𐴀𐴠𐴓𐴠𐴑𐴄𐴤𐴡𐴌𐴡𐴕𐴥𐴞𐴑 𐴑𐴝𐴕𐴟𐴕𐴡𐴌 𐴀𐴝𐴕𐴋𐴝𐴌𐴠 , 𐴑𐴠𐴂𐴢 𐴂𐴟𐴌𐴟𐴃 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝 𐴀𐴟𐴒𐴧𐴗𐴝 𐴌𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴥𐴡𐴓 𐴔𐴝𐴙𐴅𐴧𐴙𐴠 𐴱𐴱

𐴑𐴠𐴂𐴢 𐴂𐴟𐴌𐴟 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴞𐴄𐴧𐴡 𐴖𐴡𐴌𐴡𐴌 𐴀𐴞𐴐𐴑𐴟𐴓𐴡𐴃 𐴊𐴡𐴐𐴢𐴀𐴡𐴔 𐴑𐴠𐴓𐴝𐴏𐴡𐴃 𐴉𐴡𐴌𐴥𐴠 𐴊𐴠 / 𐴔𐴡𐴚 𐴄𐴞𐴕 𐴆𐴝𐴕 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌𐴥𐴡 𐴌𐴠 , 𐴋𐴞𐴏𐴡𐴔𐴁𐴡𐴌 𐴔𐴥𐴝𐴐𐴡𐴌 𐴳 𐴲 𐴃𐴝𐴌𐴥𐴞𐴑𐴡𐴃 , 𐴑𐴠𐴂𐴢 𐴂𐴟𐴌𐴟 𐴐𐴤𐴡𐴀𐴡𐴌𐴡𐴌 𐴀𐴝𐴊𐴝𐴓𐴡𐴃𐴡𐴌 𐴅𐴡𐴐𐴢 𐴐𐴤𐴝𐴀𐴝𐴉𐴠 𐴀𐴠𐴓𐴠𐴑𐴄𐴤𐴡𐴌𐴡𐴕𐴥𐴞𐴑 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴓𐴡𐴔𐴁𐴡𐴌 𐴳 𐴳 ( 𐴁𐴞 )𐴓𐴡𐴘 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴉𐴥𐴟𐴕𐴝𐴘 𐴊𐴞𐴘𐴧𐴠 𐴱 𐴀𐴝𐴣𐴀𐴝𐴌 𐴉𐴟𐴖𐴝 𐴌𐴥𐴠 𐴕𐴡 𐴁𐴟𐴎𐴤𐴞 𐴑𐴠𐴙𐴏𐴧𐴟 𐴓𐴠𐴙𐴑𐴧𐴙𐴠 𐴊𐴠 𐴘𐴥𐴝𐴕𐴡𐴃 , 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴙𐴠 𐴊𐴠 𐴘𐴥𐴝𐴕 , 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝 𐴀𐴥𐴞𐴏𐴝𐴉𐴠 𐴑𐴡𐴄𐴤𐴞𐴕 𐴀𐴝𐴌 𐴎𐴝𐴓𐴠𐴔𐴝𐴕𐴝 𐴐𐴤𐴝𐴎𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴉𐴟𐴖𐴝 𐴖𐴥𐴝𐴌 𐴁𐴝𐴉𐴠 𐴈𐴡𐴘𐴧𐴠 𐴱 𐴐𐴤𐴝𐴎𐴝𐴌 𐴄𐴝𐴙𐴔 𐴈𐴡𐴔𐴝𐴘 𐴁𐴤𐴡𐴓𐴧𐴝 , 𐴖𐴡𐴌𐴡𐴌 𐴀𐴝𐴊𐴝𐴓𐴡𐴃𐴡𐴃 (𐴇𐴥𐴝𐴘 𐴑𐴦𐴟𐴍𐴡𐴃) 𐴀𐴝𐴂𐴞𐴓 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴀𐴟𐴑𐴞𐴓𐴡𐴌 𐴓𐴡𐴘 𐴔𐴡𐴐𐴟𐴖𐴝𐴌𐴝 𐴒𐴡𐴙𐴅𐴧𐴙𐴠 𐴁𐴡𐴓𐴞 𐴘𐴥𐴡 𐴉𐴟𐴖𐴝 𐴀𐴥𐴞𐴁𐴝𐴌 𐴁𐴝𐴉𐴠 𐴈𐴡𐴘𐴧𐴠 𐴱𐴱

𐴀𐴦𐴝𐴛 𐴀𐴝𐴂𐴞𐴓 𐴒𐴡𐴙𐴃𐴧𐴡 𐴏𐴝𐴀𐴝𐴙𐴌 , 𐴀𐴟𐴑𐴞𐴓𐴠 𐴀𐴦𐴝𐴛 𐴈𐴥𐴝𐴔𐴝𐴈𐴥𐴝 𐴎𐴞𐴃𐴞 𐴉𐴝𐴙𐴅𐴧𐴟𐴔 𐴊𐴠 𐴘𐴥𐴝𐴕𐴡𐴌 𐴁𐴞𐴐𐴧𐴝𐴐𐴢 𐴊𐴞𐴘𐴧𐴠 𐴱 𐴀𐴝𐴣𐴀𐴝𐴌 𐴉𐴟𐴖𐴝 𐴀𐴝𐴌𐴑𐴝𐴕 𐴀𐴝𐴌𐴔𐴞𐴌 (𐴔𐴡𐴒𐴁𐴝𐴒𐴞𐴌)𐴏𐴥𐴝𐴣𐴀𐴝𐴃𐴠 𐴅𐴡𐴍𐴞𐴃𐴡 𐴕𐴥𐴝𐴘 , 𐴀𐴝𐴌 𐴀𐴝𐴌𐴑𐴝𐴕 𐴀𐴝𐴌𐴔𐴞𐴌 𐴏𐴥𐴝𐴣𐴀𐴝𐴃𐴠 𐴃𐴝𐴓𐴧𐴟𐴑 𐴁𐴟𐴎𐴤𐴝 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴡𐴕𐴥𐴡 𐴏𐴞𐴏𐴢 , 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴀𐴝𐴣𐴀𐴝𐴌 𐴉𐴟𐴖𐴝𐴌 𐴔𐴟𐴁𐴝𐴙𐴓𐴡𐴃 𐴕𐴥𐴡 𐴉𐴝𐴀𐴝 𐴱 𐴔𐴡𐴚 𐴄𐴞𐴕 𐴆𐴝𐴕𐴡𐴌𐴠 , 𐴑𐴠𐴂𐴢 𐴂𐴟𐴌𐴟 𐴐𐴤𐴡𐴀𐴡𐴌𐴡𐴌 𐴀𐴝𐴕𐴋𐴝𐴌𐴠 𐴀𐴝𐴏𐴥𐴠 𐴊𐴠 𐴕𐴠𐴁𐴤𐴞 𐴉𐴦𐴡𐴏𐴡𐴌 𐴁𐴝𐴁𐴡𐴃𐴠 𐴅𐴝𐴕𐴑𐴝𐴌𐴞 𐴀𐴥𐴡𐴑𐴧𐴡𐴓 𐴉𐴡𐴌𐴞𐴐𐴑𐴝𐴌 𐴁𐴤𐴝𐴉𐴠 𐴀𐴝𐴌𐴑𐴝𐴕 𐴀𐴝𐴌𐴔𐴞𐴌𐴠 𐴎𐴝𐴕𐴝𐴘 𐴊𐴠𐴌 𐴊𐴠 𐴘𐴥𐴝𐴕𐴡𐴌 𐴉𐴝𐴑𐴧𐴝 𐴈𐴥𐴡𐴁𐴡𐴌 𐴓𐴡𐴘 , 𐴉𐴟𐴓𐴞𐴐𐴢 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞 𐴋𐴦𐴝𐴘 𐴘𐴠 𐴔𐴞𐴓𐴞 , 𐴑𐴠𐴂𐴢 𐴂𐴟𐴌𐴟 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴥𐴞𐴄𐴧𐴡 𐴉𐴝𐴌𐴝𐴃, 𐴕𐴞𐴎𐴡𐴌 𐴒𐴤𐴡𐴌𐴡𐴌 𐴃𐴟 𐴶 𐴲 / 𐴎𐴟𐴓𐴝𐴘 𐴹 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴕 𐴒𐴡𐴙𐴅𐴧𐴞𐴀𐴞𐴓 𐴱 ,𐴎𐴠 𐴅𐴝𐴕𐴑𐴝𐴌𐴞𐴌 𐴁𐴝𐴁𐴡𐴃𐴠 𐴀𐴥𐴞𐴃𐴝𐴌𐴠 𐴁𐴡𐴕 𐴒𐴡𐴙𐴅𐴧𐴙𐴠 , 𐴀𐴥𐴞𐴀𐴞𐴕 𐴁𐴡𐴌𐴝𐴁𐴡𐴌 𐴀𐴥𐴞𐴃𐴝𐴌 𐴔𐴟𐴁𐴝𐴙𐴓𐴡𐴃 𐴉𐴝𐴀𐴝 𐴒𐴞𐴘𐴧𐴠 , 𐴀𐴠𐴑 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴁𐴝𐴊𐴠 𐴀𐴝𐴊𐴝𐴓𐴡𐴃𐴠 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴙𐴠 𐴊𐴠 𐴱𐴱

Sources : Narinjara.com