𐴁𐴡𐴐𐴧𐴞𐴐𐴢 𐴉𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴉𐴡𐴄𐴟𐴒𐴝𐴌𐴝𐴉𐴝𐴌 𐴀𐴝𐴁𐴟𐴓 𐴑𐴝𐴓𐴝𐴔𐴡𐴌𐴠 𐴀𐴠𐴌𐴞 𐴊𐴞𐴁𐴡𐴓𐴧𐴝 𐴵 𐴳 𐴐𐴤𐴗𐴝𐴌 𐴖𐴡𐴌𐴠 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 𐴱𐴱

𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌𐴓𐴝 𐴈𐴝𐴔 𐴒𐴡𐴌𐴡𐴙𐴕𐴧𐴝 𐴁𐴝𐴚𐴓𐴝𐴊𐴠𐴐𐴤𐴞 𐴀𐴝𐴌 𐴊𐴠𐴐𐴁𐴞𐴊𐴠𐴐𐴤𐴞 𐴔𐴡𐴐𐴤𐴟𐴀𐴟𐴌 𐴔𐴝𐴕𐴥𐴟𐴙𐴐 𐴀𐴥𐴡𐴑𐴧𐴡𐴓 , 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓 , 𐴀𐴠𐴓𐴡𐴔𐴊𐴤𐴝𐴌 𐴀𐴥𐴡𐴑𐴧𐴡𐴓 , 𐴉𐴥𐴞𐴓𐴞𐴔 𐴁𐴝𐴕𐴡𐴘𐴧𐴝 𐴀𐴦𐴡𐴓 , 𐴉𐴡𐴄𐴤𐴟 𐴃𐴟𐴓𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 , 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴕𐴡𐴎𐴡𐴊𐴝𐴌𐴞 𐴒𐴡𐴌𐴡𐴙𐴕𐴧𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 , 𐴀𐴡𐴓𐴉𐴡 𐴁𐴡𐴙𐴐𐴧𐴝 𐴁𐴠𐴐𐴤𐴞 𐴈𐴝𐴁𐴞𐴓 𐴉𐴡𐴄𐴟𐴒𐴝𐴌𐴝𐴉𐴝𐴌 𐴀𐴝𐴁𐴟𐴓 𐴑𐴝𐴓𐴝𐴔𐴡𐴌𐴠 𐴀𐴠𐴌𐴞 𐴊𐴞𐴁𐴡𐴓𐴧𐴝 𐴈𐴡𐴘𐴧𐴠 𐴱 𐴋𐴞𐴏𐴡𐴔𐴁𐴡𐴌𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴌 𐴁𐴠𐴙𐴕𐴧𐴝 , 𐴁𐴡𐴐𐴧𐴞𐴐𐴢 𐴉𐴝𐴘𐴧𐴝 𐴀𐴝𐴁𐴟𐴓 𐴑𐴝𐴓𐴝𐴔𐴠 , 𐴑𐴟𐴃𐴤𐴟 𐴉𐴝𐴓𐴡𐴚 𐴑𐴠𐴀𐴠𐴔𐴡𐴌 𐴃𐴟 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴔𐴝𐴕𐴥𐴟𐴙𐴐𐴢 𐴓𐴡𐴘𐴎𐴝𐴌 𐴊𐴠 𐴁𐴦𐴝𐴏𐴢 𐴒𐴝𐴌𐴥𐴞 𐴀𐴥𐴡𐴑𐴧𐴡𐴓𐴡𐴌 𐴉𐴡𐴄𐴤𐴟 𐴃𐴟𐴙𐴓𐴃𐴡 𐴒𐴞𐴘𐴠𐴊𐴠 𐴀𐴥𐴠𐴍𐴠 , 𐴀𐴥𐴞𐴃𐴝𐴌𐴠 𐴁𐴡𐴕 𐴒𐴡𐴌𐴥𐴞 𐴑𐴠𐴀𐴠𐴔 𐴀𐴞𐴕𐴆𐴤𐴝𐴌𐴅𐴡𐴌 𐴈𐴝𐴣𐴏𐴠 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴑𐴟𐴃𐴤𐴟 𐴉𐴝𐴓𐴡𐴚 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔 𐴀𐴞𐴕𐴆𐴤𐴝𐴌𐴅𐴠 𐴁𐴠𐴐𐴤𐴞 𐴔𐴝𐴌𐴞 𐴁𐴝𐴊𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴙𐴠 𐴱𐴱

𐴀𐴝𐴁𐴟𐴓 𐴑𐴝𐴓𐴝𐴔𐴡𐴌𐴠 𐴑𐴟𐴃𐴤𐴟 𐴉𐴝𐴓𐴡𐴚 𐴑𐴠𐴀𐴠𐴔𐴡𐴌 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴃 𐴋𐴞𐴏𐴡𐴔𐴁𐴡𐴌𐴡 𐴰 𐴳 𐴃𐴝𐴌𐴥𐴞𐴑 𐴊𐴦𐴟𐴛𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴁𐴡𐴕𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴠 𐴱 𐴁𐴝𐴚𐴓𐴝𐴊𐴠𐴐𐴤𐴞 𐴑𐴝𐴕𐴟𐴕 𐴔𐴡𐴎𐴞𐴕 , 𐴁𐴡𐴕𐴒𐴡𐴙𐴅𐴧𐴙𐴠 𐴊𐴠 𐴔𐴝𐴙𐴕𐴐𐴤𐴡𐴌𐴠 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴌 𐴃𐴟 𐴴 𐴲 𐴒𐴤𐴡𐴕𐴄𐴝𐴌 𐴁𐴤𐴟𐴃𐴡𐴌𐴠 𐴑𐴦𐴟𐴍𐴡𐴃 𐴃𐴟𐴓𐴥𐴝𐴉𐴡𐴌𐴠 𐴱 𐴔𐴡𐴕𐴃𐴡𐴌 𐴀𐴝𐴁𐴟𐴓 𐴑𐴝𐴓𐴝𐴔𐴡𐴌𐴠 𐴊𐴟𐴘 𐴊𐴞𐴕 𐴁𐴝𐴊𐴠 𐴘𐴥𐴡 𐴑𐴦𐴟𐴍𐴡𐴃 𐴕𐴡 𐴃𐴟𐴓𐴥𐴞 , 𐴘𐴥𐴝𐴕𐴃𐴟 𐴓𐴡𐴃𐴞 𐴀𐴝𐴁𐴧𐴝𐴌𐴀𐴥𐴡 𐴰 𐴶 𐴒𐴤𐴡𐴕𐴄𐴝 𐴁𐴝𐴌𐴥𐴝𐴘 𐴊𐴞 𐴉𐴟𐴓𐴞𐴐𐴡𐴌 𐴒𐴤𐴣𐴄𐴞𐴃 𐴌𐴝𐴑𐴤𐴞 𐴊𐴞𐴘𐴠 𐴱 𐴃𐴦𐴡𐴘 𐴀𐴠𐴕𐴋𐴞𐴓𐴧𐴝 𐴒𐴡𐴌𐴦𐴡𐴕 𐴁𐴝𐴚𐴓𐴝𐴊𐴠𐴐𐴤𐴡𐴌 𐴊𐴡𐴏𐴃𐴟𐴌 𐴀𐴝𐴌 𐴇𐴥𐴝𐴘 𐴑𐴦𐴟𐴍𐴡𐴌 𐴑𐴝𐴕𐴟𐴕𐴡𐴌 𐴀𐴟𐴓𐴋𐴝 𐴱 𐴉𐴡𐴄𐴤𐴟 𐴃𐴟𐴓𐴦𐴡𐴕 𐴈𐴡𐴏𐴟𐴌𐴞 𐴕𐴡𐴀𐴡 , 𐴀𐴝𐴌 𐴀𐴝𐴁𐴟𐴓 𐴑𐴝𐴓𐴝𐴔𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴔𐴝𐴕𐴥𐴟𐴙𐴐𐴢 𐴓𐴡𐴘𐴎𐴝𐴌𐴊𐴠 𐴁𐴦𐴝𐴏𐴢 𐴒𐴝𐴌𐴥𐴞𐴌 𐴉𐴡𐴄𐴤𐴟 𐴃𐴟𐴙𐴓𐴧𐴙𐴠 𐴊𐴠 𐴏𐴟𐴌𐴈𐴝 𐴁𐴤𐴝𐴉𐴠 𐴕𐴡𐴀𐴡 , 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴙𐴕𐴐𐴤𐴡𐴌 𐴔𐴦𐴟𐴕𐴃𐴟 𐴱𐴱

𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴏𐴟𐴌𐴒𐴡𐴌𐴥𐴞 𐴊𐴟𐴕𐴕𐴞𐴘𐴝𐴘𐴧𐴠 𐴕𐴡 𐴎𐴝𐴕𐴥𐴠 𐴉𐴝𐴀𐴝𐴕 𐴓𐴡𐴘 𐴎𐴝𐴌𐴊𐴠 𐴕𐴡𐴀𐴡 , 𐴎𐴡𐴊𐴞 𐴊𐴟𐴕𐴞𐴘𐴝𐴘𐴧𐴠 𐴕𐴡 𐴎𐴝𐴕𐴥𐴠 𐴉𐴝𐴀𐴝𐴕 𐴓𐴡𐴘 𐴎𐴝𐴌𐴊𐴠 𐴀𐴥𐴡𐴘𐴃𐴡 𐴁𐴡𐴓𐴞 , 𐴉𐴡𐴄𐴟𐴒𐴝𐴌𐴝𐴉𐴝𐴌𐴡𐴌 𐴎𐴡𐴌𐴞𐴘𐴝 𐴔𐴠𐴋𐴞𐴘𐴝𐴃 𐴀𐴟𐴍𐴥𐴞𐴓𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴡𐴐𐴤𐴡𐴌𐴔𐴝𐴕𐴞 𐴀𐴥𐴡𐴘𐴃𐴡 𐴱 𐴀𐴝𐴁𐴟𐴓 𐴑𐴝𐴓𐴝𐴔 𐴁𐴡𐴐𐴢 𐴵 𐴳 𐴁𐴡𐴏𐴡𐴌 , 𐴎𐴞𐴁𐴤𐴝 𐴲 𐴹 𐴹 𐴱 𐴐𐴤𐴡𐴕𐴡𐴃 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴁𐴡𐴌𐴒𐴡𐴎𐴞𐴁𐴞𐴓𐴡𐴌 𐴃𐴟 𐴇𐴥𐴝𐴣𐴃 𐴁𐴡𐴏𐴡𐴌 𐴁𐴡𐴐𐴤𐴡𐴃 𐴔𐴦𐴝𐴣 𐴁𐴝𐴉𐴡𐴌 𐴉𐴥𐴟𐴣𐴖𐴝𐴣𐴃𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴦𐴝𐴘 𐴌𐴞𐴉𐴟𐴎𐴞 𐴁𐴡𐴕𐴞 𐴃𐴤𐴝𐴙𐴑𐴧𐴙𐴠 𐴊𐴠 𐴸 𐴲 𐴁𐴡𐴏𐴡𐴌 𐴀𐴥𐴡𐴘𐴧𐴠 𐴱 𐴀𐴝𐴁𐴟𐴓 𐴑𐴝𐴓𐴝𐴔 𐴁𐴠𐴐𐴤𐴞 𐴈𐴝𐴁𐴞𐴓 𐴀𐴟𐴒𐴧𐴗𐴝 𐴉𐴡𐴄𐴟𐴒𐴝𐴌𐴝𐴉𐴝𐴌 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 𐴉𐴡𐴄𐴤𐴟 𐴃𐴟𐴓𐴝𐴌 𐴎𐴞𐴁𐴧𐴝𐴃𐴡𐴃 𐴊𐴟𐴘 𐴁𐴝𐴌 𐴁𐴡𐴐𐴧𐴞𐴐𐴢 𐴉𐴝𐴘𐴧𐴠 𐴱 𐴀𐴝𐴌 𐴀𐴥𐴞𐴁𐴝𐴌 𐴃𐴟 𐴏𐴝𐴙𐴌 𐴎𐴡𐴕 𐴒𐴟𐴌𐴝 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴝𐴏𐴥𐴠 , 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴝𐴌𐴝 𐴕𐴞𐴏𐴠 𐴏𐴥𐴝𐴙𐴕 𐴒𐴡𐴙𐴅𐴧𐴞 𐴊𐴠 𐴀𐴥𐴟𐴕 𐴁𐴠𐴒𐴧𐴟𐴕𐴠 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴠 𐴀𐴝𐴌𐴡𐴎 𐴒𐴡𐴌𐴞𐴌 𐴊𐴠 , 𐴀𐴝𐴁𐴟𐴓 𐴑𐴝𐴓𐴝𐴔𐴡𐴌𐴠 𐴊𐴠𐴌𐴞 𐴕𐴡 𐴒𐴡𐴌𐴥𐴞 𐴈𐴡𐴕𐴥𐴡 𐴐𐴡𐴌𐴡𐴃 𐴏𐴥𐴝𐴌𐴝𐴀𐴠𐴌𐴞 𐴊𐴞𐴁𐴡𐴓𐴧𐴝 𐴱𐴱

Sources : Rvision