𐴌𐴠𐴚𐴒𐴟𐴕 𐴋𐴞𐴐𐴄𐴤𐴞𐴑𐴡𐴃 𐴊𐴤𐴡𐴌𐴝 𐴈𐴥𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴞𐴚𐴑𐴗𐴝𐴌𐴞 𐴒𐴡𐴌𐴥𐴞 𐴁𐴝𐴊𐴠 𐴕𐴞𐴎𐴡𐴌 𐴎𐴝𐴒𐴝𐴃 𐴖𐴝𐴉𐴠𐴏𐴢 𐴉𐴦𐴡𐴣𐴏𐴥𐴝𐴘𐴊𐴞𐴁𐴡 𐴱𐴱

𐴑𐴟𐴁𐴤𐴞𐴋 𐴹 𐴱 𐴁𐴞𐴘𐴝𐴌𐴝𐴔 𐴏𐴡𐴓𐴠𐴌 𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴑 𐴎𐴝𐴒𐴝𐴌 𐴃𐴟 𐴀𐴝𐴌 𐴀𐴠𐴑 𐴎𐴝𐴒𐴝𐴃 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴙𐴠 𐴊𐴠 𐴀𐴡𐴑𐴃𐴡𐴃 , 𐴌𐴠𐴚𐴒𐴟𐴕 𐴋𐴞𐴐𐴄𐴤𐴞𐴑𐴡𐴌 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴃 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴊𐴠 , 𐴀𐴝𐴌𐴑𐴝𐴕𐴡𐴌 𐴔𐴡𐴌𐴥𐴡𐴑 𐴀𐴥𐴟𐴌 𐴔𐴟𐴏𐴥𐴡𐴓𐴔𐴝𐴕 𐴹 𐴹 𐴎𐴡𐴕𐴡𐴌𐴠 , 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴑𐴡𐴁𐴤𐴞𐴋 𐴹 𐴱 𐴁𐴞𐴘𐴝𐴌𐴝𐴔 𐴆𐴠𐴑 𐴒𐴡𐴌𐴥𐴞 𐴏𐴝𐴀𐴝 𐴊𐴠 , 𐴑𐴡𐴔𐴁𐴙𐴟𐴄𐴝𐴌 𐴑𐴦𐴡𐴓𐴠𐴅𐴡𐴌 𐴑𐴠𐴀𐴠𐴔𐴡𐴃 𐴌𐴝𐴑𐴤𐴞 , 𐴁𐴞𐴘𐴝𐴌𐴝𐴔 𐴀𐴝𐴏𐴥𐴠 𐴕𐴠 𐴕𐴥𐴝𐴑𐴞 𐴕𐴥𐴝𐴘 𐴏𐴝𐴀𐴝𐴘 𐴁𐴝𐴊𐴠 , 𐴀𐴥𐴞𐴃𐴝𐴌𐴝 𐴀𐴝𐴌𐴑𐴝𐴕𐴡𐴌 𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴌 𐴃𐴤𐴝𐴑𐴡𐴙𐴕𐴧𐴝 𐴀𐴥𐴡𐴕𐴠 𐴕𐴡𐴀𐴡 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 , 𐴌𐴠𐴚𐴒𐴟𐴕 𐴋𐴞𐴐𐴄𐴤𐴞𐴑𐴡𐴌 𐴇𐴥𐴡𐴑𐴟𐴔𐴡𐴃𐴞 𐴋𐴞𐴂𐴝𐴌𐴔𐴠𐴕𐴠 𐴈𐴡𐴘𐴧𐴠 𐴱 𐴔𐴡𐴌𐴥𐴡𐴑 𐴀𐴥𐴟𐴌 𐴃𐴟 𐴀𐴝𐴙𐴐𐴧𐴙𐴠 𐴊𐴠 𐴏𐴥𐴡𐴀𐴞 𐴀𐴥𐴡𐴘𐴓𐴠 𐴀𐴥𐴞𐴃𐴝𐴌𐴝 𐴌𐴠 𐴁𐴡𐴌𐴝𐴁𐴡𐴌 𐴔𐴡𐴌𐴥𐴡𐴑 𐴀𐴥𐴟𐴃 𐴉𐴦𐴡𐴣𐴏𐴥𐴝𐴘 𐴊𐴞𐴁𐴡 𐴁𐴡𐴓𐴞 , 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴀𐴝𐴌 𐴔𐴝𐴙𐴕𐴐𐴤𐴡𐴌𐴠 𐴏𐴥𐴡𐴕𐴐𐴟𐴊𐴡𐴕 𐴒𐴡𐴌𐴡𐴙𐴕𐴧𐴝 𐴀𐴟𐴎𐴞𐴌 / 𐴋𐴡 𐴔𐴥𐴟 𐴔𐴥𐴟 𐴏𐴥𐴟 𐴆𐴠 𐴘𐴠 𐴈𐴡𐴘𐴧𐴠 𐴱𐴱

𐴀𐴝𐴣𐴀𐴝𐴌𐴝𐴌 𐴈𐴝𐴔 𐴀𐴥𐴡𐴙𐴓𐴊𐴠 𐴃𐴡𐴌𐴝 𐴃𐴡𐴌𐴞 𐴀𐴠𐴔𐴞𐴒𐴞𐴌𐴞𐴐𐴤𐴞𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴀𐴞𐴚𐴑𐴗𐴝𐴌𐴞 𐴒𐴡𐴌𐴥𐴞 𐴕𐴝𐴓 𐴒𐴡𐴌𐴥𐴞 𐴊𐴦𐴡𐴕 𐴱 𐴁𐴦𐴝𐴊𐴠 𐴀𐴥𐴞𐴃𐴝𐴌𐴝 𐴈𐴡𐴏𐴟𐴌𐴁𐴡𐴕 𐴀𐴥𐴡𐴘𐴕𐴠 𐴕𐴝𐴑𐴤𐴞 𐴕𐴡𐴀𐴡 𐴘𐴥𐴝𐴕 𐴉𐴟𐴓𐴞𐴐𐴢 𐴀𐴝𐴌 𐴀𐴝𐴊𐴝𐴓𐴡𐴃𐴡𐴌 𐴉𐴥𐴝𐴘𐴏𐴠𐴓𐴝 𐴱 𐴉𐴥𐴝𐴘𐴏𐴠𐴓𐴝𐴌 𐴁𐴝𐴊𐴠 𐴁𐴞𐴘𐴝𐴌𐴝𐴔 𐴆𐴠𐴑 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴝𐴊𐴠 , 𐴁𐴞𐴘𐴝𐴌𐴝𐴔 𐴉𐴝𐴘𐴓𐴠 𐴑𐴡𐴌𐴠𐴄𐴤𐴝𐴙𐴕𐴡𐴃 𐴒𐴤𐴡𐴓𐴝𐴘 𐴊𐴦𐴡𐴕 𐴕𐴡 𐴉𐴥𐴝𐴘𐴓𐴠 , 𐴕𐴞𐴎𐴡𐴌 𐴎𐴝𐴒𐴝𐴃 𐴉𐴦𐴡𐴣𐴏𐴥𐴝𐴘 𐴊𐴞𐴘𐴝 𐴉𐴡𐴌𐴠𐴌 𐴊𐴠 𐴀𐴥𐴡𐴘𐴓𐴠 𐴉𐴦𐴡𐴣𐴏𐴥𐴝𐴘 𐴊𐴦𐴡𐴕 𐴀𐴝𐴣𐴀𐴝𐴌𐴝𐴌 𐴈𐴝𐴔 𐴱 𐴌𐴠𐴚𐴒𐴟𐴕𐴡𐴌 𐴁𐴤𐴝𐴐𐴞 𐴊𐴟𐴘 𐴎𐴡𐴕 𐴁𐴠𐴍𐴝 𐴀𐴝𐴌 𐴊𐴟𐴘 𐴎𐴡𐴕 𐴁𐴠𐴍𐴞 𐴘𐴠 𐴔𐴞𐴓𐴞 ,𐴀𐴠 𐴌𐴟𐴇𐴝𐴙𐴚𐴒𐴙𐴝 𐴹 𐴹 𐴎𐴡𐴕𐴡𐴌𐴥𐴠 𐴀𐴝𐴕𐴠𐴌 𐴊𐴠 𐴘𐴥𐴝𐴕 𐴏𐴥𐴝𐴁𐴟𐴃 𐴀𐴥𐴡𐴕𐴡𐴌 𐴁𐴦𐴝𐴊𐴠 , 𐴋𐴝𐴓𐴝𐴓 𐴏𐴝𐴙𐴌 𐴀𐴥𐴡 𐴎𐴡𐴕𐴡𐴌𐴥𐴠 , 𐴑𐴡𐴗𐴔 𐴇𐴥𐴡𐴙𐴃𐴧𐴝 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴷 𐴶 𐴳 / 𐴰 𐴷 𐴳 𐴀𐴝𐴌 𐴉𐴥𐴞𐴃𐴕𐴝 , 𐴁𐴤𐴟𐴓𐴝 𐴉𐴥𐴝𐴄𐴑𐴤𐴞 𐴀𐴝𐴌 𐴒𐴟𐴓𐴝𐴔 𐴁𐴠𐴏𐴝 𐴑𐴞𐴕𐴝𐴌 𐴊𐴤𐴝𐴌𐴝 𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴎𐴡𐴌𐴞𐴁𐴝𐴕𐴝 𐴒𐴡𐴙𐴅𐴧𐴙𐴠 𐴁𐴡𐴓𐴞 , 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴊𐴟𐴘𐴀𐴡𐴔 𐴊𐴝𐴌𐴟𐴒𐴝 𐴘𐴠 𐴈𐴡𐴘𐴧𐴠 𐴱𐴱

𐴑𐴡𐴗𐴔 𐴇𐴥𐴡𐴙𐴃𐴧𐴝 𐴑𐴝𐴕𐴟𐴕 𐴊𐴤𐴝𐴌𐴝 𐴓𐴡𐴔𐴁𐴡𐴌 𐴷 𐴶 𐴳 𐴏𐴥𐴝𐴁𐴟𐴃 𐴀𐴥𐴡𐴘𐴓𐴠 𐴄𐴞𐴛𐴝 𐴎𐴡𐴌𐴞𐴁𐴝𐴕𐴝 𐴀𐴝𐴌 𐴊𐴡𐴐𐴢 𐴁𐴡𐴏𐴥𐴡𐴌 𐴎𐴞𐴘𐴡𐴓 𐴊𐴟𐴕𐴥𐴞𐴘𐴝𐴕 𐴀𐴥𐴡𐴘 𐴉𐴝𐴌𐴠 𐴊𐴠 𐴊𐴤𐴝𐴌𐴝 , 𐴎𐴡𐴊𐴞 𐴊𐴤𐴝𐴌𐴝 𐴓𐴡𐴔𐴁𐴡𐴌 𐴰 𐴷 𐴳 𐴏𐴥𐴝𐴁𐴟𐴃 𐴀𐴥𐴡𐴘𐴓𐴠 𐴄𐴞𐴛𐴝 𐴀𐴝𐴌 𐴇𐴥𐴝𐴣𐴃 𐴁𐴡𐴏𐴥𐴡𐴌 𐴎𐴞𐴘𐴡𐴓 𐴊𐴟𐴕𐴥𐴘𐴝𐴕 𐴀𐴥𐴡𐴊𐴠 𐴊𐴤𐴝𐴌𐴝 𐴱 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴊𐴠 𐴹 𐴹 𐴎𐴡𐴕𐴡𐴌 𐴔𐴝𐴎𐴠 𐴵 𐴁𐴡𐴏𐴥𐴡𐴌𐴡𐴃𐴧𐴟 𐴰 𐴱 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴠 𐴉𐴟𐴖𐴝𐴙𐴕 𐴰 𐴱 𐴎𐴡𐴕 𐴀𐴝𐴏𐴠 , 𐴀𐴥𐴞𐴃𐴝𐴌𐴝 𐴀𐴝𐴌𐴑𐴝𐴕𐴡𐴌 𐴔𐴡𐴌𐴥𐴡𐴑 𐴀𐴥𐴟𐴃𐴧𐴟 𐴌𐴠𐴚𐴒𐴟𐴕 , 𐴌𐴠𐴚𐴒𐴟𐴕𐴡𐴌 𐴃𐴟 𐴔𐴡𐴓𐴠𐴐𐴤𐴙𐴝 𐴈𐴝𐴔 𐴒𐴡𐴙𐴃𐴧𐴡 𐴎𐴝𐴌 𐴊𐴠 𐴁𐴡𐴓𐴞 𐴉𐴟𐴓𐴞𐴐𐴠 𐴈𐴡𐴘𐴧𐴠 𐴱 𐴉𐴟𐴓𐴞𐴐𐴠 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴒𐴙𐴝 𐴀𐴥𐴟𐴕𐴡𐴌 𐴀𐴟𐴓𐴋𐴝 𐴑𐴠𐴙𐴏𐴢 𐴑𐴤𐴟𐴓𐴞𐴁𐴝𐴌 𐴏𐴡𐴌𐴞𐴐𐴃𐴡𐴌𐴡𐴃 𐴀𐴝𐴏𐴥𐴠 , 𐴔𐴡𐴕𐴃𐴡𐴌 𐴏𐴠𐴇𐴥𐴠𐴃𐴡𐴌 𐴋𐴞𐴂𐴝𐴌𐴔𐴠𐴕𐴠 𐴀𐴥𐴞𐴃𐴝𐴌 𐴉𐴥𐴝𐴍𐴞 𐴀𐴝𐴙𐴐𐴧𐴙𐴠 𐴊𐴠 𐴐𐴤𐴡𐴀𐴡𐴌 𐴀𐴥𐴞𐴕𐴡𐴌 𐴈𐴡𐴕𐴥𐴡 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴀𐴝𐴏𐴠𐴕𐴥𐴠 𐴆𐴠𐴑 𐴒𐴡𐴌𐴠𐴌 𐴁𐴡𐴓𐴞 , 𐴌𐴠𐴚𐴒𐴟𐴕 𐴋𐴞𐴐𐴄𐴤𐴞𐴑𐴡𐴌 𐴉𐴟𐴓𐴞𐴐𐴡𐴌 𐴊𐴟𐴘𐴀𐴡𐴔 𐴁𐴡𐴌𐴡 / 𐴎𐴡 𐴔𐴥𐴞𐴚 𐴀𐴥𐴟 𐴘𐴠 𐴈𐴡𐴘𐴧𐴠 𐴱𐴱

Sources : RFA Burmese