𐴞 𐴌𐴠 𐴔𐴝𐴙𐴕𐴐𐴤𐴠 𐴕𐴡 𐴎𐴝𐴕𐴥𐴠 𐴊𐴠 𐴎𐴝𐴒𐴝𐴃 𐴁𐴡𐴕 𐴒𐴡𐴌𐴞 𐴌𐴝𐴙𐴑𐴧𐴤𐴙𐴠 𐴱 𐴇𐴥𐴡𐴌𐴃𐴝𐴓 𐴒𐴡𐴌𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 , 𐴉𐴡𐴙𐴃𐴧𐴡 𐴊𐴞𐴕 𐴔𐴝𐴌𐴝𐴃 𐴀𐴝𐴏𐴠 , 𐴀𐴝𐴙𐴅𐴧𐴙𐴝 𐴌𐴦𐴡𐴘 𐴁𐴝𐴌𐴠 𐴸 𐴱 𐴎𐴡𐴕 𐴔𐴡𐴙𐴅𐴧𐴙𐴠 𐴊𐴠 , 𐴒𐴡𐴕𐴝 𐴀𐴞𐴁𐴤𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴁𐴤𐴝𐴌𐴡 𐴁𐴠𐴐𐴤𐴞 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 𐴐𐴤𐴡𐴔 𐴁𐴝𐴌𐴠 , 𐴇𐴥𐴡𐴌𐴃𐴝𐴓 𐴒𐴡𐴌𐴡𐴙𐴕𐴧𐴙𐴝 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴒𐴡𐴌𐴞 𐴕𐴠𐴙𐴓𐴧𐴙𐴠 𐴱𐴱

𐴒𐴡𐴃𐴡 𐴰 𐴲 𐴰 𐴲 𐴐𐴤𐴡𐴕 𐴕𐴡𐴖𐴡𐴔𐴁𐴡𐴌𐴡𐴃 𐴀𐴥𐴡𐴘𐴧𐴠𐴊𐴠 𐴁𐴤𐴟𐴍𐴡𐴃 , 𐴀𐴠𐴕 𐴀𐴠𐴓 𐴋𐴞 𐴏𐴥𐴟𐴆𐴞𐴌 𐴉𐴦𐴝𐴄𐴞 𐴁𐴤𐴟𐴄 𐴎𐴝𐴓𐴞 𐴒𐴡𐴌𐴥𐴞 , 𐴎𐴞𐴃𐴧𐴠 𐴊𐴠 𐴁𐴡𐴓𐴞 𐴈𐴡𐴀𐴡𐴘 𐴔𐴠𐴓𐴠𐴄𐴠𐴌𐴞 𐴘𐴠 𐴑𐴦𐴟𐴂𐴢 𐴒𐴡𐴙𐴅𐴧𐴙𐴠 𐴊𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴡𐴘𐴧𐴠 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴁𐴤𐴟𐴄 𐴎𐴝𐴓𐴞 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴀𐴡𐴌 𐴊𐴠 𐴘𐴥𐴝𐴕𐴡𐴃 𐴈𐴡𐴕𐴥𐴡 𐴏𐴥𐴝𐴁𐴟𐴃 𐴕𐴡 𐴊𐴞 𐴁𐴦𐴝𐴊𐴠 𐴘𐴥𐴡 𐴀𐴠𐴑 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴠 𐴁𐴤𐴟𐴄 𐴒𐴡𐴌𐴞 𐴁𐴡 𐴁𐴡𐴓𐴞 𐴄𐴝𐴙𐴔 𐴊𐴞𐴘𐴠 𐴱 𐴏𐴥𐴟𐴆𐴞𐴌 𐴖𐴡𐴌𐴠 𐴀𐴝𐴒𐴠 𐴓𐴡𐴃𐴞 𐴑𐴠𐴙𐴏𐴢 𐴊𐴟𐴘𐴧𐴝𐴕 𐴀𐴝𐴏𐴠 , 𐴀𐴠𐴑𐴀𐴡𐴔 / 𐴃𐴝𐴌 𐴏𐴥𐴝𐴌𐴝 𐴒𐴝𐴙𐴌 𐴑𐴝𐴕𐴟𐴕𐴞 𐴄𐴠𐴓𐴞𐴉𐴥𐴟𐴕𐴡𐴌 𐴔𐴞𐴆𐴤𐴞𐴕 𐴌𐴝𐴑𐴤𐴝 , 𐴊𐴟𐴘𐴀𐴡𐴔 / 𐴑𐴟𐴊𐴌𐴟𐴃𐴞 𐴀𐴝𐴉𐴡𐴃 𐴁𐴡𐴓𐴝𐴌 𐴑𐴝𐴕𐴟𐴕 𐴁𐴤𐴝𐴚𐴝 𐴱 𐴕𐴟𐴖𐴝 𐴃𐴞𐴕𐴀𐴡𐴔 𐴑𐴠𐴙𐴏𐴢 𐴀𐴥𐴡𐴙𐴓 𐴊𐴠 / 𐴁𐴤𐴟𐴍𐴡𐴌 𐴀𐴡𐴑𐴃𐴡𐴃 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔𐴡𐴃𐴧𐴟 𐴁𐴝𐴏𐴞𐴁𐴤𐴝𐴌 𐴑𐴝𐴕𐴟𐴕 𐴁𐴤𐴝𐴚𐴝 𐴱𐴱

𐴀𐴝𐴒𐴡𐴌 𐴊𐴟𐴕𐴥𐴞 𐴑𐴠𐴙𐴏𐴡𐴃 𐴃𐴞𐴕 𐴁𐴡𐴏𐴥𐴡𐴌 𐴎𐴞𐴘𐴡𐴓 , 𐴉𐴞𐴏𐴥𐴡𐴌 𐴒𐴤𐴝𐴕𐴡𐴌 𐴁𐴝𐴁𐴡𐴃𐴠 𐴉𐴥𐴝𐴘𐴏𐴠𐴓𐴝 𐴒𐴡𐴌𐴞𐴁𐴤𐴡𐴓𐴧𐴝 𐴔𐴝𐴌𐴠𐴆 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴄𐴝𐴙𐴔 𐴊𐴞𐴘𐴠 𐴱 𐴏𐴥𐴟𐴆𐴞𐴌 𐴉𐴥𐴟𐴣𐴖𐴝𐴣𐴃𐴞 𐴁𐴡𐴕 𐴒𐴡𐴙𐴅𐴧𐴙𐴠 𐴊𐴠 𐴁𐴡𐴌𐴔𐴥𐴝𐴌 𐴌𐴝𐴎𐴝 / 𐴖𐴥𐴞𐴕 𐴔𐴥𐴞𐴕𐴄𐴡𐴓𐴧𐴝 𐴘𐴥𐴡 𐴔𐴝𐴙𐴕𐴐𐴤𐴡𐴌𐴠 𐴀𐴟𐴏𐴑𐴝𐴘 𐴊𐴡𐴀𐴡𐴕𐴡𐴌 𐴕𐴟𐴖𐴝 𐴑𐴠𐴙𐴏𐴢 𐴁𐴝𐴕𐴝𐴘𐴧𐴠 𐴱 𐴏𐴥𐴟𐴆𐴞 𐴌𐴠 𐴁𐴡𐴕 𐴒𐴡𐴌𐴞 𐴁𐴦𐴝𐴊𐴠 , 𐴂𐴝𐴂𐴓𐴞𐴑𐴡𐴌 𐴁𐴤𐴟𐴃𐴡𐴌𐴠 𐴀𐴥𐴞𐴁𐴝𐴌 𐴉𐴞𐴌𐴞𐴘𐴡𐴃𐴝 𐴀𐴝𐴌 𐴀𐴝𐴊𐴡𐴌 𐴁𐴝𐴌𐴥𐴞 𐴒𐴞𐴘𐴠 ,𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴙𐴠 𐴊𐴠 𐴘𐴥𐴝𐴕𐴡𐴃 𐴀𐴥𐴞𐴁𐴝𐴌 𐴄𐴝𐴕 𐴀𐴝𐴌 𐴌𐴝𐴘 𐴔𐴠𐴓𐴠𐴄𐴠𐴌𐴞𐴌 𐴀𐴥𐴞𐴑𐴧𐴙𐴝 𐴊𐴠 𐴘𐴥𐴝𐴕𐴡𐴓𐴧𐴝 , 𐴊𐴟𐴕𐴞𐴘𐴝𐴌 𐴓𐴠𐴁𐴤𐴠𐴓𐴡𐴃 𐴀𐴥𐴞𐴁𐴝 𐴀𐴠𐴈𐴥𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 𐴊𐴝𐴒𐴞 𐴀𐴝𐴌 𐴀𐴡𐴉𐴌𐴝𐴊𐴞 𐴱𐴱

Sources : BBC News