𐴀𐴝𐴘 𐴏𐴞 𐴏𐴞 / 𐴀𐴝𐴘 𐴏𐴞 𐴅𐴠 𐴌𐴠 𐴃𐴦𐴝𐴙𐴊 𐴒𐴡𐴙𐴅𐴧𐴙𐴠 𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴑𐴄𐴞𐴁𐴥𐴞𐴏𐴄 𐴊𐴟𐴘 𐴎𐴡𐴕𐴡𐴌𐴠 𐴵 𐴰 𐴵 ( 𐴑𐴝𐴅𐴞 ) 𐴓𐴡𐴘 𐴁𐴡𐴕𐴒𐴡𐴌𐴥𐴞 𐴎𐴡𐴌𐴞𐴁𐴝𐴕𐴝 𐴒𐴡𐴙𐴅𐴧𐴙𐴠 𐴱𐴱

𐴀𐴝𐴘 𐴏𐴞 𐴏𐴞 / 𐴀𐴝𐴘 𐴏𐴞 𐴅𐴠 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴍𐴡𐴃 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴙𐴠 𐴊𐴠 𐴀𐴥𐴠𐴃𐴡𐴓𐴧𐴝 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴀𐴟𐴓𐴋𐴝 𐴏𐴡𐴓𐴠𐴌 𐴊𐴠 𐴔𐴦𐴡𐴊𐴧𐴞𐴔𐴝𐴌 𐴃𐴦𐴝𐴙𐴊 𐴒𐴡𐴌𐴥𐴞 , 𐴈𐴥𐴡𐴁𐴡𐴌𐴞 𐴌𐴠𐴂𐴟𐴄𐴝𐴌𐴡𐴌 𐴔𐴡𐴅𐴓𐴞𐴏𐴢 ( 𐴂𐴠𐴌𐴠𐴏𐴢 𐴑𐴝𐴕𐴉𐴠𐴌𐴥𐴠𐴣𐴏𐴢 ) 𐴒𐴡𐴌𐴥𐴞𐴁𐴝𐴌 𐴏𐴡𐴌𐴞𐴐𐴃𐴡𐴌𐴡 𐴒𐴡𐴌𐴥𐴠𐴌 𐴊𐴠 𐴱 𐴀𐴠𐴔𐴂𐴞𐴌 𐴁𐴤𐴟𐴍𐴡𐴃 𐴃𐴤𐴞𐴘𐴧𐴝𐴙𐴓 𐴊𐴠 𐴀𐴝𐴐𐴤𐴝𐴊𐴤𐴝𐴌 𐴀𐴠𐴑𐴄𐴞𐴁𐴤𐴞𐴏𐴄 𐴊𐴟𐴘 𐴎𐴡𐴕𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌𐴠 𐴁𐴠𐴀𐴞𐴎𐴧𐴡𐴃 𐴒𐴡𐴌𐴡𐴌 𐴁𐴡𐴓𐴞 𐴈𐴡𐴘 𐴊𐴤𐴝𐴌𐴝 𐴓𐴡𐴔𐴁𐴡𐴌 𐴵 𐴰 𐴵 ( 𐴑𐴝𐴅𐴞) 𐴓𐴡𐴘 𐴁𐴡𐴕𐴒𐴡𐴌𐴞 𐴎𐴡𐴌𐴞𐴁𐴝𐴕𐴝 𐴒𐴡𐴙𐴅𐴧𐴙𐴠 𐴱 𐴂𐴥𐴠𐴒𐴤𐴟 𐴋𐴞𐴐𐴄𐴞𐴑𐴡𐴌 𐴕𐴥𐴠 𐴃𐴡𐴓𐴧𐴝𐴚 𐴐𐴤𐴡𐴀𐴡𐴌𐴡𐴌 𐴃𐴟 𐴀𐴠𐴔𐴂𐴞𐴌 𐴁𐴤𐴟𐴍𐴡𐴃 𐴃𐴤𐴞𐴘𐴧𐴝𐴙𐴓 𐴊𐴠 / 𐴀𐴥𐴟 𐴑𐴙𐴡 𐴏𐴥𐴞𐴚 𐴀𐴝𐴌 𐴀𐴥𐴟 𐴏𐴥𐴠𐴕 𐴏𐴝𐴚 𐴄𐴤𐴝 𐴊𐴟𐴕𐴥𐴞 𐴎𐴡𐴕𐴠 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴅𐴠𐴕𐴟𐴏𐴥𐴝𐴙𐴋𐴡𐴌 𐴀𐴝𐴐𐴤𐴝𐴔𐴞 𐴊𐴞 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 (𐴀𐴝𐴘 𐴏𐴞 𐴅𐴠) 𐴀𐴝𐴌 𐴀𐴝𐴘 𐴏𐴞 𐴏𐴞 𐴑𐴦𐴟𐴍𐴡𐴃 , 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴊𐴠 𐴘𐴥𐴝𐴕 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴔𐴝𐴕𐴡𐴑 𐴔𐴡𐴎𐴞𐴕 𐴀𐴥𐴡𐴘𐴧𐴠𐴊𐴠 𐴘𐴥𐴝𐴕𐴡𐴌𐴠 𐴃𐴦𐴝𐴙𐴊 𐴒𐴡𐴌𐴥𐴞 𐴱𐴱

𐴋𐴞𐴏𐴡𐴔𐴁𐴡𐴌𐴡𐴌 𐴷 𐴲 𐴃𐴝𐴌𐴥𐴞𐴑𐴡𐴃 𐴈𐴥𐴡𐴁𐴡𐴌𐴞 𐴔𐴡𐴅𐴓𐴞𐴏𐴢 𐴒𐴡𐴌𐴥𐴞 𐴁𐴡𐴓𐴧𐴝 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌𐴠 𐴁𐴠𐴀𐴞𐴎𐴧𐴡𐴃 𐴒𐴡𐴌𐴦𐴡𐴌 𐴁𐴡𐴓𐴞 𐴈𐴡𐴘 / 𐴁𐴟𐴔𐴥𐴟 𐴖𐴠 𐴂𐴟𐴌𐴥𐴟 𐴀𐴡𐴚 𐴉𐴥𐴡𐴌𐴘𐴝𐴊𐴞 𐴁𐴡𐴕𐴞 , 𐴀𐴥𐴞𐴃𐴝𐴌𐴝𐴌 𐴓𐴝 𐴴 𐴲 𐴃𐴝𐴌𐴥𐴞𐴑𐴡𐴃 𐴑𐴠𐴙𐴏𐴢 𐴑𐴤𐴟𐴓𐴧𐴙𐴠 𐴊𐴠 𐴱 𐴀𐴠𐴈𐴥𐴡𐴕 𐴀𐴝𐴊𐴝𐴓𐴡𐴃𐴡𐴌 𐴖𐴝𐴌𐴞𐴕 𐴔𐴡𐴎𐴞𐴕 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴁𐴡𐴕𐴒𐴡𐴌𐴥𐴞 , 𐴂𐴠𐴌𐴠 𐴐𐴤𐴡𐴀𐴡𐴌𐴡𐴌 𐴒𐴝𐴣𐴌𐴝𐴃𐴡𐴃 𐴌𐴝𐴑𐴧𐴙𐴠 𐴁𐴡𐴓𐴞 , 𐴂𐴠𐴌𐴠 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴏𐴥𐴠𐴚 𐴎𐴡 𐴖𐴥𐴝𐴚𐴠 ” 𐴔𐴙𐴝𐴣𐴔𐴧𐴝𐴌 𐴕𐴦𐴡 ” 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴢 𐴀𐴡𐴓𐴝𐴌𐴠 𐴈𐴡𐴘𐴧𐴠 𐴱 𐴀𐴥𐴟 𐴑𐴙𐴡 𐴏𐴥𐴠𐴚 𐴰 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴍𐴡𐴃 ( 𐴘𐴟 𐴀𐴠𐴕 𐴋𐴞 𐴂𐴞 ) 𐴌 𐴀𐴝𐴐𐴤𐴝𐴊𐴤𐴝𐴌 𐴀𐴥𐴞𐴏𐴝𐴉𐴠 , 𐴀𐴝𐴌 𐴀𐴥𐴟 𐴏𐴥𐴠𐴕 𐴏𐴝𐴚 𐴄𐴤𐴝 𐴰 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴍𐴡𐴃 𐴀𐴠𐴑𐴡𐴑 ( 𐴃𐴝𐴏𐴧𐴞𐴥 𐴂𐴥𐴟𐴒𐴓𐴥𐴝 ) 𐴀𐴝𐴐𐴤𐴊𐴤𐴝𐴌 𐴀𐴥𐴞𐴏𐴝𐴉𐴠 𐴃𐴤𐴞𐴘𐴧𐴝𐴙𐴓 , 𐴔𐴡𐴕𐴃𐴡𐴌 𐴊𐴟𐴕𐴥𐴞 𐴎𐴡𐴕 𐴁𐴤𐴟𐴄 𐴈𐴡𐴔 𐴉𐴦𐴡𐴕𐴠 𐴀𐴠𐴔𐴂𐴞 𐴁𐴡𐴕𐴞 𐴕𐴥𐴡 𐴉𐴝𐴌𐴠 𐴱 𐴁𐴤𐴞𐴕𐴧𐴡 𐴋𐴞𐴐𐴄𐴤𐴞𐴑 𐴀𐴥𐴡𐴑𐴧𐴡𐴓𐴡𐴃 𐴁𐴤𐴟𐴍𐴡𐴃 𐴎𐴞𐴃𐴞 𐴕𐴥𐴡 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴰 𐴳 𐴎𐴡𐴕 𐴉𐴡𐴙𐴅𐴧𐴡𐴕𐴃𐴡 𐴀𐴝𐴐𐴤𐴝𐴊𐴤𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 ,𐴀𐴞𐴃𐴝𐴌𐴝 𐴊𐴟𐴕𐴥𐴞𐴎𐴡𐴕𐴠 𐴔𐴟𐴌𐴡𐴁𐴧𐴞 𐴘𐴝𐴕𐴝 𐴒𐴡𐴌𐴞 𐴁𐴤𐴞𐴌𐴝𐴘 ,𐴀𐴝𐴘 𐴏𐴞 𐴅𐴠𐴌 𐴔𐴦𐴡𐴊𐴧𐴞𐴔𐴝𐴌 𐴃𐴦𐴝𐴙𐴃𐴡𐴊 𐴀𐴠𐴑𐴔𐴡𐴃 𐴒𐴡𐴌𐴥𐴞 𐴁𐴝𐴊𐴠 𐴲 𐴲 𐴋𐴞𐴏𐴡𐴔𐴁𐴡𐴌 𐴔𐴥𐴝𐴐𐴡𐴃 𐴀𐴠𐴓𐴝𐴕 𐴕𐴝𐴔𐴥𐴝 𐴘𐴥𐴡 𐴕𐴠𐴓𐴦𐴝𐴙𐴓 𐴱𐴱

Sources : Myanmar Now