𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 , 𐴁𐴞𐴄𐴤𐴞𐴐𐴢 𐴇𐴥𐴡𐴑𐴟𐴔𐴡𐴃𐴡𐴌𐴠 𐴁𐴡𐴌𐴔𐴥𐴝𐴌 𐴀𐴟𐴓𐴋𐴝 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴔𐴦𐴡𐴊𐴧𐴞𐴔𐴝𐴃 𐴈𐴥𐴝𐴔𐴝𐴈𐴥𐴝 𐴅𐴗𐴥𐴝𐴙𐴕 𐴀𐴥𐴡𐴙𐴁𐴡𐴓𐴧𐴝 𐴈𐴡𐴘𐴧𐴠 𐴱𐴱

𐴕𐴞𐴏𐴠 𐴏𐴥𐴝𐴀𐴙𐴕 𐴒𐴡𐴌𐴥𐴞 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴓𐴝𐴘𐴧𐴠𐴊𐴠 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 , 𐴕𐴠𐴊𐴤𐴝𐴌𐴓𐴥𐴠𐴕𐴡𐴌 𐴐𐴤𐴡𐴀𐴡𐴌 𐴇𐴥𐴠𐴒𐴡𐴃 𐴀𐴝𐴏𐴠𐴊𐴠 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴅𐴠 ) 𐴃𐴢 𐴔𐴝𐴎𐴠 𐴏𐴡𐴓𐴠𐴌 𐴊𐴠 𐴁𐴡𐴌𐴔𐴥𐴝𐴌 𐴀𐴟𐴓𐴋𐴝 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴔𐴦𐴡𐴊𐴧𐴞𐴔𐴝𐴃𐴢 𐴃𐴡𐴌𐴝 𐴃𐴡𐴌𐴞 𐴅𐴗𐴝𐴙𐴕 𐴀𐴥𐴡𐴙𐴁𐴡𐴓𐴧𐴝 𐴱 𐴁𐴞𐴄𐴤𐴞𐴐𐴢 𐴇𐴥𐴡𐴑𐴟𐴔𐴡𐴃𐴡 𐴌𐴠 𐴀𐴝𐴌𐴡𐴎 𐴒𐴡𐴙𐴅𐴧𐴙𐴠 𐴱 ( 𐴀𐴝𐴘 𐴏𐴞 𐴅𐴠 ) 𐴑𐴦𐴟𐴍𐴠 𐴀𐴡𐴋𐴝𐴌 𐴒𐴡𐴙𐴅𐴧𐴞𐴀𐴞𐴓 𐴊𐴠 𐴂𐴡𐴌𐴡𐴖𐴥𐴞𐴐𐴕𐴠𐴓 𐴔𐴞𐴎𐴦𐴟𐴌 𐴱 𐴀𐴥𐴞𐴕𐴡𐴌𐴥𐴠 𐴁𐴡𐴌𐴔𐴥𐴝 𐴘𐴠 𐴕𐴡 𐴔𐴝𐴕𐴠𐴌 𐴊𐴠 𐴘𐴥𐴝𐴕 𐴏𐴥𐴝𐴉𐴢 𐴏𐴥𐴝𐴉𐴢 𐴊𐴠𐴈𐴥𐴝 𐴎𐴝𐴀𐴝𐴌 𐴱 𐴀𐴥𐴠𐴃𐴡𐴓𐴧𐴝 𐴊𐴠𐴐𐴁𐴞𐴊𐴠𐴐𐴤𐴡𐴌 𐴃𐴟 , 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴥𐴝 𐴁𐴡𐴕𐴒𐴡𐴌𐴥𐴞𐴁𐴡𐴓𐴧𐴝 𐴀𐴝𐴌𐴀𐴥𐴡 𐴁𐴠𐴙𐴐𐴢 𐴒𐴡𐴌𐴥𐴞 𐴁𐴡𐴌𐴔𐴥𐴝 𐴌𐴠 𐴏𐴞𐴂𐴢𐴊𐴞𐴘𐴝 𐴉𐴡𐴌𐴞𐴁𐴤𐴡 𐴱 𐴀𐴝𐴌 𐴈𐴡𐴏𐴥𐴟𐴌𐴁𐴡𐴕 𐴀𐴥𐴡𐴑𐴧𐴡𐴓𐴡 𐴌𐴠 𐴊𐴤𐴡𐴌𐴝 𐴊𐴤𐴡𐴌𐴞 𐴈𐴥𐴝𐴄𐴞 𐴁𐴝𐴕𐴝 𐴉𐴡𐴌𐴞𐴁𐴡 𐴱 𐴁𐴡𐴌𐴔𐴥𐴝 𐴘𐴠 𐴅𐴠𐴕𐴟𐴏𐴥𐴝𐴙𐴋 𐴕𐴞𐴘𐴡𐴔 𐴉𐴡𐴃𐴧𐴡𐴌𐴡𐴌 𐴀𐴟𐴏𐴦𐴟𐴓 𐴁𐴤𐴝𐴚𐴞 𐴉𐴥𐴠𐴓𐴝𐴘𐴧𐴠𐴊𐴠 𐴱 𐴘𐴥𐴝𐴕𐴡𐴓𐴧𐴝 𐴒𐴝𐴔𐴁𐴞𐴘𐴝 𐴘𐴠 𐴁𐴡𐴌𐴔𐴥𐴝 𐴌𐴠 𐴀𐴝𐴐𐴤𐴝𐴔𐴞 𐴁𐴝𐴕𐴝𐴘 ( 𐴀𐴝𐴘 𐴏𐴞 𐴅𐴠 ) 𐴀𐴞𐴕𐴏𐴝𐴉𐴢 𐴑𐴦𐴟𐴍𐴡𐴃 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴊𐴠 𐴀𐴠𐴑 𐴁𐴡𐴏𐴥𐴡𐴌 𐴉𐴟𐴌𐴝𐴘 𐴒𐴞𐴘𐴡𐴘 𐴱𐴱

𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴃𐴟 𐴈𐴡𐴏𐴥𐴟𐴌𐴁𐴡𐴕 𐴁𐴡𐴕𐴞 𐴅𐴟𐴖𐴝𐴁 𐴊𐴠𐴇𐴥𐴞 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴠 𐴀𐴠𐴑𐴀𐴡𐴔 𐴁𐴝𐴌 𐴱 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝 𐴕𐴦𐴡 , 𐴁𐴡𐴌𐴔𐴥𐴝𐴌 𐴀𐴡𐴙𐴕𐴧𐴡 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴎𐴞𐴃𐴝𐴌𐴥𐴝 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔𐴡𐴌 𐴏𐴝𐴑𐴧𐴝𐴃 𐴉𐴞𐴐𐴤𐴝 𐴈𐴥𐴝𐴀𐴝𐴌 𐴱 𐴁𐴠𐴙𐴒𐴧𐴟𐴕𐴥𐴠 𐴀𐴝𐴘 𐴏𐴞 𐴅𐴠 𐴑𐴦𐴟𐴍𐴡𐴃 𐴏𐴡𐴓𐴠𐴌 𐴊𐴠 𐴔𐴦𐴡𐴊𐴧𐴞𐴔𐴝 𐴌𐴠 𐴏𐴗𐴝𐴒𐴡𐴃 𐴒𐴡𐴙𐴅𐴧𐴙𐴠 𐴱 𐴁𐴡𐴌𐴔𐴥𐴝𐴌 𐴇𐴥𐴡𐴑𐴟𐴔𐴡𐴃𐴡𐴌 𐴈𐴡𐴕𐴥 𐴃𐴡𐴌𐴞𐴑𐴝 𐴓𐴡𐴘 𐴘𐴝𐴃𐴡 𐴈𐴡𐴕𐴥𐴡 𐴑𐴦𐴟𐴍𐴡𐴌 𐴃𐴟 𐴀𐴝𐴣𐴀𐴝𐴌𐴝 ( 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 ) 𐴁𐴞𐴏𐴝𐴌 𐴀𐴝𐴌 𐴀𐴞𐴕𐴏𐴝𐴉𐴢 𐴕𐴡 𐴉𐴝𐴘𐴧𐴟𐴔 𐴊𐴠 𐴎𐴝𐴕𐴞 𐴱 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴅𐴠𐴕𐴟𐴏𐴥𐴝𐴙𐴋 𐴀𐴝𐴌 𐴎𐴟𐴓𐴟𐴔 𐴒𐴡𐴌𐴥𐴝 𐴁𐴡𐴕𐴒𐴡𐴌𐴥𐴞𐴁𐴡𐴓𐴧𐴝 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴁𐴤𐴟𐴎𐴝𐴘 𐴕𐴡 𐴉𐴥𐴠𐴓𐴝𐴙𐴁𐴡𐴓𐴧𐴝 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴅𐴠𐴌 ) 𐴇𐴥𐴡𐴣𐴃𐴡𐴌𐴥𐴡𐴖𐴧𐴝 𐴇𐴝𐴑𐴠𐴔𐴠 𐴉𐴥𐴝𐴙𐴏𐴠𐴓𐴝 𐴒𐴡𐴌𐴞 𐴁𐴡𐴌𐴔𐴥𐴝 𐴌𐴠 𐴂𐴡𐴌𐴡𐴖𐴥𐴞𐴐𐴕𐴠𐴓 𐴔𐴞𐴎𐴦𐴟𐴌𐴡𐴌 𐴀𐴡𐴋𐴝𐴌 𐴊𐴞𐴘𐴠 𐴱𐴱

𐴓𐴝𐴒𐴝𐴃𐴝𐴌 𐴑𐴝𐴌𐴖𐴝𐴘 𐴘𐴥𐴡 𐴒𐴡𐴌𐴥𐴝𐴃 𐴀𐴝𐴏𐴠 𐴀𐴥𐴡𐴙𐴃 𐴉𐴝𐴌𐴠 𐴈𐴡𐴀𐴠𐴑 𐴁𐴡𐴏𐴥𐴡𐴌 𐴓𐴝𐴒𐴞𐴁𐴤𐴡 𐴱 𐴀𐴠 𐴒𐴠𐴂𐴢 𐴘𐴝𐴕𐴡𐴃 𐴁𐴡𐴌𐴔𐴥𐴝 𐴘𐴠 𐴑𐴦𐴟𐴍𐴡𐴌 𐴀𐴡𐴋𐴝𐴌 𐴔𐴝𐴕𐴠𐴌 𐴁𐴡𐴓𐴞 𐴊𐴠𐴈𐴥𐴝𐴘 𐴁𐴡𐴓𐴧𐴝 𐴂𐴝𐴂𐴓𐴞𐴑𐴠 𐴕𐴡 𐴎𐴝𐴕𐴥𐴠 𐴉𐴝𐴕 𐴑𐴦𐴟𐴍𐴡𐴃 𐴊𐴟𐴘 𐴁𐴝𐴌 𐴌𐴠𐴂𐴟𐴄 𐴉𐴦𐴡𐴣𐴏𐴥𐴝𐴘𐴧𐴠 𐴱 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴑𐴦𐴟𐴍𐴡𐴌 𐴀𐴡𐴋𐴝𐴌 𐴕𐴡 𐴔𐴝𐴕𐴠𐴌 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴅𐴠𐴕𐴟𐴏𐴥𐴝𐴙𐴋 𐴎𐴟𐴓𐴟𐴔 𐴀𐴥𐴡𐴊𐴡𐴊𐴠 𐴃𐴤𐴝𐴑𐴞 𐴒𐴞𐴘𐴡𐴘 𐴱 𐴎𐴡𐴊𐴞 𐴊𐴠𐴐𐴁𐴞𐴊𐴠𐴐𐴤𐴠 𐴀𐴝𐴌𐴅𐴤𐴠𐴕 𐴁𐴡𐴌𐴔𐴥𐴝 𐴌𐴠 𐴏𐴞𐴂𐴢 𐴊𐴞𐴘𐴝 𐴕𐴡 𐴁𐴝𐴌𐴥𐴝𐴘 𐴓𐴠 𐴱 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴠 𐴀𐴠𐴈𐴥𐴡𐴕 𐴀𐴝𐴏𐴠𐴊𐴠 𐴀𐴡𐴓𐴉𐴡 𐴒𐴡𐴌𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌 𐴃𐴟 𐴘𐴥𐴡 𐴎𐴞𐴕𐴊𐴞𐴒𐴞𐴌 𐴃𐴟 𐴇𐴥𐴝𐴃 𐴊𐴤𐴟𐴘 𐴉𐴥𐴠𐴓𐴝 𐴉𐴡𐴌𐴞𐴁𐴡 𐴱 𐴒𐴡𐴃𐴡 𐴏𐴥𐴠𐴃𐴡𐴔𐴁𐴡𐴌 𐴔𐴥𐴝𐴐𐴡𐴃 𐴕𐴠𐴊𐴤𐴝𐴌𐴓𐴥𐴠𐴕 𐴀𐴝𐴌 𐴑𐴠𐴕𐴠𐴋𐴝 𐴊𐴟𐴕𐴥𐴞 𐴊𐴠𐴐𐴤𐴠 𐴔𐴦𐴡𐴊𐴧𐴞𐴔𐴝𐴃 𐴒𐴤𐴡𐴓𐴞𐴁𐴡𐴓𐴧𐴝 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴌 𐴁𐴡𐴓𐴞 𐴈𐴡𐴀𐴡𐴙𐴓 𐴱𐴱 (𐴏𐴥𐴝𐴀𐴝𐴙𐴕 𐴒𐴡𐴌𐴥𐴞 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴓𐴝𐴘𐴧𐴠 𐴊𐴠 𐴶 𐴳 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴕𐴝𐴔 𐴓𐴥𐴞𐴚𐴑𐴡𐴃 𐴀𐴝𐴏𐴠 ) 𐴱𐴱

Sources : Rohingyavision