𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴉𐴥𐴟𐴣𐴖𐴝𐴣𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴙𐴁𐴡𐴓𐴧𐴝 𐴀𐴥𐴞𐴔𐴧𐴡𐴃 𐴊𐴠𐴌 𐴱𐴱

𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴙𐴐𐴧𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴀𐴥𐴞𐴃𐴝𐴌𐴝𐴌 𐴀𐴠𐴒𐴠𐴕𐴝 𐴒𐴟𐴐𐴧𐴞 𐴎𐴟𐴀𐴟𐴕 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴃 𐴀𐴝𐴏𐴠 , 𐴀𐴥𐴟𐴕𐴠 𐴕𐴟𐴖𐴝 𐴃𐴤𐴡𐴌𐴡𐴌 𐴁𐴝𐴁𐴡𐴃𐴠 𐴇𐴝𐴓𐴡𐴃𐴡𐴌𐴠 𐴁𐴠𐴐𐴤𐴞 𐴐𐴡𐴖𐴑 𐴀𐴝𐴌 𐴀𐴝𐴎𐴧𐴟 𐴓𐴡𐴘 𐴎𐴝𐴙𐴕𐴃𐴡 𐴏𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 𐴱 𐴁𐴝𐴚𐴓𐴝𐴊𐴠𐴐𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴎𐴤𐴝𐴉𐴝 𐴎𐴤𐴝𐴙𐴂𐴧𐴝 𐴒𐴡𐴌𐴞 , 𐴀𐴠𐴒𐴝𐴌𐴡 𐴓𐴥𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴝𐴙𐴑𐴧𐴙𐴠𐴊𐴠 , 𐴀𐴥𐴠𐴃𐴧𐴟 𐴀𐴠𐴑 𐴓𐴥𐴝𐴑 𐴓𐴦𐴡𐴃 𐴌𐴟𐴇𐴝𐴙𐴚𐴒𐴙𐴝 𐴒𐴤𐴞𐴐𐴢 𐴈𐴡𐴔𐴥𐴝𐴙𐴁𐴝𐴌 𐴔𐴡𐴑𐴏𐴟𐴃 𐴓𐴡𐴘 , 𐴀𐴝𐴏𐴃𐴠 𐴀𐴝𐴏𐴃𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘 𐴌𐴝𐴑𐴤𐴞𐴁𐴡 𐴱 𐴎𐴠 𐴁𐴤𐴝𐴐𐴡𐴕 𐴏𐴡𐴌𐴡𐴌𐴥𐴠 𐴏𐴡𐴓𐴞𐴃𐴡 𐴈𐴝𐴓 𐴓𐴡𐴘 𐴉𐴥𐴞𐴄 𐴀𐴥𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴏𐴥𐴝𐴏𐴝𐴔𐴝𐴕 𐴐𐴤𐴡𐴣𐴀𐴡 , 𐴀𐴞𐴐𐴑𐴟𐴓 , 𐴔𐴡𐴏𐴥𐴡𐴙𐴃 , 𐴋𐴝𐴑𐴄𐴡𐴌 𐴈𐴥𐴝𐴕𐴝 , 𐴔𐴟𐴁𐴝𐴙𐴓 𐴕𐴠𐴀𐴠𐴄 𐴖𐴥𐴝𐴑 𐴀𐴝𐴌 𐴀𐴞𐴕𐴄𐴝𐴌𐴕𐴥𐴠𐴄 𐴐𐴤𐴟𐴎𐴟𐴑 𐴐𐴤𐴟𐴁𐴞𐴊𐴝 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝𐴌 𐴓𐴝 𐴃𐴡𐴘𐴧𐴝𐴌 𐴒𐴡𐴙𐴅𐴧𐴙𐴠 𐴱 𐴀𐴝𐴙𐴅𐴧𐴙𐴝 𐴁𐴠𐴙𐴕𐴧𐴝 𐴔𐴡𐴕𐴎𐴟𐴌 𐴀𐴝𐴓𐴡𐴔𐴠 𐴁𐴠𐴐𐴤𐴞 𐴅𐴟𐴐𐴢 𐴑𐴤𐴟𐴐𐴢 𐴓𐴡𐴘 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴃𐴟 , 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴘 𐴁𐴞𐴋𐴞𐴘𐴡 𐴑𐴦𐴡𐴓 𐴓𐴡𐴘 𐴔𐴡𐴒𐴤𐴡𐴕 𐴱𐴱

𐴔𐴡𐴕𐴎𐴟𐴌 𐴀𐴝𐴓𐴡𐴔 𐴑𐴠𐴀𐴠𐴔 𐴔𐴝𐴎𐴤𐴞 𐴀𐴝𐴌 𐴓𐴞𐴋𐴝𐴌 , 𐴀𐴥𐴞𐴁𐴝 𐴘𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴁𐴝𐴓𐴟𐴈𐴥𐴝𐴓𐴞 𐴱 𐴱 𐴀𐴠𐴒𐴝𐴌𐴡 𐴓𐴡𐴔𐴁𐴡𐴌 𐴑𐴠𐴀𐴠𐴔𐴡𐴃 𐴀𐴝𐴏𐴠𐴊𐴠 𐴀𐴠𐴒𐴠𐴕𐴝 𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴡𐴌𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴀𐴝𐴃𐴌𐴝𐴉𐴢 𐴀𐴝𐴌 𐴕𐴟𐴖𐴝 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴊𐴠𐴈𐴦𐴝𐴌 𐴀𐴝𐴌 𐴈𐴡𐴀𐴡𐴌 , 𐴀𐴠𐴍𐴥𐴠 𐴎𐴤𐴝𐴔𐴞𐴓𐴝 𐴘𐴥𐴡 𐴕𐴥𐴝𐴘 𐴀𐴝𐴌 𐴎𐴡𐴌𐴟𐴌𐴡𐴃𐴡𐴌 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴁𐴠𐴙𐴒𐴧𐴞𐴕 𐴀𐴝𐴏𐴥𐴠 𐴀𐴝𐴌 𐴁𐴞𐴓𐴋𐴤𐴞𐴚𐴀𐴥𐴡 𐴐𐴤𐴟𐴕𐴊𐴡𐴌 𐴱 𐴀𐴠𐴍𐴥𐴠 𐴀𐴝𐴙𐴐𐴧𐴙𐴠 𐴊𐴠 𐴀𐴥𐴟𐴀𐴟𐴕 𐴁𐴠𐴙𐴒𐴧𐴟𐴕 𐴁𐴤𐴝𐴒𐴧𐴞𐴃𐴧𐴝 𐴀𐴝𐴌 𐴑𐴤𐴟𐴐𐴞𐴃 , 𐴀𐴝𐴣𐴀𐴝𐴌𐴝 𐴘𐴥𐴡 𐴀𐴠𐴍𐴥𐴠 𐴀𐴦𐴝𐴘 𐴁𐴠𐴐𐴤𐴞 𐴑𐴤𐴟𐴐𐴞𐴃 𐴱 𐴃𐴟𐴣𐴖𐴝𐴣𐴌𐴝 𐴑𐴤𐴟𐴐𐴞 𐴏𐴡𐴀𐴡𐴌 𐴊𐴠 𐴀𐴥𐴡𐴙𐴓𐴠 𐴀𐴠𐴍𐴥𐴠 𐴀𐴝𐴘𐴧𐴡 𐴁𐴡𐴓𐴞 / 𐴔𐴡𐴕𐴎𐴟𐴌 𐴀𐴝𐴓𐴡𐴔𐴠 𐴈𐴡𐴘𐴧𐴠 𐴱 𐴔𐴡𐴎𐴟𐴌 𐴀𐴝𐴓𐴡𐴔𐴠 / 𐴁𐴞𐴎𐴞𐴕𐴞𐴏𐴢 𐴀𐴠𐴏𐴄𐴠𐴕𐴋𐴤𐴝𐴋 𐴈𐴥𐴡𐴁𐴡𐴌 𐴀𐴠𐴅𐴠𐴕𐴏𐴞𐴌𐴠 𐴈𐴡𐴘𐴧𐴠𐴊𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴙𐴁𐴡𐴌𐴓𐴝 𐴀𐴝𐴣𐴀𐴝𐴌 𐴀𐴠𐴒𐴠𐴕𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴥𐴞𐴔𐴧𐴡𐴃 𐴊𐴞𐴌𐴊𐴠 𐴱𐴱

𐴀𐴝𐴌 𐴎𐴝𐴒𐴝 𐴘𐴝𐴕𐴡𐴌𐴠 𐴀𐴦𐴝𐴛 𐴁𐴠𐴐𐴤𐴞 𐴁𐴤𐴝𐴓𐴝 𐴀𐴝𐴌 𐴕𐴞𐴌𐴝𐴉𐴡𐴃 𐴁𐴟𐴎𐴞𐴌 , 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴀𐴝𐴣𐴀𐴝𐴌𐴝 𐴌𐴠 𐴁𐴡𐴓𐴝𐴎𐴟𐴌𐴞 𐴀𐴝𐴙𐴕𐴧𐴙𐴠 𐴊𐴠 𐴕𐴦𐴡 , 𐴀𐴝𐴣𐴀𐴝𐴌𐴝 𐴕𐴞𐴎𐴡𐴌 𐴀𐴝𐴃𐴧𐴝 𐴑𐴤𐴟𐴐𐴞 𐴘𐴠 𐴀𐴝𐴙𐴐𐴧𐴞𐴊𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴔𐴡𐴕𐴎𐴟𐴌 𐴁𐴝𐴊𐴠 𐴀𐴝𐴌𐴀𐴥𐴡 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴝 𐴀𐴥𐴡𐴑𐴧𐴡𐴓𐴠 , 𐴕𐴞𐴎𐴡𐴌 𐴕𐴞𐴎𐴡𐴌 𐴀𐴠𐴒𐴠𐴕𐴝 𐴒𐴟𐴐𐴧𐴞 𐴀𐴝𐴌 𐴊𐴟𐴏𐴃𐴡 𐴀𐴥𐴡𐴑𐴧𐴡𐴓, 𐴎𐴟𐴀𐴟𐴕𐴠 𐴕𐴟𐴖𐴝 𐴒𐴤𐴡𐴌𐴡𐴌 𐴁𐴝𐴁𐴡𐴃𐴠 𐴎𐴝𐴙𐴕𐴃𐴡 𐴏𐴝𐴀𐴝𐴌 , 𐴀𐴥𐴞𐴃𐴝𐴌𐴝 𐴌𐴠 𐴅𐴝𐴕𐴑𐴝𐴌𐴞 𐴊𐴞𐴘𐴝𐴃 𐴔𐴡𐴒𐴤𐴕 𐴊𐴠𐴈𐴥𐴝 𐴒𐴞𐴘𐴠 𐴱 𐴀𐴠𐴑 𐴎𐴡𐴕 𐴐𐴡𐴔𐴐𐴞𐴌𐴥𐴝 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞 𐴘𐴠 𐴈𐴡𐴘𐴧𐴠 𐴊𐴠 , 𐴀𐴝𐴣𐴀𐴝𐴌𐴝 𐴑𐴝𐴑𐴏𐴢 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴁𐴝𐴣𐴐𐴢 𐴀𐴝𐴌 𐴃𐴠𐴌𐴉𐴝𐴓 𐴊𐴞 𐴁𐴝𐴕𐴝𐴘𐴧𐴝 𐴒𐴤𐴇𐴡𐴌𐴡𐴃 𐴃𐴤𐴝𐴑𐴧𐴞𐴓𐴝𐴔 𐴊𐴠 , 𐴀𐴠𐴈𐴥𐴡𐴕 𐴈𐴡𐴃𐴡 𐴐𐴤𐴟𐴕𐴊𐴡𐴌 𐴁𐴞𐴓𐴋𐴤𐴞𐴚𐴡𐴃 𐴃𐴤𐴝𐴑𐴞 𐴉𐴝𐴌𐴞𐴌 , 𐴎𐴞𐴘𐴝𐴕𐴡𐴌𐴠 𐴀𐴝𐴣𐴀𐴝𐴌𐴝 𐴁𐴠𐴐𐴤𐴞 𐴀𐴝𐴌𐴝𐴔 𐴁𐴟𐴎𐴞𐴌 𐴱 𐴑𐴝𐴑𐴏𐴢 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴎𐴤𐴡𐴌 𐴁𐴡𐴌𐴏𐴝𐴃𐴡𐴌 𐴈𐴝𐴓𐴠 𐴁𐴠𐴐𐴤𐴞 𐴊𐴟𐴑 𐴉𐴝𐴘𐴧𐴠 , 𐴀𐴠𐴍𐴥𐴠 𐴉𐴝𐴑 𐴒𐴤𐴡𐴌 ( 𐴀𐴡𐴖𐴓𐴝 ) 𐴀𐴝𐴌 𐴄𐴝𐴄𐴧𐴞 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴱𐴱

Sources : The business Standard