𐴁𐴡𐴀𐴡𐴃 𐴎𐴟𐴑 𐴀𐴥𐴡𐴙𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴁𐴞𐴕𐴝 𐴈𐴡𐴏𐴟𐴌 𐴊𐴟𐴑𐴧𐴡𐴃 : 𐴈𐴥𐴡𐴁𐴡𐴌 𐴁𐴤𐴝𐴉𐴡𐴙𐴕𐴧𐴝 𐴱𐴱

𐴊𐴠𐴐𐴁𐴞𐴊𐴠𐴐𐴢 𐴈𐴦𐴝𐴏𐴢 𐴒𐴡𐴌𐴞 𐴉𐴡𐴏𐴞𐴔𐴡𐴌 𐴊𐴠𐴙𐴐𐴢 𐴀𐴝𐴌 𐴆𐴞𐴕𐴝 , 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴁𐴠𐴐𐴤𐴞 𐴒𐴡𐴌𐴞 𐴁𐴤𐴝𐴉𐴠𐴌 𐴉𐴥𐴦𐴝𐴀𐴝𐴕 𐴕𐴡 𐴓𐴥𐴝𐴒𐴠𐴌 𐴱 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴌 𐴃𐴟 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴎𐴝𐴒𐴝 𐴓𐴝𐴌𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴙𐴕𐴧𐴙𐴠 𐴊𐴠 𐴲 𐴴 𐴶 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴁𐴤𐴟𐴃𐴡𐴌𐴃𐴟 𐴈𐴡𐴕𐴥𐴞𐴑𐴧𐴙𐴝 , 𐴈𐴡𐴀𐴠𐴑 𐴁𐴡𐴏𐴡𐴌 𐴀𐴝𐴒𐴠 , 𐴕𐴞𐴎𐴡𐴌 𐴕𐴝𐴒𐴤𐴞 𐴈𐴝𐴍𐴝 𐴊𐴠𐴐𐴢 𐴀𐴝𐴌𐴑𐴝𐴕 𐴏𐴥𐴝𐴌𐴞 𐴁𐴝𐴚𐴓𐴝 𐴈𐴥𐴝𐴌𐴞𐴌 𐴔𐴝𐴎𐴤𐴠 , 𐴁𐴡𐴀𐴡𐴃 𐴊𐴟𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴁𐴡𐴐𐴤𐴡𐴃𐴞 𐴒𐴡𐴌𐴞𐴁𐴤𐴡𐴊𐴠 𐴘𐴥𐴝𐴕 𐴎𐴡𐴑𐴊𐴠 𐴁𐴤𐴝𐴉𐴞𐴁𐴡 , 𐴐𐴤𐴡𐴂𐴧𐴡𐴕𐴡𐴃 𐴀𐴥𐴟𐴊𐴧𐴝 𐴕𐴥𐴡 𐴊𐴠𐴑𐴤𐴠 𐴱 𐴀𐴝𐴌𐴑𐴝𐴕𐴡𐴌 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴝𐴌 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞𐴌 , 𐴀𐴝𐴕 𐴉𐴥𐴟𐴕𐴥𐴝 𐴀𐴝𐴌 𐴁𐴠 𐴔𐴠𐴏𐴦𐴝𐴓 𐴎𐴟𐴓𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴞 𐴕𐴡𐴉𐴝𐴌𐴥𐴞 𐴊𐴠𐴐𐴢 𐴏𐴥𐴝𐴌𐴞 𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴙𐴒𐴧𐴟𐴕𐴡𐴌 𐴁𐴤𐴝𐴉𐴢 𐴀𐴠𐴙𐴑𐴧𐴟 𐴋𐴦𐴡𐴙𐴓𐴧𐴝 𐴱𐴱

𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴡𐴕𐴡𐴌 𐴎𐴡𐴌𐴞𐴘𐴝 , 𐴃𐴤𐴝𐴑𐴞𐴁𐴡𐴌 𐴓𐴝 𐴁𐴤𐴝𐴓𐴝 𐴎𐴝𐴒𐴝 𐴉𐴝𐴙𐴓𐴠 𐴘𐴥𐴡 , 𐴘𐴥𐴝𐴕𐴠 𐴀𐴥𐴞𐴃𐴝𐴌𐴝𐴌 𐴊𐴞𐴓 𐴀𐴝𐴌 𐴊𐴠𐴔𐴝𐴒𐴡𐴌𐴠 𐴐𐴤𐴝𐴕𐴃𐴞 𐴒𐴡𐴙𐴅𐴧𐴙𐴠 𐴕𐴥𐴠؟ 𐴏𐴟𐴖𐴝𐴓 𐴘𐴝𐴕𐴡𐴌 𐴅𐴟𐴖𐴝𐴁𐴢 𐴁𐴠𐴐𐴤𐴞 𐴋𐴦𐴡𐴣𐴌 𐴊𐴠 𐴘𐴥𐴝𐴕𐴡𐴃 𐴈𐴡𐴕𐴥𐴡 𐴐𐴤𐴡𐴑 𐴕𐴥𐴝𐴘 𐴱 𐴀𐴥𐴞𐴃𐴝𐴌𐴝 𐴘𐴥𐴡 𐴊𐴟𐴕𐴞𐴘𐴝𐴙𐴌 𐴀𐴡𐴙𐴕𐴧𐴡 𐴔𐴝𐴙𐴕𐴐𐴤𐴡𐴌 𐴋𐴦𐴡𐴙𐴓𐴧𐴝 𐴕𐴞𐴎𐴡𐴌 𐴕𐴞𐴎𐴡𐴌 𐴒𐴤𐴡𐴌𐴡𐴃 𐴃𐴤𐴝𐴑𐴡𐴕𐴡𐴌 𐴓𐴝𐴙𐴑𐴧𐴙𐴝 𐴱 𐴎𐴝𐴒𐴝 𐴓𐴝𐴌𐴞 𐴊𐴟𐴘𐴀𐴡𐴔 𐴄𐴠𐴔𐴂𐴡𐴌𐴝𐴌𐴞 𐴒𐴤𐴡𐴌𐴡𐴃 𐴌𐴝𐴙𐴑𐴧𐴙𐴠 𐴊𐴠 𐴀𐴥𐴞𐴃𐴝𐴌𐴝𐴌𐴠 𐴏𐴝𐴙𐴃𐴠 𐴑𐴤𐴟𐴐𐴞 𐴑𐴤𐴟𐴐𐴞 𐴔𐴞𐴑𐴧𐴙𐴝 𐴓𐴝𐴒𐴠𐴌 𐴱 𐴑𐴝𐴑𐴏𐴢𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴐𐴤𐴟𐴌𐴟 𐴐𐴤𐴟𐴌𐴟𐴃 , 𐴀𐴥𐴞𐴃𐴝𐴌𐴝 𐴌𐴥𐴠 𐴏𐴝𐴙𐴃𐴠 𐴕𐴞𐴎𐴡𐴌 𐴔𐴦𐴟𐴔 𐴈𐴝𐴓𐴡𐴌 𐴁𐴝𐴁𐴡𐴃𐴠 𐴉𐴠𐴌𐴠𐴐𐴝𐴕 𐴔𐴞𐴑𐴧𐴙𐴝 𐴓𐴝𐴒𐴞𐴃𐴡 𐴱 𐴀𐴥𐴞𐴃𐴝𐴌𐴝 𐴘𐴥𐴡 𐴀𐴡𐴙𐴕𐴧𐴡 𐴔𐴝𐴙𐴕𐴐𐴤𐴡𐴌 𐴋𐴦𐴡𐴙𐴓𐴧 𐴝 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌 𐴕𐴞𐴎𐴡𐴌 𐴒𐴤𐴡𐴌 𐴁𐴝𐴌𐴞𐴌 𐴃𐴟 𐴊𐴟𐴌𐴥𐴠 𐴃𐴤𐴝𐴑𐴞𐴃𐴡 𐴕𐴡 𐴏𐴝𐴀𐴝 , 𐴀𐴝𐴌 𐴎𐴠𐴃𐴡 𐴈𐴥𐴝𐴌𐴝 𐴉𐴝𐴌𐴠 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴙𐴁𐴡𐴓𐴧𐴝 𐴏𐴝𐴀𐴝𐴌 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴃 𐴀𐴝𐴌𐴑𐴝𐴕𐴡𐴃 𐴐𐴤𐴡𐴃𐴝 𐴐𐴤𐴡𐴃𐴞 𐴁𐴡𐴏𐴡𐴌 𐴀𐴥𐴡𐴙𐴃𐴠 𐴃𐴤𐴝𐴑𐴞 𐴀𐴝𐴘𐴧𐴠𐴌 𐴊𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴘 𐴁𐴝𐴊𐴠 𐴘𐴥𐴡 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴀𐴥𐴞𐴃𐴝𐴌𐴝𐴌 𐴎𐴡𐴕𐴡𐴔𐴞 𐴇𐴥𐴡𐴑 𐴊𐴠𐴐𐴤𐴡𐴙𐴃𐴧𐴝 𐴃𐴝 𐴈𐴝𐴌𐴥𐴞 𐴓𐴡𐴘 𐴁𐴝𐴊𐴠 𐴱 𐴀𐴝𐴌𐴀𐴥𐴡 𐴂𐴠𐴓𐴝𐴕 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘 𐴎𐴟𐴓𐴟𐴔 𐴒𐴡𐴌𐴠𐴌 , 𐴀𐴠𐴈𐴥𐴡𐴕 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴁𐴤𐴝𐴌𐴡 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴔𐴡𐴎𐴓𐴟𐴔 𐴑𐴡𐴖𐴔 𐴱 𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴘𐴝 𐴂𐴝𐴂𐴓𐴞𐴑 𐴇𐴥𐴡𐴑𐴟𐴔𐴡𐴃 , 𐴎𐴞𐴁𐴤𐴝 𐴀𐴝𐴙𐴁𐴡 𐴀𐴝𐴘𐴧𐴡𐴑 𐴎𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 , 𐴐𐴤𐴝𐴊𐴝 𐴐𐴤𐴞𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴟𐴓𐴟𐴔 𐴒𐴡𐴌𐴞 𐴒𐴡𐴌𐴞 , 𐴁𐴡𐴀𐴡𐴃 𐴎𐴟𐴑 𐴀𐴥𐴡𐴙𐴃𐴠 𐴊𐴠𐴐𐴤𐴡𐴌𐴃𐴟 𐴁𐴦𐴝𐴙𐴌 𐴒𐴡𐴌𐴞 𐴉𐴡𐴣𐴃𐴤𐴠 𐴉𐴡𐴣𐴃𐴤𐴠 , 𐴊𐴠𐴐𐴤𐴠 𐴊𐴠𐴐𐴤𐴠 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴠 𐴏𐴥𐴝𐴀𐴝𐴌𐴝 𐴊𐴞𐴘𐴠𐴊𐴠 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 , 𐴁𐴝𐴚𐴓𐴠𐴊𐴠𐴐𐴢 𐴀𐴥𐴡 , 𐴁𐴡𐴀𐴡𐴃 𐴋𐴦𐴡𐴙𐴓𐴧𐴝 𐴀𐴞𐴑𐴟𐴕𐴡𐴔𐴥𐴞𐴑 𐴀𐴡𐴐𐴤𐴝𐴕𐴃𐴞 𐴃𐴤𐴑𐴞𐴁𐴝𐴊𐴠 𐴘𐴥𐴡 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴏𐴥𐴝𐴀𐴝𐴌𐴝 𐴊𐴞𐴘𐴠𐴊𐴠 𐴊𐴠𐴐𐴢 𐴱 𐴀𐴠𐴈𐴥𐴡𐴕 𐴀𐴥𐴡 𐴰 𐴰 𐴰 𐴰𐴰 𐴵 𐴃𐴟 𐴰 𐴰 𐴰 𐴰 𐴰 𐴶 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌𐴑𐴝𐴕𐴡𐴃 , 𐴎𐴞𐴘𐴡𐴓𐴡𐴌 𐴈𐴡𐴊𐴞𐴌 𐴔𐴡𐴃𐴡𐴕 𐴁𐴡𐴐𐴤𐴡 𐴁𐴤𐴝𐴐𐴢 𐴒𐴡𐴌𐴠𐴌 𐴱 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴝 𐴎𐴟𐴓𐴟𐴔 𐴒𐴡𐴌𐴠𐴌𐴊𐴠 𐴁𐴝𐴙𐴅𐴧𐴙𐴝𐴌 𐴊𐴠 𐴀𐴥𐴞𐴀𐴞𐴕 𐴕𐴟𐴖𐴝 𐴕𐴦𐴡 , 𐴇𐴥𐴝𐴔𐴞𐴐𐴤𐴝 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱 𐴔𐴡𐴕𐴃𐴡𐴌 𐴷 𐴱 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴒𐴡𐴙𐴅𐴧𐴙𐴠 𐴊𐴠 𐴎𐴟𐴓𐴟𐴔 𐴀𐴥𐴞𐴕𐴠 𐴀𐴝𐴒𐴡𐴌 𐴎𐴟𐴓𐴟𐴔𐴡𐴌 𐴃𐴟 𐴁𐴤𐴝𐴌𐴡 𐴁𐴡𐴀𐴡𐴃 𐴁𐴠𐴐𐴤𐴞 𐴱 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴰 𐴰 𐴰 𐴰 𐴵 𐴷 𐴐𐴤𐴝𐴌𐴡 𐴇𐴥𐴝𐴣𐴃 𐴓𐴥𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴡𐴖𐴋𐴝𐴌 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴌 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴉𐴝𐴕𐴥𐴝 𐴓𐴡𐴕𐴡𐴃 𐴔𐴡𐴅𐴁𐴟𐴌 𐴀𐴥𐴡𐴘𐴧𐴠 𐴱 𐴎𐴞𐴘𐴥𐴝𐴕𐴡𐴌𐴠 ( 𐴘𐴟𐴕𐴝𐴙𐴄𐴤𐴠𐴋 𐴕𐴠𐴐𐴤𐴠𐴕 𐴇𐴙𐴟𐴔𐴥𐴠𐴕 𐴌𐴥𐴝𐴙𐴄 𐴑𐴡𐴕𐴐𐴞𐴓𐴠 ) 𐴅𐴠𐴕𐴟𐴏𐴥𐴝𐴙𐴋 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : Dhakatribune