𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝 𐴎𐴞𐴁𐴤𐴝𐴘𐴠 𐴑𐴦𐴟𐴣𐴙𐴌 𐴉𐴥𐴠𐴓𐴝𐴘 𐴕𐴡 𐴎𐴝𐴀𐴝𐴌 𐴱𐴱

𐴊𐴡𐴐𐴢 𐴁𐴡𐴏𐴥𐴡𐴙𐴅𐴧𐴙𐴝 𐴏𐴟𐴇𐴝𐴙𐴓𐴢 𐴀𐴝𐴌 𐴀𐴥𐴞𐴃𐴝𐴌 𐴒𐴤𐴡𐴌𐴒𐴟𐴐𐴧𐴞𐴌 𐴎𐴟𐴑𐴃𐴞 𐴀𐴝𐴌 𐴃𐴡𐴌𐴑𐴡 𐴉𐴥𐴟𐴕𐴞𐴘𐴡𐴌𐴠, 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴠 , 𐴏𐴟𐴇𐴝𐴙𐴓𐴡𐴌𐴠 𐴀𐴥𐴞𐴃𐴝𐴌 𐴑𐴦𐴟𐴣𐴙𐴌𐴡𐴌𐴥𐴠 𐴘𐴥𐴡 𐴉𐴥𐴟𐴣𐴖𐴝𐴣𐴃𐴞 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴕𐴞 𐴁𐴡𐴓𐴧𐴝 𐴀𐴠𐴅𐴝𐴎𐴡𐴃 𐴊𐴞𐴘𐴠 𐴱 𐴊𐴡𐴐𐴢 𐴁𐴡𐴏𐴥𐴡𐴙𐴅𐴧𐴙𐴝 𐴏𐴟𐴇𐴝𐴙𐴓𐴢 : 𐴑𐴡𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴃𐴟 , 𐴔𐴡𐴚𐴒𐴡𐴓 𐴁𐴝𐴌𐴠 𐴕𐴟𐴖𐴝𐴈𐴥𐴝𐴓𐴞𐴌 𐴀𐴠𐴓𐴝𐴑𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴘𐴧𐴠𐴌 𐴊𐴠 𐴉𐴟𐴖𐴝 , 𐴀𐴥𐴞𐴃𐴠 𐴎𐴟𐴑𐴃𐴞 𐴀𐴝𐴌 𐴊𐴡𐴓𐴞𐴓𐴢 𐴓𐴡𐴘 𐴉𐴡𐴌𐴔𐴝𐴕 𐴒𐴡𐴌𐴥𐴞 𐴊𐴞𐴓𐴡𐴊𐴠 , 𐴑𐴦𐴟𐴣𐴙𐴌 𐴀𐴞𐴕𐴏𐴝𐴕𐴡𐴌 𐴁𐴠𐴐𐴤𐴞 𐴁𐴤𐴝𐴓𐴝 𐴊𐴟𐴏𐴃𐴡 𐴱 𐴉𐴟𐴖𐴝 𐴀𐴥𐴞𐴁𐴝 : 𐴀𐴥𐴞𐴃𐴝𐴌 𐴉𐴝𐴓𐴧𐴗𐴝 𐴑𐴦𐴟𐴣𐴙𐴌 𐴉𐴥𐴟𐴣𐴖𐴝𐴣𐴌𐴠 𐴓𐴡𐴘 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴁𐴡𐴓𐴧𐴝 𐴎𐴦𐴝𐴣𐴏𐴡𐴃 𐴀𐴟𐴍𐴥𐴠𐴌 𐴒𐴤𐴡𐴘𐴊𐴠 𐴊𐴠𐴑𐴤𐴝 𐴒𐴞𐴘𐴠 𐴁𐴡𐴓𐴞 𐴔𐴞𐴋𐴞𐴘𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴠 𐴱 𐴑𐴟𐴃𐴤𐴟𐴉𐴝𐴓𐴡𐴚 𐴑𐴠𐴀𐴠𐴔𐴡𐴃 𐴃𐴤𐴝𐴑𐴞𐴃𐴠 , 𐴏𐴟𐴇𐴝𐴙𐴓𐴠 𐴁𐴠𐴐𐴤𐴞 𐴎𐴡𐴃𐴧𐴡𐴕 𐴒𐴡𐴌𐴥𐴞 𐴑𐴦𐴟𐴣𐴙𐴌 𐴀𐴥𐴞𐴁𐴝 𐴉𐴝𐴙𐴓𐴧𐴙𐴠 𐴱𐴱

𐴁𐴝𐴑𐴞 𐴀𐴥𐴡𐴘𐴝𐴃 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴈𐴝𐴍𐴝𐴘𐴁𐴤𐴝𐴌 𐴕𐴞𐴘𐴡𐴃𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴀𐴥𐴞𐴃𐴝𐴌 𐴑𐴠𐴣𐴐𐴧𐴤𐴙𐴝 𐴊𐴟𐴏𐴃𐴡 𐴑𐴦𐴟𐴣𐴙𐴌 𐴀𐴥𐴞𐴁𐴝 𐴉𐴥𐴠𐴓𐴝𐴘 𐴎𐴝𐴘 𐴕𐴡 𐴉𐴝𐴌𐴠𐴌 𐴱 𐴔𐴞𐴋𐴞𐴘𐴝 𐴘𐴠 𐴉𐴟𐴏𐴥𐴝𐴌 𐴒𐴡𐴙𐴅𐴧𐴙𐴠 𐴊𐴠 𐴀𐴡𐴑𐴃𐴡𐴃 𐴏𐴟𐴇𐴝𐴙𐴓𐴠 𐴈𐴡𐴘𐴧𐴠𐴊𐴠 , 𐴀𐴠𐴕𐴋𐴞𐴓𐴧𐴝 𐴔𐴡𐴐𐴑𐴞𐴓 𐴀𐴝𐴌 𐴊𐴟𐴙𐴑𐴧𐴤𐴙𐴝 𐴏𐴡𐴉𐴡𐴌 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 𐴀𐴦𐴝𐴛 ( 𐴔𐴟𐴄𐴞 ) 𐴌𐴠 𐴉𐴥𐴟𐴣𐴖𐴝𐴣𐴃𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘𐴧𐴔 𐴁𐴡𐴘 𐴱 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴁𐴡𐴓𐴧𐴝 𐴎𐴦𐴝𐴣𐴏𐴡𐴃 𐴀𐴟𐴍𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴎𐴠𐴈𐴥𐴡𐴕 𐴏𐴟𐴇𐴝𐴙𐴓𐴡𐴌𐴠 𐴑𐴦𐴟𐴣𐴙𐴌 𐴃𐴟𐴙𐴓𐴃𐴡 𐴕𐴡 𐴊𐴠𐴀𐴠𐴌 , 𐴃𐴡𐴀𐴡𐴘 𐴏𐴟𐴇𐴝𐴙𐴓𐴢 𐴀𐴝𐴌 𐴀𐴥𐴞𐴃𐴝𐴌 𐴁𐴝𐴉𐴠 , 𐴎𐴠𐴈𐴥𐴡𐴕 𐴎𐴟𐴑𐴃𐴞 𐴀𐴝𐴌 𐴊𐴡𐴓𐴞𐴓 𐴓𐴡𐴘 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴁𐴟𐴎𐴤𐴝𐴘 𐴊𐴞𐴓𐴥𐴡 , 𐴃𐴡𐴀𐴡𐴘 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴠 𐴏𐴟𐴇𐴝𐴙𐴓𐴡𐴌𐴠 𐴀𐴥𐴞𐴃𐴝𐴌 𐴑𐴦𐴟𐴣𐴙𐴌 𐴃𐴟𐴓𐴞𐴁𐴡𐴓𐴧𐴝 𐴀𐴠𐴅𐴝𐴎𐴡𐴃 𐴊𐴞𐴓𐴥𐴡 𐴱 𐴏𐴝𐴙𐴌𐴀𐴡𐴔 𐴑𐴤𐴠𐴉𐴡𐴌 𐴊𐴡𐴘𐴀𐴡𐴔 𐴊𐴞𐴕𐴡𐴃 𐴹 𐴰 𐴰 𐴱 𐴎𐴡𐴕𐴡𐴌 𐴃𐴟𐴁𐴝𐴌𐴥𐴡 𐴁𐴦𐴠𐴐𐴢 𐴌𐴟𐴇𐴝𐴙𐴕𐴒𐴙𐴝 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴡𐴣𐴀𐴡𐴏𐴧𐴙𐴠 𐴱𐴱

Sources : Dhaka Tribune