𐴔𐴥𐴝𐴔 𐴁𐴡𐴌𐴥𐴝𐴃 𐴁𐴟𐴔 𐴉𐴥𐴟𐴍𐴞 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴀𐴝𐴌 𐴀𐴝𐴣𐴐𐴄𐴡 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴙𐴅𐴧𐴙𐴝 𐴊𐴦𐴟𐴙𐴛𐴅𐴧𐴙𐴝 𐴀𐴝𐴌𐴑𐴝𐴕𐴡𐴌 𐴔𐴥𐴝𐴔 𐴁𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴏𐴡𐴁𐴧𐴝𐴇 𐴄𐴤𐴝 𐴉𐴝𐴌𐴝𐴃 𐴁𐴟𐴔 𐴉𐴥𐴟𐴍𐴞 𐴁𐴠𐴍𐴞 𐴀𐴠𐴑 𐴎𐴡𐴕 / 𐴋𐴡 𐴓𐴥𐴝 𐴏𐴥𐴠𐴚 𐴖𐴠 𐴁𐴡𐴐𐴢 𐴵 𐴴 𐴁𐴡𐴏𐴥𐴡𐴌 𐴔𐴡𐴌𐴞𐴒𐴞𐴘𐴡𐴘 , 𐴀𐴝𐴌 𐴀𐴝𐴣𐴐𐴄𐴡 𐴎𐴡𐴕 / 𐴑𐴟 𐴆𐴙𐴡 𐴕𐴥𐴟 𐴶 𐴱 𐴁𐴡𐴏𐴥𐴡𐴌 / 𐴔𐴥𐴝 𐴏𐴥𐴟 𐴏𐴥𐴠𐴕 𐴕𐴥𐴟 𐴶 𐴱 𐴁𐴡𐴏𐴥𐴡𐴌 / 𐴑𐴟 𐴀𐴥𐴟 𐴏𐴥𐴠𐴕 𐴐𐴗𐴠 𐴔𐴡𐴚 𐴶 𐴲 𐴁𐴡𐴏𐴥𐴡𐴌 / 𐴑𐴟 𐴆𐴙𐴡 𐴆𐴙𐴡 𐴵 𐴲 𐴁𐴡𐴏𐴥𐴡𐴌 / 𐴋𐴡 𐴕𐴥𐴟 𐴕𐴥𐴟 𐴏𐴥𐴠𐴕 𐴰 𐴴 𐴁𐴡𐴏𐴥𐴡𐴌 / 𐴔𐴥𐴝 𐴏𐴥𐴠𐴕 𐴄𐴤𐴠 𐴳 𐴲 𐴁𐴡𐴏𐴥𐴡𐴌 / 𐴔𐴥𐴝 𐴀𐴥𐴠 𐴀𐴥𐴠 𐴔𐴥𐴟 𐴳 𐴁𐴡𐴏𐴥𐴡𐴌 / 𐴔𐴥𐴝 𐴀𐴥𐴠 𐴏𐴥𐴟 𐴆𐴙𐴠 𐴵 𐴁𐴡𐴏𐴥𐴡𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴏𐴡𐴁𐴧𐴝𐴇𐴢 𐴄𐴤𐴝 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴑 𐴌𐴥𐴠 𐴔𐴥𐴟 / 𐴀𐴥𐴟 𐴔𐴙𐴥𐴟 𐴎𐴡 𐴀𐴡𐴚𐴠 𐴈𐴡𐴘𐴧𐴠 𐴱 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴕𐴡𐴌 𐴁𐴤𐴟𐴃𐴡𐴌𐴠 / 𐴑𐴟 𐴆𐴙𐴡 𐴕𐴥𐴟 ,𐴑𐴟 𐴀𐴥𐴟 𐴏𐴥𐴠𐴕 𐴐𐴗𐴠 𐴔𐴡𐴚 𐴀𐴝𐴌 𐴋𐴡 𐴕𐴥𐴟 𐴕𐴥𐴟 𐴏𐴥𐴠𐴕 ,𐴀𐴠 𐴃𐴞𐴕 𐴎𐴡𐴕𐴡𐴌 𐴎𐴡𐴈𐴡𐴔 𐴁𐴠𐴐𐴤𐴞 𐴈𐴥𐴡𐴃𐴡𐴌𐴥𐴝 𐴀𐴥𐴡𐴕𐴠 , 𐴀𐴥𐴞𐴃𐴝𐴌𐴝𐴌𐴠 𐴔𐴡𐴌𐴥𐴡𐴑 𐴀𐴥𐴟 𐴋𐴞𐴐𐴄𐴤𐴞𐴑𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱𐴱

𐴁𐴝𐴊𐴠 𐴔𐴡𐴌𐴞 𐴒𐴞𐴘𐴡𐴘 𐴊𐴠 𐴀𐴥𐴞𐴁𐴝𐴌𐴠 𐴔𐴥𐴝𐴔 𐴁𐴡𐴌𐴥𐴝𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴦𐴡𐴣𐴏𐴝𐴘 𐴊𐴞 𐴁𐴝𐴊𐴠 , 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴁𐴝𐴑𐴞 𐴉𐴝𐴣𐴏𐴢 𐴎𐴡𐴕𐴡𐴌𐴠 𐴔𐴡𐴌𐴥𐴡𐴚 𐴁𐴗𐴠 𐴇𐴥𐴝𐴐𐴉𐴝𐴃𐴝𐴓𐴡𐴃 𐴓𐴡𐴘 𐴒𐴠𐴘𐴠 𐴱 𐴀𐴝𐴙𐴅𐴧𐴙𐴝 𐴊𐴦𐴟𐴛𐴅𐴧𐴙𐴝 𐴀𐴠𐴑 𐴁𐴝𐴎𐴡𐴌 𐴁𐴝𐴊𐴠 𐴉𐴝𐴌𐴝𐴌 𐴁𐴤𐴟𐴃𐴡𐴌𐴠 , 𐴋𐴦𐴡𐴣𐴌 𐴀𐴝𐴁𐴝𐴏𐴢 𐴓𐴡𐴘 𐴁𐴟𐴔 𐴉𐴥𐴟𐴙𐴄𐴧𐴙𐴠 𐴊𐴠 𐴉𐴥𐴟𐴕𐴞 𐴉𐴝𐴙𐴅𐴧𐴙𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴉𐴥𐴟𐴙𐴄𐴧𐴙𐴠 𐴊𐴠 𐴎𐴝𐴒𐴝𐴃 𐴎𐴝𐴘 𐴏𐴝𐴀𐴝𐴌 𐴊𐴠 , 𐴒𐴤𐴡𐴌 𐴀𐴠𐴑𐴧𐴝𐴕𐴡𐴌 𐴈𐴝𐴣𐴏𐴝𐴃 𐴀𐴠𐴑 𐴎𐴡𐴕 𐴔𐴡𐴌𐴝 , 𐴀𐴝𐴌 𐴀𐴝𐴣𐴐𐴄𐴡 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴉𐴡𐴌𐴞 𐴃𐴤𐴝𐴑𐴧𐴙𐴠 𐴊𐴠 𐴊𐴠𐴑𐴤𐴞𐴓𐴡 𐴁𐴡𐴓𐴞 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴈𐴡𐴘𐴧𐴠 𐴱 𐴓𐴝𐴌𐴥𐴝𐴙𐴌 𐴀𐴡𐴑𐴃𐴡𐴌 𐴁𐴝𐴏𐴝 𐴑𐴟𐴏𐴝 𐴋𐴦𐴡𐴣𐴌 𐴀𐴥𐴝𐴣𐴃𐴞𐴘𐴝𐴌 𐴉𐴥𐴟𐴙𐴄𐴧𐴙𐴠 𐴊𐴠 𐴁𐴡𐴓𐴞,𐴑𐴠𐴙𐴏𐴧𐴟 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴠 𐴈𐴡𐴘𐴓𐴠 𐴘𐴥𐴡 , 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴊𐴠 𐴀𐴥𐴟𐴕𐴡𐴌𐴠 𐴃𐴡𐴌𐴝 𐴃𐴡𐴌𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴉𐴦𐴡𐴣𐴏𐴝𐴘 𐴊𐴡𐴀𐴡𐴕 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 𐴊𐴠 𐴀𐴥𐴠𐴃𐴡𐴓𐴧𐴝 , 𐴈𐴥𐴝𐴄𐴞 𐴇𐴝𐴓𐴡𐴃𐴡𐴌𐴠 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴏𐴦𐴝𐴘 𐴕𐴥𐴡 𐴉𐴝𐴌𐴥𐴞𐴌 𐴁𐴡𐴓𐴞 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠 𐴔𐴥𐴟 / 𐴀𐴥𐴟 𐴔𐴙𐴥𐴟 𐴎𐴡 𐴀𐴡𐴚𐴠 𐴈𐴡𐴘𐴧𐴠 𐴱 𐴏𐴡𐴁𐴧𐴝𐴇 𐴄𐴤𐴝 𐴉𐴝𐴌𐴝𐴌 𐴃𐴟 𐴃𐴞𐴕 𐴉𐴥𐴡𐴌𐴡𐴓𐴡𐴚 𐴊𐴟𐴌𐴥𐴠 , 𐴒𐴡𐴃𐴡 𐴁𐴡𐴏𐴥𐴡𐴌 𐴔𐴡𐴒𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴠 𐴓𐴝𐴌𐴥𐴝𐴘 𐴏𐴡𐴓𐴧𐴞𐴀𐴞𐴓 𐴱𐴱

Sources : RFA Burmese