𐴀𐴝𐴌𐴑𐴝𐴕𐴡𐴃 𐴑𐴡𐴗𐴔 𐴁𐴠𐴒𐴧𐴟𐴕 𐴔𐴞𐴓𐴞 𐴎𐴤𐴟𐴓𐴞 𐴃𐴤𐴝𐴑𐴞 𐴁𐴡𐴓𐴧𐴝 𐴑𐴞𐴘𐴥𐴡𐴌 𐴊𐴡𐴌𐴈𐴝𐴌 𐴀𐴥𐴡𐴘𐴁𐴡𐴊𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 , 𐴔𐴟𐴏𐴥𐴡𐴓𐴔𐴝𐴕 𐴀𐴝𐴌 𐴀𐴡𐴙𐴕𐴧𐴡 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴁𐴠𐴒𐴧𐴟𐴕 𐴔𐴞𐴓𐴞 𐴎𐴤𐴟𐴓𐴞 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴀𐴝𐴘𐴧𐴠𐴌 𐴊𐴠 𐴀𐴥𐴠𐴍𐴠 , 𐴲 𐴱 𐴰 𐴲 𐴐𐴤𐴡𐴕𐴡𐴃 𐴀𐴝𐴃𐴤𐴞𐴑𐴧𐴙𐴝 𐴀𐴡𐴐𐴤𐴝𐴕𐴃𐴞 𐴐𐴤𐴟𐴌𐴟 𐴀𐴥𐴡𐴘 𐴁𐴝𐴊𐴠,𐴀𐴠𐴑 𐴔𐴡𐴓𐴞𐴘𐴟𐴕 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴁𐴡𐴊𐴧𐴝𐴐 𐴒𐴡𐴌𐴥𐴞 𐴕𐴡𐴉𐴝𐴌𐴞,𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘 𐴎𐴝𐴒𐴤𐴡𐴘 𐴉𐴡𐴙𐴅𐴧𐴙𐴠 ,𐴁𐴝𐴚𐴓𐴝𐴊𐴠𐴐𐴤𐴡𐴃 𐴕𐴡𐴎𐴝𐴘 𐴀𐴝𐴌𐴑𐴝𐴕𐴡𐴃 𐴃𐴤𐴝𐴑𐴞 𐴒𐴞𐴘𐴡𐴘𐴊𐴠 𐴔𐴟𐴏𐴥𐴡𐴓𐴔𐴝𐴕 𐴀𐴥𐴟𐴕𐴡𐴌𐴠 𐴓𐴡𐴌𐴝𐴏𐴡𐴌𐴝 𐴒𐴡𐴙𐴃𐴧𐴡 𐴕𐴡 𐴊𐴤𐴞 𐴑𐴠𐴀𐴠𐴔𐴡𐴃 𐴁𐴝𐴣𐴊𐴤𐴞 𐴌𐴝𐴙𐴑𐴧𐴙𐴠 𐴊𐴠 𐴁𐴡𐴀𐴡𐴃 𐴁𐴡𐴏𐴥𐴡𐴌 𐴀𐴥𐴡𐴘𐴧𐴠 𐴱 𐴀𐴠 𐴔𐴦𐴝𐴔𐴠𐴓𐴝𐴌 𐴀𐴟𐴉𐴥𐴝𐴘 𐴕𐴠𐴓𐴝𐴘 𐴁𐴡𐴓𐴧𐴝 , 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴁𐴦𐴝𐴌𐴠 𐴏𐴡𐴓𐴠𐴌 𐴊𐴠 𐴑𐴟𐴐𐴤𐴞𐴐𐴢 𐴀𐴥𐴞𐴀𐴞𐴕 𐴓𐴡𐴘 𐴀𐴟𐴉𐴥𐴝𐴘 𐴕𐴠𐴓𐴝𐴀𐴡𐴕𐴡𐴃 𐴑𐴝𐴔𐴞𐴘𐴝𐴁 𐴕𐴦𐴡 𐴀𐴥𐴡𐴱𐴱

𐴔𐴡𐴒𐴤𐴡𐴌 𐴎𐴝𐴃𐴞𐴘𐴡 𐴉𐴝𐴄𐴞𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴔𐴁𐴡𐴌 / 𐴀𐴥𐴟 𐴂𐴠 𐴏𐴥𐴠𐴚𐴡𐴌 𐴑𐴤𐴞𐴘𐴝𐴓 𐴏𐴡𐴀𐴡 , 𐴀𐴝𐴌𐴑𐴝𐴕𐴡𐴌 𐴀𐴡𐴐𐴤𐴝𐴕𐴃𐴞𐴌 𐴔𐴟𐴓 , 𐴊𐴤𐴡𐴌𐴔𐴡 𐴘𐴥𐴡 𐴕𐴡𐴀𐴡 , 𐴔𐴡𐴒𐴠 𐴀𐴞𐴁𐴤𐴝 𐴔𐴟𐴏𐴥𐴡𐴓𐴔𐴝𐴕 𐴁𐴡𐴓𐴞 𐴎𐴟𐴓𐴟𐴔 𐴒𐴡𐴌𐴠𐴌 𐴊𐴠 𐴘𐴥𐴡 𐴕𐴡𐴀𐴡 ,𐴀𐴠 𐴁𐴝𐴁𐴡𐴃𐴠 𐴇𐴥𐴡𐴑𐴟𐴔𐴡𐴃𐴡𐴌 𐴉𐴡𐴓𐴡𐴏𐴞 𐴒𐴟𐴓𐴔𐴟𐴓 , 𐴀𐴝𐴌𐴑𐴝𐴕𐴡𐴃 𐴀𐴥𐴞𐴃𐴝𐴌𐴝𐴌𐴠 𐴃𐴤𐴝𐴑𐴞𐴃𐴡 𐴊𐴞 𐴁𐴦𐴝𐴊𐴠 𐴘𐴥𐴡 𐴀𐴡𐴙𐴕𐴧𐴡 𐴋𐴞𐴐𐴄𐴤𐴞𐴑𐴡𐴃 𐴎𐴝𐴘𐴃𐴡 𐴕𐴡 𐴊𐴠 , 𐴏𐴞𐴘𐴝𐴏𐴞 𐴑𐴤𐴠𐴓 𐴑𐴤𐴠𐴓𐴝 ,𐴉𐴡𐴄𐴤𐴟𐴊𐴞𐴁𐴝𐴌 𐴔𐴦𐴔𐴠𐴓𐴝 , 𐴁𐴤𐴟𐴄 𐴊𐴞𐴁𐴝𐴌 𐴓𐴡𐴘𐴁𐴝𐴌 𐴔𐴦𐴔𐴠𐴓𐴝 , 𐴀𐴝𐴌𐴑𐴝𐴕𐴡𐴃 𐴀𐴥𐴞𐴃𐴝𐴌𐴝 𐴔𐴡𐴒𐴢 𐴓𐴡𐴘 𐴔𐴞𐴓𐴞 𐴎𐴤𐴟𐴓𐴞 𐴕𐴡 𐴃𐴤𐴝𐴙𐴑𐴧𐴙𐴟𐴔 𐴈𐴦𐴡𐴘 𐴔𐴡𐴕𐴐𐴤𐴝 𐴎𐴦𐴝𐴙𐴌 𐴒𐴡𐴌𐴠𐴌 𐴊𐴠 𐴘𐴥𐴝𐴕 𐴀𐴝𐴌 𐴀𐴥𐴡 𐴀𐴡𐴐𐴤𐴝𐴕𐴃𐴞𐴌 𐴈𐴡𐴃𐴤𐴝 𐴱𐴱 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕𐴡𐴌 𐴀𐴝𐴁𐴝𐴊𐴞 𐴀𐴥𐴡𐴊𐴡𐴌 𐴁𐴦𐴝𐴌𐴠 𐴁𐴝𐴌𐴥𐴠𐴌 𐴊𐴠 𐴘𐴥𐴝𐴕𐴡𐴃 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴃 𐴔𐴝𐴎𐴠 𐴁𐴡𐴓𐴞 𐴘𐴥𐴡 / 𐴀𐴥𐴟 𐴂𐴠 𐴏𐴥𐴠𐴚𐴠 𐴈𐴡𐴘𐴧𐴠 𐴱𐴱 𐴀𐴝𐴣𐴀𐴝𐴌𐴝 𐴀𐴝𐴌𐴑𐴝𐴕𐴡𐴌 𐴀𐴝𐴁𐴝𐴊𐴞 𐴃𐴞𐴕 𐴔𐴡𐴓𐴞𐴘𐴟𐴕 𐴀𐴝𐴐𐴧𐴞𐴓𐴝𐴔 𐴊𐴠 𐴀𐴡𐴑𐴃𐴡𐴃 𐴀𐴥𐴞𐴃𐴝𐴌𐴝 𐴀𐴠𐴑 𐴔𐴡𐴓𐴞𐴘𐴟𐴕, 𐴀𐴝𐴐𐴧𐴞𐴓 , 𐴊𐴡𐴐𐴢 𐴑𐴟𐴌𐴞 𐴁𐴡𐴏𐴥𐴡𐴌 𐴁𐴤𐴟𐴃𐴡𐴌𐴠 𐴔𐴡𐴒𐴢 𐴀𐴝𐴁𐴝𐴊𐴞𐴌𐴠 𐴁𐴤𐴝𐴌𐴝𐴘 𐴒𐴞𐴘𐴡𐴘 , 𐴃𐴦𐴡𐴘𐴓𐴠 , 𐴁𐴦𐴝𐴊𐴠 𐴎𐴝𐴘 𐴀𐴥𐴞𐴃𐴝𐴌𐴝𐴌 𐴁𐴡𐴓 𐴁𐴝𐴌𐴥𐴞 𐴒𐴞𐴓𐴠 𐴒𐴦𐴡𐴘 𐴅𐴞𐴇𐴝𐴊 𐴐𐴤𐴟𐴌𐴟 𐴒𐴡𐴌𐴡𐴕𐴡𐴌 𐴀𐴝𐴁𐴡 𐴘𐴥𐴡 𐴀𐴝𐴏𐴠 , 𐴀𐴝𐴌𐴑𐴝𐴕𐴡𐴌 𐴔𐴟𐴓𐴥𐴝 𐴑𐴡𐴗𐴔 𐴈𐴡𐴊𐴦𐴟𐴕 𐴉𐴡𐴌𐴠 𐴎𐴝𐴘 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘𐴊𐴠 𐴘𐴥𐴝𐴕𐴡𐴌 𐴀𐴡𐴐𐴤𐴝𐴕𐴃𐴞 𐴘𐴥𐴡 𐴀𐴝𐴏𐴠 , 𐴉𐴟𐴖𐴝𐴙𐴕 𐴈𐴡𐴔 𐴁𐴞𐴘𐴝𐴘𐴁𐴤𐴝𐴌 𐴑𐴝𐴕𐴟𐴕 𐴀𐴥𐴡 𐴀𐴝𐴏𐴠 𐴔𐴡𐴕𐴃𐴡𐴌 𐴇𐴥𐴡𐴑𐴟𐴔𐴡𐴃𐴠 𐴓𐴝𐴒𐴟 𐴕𐴡 𐴒𐴡𐴌𐴠𐴌 , 𐴏𐴥𐴝𐴌𐴔𐴠 𐴎𐴝𐴘 𐴑𐴠𐴀𐴠𐴕 𐴒𐴡𐴌𐴥𐴞 𐴃𐴤𐴝𐴑𐴞 𐴉𐴝𐴙𐴅𐴧𐴙𐴟𐴔 𐴊𐴠 𐴱𐴱

𐴇𐴥𐴡𐴑𐴟𐴔𐴡𐴃𐴡𐴌 𐴉𐴡𐴓𐴡𐴏𐴞 𐴔𐴡𐴎𐴞𐴕 𐴀𐴥𐴞𐴃𐴝𐴌𐴝 𐴌𐴠 𐴊𐴠𐴐𐴤𐴡𐴙𐴃𐴧𐴝 𐴃𐴝 𐴘𐴝𐴃𐴡 𐴒𐴡𐴌𐴁𐴝 𐴊𐴠𐴐𐴤𐴡𐴙𐴃𐴧𐴝 𐴃𐴝,𐴈𐴡𐴕𐴥𐴡 𐴀𐴠𐴑𐴧𐴝𐴕 𐴈𐴥𐴝𐴄𐴞 𐴒𐴡𐴌𐴥𐴞 𐴊𐴞𐴉𐴠𐴓𐴥𐴝 𐴉𐴡𐴌𐴞𐴁𐴤𐴡 , 𐴊𐴠𐴐𐴤𐴡𐴙𐴃𐴧𐴝 𐴁𐴝𐴕𐴝𐴘𐴧𐴠 𐴊𐴠 𐴀𐴥𐴡𐴘𐴓𐴠 𐴁𐴡𐴌𐴔𐴥𐴝 𐴀𐴝𐴒𐴝 𐴒𐴟𐴌𐴝 𐴁𐴠𐴒𐴧𐴟𐴓𐴧𐴝 𐴎𐴝𐴘 𐴉𐴝𐴌𐴝 𐴉𐴡𐴌𐴞𐴁𐴤𐴡 , 𐴎𐴝𐴘𐴃𐴡 𐴕𐴡𐴊𐴞 𐴀𐴝𐴌𐴑𐴝𐴕𐴡𐴃 𐴁𐴝𐴣𐴊𐴞 𐴌𐴝𐴑𐴤𐴞𐴓𐴠 𐴔𐴡𐴒𐴢 𐴓𐴡𐴘 𐴔𐴟𐴑𐴝𐴁𐴞𐴓𐴝 𐴒𐴡𐴌𐴥𐴝𐴘 𐴊𐴠𐴉𐴝𐴀𐴝𐴕 𐴀𐴥𐴡𐴘𐴁𐴡 , 𐴔𐴟𐴏𐴥𐴡𐴓𐴔𐴝𐴕𐴡𐴌 𐴓𐴞𐴋𐴝𐴌 𐴀𐴝𐴌 𐴔𐴡𐴒𐴤𐴡𐴌 𐴓𐴞𐴋𐴝𐴌 𐴔𐴞𐴓𐴞 , 𐴀𐴠𐴑 𐴎𐴡𐴕𐴡𐴕𐴡𐴌 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴀𐴠𐴑 𐴎𐴡𐴕𐴠 𐴁𐴟𐴎𐴤𐴞 𐴘𐴡𐴌𐴠 𐴀𐴠𐴃𐴧𐴠𐴉𐴝𐴑𐴡𐴌 𐴏𐴥𐴝𐴣𐴀𐴝𐴃𐴠 𐴏𐴡𐴓𐴞𐴓𐴠 , 𐴈𐴡𐴙𐴅𐴧𐴙𐴝 𐴏𐴥𐴝𐴌𐴝 𐴐𐴤𐴝𐴕𐴃𐴞𐴘𐴠 𐴃𐴤𐴝𐴑𐴞 𐴉𐴝𐴌𐴞𐴁𐴤𐴡 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴝𐴌 𐴀𐴡𐴙𐴕𐴧𐴡 𐴊𐴠𐴐𐴤𐴡𐴙𐴃𐴧𐴝 𐴑𐴡𐴗𐴔 , 𐴀𐴝𐴉𐴡𐴏𐴥𐴡𐴃 𐴁𐴤𐴝𐴘 𐴁𐴤𐴝𐴘 𐴁𐴡𐴕𐴞 𐴁𐴠𐴐𐴤𐴝 𐴁𐴠𐴐𐴤𐴞 𐴁𐴡𐴏𐴥𐴡𐴌 𐴀𐴝𐴌𐴑𐴝𐴕𐴡𐴃 𐴃𐴤𐴝𐴑𐴞 𐴀𐴝𐴘𐴧𐴠𐴌 𐴊𐴠 , 𐴀𐴥𐴠𐴃𐴡𐴓𐴧𐴝 𐴀𐴥𐴡𐴘𐴧𐴠𐴊𐴠 𐴏𐴥𐴡𐴚𐴑𐴡𐴄𐴡 𐴌𐴠 𐴔𐴞𐴔𐴡𐴚𐴐𐴤𐴝 𐴒𐴡𐴌𐴥𐴞 𐴀𐴝𐴒𐴡𐴌 𐴋𐴦𐴡𐴙𐴓𐴧𐴝 𐴃𐴤𐴝𐴑𐴞 𐴉𐴝𐴌𐴞𐴁𐴤𐴡 𐴁𐴡𐴓𐴞 , 𐴓𐴡𐴕𐴋𐴤𐴡𐴕𐴡𐴃 𐴃𐴤𐴝𐴑𐴠𐴊𐴠 𐴁𐴡𐴌𐴥𐴡𐴑 𐴃𐴡𐴕𐴎𐴞𐴔𐴡𐴌 𐴀𐴥𐴟𐴑𐴧𐴝𐴄𐴝 / 𐴄𐴤𐴟𐴚𐴑𐴠𐴚𐴠 𐴈𐴡𐴘𐴧𐴠 𐴱𐴱

Sources : RFA Burmese