𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴃 𐴔𐴡𐴐𐴟𐴖𐴝𐴌𐴝 𐴱𐴱

𐴅𐴝𐴕𐴖𐴝𐴌𐴞 𐴔𐴥𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴌 𐴃𐴟 𐴓𐴡𐴃𐴞 𐴹 𐴲 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴏𐴡𐴓𐴠𐴌 𐴊𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴔𐴞𐴔𐴁𐴤𐴡𐴌 𐴊𐴠𐴐𐴢𐴀𐴥𐴡𐴑𐴧𐴡𐴓𐴡𐴌 𐴷 𐴳 𐴀𐴡𐴔 𐴔𐴞𐴄𐴤𐴞𐴚𐴡𐴃,𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴁𐴝𐴁𐴡𐴁𐴡𐴃𐴠 𐴊𐴟𐴀𐴝𐴌𐴝 𐴏𐴝𐴀𐴝 𐴀𐴝𐴌 𐴉𐴥𐴟𐴕𐴝 𐴉𐴥𐴟𐴕𐴞 𐴀𐴥𐴡𐴘𐴧𐴠𐴊𐴠 𐴀𐴥𐴠𐴍𐴠 𐴁𐴡𐴌𐴔𐴥𐴝𐴌 𐴇𐴝𐴓𐴡𐴃𐴡𐴌 𐴖𐴡𐴌𐴠 𐴴 𐴲 𐴃𐴝𐴌𐴥𐴞𐴑𐴡𐴌 𐴊𐴞𐴕 𐴔𐴡𐴐𐴟𐴖𐴝𐴌𐴝 𐴏𐴡𐴙𐴓𐴧𐴙𐴠 𐴱 𐴀𐴥𐴠 𐴔𐴞𐴄𐴤𐴞𐴚𐴡𐴃 , 𐴁𐴡𐴌𐴔𐴥𐴝𐴃 𐴀𐴞𐴕𐴏𐴝𐴕𐴞 𐴇𐴥𐴑𐴧𐴡𐴌 𐴇𐴝𐴓𐴡𐴃 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴁𐴤𐴝𐴓𐴝 𐴖𐴥𐴝𐴉𐴡𐴌𐴞𐴁𐴤𐴡 𐴁𐴡𐴓𐴞 , 𐴊𐴠𐴐𐴁𐴞𐴊𐴠𐴐𐴤𐴠 𐴈𐴡𐴘𐴧𐴠 𐴱 𐴃𐴦𐴡𐴘 𐴁𐴡𐴌𐴔𐴥𐴝𐴌 𐴃𐴡𐴌𐴉𐴡𐴌 𐴃𐴟 𐴇𐴝𐴎𐴠𐴌 𐴀𐴥𐴡𐴘𐴧𐴊𐴠 𐴕𐴡𐴔𐴝𐴙𐴕𐴊𐴝 , 𐴁𐴡𐴌𐴔𐴥𐴝𐴌 𐴁𐴡𐴌𐴡 𐴀𐴟𐴑𐴞𐴓 / 𐴀𐴥𐴟 𐴄𐴤𐴗𐴥𐴠𐴚 𐴄𐴤𐴗𐴥𐴠𐴚𐴠 𐴈𐴡𐴘𐴧𐴠𐴊𐴠 ‘ 𐴁𐴡𐴌𐴔𐴥𐴝𐴃 𐴀𐴥𐴡𐴑𐴧𐴡𐴓 𐴏𐴞𐴏𐴢 𐴓𐴝𐴒𐴝𐴃𐴝𐴌 𐴃𐴡𐴌𐴑𐴞 𐴀𐴥𐴡𐴘 𐴀𐴝𐴘𐴧𐴡𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴀𐴝𐴌 𐴁𐴟𐴕𐴘𐴝𐴊𐴞 𐴀𐴝𐴎𐴝𐴊𐴞𐴌 𐴇𐴥𐴡𐴑 𐴀𐴥𐴡 𐴃𐴡𐴌𐴑𐴞 𐴀𐴥𐴡𐴘 𐴀𐴝𐴘𐴧𐴠𐴌 𐴱 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴀𐴥𐴡𐴘𐴧𐴠𐴊𐴠 𐴀𐴥𐴞𐴕𐴡𐴌 𐴁𐴝𐴁𐴡𐴃𐴠 𐴇𐴥𐴡𐴑𐴟𐴔𐴡𐴃𐴠 𐴃𐴡𐴊𐴝𐴌𐴟𐴑 𐴒𐴡𐴌𐴠𐴌 𐴱𐴱

𐴊𐴠𐴐𐴁𐴞𐴊𐴠𐴐𐴤𐴡𐴌 𐴖𐴝𐴊𐴝 𐴄𐴤𐴞𐴑 𐴁𐴤𐴝𐴉𐴠 𐴉𐴝𐴓𐴡𐴕 𐴒𐴡𐴌𐴞𐴁𐴡𐴓𐴧𐴝 𐴄𐴝𐴙𐴔 𐴓𐴝𐴒𐴞𐴁𐴤𐴡 𐴱 𐴕𐴞𐴉𐴡𐴌𐴡𐴃𐴞 𐴈𐴡𐴃𐴤𐴝 𐴈𐴡𐴀𐴡𐴕 𐴀𐴝𐴌 𐴊𐴤𐴡𐴌𐴔𐴡 𐴌𐴥𐴠 𐴏𐴞𐴘𐴝𐴏𐴡𐴃 𐴓𐴡𐴘 𐴔𐴞𐴓𐴝𐴘 𐴀𐴠𐴏𐴃𐴠𐴔𐴝𐴓 𐴒𐴡𐴌𐴦𐴡𐴕 , 𐴁𐴠𐴒𐴧𐴞𐴕𐴡𐴌𐴠 𐴈𐴦𐴝𐴏𐴢 𐴒𐴡𐴌𐴥𐴞 𐴊𐴤𐴞𐴘𐴝𐴕 𐴊𐴞𐴀𐴞 𐴔𐴝𐴕𐴥𐴝 𐴒𐴡𐴌𐴥𐴝 𐴀𐴝𐴌 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴝 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 𐴱 𐴒𐴡𐴃𐴡 𐴉𐴝𐴣𐴏𐴢 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴠 , 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴋𐴞𐴔𐴟𐴑𐴠𐴌𐴠𐴏𐴞 𐴇𐴥𐴡𐴑 𐴀𐴝𐴌 𐴁𐴟𐴕𐴘𐴝𐴊𐴞 𐴀𐴝𐴎𐴝𐴊𐴞𐴌 𐴇𐴥𐴡𐴑 , 𐴀𐴠𐴀𐴥𐴠𐴕 𐴉𐴝𐴀𐴝 𐴉𐴝𐴘𐴧𐴠𐴊𐴠 𐴎𐴞𐴀𐴥𐴞𐴕 𐴁𐴡𐴌𐴔𐴥𐴝𐴃 𐴈𐴡𐴕𐴥𐴡 𐴀𐴡𐴑𐴃𐴠 𐴕𐴥𐴡𐴀𐴡 𐴉𐴝𐴀𐴝 𐴁𐴡𐴓𐴞 𐴘𐴥𐴡 / 𐴀𐴥𐴟 𐴄𐴤𐴗𐴥𐴠𐴚 𐴄𐴤𐴙𐴗𐴥𐴠𐴚𐴠 𐴈𐴡𐴘𐴧𐴠 𐴱 𐴓𐴡𐴕𐴋𐴤𐴡𐴕𐴡𐴃 𐴃𐴤𐴝𐴑𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔𐴡𐴌 𐴀𐴥𐴟𐴑𐴧𐴝𐴄𐴝 / 𐴀𐴥𐴟 𐴄𐴤𐴟𐴚 𐴑𐴞𐴚𐴠 𐴈𐴡𐴘𐴧𐴠𐴊𐴠 ‘ 𐴁𐴡𐴌𐴔𐴥𐴝 𐴘𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌𐴥𐴠 𐴀𐴥𐴞𐴃𐴝𐴌𐴝𐴌 𐴕𐴡𐴏𐴥𐴡𐴓𐴞 𐴕𐴝𐴔 𐴌𐴟𐴇𐴝𐴙𐴚𐴒𐴙𐴝 𐴈𐴡𐴘 𐴔𐴝𐴕𐴞 𐴕𐴥𐴡𐴀𐴡 𐴓𐴡𐴀𐴡 , 𐴏𐴟𐴌𐴒𐴡𐴌𐴥𐴞 𐴒𐴤𐴡𐴙𐴓𐴧𐴙𐴠 𐴊𐴠 𐴁𐴝𐴚𐴒𐴝𐴓𐴞 𐴁𐴡𐴓𐴞 𐴈𐴡𐴀𐴡𐴌 , 𐴎𐴞𐴘𐴝𐴕𐴡𐴌𐴠 𐴀𐴝𐴣𐴀𐴝𐴌𐴝 𐴈𐴡𐴕𐴥𐴡 𐴀𐴡𐴑𐴃𐴠 𐴕𐴡 𐴔𐴝𐴕𐴞𐴘𐴥𐴟𐴔 𐴱𐴱

𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴝𐴌𐴥𐴝 𐴌𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴕𐴞 𐴓𐴟𐴖𐴝 𐴉𐴡𐴌𐴞𐴁𐴤𐴡 , 𐴁𐴝𐴊𐴠 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘𐴧𐴠 𐴊𐴠 𐴊𐴠𐴐𐴤𐴡𐴙𐴃𐴧𐴝 𐴃𐴝 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴇𐴥𐴡𐴑 𐴁𐴠𐴒𐴧𐴞𐴕 𐴖𐴝𐴉𐴠𐴏𐴢 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴀𐴡𐴉𐴡𐴌𐴥𐴝𐴊𐴢 𐴀𐴥𐴟𐴖𐴝𐴃 𐴀𐴝𐴏𐴥𐴠 , 𐴀𐴝𐴘 𐴏𐴞 𐴅𐴠𐴃 𐴏𐴡𐴓𐴠𐴌 𐴊𐴠 𐴔𐴦𐴝𐴔𐴠𐴓𐴝 𐴌𐴥𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴔𐴞𐴔𐴁𐴤𐴡𐴌 𐴊𐴠𐴐𐴢 𐴁𐴠𐴒𐴧𐴞𐴕𐴡𐴃𐴧𐴟 𐴃𐴝𐴙𐴊𐴢 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 , 𐴅𐴝𐴌𐴔𐴥𐴡𐴕 , 𐴕𐴠𐴊𐴝𐴓𐴥𐴠𐴕 , 𐴀𐴝𐴔𐴠𐴌𐴞𐴑𐴝 , 𐴘𐴟 𐴑𐴠 𐴐𐴤𐴡𐴣𐴀𐴡 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴊𐴠𐴐𐴢 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴕𐴞𐴓𐴡𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴡𐴌𐴔𐴥𐴝 𐴘𐴠 𐴘𐴥𐴡 𐴔𐴝𐴕𐴞 𐴓𐴡𐴘𐴁𐴡𐴓𐴧𐴝 𐴏𐴞𐴁𐴢 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴄𐴤𐴟𐴚 𐴑𐴞𐴚𐴠 𐴈𐴡𐴘𐴧𐴠 𐴱𐴱

𐴁𐴝𐴊𐴠 𐴑𐴟𐴉𐴞 𐴀𐴝𐴕𐴝𐴕 𐴑𐴡𐴔𐴞𐴐𐴤𐴠𐴕𐴡𐴌 𐴁𐴟𐴊𐴧𐴤𐴞 𐴊𐴡𐴙𐴕𐴧𐴝 𐴉𐴝𐴄𐴞𐴌 𐴔𐴞𐴔𐴁𐴤𐴡𐴌 𐴇𐴝𐴅𐴞 / 𐴀𐴥𐴟 𐴀𐴥𐴠 𐴓𐴗𐴝𐴚𐴠 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴠 𐴀𐴥𐴞𐴀𐴞𐴕 𐴀𐴝𐴔𐴡𐴓𐴥𐴞 𐴃𐴡𐴗𐴌𐴠 𐴒𐴡𐴌𐴥𐴞 𐴎𐴝𐴘𐴁𐴡𐴓𐴧𐴝 𐴇𐴥𐴡𐴑𐴟𐴔𐴡𐴃𐴡 𐴌𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴙𐴠 , 𐴀𐴝𐴣𐴀𐴝𐴌𐴝𐴌 𐴃𐴟 𐴉𐴟𐴌𐴝𐴉𐴟𐴌𐴞 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴕𐴡 𐴃𐴤𐴝𐴑𐴞𐴓𐴠 𐴘𐴥𐴡 , 𐴎𐴡𐴊𐴞 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴠 𐴁𐴡𐴌𐴔𐴥𐴝𐴃 𐴀𐴞𐴏𐴝𐴕𐴞 𐴇𐴥𐴡𐴑 𐴔𐴝𐴍𐴝 𐴊𐴠 𐴘𐴥𐴝𐴕𐴡𐴌𐴠 𐴁𐴤𐴝𐴉𐴞𐴃𐴦𐴡 , 𐴀𐴝𐴣𐴀𐴝𐴌𐴝 𐴊𐴟𐴕𐴞𐴘𐴝𐴙𐴌 𐴐𐴤𐴝𐴙𐴑𐴧𐴙𐴝𐴃 𐴀𐴠𐴕𐴋𐴞𐴓𐴧𐴝 𐴕𐴡 𐴀𐴥𐴡𐴘𐴃𐴝𐴔 , 𐴊𐴟𐴕𐴞𐴘𐴝𐴙𐴃 𐴑𐴞 𐴀𐴥𐴡𐴀𐴡𐴌 𐴔𐴝𐴕𐴐𐴤𐴙𐴠 𐴎𐴝𐴕𐴠 , 𐴐𐴟𐴊𐴤𐴠 𐴒𐴝𐴓𐴠 𐴈𐴡𐴘𐴓𐴠 𐴕𐴡 𐴀𐴥𐴡𐴀𐴡 , 𐴎𐴡𐴊𐴞 𐴀𐴝𐴣𐴀𐴝𐴌𐴝 𐴉𐴥𐴡𐴓 𐴉𐴝𐴀𐴝 𐴔𐴡𐴃𐴡 𐴑𐴠𐴙𐴏𐴧𐴟 𐴒𐴡𐴙𐴃𐴧𐴤𐴝𐴔 , 𐴃𐴦𐴡𐴘 𐴓𐴠 𐴀𐴝𐴣𐴀𐴝𐴌𐴝 𐴈𐴝𐴔 𐴀𐴥𐴡𐴉𐴦𐴝𐴕 𐴔𐴟𐴑𐴤𐴠 𐴀𐴞𐴕𐴑𐴝𐴌 𐴒𐴡𐴌𐴥𐴞 𐴉𐴝𐴙𐴃𐴧𐴝𐴔 𐴁𐴡𐴓𐴞 / 𐴇𐴝𐴅𐴞 𐴀𐴥𐴟 𐴀𐴥𐴠 𐴓𐴗𐴝𐴚𐴠 𐴈𐴡𐴘𐴧𐴠 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌 𐴔𐴞𐴄𐴤𐴞𐴚𐴡𐴃 , 𐴆𐴞𐴕𐴝𐴌 𐴕𐴡𐴔𐴝𐴙𐴕𐴊𐴝 𐴘𐴠 𐴎𐴞𐴀𐴞𐴕 𐴈𐴡𐴘𐴧𐴠 𐴁𐴠𐴒𐴧𐴤𐴞𐴕 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴃𐴝𐴙𐴊𐴡𐴃 𐴔𐴝𐴎𐴤𐴠 𐴈𐴡𐴘𐴧𐴠 𐴱𐴱

Sources : RFA Burmese