𐴑𐴠𐴀𐴠𐴔𐴡𐴌𐴃𐴟 𐴕𐴟𐴖𐴝 𐴑𐴤𐴠𐴂𐴢 𐴉𐴦𐴡𐴣𐴏𐴡𐴕𐴡𐴌 𐴁𐴝𐴊𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴠𐴈𐴥𐴡𐴕 𐴀𐴝𐴏𐴠𐴊𐴠 𐴀𐴥𐴟𐴕𐴡𐴌𐴠 , 𐴑𐴠𐴀𐴠𐴔𐴡𐴃 𐴉𐴦𐴡𐴣𐴏𐴥𐴝𐴙𐴁𐴡 𐴱𐴱

𐴒𐴡𐴃𐴡 𐴔𐴠 𐴔𐴥𐴝𐴐𐴡𐴌 𐴳 𐴃𐴝𐴌𐴞𐴑 𐴀𐴝𐴌 𐴷 𐴃𐴝𐴌𐴞𐴑𐴡𐴃 𐴊𐴡𐴙𐴅𐴧𐴙𐴝𐴌𐴃𐴟 𐴁𐴝𐴏𐴝𐴘 𐴃𐴟𐴓𐴞 𐴓𐴡𐴘 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴌𐴝𐴑𐴧𐴞𐴓 𐴊𐴠 𐴶 𐴰 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴠 , 𐴇𐴥𐴡𐴑𐴟𐴔𐴡𐴃𐴡𐴌 𐴂𐴠𐴓𐴝𐴕 𐴔𐴡𐴎𐴞𐴕 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 , 𐴀𐴠𐴑𐴀𐴡𐴔 𐴑𐴤𐴠𐴂𐴢 𐴉𐴦𐴡𐴣𐴏𐴝𐴀𐴡𐴕𐴡𐴌 𐴁𐴝𐴊𐴠 𐴕𐴞𐴎𐴡𐴌 𐴒𐴤𐴡𐴌𐴒𐴟𐴐𐴧𐴞𐴌 𐴀𐴥𐴠𐴍𐴠 𐴉𐴦𐴡𐴣𐴏𐴥𐴝𐴙𐴁𐴡 𐴁𐴡𐴓𐴞 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴤𐴝𐴙𐴁𐴝𐴌 𐴂𐴡𐴌𐴟𐴒𐴠𐴌𐴝𐴔𐴡𐴃 𐴁𐴝𐴙𐴅𐴧𐴙𐴝 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴠 𐴱 𐴘𐴝𐴕 𐴀𐴥𐴡𐴙𐴓𐴊𐴠 𐴇𐴥𐴡𐴑𐴟𐴔𐴡𐴃𐴡𐴌 𐴉𐴥𐴝𐴙𐴏𐴠𐴓𐴝 𐴔𐴡𐴕𐴃𐴡𐴌 𐴈𐴥𐴝𐴄𐴞 𐴒𐴡𐴌𐴞 𐴈𐴡𐴣𐴀𐴡𐴃𐴧𐴠 𐴀𐴥𐴡𐴙𐴁𐴡 𐴈𐴟𐴖𐴝 𐴕𐴡𐴎𐴝𐴌 𐴁𐴡𐴓𐴞 , 𐴇𐴥𐴡𐴑𐴟𐴔𐴡𐴃𐴠 𐴁𐴠𐴁𐴡𐴏𐴃𐴝 𐴒𐴡𐴌𐴥𐴞 𐴒𐴡𐴃𐴡 𐴌𐴦𐴡𐴙𐴁𐴝𐴌 𐴀𐴝𐴌 𐴐𐴤𐴡𐴔𐴁𐴝𐴌𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴇𐴝𐴓𐴡𐴃 𐴏𐴝𐴙𐴁𐴡𐴌𐴓𐴝 𐴕𐴞𐴎𐴦𐴝𐴙𐴓𐴊𐴠 𐴈𐴥𐴡𐴁𐴡𐴌𐴞 𐴕𐴡𐴔𐴝𐴙𐴕𐴊𐴝𐴌 𐴋𐴦𐴝𐴘𐴧𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴀𐴠𐴈𐴥𐴡𐴕 𐴁𐴤𐴝𐴐𐴡𐴕 𐴏𐴡𐴌𐴡𐴃 , 𐴁𐴡𐴌𐴔𐴝𐴌 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴌𐴟𐴇𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴝𐴘 𐴌𐴝𐴑𐴤𐴞 𐴁𐴡𐴌𐴓𐴝 𐴁𐴝𐴙𐴕𐴊𐴠 𐴊𐴠 𐴑𐴝𐴓𐴝𐴏𐴄𐴝𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴶 𐴰 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙 𐴀𐴝𐴏𐴠 , 𐴎𐴟𐴀𐴟𐴕𐴡𐴌𐴠 𐴒𐴡𐴃𐴡 𐴔𐴠 𐴔𐴥𐴝𐴐𐴡𐴃 𐴊𐴡𐴙𐴅𐴧𐴙𐴝𐴌 𐴃𐴟 𐴁𐴝𐴏𐴝𐴘 𐴃𐴟𐴓𐴥𐴞 𐴓𐴡𐴀𐴡𐴙𐴓 𐴱 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴑𐴠𐴀𐴠𐴔𐴡𐴌𐴃𐴟 𐴀𐴠𐴑𐴀𐴡𐴔 𐴑𐴤𐴠𐴉𐴢 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴕𐴡𐴕𐴡𐴌 𐴁𐴝𐴊𐴠 , 𐴶 𐴰 𐴳 𐴎𐴡𐴕 𐴀𐴝𐴒𐴠 𐴓𐴡𐴃𐴞 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴑𐴠𐴀𐴠𐴔𐴡𐴃 , 𐴀𐴥𐴞𐴃𐴝𐴌𐴝𐴌 𐴒𐴤𐴡𐴌 𐴒𐴟𐴐𐴧𐴞𐴌 𐴈𐴝𐴣𐴏𐴠 𐴎𐴝𐴙𐴃𐴡 𐴏𐴝𐴙𐴓𐴠 𐴉𐴦𐴡𐴣𐴏𐴥𐴝𐴘 𐴊𐴞𐴁𐴡 𐴁𐴡𐴓𐴞 , 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 𐴱 𐴀𐴠𐴈𐴥𐴡𐴕 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴏𐴠 𐴊𐴠 𐴶 𐴰 𐴳 𐴎𐴡𐴕𐴡𐴌 𐴁𐴤𐴟𐴃𐴡𐴌𐴠 𐴷 𐴹 𐴎𐴡𐴕 𐴁𐴠𐴍𐴝 𐴶 𐴷 𐴱 𐴎𐴡𐴕 𐴁𐴠𐴍𐴞 𐴳 𐴳 𐴎𐴡𐴕 𐴉𐴟𐴖𐴙𐴕 𐴱𐴱

𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴰 𐴵 𐴲 𐴎𐴡𐴕𐴡𐴌𐴃𐴟 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 ) 𐴒𐴡𐴕𐴝𐴌 𐴑𐴦𐴝𐴋 𐴀𐴝𐴏𐴠 , 𐴅𐴤𐴡𐴁𐴑𐴤𐴞 ‘ 𐴁𐴝𐴑𐴞 𐴶 𐴵 𐴎𐴡𐴕𐴡𐴌 𐴁𐴤𐴟𐴃𐴡𐴌𐴠 𐴳 𐴳 𐴎𐴡𐴕 𐴁𐴠𐴍𐴝 𐴀𐴝𐴌 𐴳 𐴲 𐴎𐴡𐴕 𐴉𐴟𐴖𐴝𐴙𐴕 𐴑𐴦𐴝𐴋 𐴏𐴥𐴝𐴌𐴝 𐴱 𐴑𐴦𐴝𐴋 𐴕𐴥𐴝𐴘 𐴊𐴠 𐴀𐴥𐴞𐴃𐴝𐴌𐴝𐴌𐴠 𐴑𐴦𐴝𐴋 𐴊𐴞𐴁𐴡𐴓𐴧𐴝 𐴇𐴥𐴡𐴑𐴟𐴔𐴡𐴃𐴠 𐴁𐴠𐴁𐴡𐴏𐴃𐴝 𐴒𐴡𐴌𐴥𐴞 𐴌𐴝𐴙𐴑𐴧𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴠 𐴇𐴥𐴝𐴣𐴃 𐴔𐴥𐴝𐴐𐴢 𐴉𐴡𐴙𐴅𐴧𐴡𐴕𐴃𐴡 𐴁𐴠𐴐𐴤𐴞 𐴐𐴤𐴟𐴕𐴊𐴡𐴌 𐴒𐴡𐴌𐴞 𐴏𐴝𐴀𐴝 𐴏𐴞𐴃𐴝 𐴒𐴡𐴙𐴅𐴧𐴙𐴠 , 𐴀𐴝𐴌 𐴘𐴥𐴝𐴕 ‘ 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴝 𐴂𐴡𐴌𐴟𐴒𐴠𐴌𐴝𐴔𐴡𐴌 𐴐𐴤𐴟𐴌𐴟𐴌 𐴑𐴝𐴔𐴞𐴘𐴝𐴁𐴞 𐴁𐴡𐴓𐴞 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 𐴱 𐴀𐴠 𐴶 𐴰 𐴳 𐴎𐴡𐴕𐴡𐴌𐴠 𐴐𐴤𐴟𐴕𐴊𐴡𐴌 𐴒𐴡𐴌𐴞 𐴏𐴝𐴀𐴝 𐴏𐴞𐴃𐴝 𐴇𐴠𐴉𐴝𐴎𐴡𐴃 𐴒𐴡𐴙𐴅𐴧𐴙𐴠 𐴊𐴠 𐴃𐴡𐴅𐴌𐴡𐴁𐴝 𐴘𐴥𐴝𐴕𐴡𐴌 𐴃𐴟 , 𐴏𐴥𐴝𐴔𐴧𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴕𐴥𐴞𐴁𐴡𐴊𐴠 𐴀𐴥𐴞𐴃𐴝𐴌𐴝𐴌𐴠 𐴐𐴤𐴟𐴕𐴊𐴡𐴌 𐴒𐴡𐴌𐴞 𐴑𐴠𐴀𐴠𐴕𐴠 𐴌𐴝𐴑𐴤𐴝 𐴎𐴝𐴙𐴁𐴡 , 𐴘𐴥𐴝𐴕𐴡𐴌 𐴁𐴤𐴝𐴓𐴝 𐴃𐴡𐴅𐴌𐴡𐴁𐴝 𐴇𐴝𐴏𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 𐴱𐴱

Sources : Dhakatribune