𐴀𐴝𐴌𐴑𐴝𐴕𐴡𐴌 𐴀𐴠𐴑 𐴐𐴤𐴡𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴃 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴹 𐴹 𐴎𐴡𐴕 𐴌𐴠𐴚𐴒𐴟𐴕 𐴋𐴞𐴐𐴄𐴤𐴞𐴑𐴡𐴌 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴃 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴁𐴡𐴓𐴞 , 𐴐𐴗𐴠 𐴂𐴠𐴌𐴠𐴏𐴝 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴠 ( 𐴀𐴝𐴌 𐴀𐴠𐴉𐴢 𐴀𐴠 ) 𐴌𐴠 𐴈𐴡𐴘𐴧𐴠 𐴱 𐴊𐴤𐴡𐴌𐴝 𐴈𐴥𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴥𐴠 𐴁𐴝𐴎𐴤𐴝 𐴀𐴝𐴏𐴥𐴠𐴊𐴠 𐴋𐴞𐴂𐴝𐴌𐴔𐴠𐴕𐴠 , 𐴒𐴡𐴌𐴥𐴝 𐴉𐴡𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴃𐴡𐴊𐴝𐴌𐴟𐴑 𐴀𐴝𐴌 𐴀𐴞𐴚𐴑𐴗𐴝𐴌𐴞 𐴒𐴡𐴌𐴠𐴌 𐴱 𐴀𐴥𐴞𐴃𐴝𐴌𐴝 𐴃𐴤𐴝𐴙𐴑𐴧𐴙𐴠 𐴊𐴠 𐴁𐴤𐴝𐴌𐴝 𐴒𐴤𐴡𐴌𐴡𐴌 𐴒𐴞𐴌𐴥𐴡𐴏𐴡𐴌𐴠 𐴁𐴡𐴕 𐴕𐴡 𐴒𐴡𐴌𐴥𐴞𐴁𐴡 𐴁𐴡𐴓𐴞 , 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴊𐴟𐴘𐴀𐴡𐴔 𐴊𐴝𐴌𐴟𐴒𐴝 / 𐴄𐴞𐴚 𐴔𐴡𐴚 𐴓𐴗𐴝𐴚𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 𐴱𐴱

𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴸 𐴓𐴡𐴔𐴁𐴡𐴌 𐴌𐴥𐴠𐴑𐴧𐴗𐴝𐴌 𐴁𐴡𐴌𐴥𐴝𐴚 𐴕𐴡𐴚 𐴌𐴝𐴏𐴧𐴝𐴃𐴢 , 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴊𐴝𐴌𐴟𐴒𐴝 𐴘𐴠 𐴐𐴤𐴡𐴕𐴊𐴡 𐴒𐴡𐴌𐴥𐴠 𐴔𐴝𐴕𐴟𐴙𐴐𐴢 𐴀𐴠𐴑 𐴎𐴡𐴕𐴡𐴌𐴠 𐴋𐴝𐴑𐴞 𐴃𐴡𐴊𐴝𐴌𐴟𐴑 𐴀𐴝𐴌 𐴀𐴞𐴚𐴑𐴗𐴝𐴌𐴞 𐴒𐴡𐴙𐴅𐴧𐴙𐴠 𐴘𐴥𐴝𐴌 , 𐴀𐴥𐴞𐴃𐴝𐴌 𐴎𐴡𐴌𐴞𐴘𐴝 𐴀𐴝𐴌𐴀𐴥𐴡 𐴶 𐴲 𐴎𐴡𐴕 𐴁𐴠𐴍𐴝 𐴀𐴝𐴌 𐴳 𐴷 𐴎𐴡𐴕 𐴁𐴠𐴍𐴠 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴱 𐴔𐴝𐴕𐴟𐴙𐴐𐴢 𐴀𐴟𐴀𐴥𐴟𐴕 𐴈𐴝𐴔𐴝𐴘 𐴒𐴡𐴌𐴥𐴞 𐴁𐴡𐴓𐴧𐴝 𐴀𐴝𐴌𐴑𐴝𐴕𐴡𐴌 𐴃𐴟 𐴔𐴡𐴓𐴠𐴐𐴤𐴙𐴝 𐴎𐴝𐴌𐴊𐴠 , 𐴔𐴡𐴕𐴃𐴡𐴌 𐴀𐴥𐴞𐴃𐴝𐴌𐴝 𐴌𐴥𐴠 𐴈𐴡𐴕𐴥𐴡 𐴀𐴝𐴊𐴡𐴔 𐴁𐴞𐴘𐴝𐴌𐴞 𐴋𐴝𐴓𐴝𐴓𐴠 𐴀𐴝𐴕𐴠𐴌 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴇𐴝𐴓𐴡𐴃 𐴁𐴟𐴎𐴤𐴝 𐴕𐴦𐴡 𐴎𐴝 𐴁𐴡𐴓𐴞 𐴊𐴟𐴘𐴀𐴡𐴔 𐴊𐴝𐴌𐴟𐴒𐴝 / 𐴄𐴞𐴚 𐴔𐴡𐴚 𐴓𐴗𐴝𐴚𐴠 𐴈𐴡𐴘𐴧𐴠 𐴱 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴊𐴠 𐴀𐴥𐴞𐴃𐴝𐴌𐴝 𐴌𐴠 𐴑𐴡𐴁𐴤𐴞𐴋 𐴹 𐴱 𐴁𐴞𐴘𐴝𐴌𐴝𐴔 𐴀𐴝𐴏𐴥𐴠𐴕𐴠 𐴏𐴠𐴑 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴡𐴓𐴧𐴝 , 𐴑𐴡𐴔𐴁𐴙𐴟𐴄𐴝𐴌 𐴑𐴦𐴡𐴓𐴥𐴠𐴅𐴡𐴃 𐴑𐴡𐴁𐴤𐴞𐴋 𐴹 𐴱 𐴏𐴠𐴑 𐴒𐴡𐴌𐴥𐴠𐴊𐴠 𐴏𐴠𐴑𐴐𐴤𐴠𐴕𐴡𐴃 𐴌𐴝𐴙𐴑𐴧𐴙𐴠 𐴁𐴡𐴓𐴞 , 𐴐𐴗𐴠 𐴂𐴠𐴌𐴠 𐴏𐴝 𐴐𐴤𐴡𐴀𐴡𐴌𐴡𐴌 𐴀𐴠𐴔 𐴂𐴞 / 𐴀𐴥𐴟 𐴌𐴠𐴚 𐴀𐴡𐴚 𐴔𐴥𐴝𐴚𐴠 ( 𐴀𐴝𐴌 𐴀𐴠𐴉𐴢 𐴀𐴠 ) 𐴌𐴥𐴠 𐴈𐴡𐴘𐴧𐴠 𐴱𐴱

Sources : RFABurmese