𐴁𐴡𐴌𐴔𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴦𐴟𐴕 𐴖𐴝𐴉𐴠𐴏𐴢 𐴀𐴝𐴌𐴑𐴝𐴕𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱𐴱

𐴁𐴡𐴏𐴥𐴝𐴘 ( 𐴂𐴡𐴏𐴧𐴞𐴕 ) 𐴇𐴥𐴡𐴑𐴟𐴔𐴡𐴃𐴠 , 𐴀𐴠𐴌𐴝𐴖𐴡𐴋𐴧𐴞 𐴀𐴠𐴓𐴝𐴑𐴝𐴌 𐴆𐴡𐴚𐴄𐴝 𐴊𐴡𐴙𐴅𐴧𐴙𐴝𐴌 𐴏𐴡𐴌𐴡𐴌 𐴈𐴝𐴣𐴏𐴥𐴡𐴌 𐴃𐴟 , 𐴏𐴡𐴉𐴥𐴡𐴌 𐴒𐴡𐴌𐴞𐴁𐴤𐴝𐴌 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴓𐴦𐴡𐴃 𐴉𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴇𐴥𐴝𐴣𐴃 𐴎𐴡𐴕𐴡𐴌𐴠 , 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴌 𐴌𐴝𐴎𐴊𐴤𐴝𐴕𐴞 𐴀𐴝𐴙𐴑𐴧𐴙𐴝𐴁𐴡𐴃 𐴖𐴝𐴉𐴠𐴏𐴢 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱 𐴉𐴝𐴣𐴏𐴢 𐴎𐴡𐴕 𐴁𐴠𐴍𐴦𐴝𐴙𐴕 𐴀𐴝𐴌 𐴊𐴟𐴘 𐴎𐴡𐴕 𐴁𐴠𐴍𐴞𐴘𐴝𐴙𐴕 𐴌𐴟𐴇𐴝𐴙𐴚𐴒𐴙𐴝 , 𐴀𐴝𐴌 𐴁𐴟𐴍𐴡𐴌 𐴑𐴡𐴌𐴔𐴞𐴊𐴡𐴓 𐴉𐴝𐴣𐴏𐴢 𐴎𐴡𐴕 𐴁𐴟𐴋𐴧𐴞𐴏𐴢 𐴐𐴤𐴡𐴣𐴀𐴡 , 𐴆𐴡𐴚𐴄𐴝 𐴊𐴡𐴙𐴅𐴧𐴙𐴝𐴌 𐴏𐴡𐴌𐴡𐴌 𐴈𐴝𐴣𐴏𐴥𐴡𐴌 𐴃𐴟 / 𐴅𐴝𐴕𐴖𐴝𐴌𐴞𐴌 𐴴 𐴃𐴝𐴌𐴥𐴞𐴑𐴡𐴃 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴌𐴥𐴞 , 𐴈𐴡𐴕𐴥𐴡 𐴑𐴠𐴙𐴏𐴢 𐴏𐴥𐴝𐴌𐴝 𐴎𐴠𐴃𐴧𐴟 𐴀𐴝𐴙𐴐𐴧𐴙𐴠 𐴀𐴥𐴠𐴍𐴠 𐴀𐴝𐴌𐴑𐴝𐴕𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴁𐴡𐴓𐴞 𐴀𐴠𐴌𐴝𐴖𐴡𐴋𐴧𐴞 𐴉𐴟𐴓𐴞𐴐𐴡𐴌 𐴃𐴡𐴌𐴉𐴡𐴌 𐴈𐴡𐴃𐴤𐴝 𐴈𐴦𐴡𐴙𐴕𐴧𐴝 𐴓𐴠𐴉𐴄𐴤𐴠𐴕𐴄 𐴑𐴡𐴌𐴕𐴡𐴓 / 𐴄𐴟𐴕 𐴐𐴗𐴠 𐴘𐴠 𐴀𐴠𐴌𐴝𐴖𐴡𐴋𐴧𐴞 𐴈𐴥𐴡𐴁𐴡𐴌 𐴀𐴡𐴓𐴝𐴌𐴠 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴊𐴠𐴐𐴤𐴡𐴙𐴃𐴧𐴝 𐴔𐴟𐴏𐴡𐴓𐴔𐴝𐴕 , 𐴎𐴞𐴃𐴝𐴌𐴝𐴌𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴘 𐴔𐴝𐴕𐴝𐴎𐴝 𐴀𐴝𐴌 𐴏𐴞𐴕𐴥𐴝𐴎𐴝 , 𐴀𐴥𐴞𐴃𐴝𐴌𐴝𐴌𐴠 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴒𐴝𐴙𐴌 𐴑𐴝𐴕𐴟𐴕𐴞 𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴟 𐴒𐴤𐴡𐴙𐴓𐴧𐴙𐴠 𐴊𐴠 𐴁𐴡𐴓𐴞 𐴈𐴦𐴡𐴘 , 𐴀𐴥𐴞𐴃𐴝𐴌𐴝𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴇𐴥𐴡𐴑 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘 𐴁𐴝𐴊𐴠 , 𐴕𐴞𐴎𐴡𐴌 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴓𐴡𐴌𐴝𐴏𐴡𐴌𐴝 𐴒𐴡𐴙𐴃𐴧𐴡 𐴕𐴡 𐴊𐴠 𐴱 𐴀𐴠𐴑 𐴎𐴝𐴒𐴝𐴌 𐴃𐴟 𐴀𐴝𐴌𐴀𐴠𐴑 𐴎𐴝𐴒𐴝𐴃 𐴎𐴝𐴘𐴃𐴡 𐴕𐴡 𐴊𐴠 𐴱 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴠𐴅𐴞𐴏𐴄𐴠𐴌𐴞 𐴒𐴡𐴌𐴥𐴝𐴌 𐴹 𐴴 𐴹 𐴱 𐴐𐴤𐴡𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴠𐴌𐴝𐴖𐴡𐴋𐴧𐴞 𐴐𐴤𐴡𐴀𐴡𐴌𐴡𐴃 𐴒𐴤𐴡𐴓𐴠𐴌 𐴊𐴠 𐴀𐴥𐴠𐴃𐴡𐴌 𐴓𐴝 , 𐴀𐴠𐴌𐴝𐴖𐴡𐴋𐴧𐴞𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴀𐴡𐴉𐴞𐴏𐴥𐴝𐴌𐴠 𐴀𐴝𐴒𐴠 𐴓𐴡𐴃𐴞 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴀𐴟𐴓𐴋𐴝 𐴑𐴦𐴟𐴍𐴡𐴃 𐴑𐴠𐴙𐴏𐴢 𐴑𐴤𐴟𐴓𐴞 𐴌𐴝𐴙𐴑𐴧𐴙𐴠 𐴱 𐴎𐴦𐴝𐴣 𐴇𐴥𐴡𐴑 𐴑𐴡𐴁𐴤𐴞𐴋 𐴹 𐴱 𐴐𐴤𐴌𐴟 𐴀𐴥𐴡𐴘𐴧𐴠𐴊𐴠 𐴒𐴡𐴃𐴡 𐴔𐴝𐴌𐴠𐴆 𐴔𐴥𐴝𐴐𐴢 𐴓𐴡𐴃𐴞 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴠 𐴔𐴦𐴝𐴔𐴠𐴓𐴝 𐴕𐴡 𐴑𐴤𐴟𐴓𐴞 , 𐴊𐴤𐴡𐴌𐴝 𐴉𐴡𐴌𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴟𐴎𐴟 𐴎𐴟 𐴀𐴝𐴌𐴑𐴝𐴕𐴡𐴃 𐴉𐴦𐴡𐴣𐴏𐴝𐴘 𐴊𐴠 𐴱 𐴔𐴡𐴕𐴃𐴡𐴌 𐴀𐴝𐴙𐴑𐴧𐴙𐴝𐴁𐴡𐴃 𐴃𐴤𐴝𐴑𐴡𐴙𐴕𐴧𐴝 𐴁𐴟𐴄 𐴀𐴡𐴓𐴝 𐴉𐴝𐴣𐴏𐴢𐴀𐴥𐴡 𐴎𐴡𐴕𐴡𐴌 𐴓𐴝 𐴷 𐴶 𐴳 𐴊𐴤𐴝𐴌𐴝𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 , 𐴎𐴠 𐴊𐴤𐴝𐴌𐴝 𐴓𐴡𐴘 𐴔𐴦𐴝𐴔𐴠𐴓𐴝 𐴏𐴥𐴝𐴁𐴟𐴃 𐴀𐴥𐴡𐴘𐴓𐴠 𐴰 𐴱 𐴁𐴡𐴏𐴥𐴡𐴌 𐴎𐴞𐴘𐴡𐴓 𐴀𐴥𐴡𐴘𐴁𐴡 𐴱 𐴒𐴡𐴃𐴡 𐴁𐴡𐴏𐴥𐴡𐴌 𐴀𐴡𐴒𐴤𐴡𐴏𐴄𐴡 𐴔𐴥𐴝𐴐𐴡𐴃 ,𐴀𐴠𐴌𐴝𐴖𐴡𐴋𐴧𐴞 𐴁𐴦𐴝𐴘 𐴔𐴡𐴓𐴔𐴞𐴕𐴡𐴃 𐴒𐴤𐴡𐴓𐴞𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴠𐴌 𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴲 𐴴 𐴎𐴡𐴕𐴡𐴌𐴠 𐴊𐴤𐴡𐴌𐴞 𐴁𐴡𐴕 𐴒𐴡𐴌𐴥𐴞 , 𐴀𐴝𐴌𐴑𐴝𐴕𐴡𐴃 𐴖𐴝𐴉𐴠𐴏𐴢 𐴉𐴦𐴡𐴣𐴏𐴝𐴘 𐴊𐴞𐴀𐴞𐴓 𐴱𐴱

Sources : The Irrawaddy