𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴊𐴟𐴌𐴥𐴠 𐴋𐴞𐴘𐴝𐴃𐴢 𐴉𐴥𐴝𐴣𐴏𐴞 , 𐴋𐴡𐴣𐴀𐴡𐴌 𐴎𐴞𐴘𐴡𐴓𐴥𐴡𐴃𐴢 𐴃𐴤𐴝𐴑𐴠𐴌 𐴱𐴱

𐴕𐴟𐴖𐴝 𐴎𐴞𐴕𐴊𐴞𐴒𐴞 𐴐𐴤𐴟𐴌𐴟 𐴒𐴡𐴌𐴦𐴡𐴕𐴡𐴌 𐴀𐴝𐴐𐴤𐴝 𐴓𐴡𐴘 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴇𐴠𐴉𐴝𐴎𐴡𐴃𐴡𐴌 𐴀𐴝𐴕𐴋𐴝𐴌𐴠 , 𐴋𐴦𐴝𐴘𐴌 𐴉𐴥𐴟𐴣𐴖𐴝𐴣𐴃𐴞 , 𐴇𐴝𐴓𐴞𐴔𐴥𐴝 𐴀𐴝𐴌 𐴀𐴥𐴞𐴁𐴝𐴌 𐴒𐴤𐴡𐴌𐴒𐴟𐴐𐴧𐴞 𐴘𐴥𐴡 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴡𐴣𐴀𐴡𐴏𐴞 𐴀𐴠𐴑𐴊𐴞𐴕 𐴁𐴦𐴝𐴊𐴠 𐴉𐴟𐴖𐴝 𐴀𐴥𐴡𐴘𐴁𐴡𐴓𐴧𐴝 𐴉𐴠𐴄 𐴈𐴦𐴡𐴣𐴌𐴞 𐴊𐴤𐴡𐴙𐴅𐴧𐴙𐴠 𐴱 𐴀𐴦𐴝𐴛 𐴋𐴡𐴌𐴠 𐴀𐴝𐴌 𐴈𐴡𐴕𐴥𐴡 𐴔𐴡𐴊𐴡𐴊 𐴏𐴥𐴝𐴌𐴝 𐴀𐴥𐴡𐴕𐴠 𐴕𐴞𐴌 𐴀𐴝𐴐𐴤𐴝 𐴀𐴥𐴡𐴘 𐴒𐴦𐴞𐴓𐴥𐴝𐴔𐴁𐴤𐴡𐴘 , 𐴔𐴡𐴕𐴃𐴡𐴌 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴌𐴝𐴇𐴔𐴡𐴃 𐴔𐴝𐴒𐴝𐴃 𐴀𐴝𐴐𐴧𐴞𐴓𐴝𐴔 𐴁𐴡𐴓𐴞 / 𐴇𐴝𐴓𐴞𐴔𐴝 𐴘𐴠 / 𐴁𐴞 𐴁𐴞 𐴏𐴞 𐴌𐴥𐴠 𐴈𐴡𐴘𐴧𐴠 𐴱 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴔𐴡𐴊𐴡𐴊 𐴒𐴡𐴌𐴦𐴡𐴙𐴕𐴧𐴝 𐴈𐴡𐴕𐴥𐴡 𐴃𐴡𐴕𐴎𐴞𐴔 𐴘𐴝𐴃𐴡 𐴈𐴡𐴕𐴥𐴡 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 𐴘𐴝𐴃𐴡 𐴈𐴡𐴕𐴥𐴡 𐴌𐴠𐴂𐴟𐴄𐴝𐴌 , 𐴈𐴡𐴕𐴥𐴞𐴑𐴧𐴙𐴝 𐴌𐴥𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴃𐴡 𐴕𐴡 𐴊𐴠𐴀𐴠 𐴱 𐴔𐴡𐴕𐴃𐴡𐴌 / 𐴁𐴞 𐴁𐴞 𐴏𐴞 𐴘𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴃𐴤𐴝𐴑𐴠𐴌 𐴊𐴠 𐴈𐴡𐴊𐴦𐴟𐴕 𐴌𐴞𐴉𐴟𐴎𐴞𐴌 𐴓𐴡𐴘 𐴄𐴠𐴓𐴞𐴉𐴥𐴟𐴕 𐴒𐴡𐴌𐴥𐴞 𐴈𐴥𐴡𐴁𐴡𐴌 𐴓𐴡𐴀𐴡 𐴱𐴱

𐴀𐴥𐴠 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴠𐴊𐴠 , 𐴀𐴞𐴕𐴏𐴝𐴕𐴡𐴌 𐴇𐴥𐴝𐴘𐴝𐴃𐴡𐴃 𐴓𐴝𐴒𐴠𐴊𐴠 𐴔𐴟𐴓 𐴎𐴡𐴌𐴟𐴌𐴞 𐴈𐴡𐴕𐴥𐴡 𐴏𐴞𐴏𐴢 𐴀𐴝𐴌 𐴈𐴝𐴔𐴡𐴌 𐴈𐴡𐴕𐴥𐴡 𐴔𐴡𐴖𐴑𐴝 𐴕𐴡 𐴃𐴤𐴝𐴑𐴡𐴕𐴠 , 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 𐴒𐴟𐴐𐴧𐴤𐴝 𐴀𐴝𐴌 𐴕𐴝𐴌𐴝𐴎𐴞 𐴁𐴝𐴌𐴦𐴠𐴌 𐴱 𐴀𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴀𐴝𐴕𐴊𐴤𐴝𐴙𐴅𐴧𐴙𐴝 𐴀𐴝𐴌 𐴄𐴤𐴝𐴕𐴋𐴝 𐴎𐴝𐴒𐴝 , 𐴇𐴝𐴓𐴞𐴔𐴝 𐴀𐴥𐴠𐴍𐴠 𐴎𐴝𐴘 𐴁𐴦𐴝𐴊𐴠 𐴎𐴝𐴕𐴞 𐴉𐴝𐴙𐴓𐴧𐴡𐴊𐴠 , 𐴀𐴠𐴍𐴥𐴠 𐴈𐴡𐴕𐴥𐴡 𐴋𐴝𐴑𐴄𐴡𐴌 𐴀𐴝𐴌 𐴕𐴦𐴝𐴏𐴢 𐴉𐴝𐴀𐴝 𐴕𐴡 𐴎𐴝𐴘𐴁𐴤𐴡 𐴱 𐴀𐴝𐴣𐴀𐴝𐴌 𐴃𐴟 𐴁𐴞𐴘𐴡𐴓𐴞𐴌 𐴃𐴡𐴅𐴌𐴡𐴁𐴝 𐴀𐴝𐴒𐴠 𐴓𐴥𐴡𐴃𐴞 𐴀𐴝𐴏𐴠 , 𐴔𐴡𐴕𐴃𐴡𐴌 𐴀𐴠𐴁𐴝𐴌𐴡𐴃 𐴎𐴠 𐴊𐴟𐴑 𐴀𐴦𐴝𐴛 𐴉𐴝𐴘𐴧𐴞 𐴈𐴡𐴕𐴥𐴡 𐴑𐴞𐴘𐴥𐴡𐴌𐴠 𐴁𐴟𐴎𐴤𐴝𐴘 𐴕𐴡 𐴉𐴝𐴌𐴞𐴌 𐴱 𐴁𐴠𐴐𐴤𐴞 𐴊𐴟𐴑 𐴉𐴝𐴙𐴌 𐴊𐴠 𐴊𐴠𐴑𐴤𐴞 𐴀𐴝𐴣𐴀𐴝𐴌 𐴈𐴥𐴡𐴐𐴡𐴔 𐴀𐴠𐴕𐴝𐴘𐴡𐴃𐴠 , 𐴀𐴡𐴙𐴕𐴧𐴡 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 , 𐴉𐴟𐴖𐴝 𐴊𐴤𐴡𐴌𐴞𐴁𐴝𐴌 𐴑𐴠𐴙𐴏𐴧𐴟 𐴃𐴡𐴅𐴌𐴡𐴁𐴝 𐴀𐴝𐴏𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴘𐴝𐴙𐴕 𐴃𐴟𐴖𐴝𐴘𐴁𐴤𐴡𐴓𐴧𐴝 𐴊𐴦𐴟𐴣𐴌 𐴊𐴞𐴘𐴠 𐴱 𐴀𐴠 𐴊𐴟𐴑𐴧𐴤𐴡𐴌 𐴁𐴦𐴝𐴊𐴠 𐴇𐴝𐴓𐴞𐴔𐴝𐴌 𐴃𐴟 𐴀𐴟𐴒𐴧𐴤𐴗𐴝 𐴎𐴤𐴠𐴌 𐴉𐴟𐴖𐴝 𐴀𐴥𐴡𐴘𐴧𐴠 𐴎𐴞𐴁𐴤𐴝𐴌 𐴕𐴝𐴔 𐴉𐴝𐴃𐴠𐴔𐴥𐴝 𐴌𐴝𐴙𐴑𐴧𐴤𐴙𐴠 , 𐴀𐴝𐴌 𐴉𐴝𐴃𐴠𐴔𐴥𐴝 𐴘𐴠 𐴈𐴡𐴘𐴧𐴠𐴊𐴠 , 𐴀𐴦𐴝𐴛 𐴁𐴟𐴎𐴤𐴞 𐴉𐴝𐴙𐴅𐴧𐴤𐴞 𐴀𐴝𐴓𐴧𐴝𐴇𐴢 𐴀𐴝𐴣𐴀𐴝𐴌 𐴉𐴥𐴟𐴣𐴖𐴝𐴣𐴃𐴞 𐴀𐴝𐴏𐴠 𐴱𐴱

Sources : BBC Arabic