𐴇𐴥𐴡𐴑𐴟𐴔𐴡𐴃𐴠 𐴈𐴝𐴔 𐴏𐴥𐴝𐴌𐴝 𐴔𐴝𐴕𐴟𐴙𐴐𐴢 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴀𐴝 𐴁𐴡𐴕 𐴒𐴡𐴙𐴅𐴧𐴙𐴠 𐴱𐴱

𐴇𐴠𐴉𐴝𐴎𐴡𐴃𐴡𐴌𐴠 𐴈𐴥𐴝𐴄𐴞 𐴁𐴝𐴕𐴝𐴘 𐴁𐴡𐴓𐴧𐴝 , 𐴑𐴝𐴑𐴐𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴝𐴌𐴔𐴞 𐴘𐴠 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴊𐴞𐴁𐴡 𐴱 𐴀𐴠𐴕 𐴅𐴞 𐴀𐴡 𐴀𐴝𐴌 𐴀𐴡𐴉𐴞𐴐𐴤𐴝𐴓𐴞 𐴈𐴝𐴔 𐴒𐴡𐴌𐴡𐴙𐴕𐴧𐴝 𐴁𐴝𐴊𐴠 , 𐴀𐴡𐴙𐴕𐴧𐴡 𐴔𐴝𐴙𐴕𐴐𐴤𐴡𐴌𐴠 𐴁𐴠 𐴊𐴡𐴌𐴈𐴝𐴌𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴀𐴝 , 𐴁𐴡𐴕 𐴒𐴡𐴌𐴥𐴞 𐴊𐴞𐴁𐴡 𐴁𐴡𐴓𐴞 𐴇𐴥𐴡𐴑𐴟𐴔𐴡𐴃𐴠 𐴀𐴠𐴓𐴝𐴕 𐴒𐴡𐴙𐴅𐴧𐴙𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 , 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌 𐴃𐴟 𐴁𐴦𐴝𐴌𐴠 𐴕𐴠𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴓𐴡𐴘 𐴔𐴞𐴓𐴞 𐴎𐴤𐴟𐴓𐴞 𐴎𐴝𐴘𐴒𐴤𐴡𐴘 𐴕𐴡 𐴉𐴝𐴌𐴥𐴠 𐴉𐴝𐴀𐴝𐴕 ,𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴝𐴌𐴔𐴞 𐴘𐴠 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴊𐴞𐴁𐴡 𐴱 𐴈𐴡𐴊𐴦𐴟𐴕 𐴁𐴤𐴠𐴊𐴞 𐴔𐴝𐴕𐴟𐴙𐴐𐴢 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘 𐴒𐴝𐴙𐴌 𐴇𐴥𐴝𐴑𐴞𐴑𐴞 𐴈𐴥𐴡𐴁𐴡𐴌 𐴁𐴥𐴝𐴙𐴌 𐴒𐴡𐴌𐴥𐴞𐴁𐴝𐴌 𐴏𐴠𐴐𐴃𐴝𐴃 𐴀𐴝𐴏𐴥𐴞 𐴊𐴠 𐴘𐴥𐴝𐴕 𐴊𐴠𐴑𐴤𐴞 𐴁𐴝𐴊𐴠 𐴱𐴱

𐴁𐴤𐴝𐴐𐴡𐴕 𐴏𐴡𐴌𐴡𐴃 𐴁𐴠𐴊𐴡𐴌𐴈𐴝𐴌𐴞 𐴔𐴝𐴕𐴥𐴟𐴙𐴐𐴢 𐴎𐴝𐴘𐴃𐴡 𐴕𐴡𐴊𐴞𐴁𐴤𐴝𐴌 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴝 𐴒𐴞𐴘𐴠𐴊𐴠 𐴁𐴡𐴓𐴞 𐴒𐴤𐴡𐴌 𐴀𐴟𐴎𐴞𐴌 / 𐴀𐴝𐴏𐴡𐴊𐴤𐴟𐴎 𐴎𐴡𐴔𐴝𐴕 𐴈𐴦𐴝𐴕 𐴑𐴡𐴔𐴝𐴓𐴠 𐴈𐴡𐴘𐴧𐴠 𐴱 𐴎𐴡𐴊𐴞 𐴈𐴡𐴕𐴥𐴞𐴑𐴧𐴙𐴝𐴃𐴧𐴟 𐴎𐴡𐴌𐴟𐴌𐴞 𐴎𐴝𐴀𐴝 𐴉𐴡𐴌𐴠𐴌 𐴊𐴠 𐴀𐴥𐴡𐴘𐴓𐴠 𐴎𐴝𐴘 𐴉𐴝𐴌𐴥𐴞𐴁𐴡 , 𐴔𐴡𐴕𐴃𐴡𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴔𐴝𐴕𐴥𐴟𐴙𐴐𐴢 𐴎𐴡𐴔𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 , 𐴔𐴞𐴄𐴤𐴞𐴚𐴡𐴃 𐴒𐴤𐴡𐴌 𐴀𐴟𐴎𐴞𐴌𐴠 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘 𐴊𐴞𐴘𐴠 𐴱 𐴇𐴥𐴡𐴑𐴟𐴔𐴡𐴃𐴠 𐴊𐴟𐴘 𐴑𐴤𐴠𐴂𐴢 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘 𐴕𐴝𐴓 𐴒𐴡𐴌𐴥𐴞 𐴊𐴞𐴘𐴠 , 𐴀𐴝𐴏𐴧𐴠 𐴀𐴝𐴏𐴧𐴠 𐴀𐴝𐴌𐴀𐴥𐴡 𐴁𐴡𐴀𐴡𐴃 𐴕𐴞𐴎𐴝𐴗𐴕𐴡𐴌 𐴀𐴝𐴏𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔 𐴏𐴥𐴝𐴌𐴞 𐴁𐴦𐴝𐴌𐴠 𐴕𐴠𐴓𐴞 𐴕𐴡 𐴉𐴝𐴌𐴥𐴠 𐴉𐴝𐴀𐴝𐴕 , 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴊𐴞𐴘𐴝 𐴎𐴝𐴘𐴁𐴡 𐴁𐴡𐴓𐴞 𐴱𐴱

𐴉𐴥𐴠𐴌𐴖𐴝𐴌𐴞 𐴰 𐴲 𐴰 𐴲 𐴐𐴤𐴡𐴕𐴡𐴃 𐴒𐴤𐴡𐴌𐴀𐴟𐴎𐴞𐴌 / 𐴀𐴝𐴏𐴡𐴊𐴤𐴟𐴎𐴧𐴡𐴔𐴝𐴕 𐴈𐴦𐴝𐴕 𐴑𐴡𐴔𐴝𐴓𐴠 𐴈𐴡𐴀𐴡𐴙𐴓 𐴱 𐴒𐴡𐴃𐴡 𐴁𐴟𐴙𐴃 𐴁𐴝𐴌𐴠 𐴔𐴞𐴄𐴤𐴞𐴚𐴡𐴃 𐴒𐴤𐴞𐴌𐴝 𐴊𐴞𐴁𐴝𐴌 𐴉𐴝𐴑𐴧𐴝 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 , 𐴐𐴤𐴞𐴣𐴍𐴝 𐴐𐴤𐴞𐴄𐴧𐴝 𐴕𐴡 𐴀𐴥𐴡𐴘𐴧𐴡 𐴌𐴠 𐴀𐴠𐴑 𐴎𐴝𐴒𐴝𐴃 𐴌𐴝𐴑𐴤𐴞𐴁𐴡𐴓𐴧𐴝 , 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴊𐴞𐴁𐴝𐴌 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴝 𐴒𐴞𐴘𐴠𐴊𐴠 𐴱 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴁𐴝𐴊𐴠 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴀𐴥𐴝𐴣𐴍𐴞𐴁𐴝𐴌 𐴌𐴝𐴏𐴧𐴝 𐴀𐴝𐴌 𐴑𐴠𐴀𐴠𐴔 𐴁𐴠𐴒𐴧𐴟𐴓𐴧𐴝 𐴊𐴠𐴈𐴥𐴝 𐴎𐴝𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴠𐴑𐴧𐴝𐴕 𐴀𐴟𐴏𐴡𐴓 𐴒𐴤𐴡𐴌 𐴀𐴝𐴌 𐴎𐴝𐴒𐴝 𐴎𐴝𐴒𐴝 𐴏𐴝𐴘 𐴏𐴝𐴘 ( 𐴏𐴞 𐴏𐴞 𐴄𐴞 𐴁𐴞 ) 𐴑𐴠𐴔𐴌𐴝 𐴓𐴝𐴒𐴝 𐴉𐴡𐴌𐴥𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴒𐴤𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴞𐴑𐴙𐴟𐴌𐴞𐴄𐴞 𐴀𐴝𐴌 𐴇𐴠𐴉𐴝𐴎𐴡𐴃 𐴔𐴡𐴎𐴁𐴟𐴃 𐴀𐴥𐴡𐴘 𐴁𐴡𐴓𐴧𐴝 , 𐴉𐴥𐴝𐴘𐴏𐴠𐴓𐴝 𐴀𐴞𐴀𐴞𐴕 𐴒𐴡𐴌𐴥𐴝 𐴒𐴞𐴘𐴠𐴊𐴠 , 𐴀𐴝𐴌 𐴀𐴡𐴓𐴉𐴡 𐴄𐴝𐴙𐴔𐴡𐴌 𐴁𐴤𐴟𐴃𐴡𐴌𐴠 𐴕𐴝𐴓 𐴀𐴥𐴡𐴘 𐴎𐴝𐴘𐴁𐴡𐴒𐴤𐴡𐴘 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

Sources : Dhakatribune