𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴐𐴤𐴡𐴃 𐴁𐴝𐴌𐴞 𐴒𐴡𐴌𐴞 𐴁𐴡𐴌 𐴓𐴝 𐴁𐴤𐴝𐴐𐴡𐴕 𐴏𐴡𐴌 𐴁𐴠𐴐𐴤𐴞 𐴁𐴤𐴝𐴓𐴝 𐴎𐴝𐴒𐴝 𐴱𐴱

𐴁𐴝𐴚𐴓𐴝 𐴈𐴥𐴝𐴌𐴞𐴃 𐴀𐴝𐴏𐴠𐴊𐴠 𐴁𐴤𐴝𐴐𐴡𐴕 𐴏𐴡𐴌 ‘ 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴎𐴤𐴝𐴉𐴝 𐴎𐴤𐴝𐴙𐴉𐴧𐴝 𐴄𐴝𐴓𐴝𐴘𐴧𐴝 𐴑𐴠𐴀𐴠𐴔𐴡𐴌 𐴀𐴟𐴎𐴡𐴌𐴡𐴌𐴃𐴟 , 𐴊𐴟𐴌𐴥𐴠 𐴏𐴥𐴝𐴉𐴢𐴏𐴡𐴃𐴟𐴌𐴥𐴝 𐴉𐴡𐴌𐴞𐴐𐴑𐴝𐴌 𐴋𐴞𐴘𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴀𐴠𐴑𐴀𐴡𐴔 𐴑𐴤𐴠𐴂 , 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴌𐴃𐴟 , 𐴈𐴡𐴀𐴠𐴑 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴦𐴡𐴣𐴏𐴞𐴁𐴡 𐴒𐴤𐴡𐴘 , 𐴎𐴠𐴍𐴠 𐴀𐴥𐴞𐴃𐴝𐴌𐴝 𐴁𐴠𐴐𐴤𐴞 𐴐𐴤𐴟𐴕𐴊𐴡𐴙𐴅𐴧𐴙𐴝 𐴁𐴡𐴐𐴤𐴡𐴃 𐴁𐴝𐴌𐴞 𐴒𐴡𐴌𐴞𐴁𐴡 𐴱 𐴘𐴥𐴝𐴌 𐴁𐴝𐴊𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴃𐴤𐴝𐴑𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 , 𐴀𐴟𐴎𐴡𐴌 𐴀𐴝𐴌 𐴒𐴤𐴞𐴐𐴡𐴌 𐴃𐴟 𐴕𐴠𐴓𐴞 𐴏𐴥𐴝𐴉𐴢 𐴏𐴡𐴃𐴟𐴌𐴝 𐴋𐴞𐴘𐴝𐴃 𐴁𐴤𐴝𐴓𐴝 𐴁𐴡𐴐𐴤𐴡𐴃 𐴁𐴝𐴌𐴞 𐴏𐴡𐴓𐴞𐴁𐴡 𐴱 𐴎𐴤𐴝𐴔𐴞𐴓𐴝 𐴈𐴡𐴔 𐴒𐴡𐴌𐴞𐴁𐴡𐴌 𐴓𐴝 , 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴀𐴝𐴏𐴠𐴊𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴃𐴧𐴟, 𐴇𐴥𐴡𐴑𐴟𐴔𐴡𐴃𐴡𐴌 𐴂𐴠𐴓𐴝𐴕 𐴀𐴥𐴞𐴏𐴝𐴉𐴠 , 𐴀𐴠𐴑 𐴓𐴥𐴝𐴑 𐴀𐴥𐴝𐴕𐴞𐴑 𐴔𐴝𐴕𐴟𐴙𐴐𐴢 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘𐴁𐴝𐴌 𐴀𐴝𐴏𐴠𐴊𐴠 𐴔𐴡𐴎𐴞𐴕 , 𐴊𐴟𐴘 𐴀𐴠𐴑 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴰 𐴰 𐴵 𐴲 𐴎𐴡𐴕 𐴔𐴝𐴕𐴟𐴙𐴐𐴢 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴦𐴡𐴣𐴏𐴞𐴁𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴠𐴌 𐴱𐴱

𐴒𐴡𐴃𐴡 𐴌𐴦𐴡𐴘 𐴁𐴝𐴌𐴠 𐴀𐴝𐴌 𐴐𐴤𐴡𐴔𐴁𐴝𐴌𐴠 𐴇𐴥𐴡𐴑𐴟𐴔𐴡𐴃𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴦𐴝𐴙𐴓𐴊𐴠 𐴈𐴥𐴡𐴁𐴡𐴌𐴞 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 , 𐴂𐴝𐴂𐴓𐴥𐴞𐴑 𐴐𐴤𐴎𐴟𐴑 𐴐𐴤𐴟𐴁𐴞𐴊𐴝 𐴀𐴠𐴃𐴠𐴁𐴝𐴌𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴃𐴤𐴝𐴑𐴤𐴡𐴕 𐴁𐴠𐴐𐴤𐴞 𐴁𐴤𐴝𐴓𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱 𐴕𐴟𐴖𐴝𐴈𐴥𐴝𐴓𐴞 𐴇𐴥𐴝𐴃𐴞𐴘𐴥𐴝 𐴀𐴟𐴉𐴟𐴎𐴞𐴓𐴝𐴌 𐴀𐴝𐴕𐴋𐴝𐴌𐴠 𐴀𐴝𐴏𐴠𐴊𐴠 𐴁𐴤𐴝𐴐𐴡𐴕 𐴏𐴡𐴌 𐴋𐴞𐴘𐴝 𐴘𐴠 , 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 𐴌𐴞𐴉𐴟𐴎𐴞 𐴌𐴝𐴑𐴤𐴞 𐴁𐴡𐴌𐴓𐴝 𐴃𐴡𐴘𐴧𐴝𐴌 𐴱 𐴁𐴤𐴝𐴐𐴡𐴕 𐴏𐴡𐴌𐴥𐴡 𐴌𐴠 𐴁𐴝𐴚𐴓𐴝𐴊𐴠𐴐𐴤𐴞 𐴕𐴠𐴁𐴤𐴞𐴌 𐴉𐴡𐴖𐴏𐴠 ” 𐴰 𐴰 𐴱 𐴳 ” 𐴑𐴟𐴌𐴟𐴓 𐴄𐴞𐴛𐴝 𐴈𐴥𐴏𐴧𐴝𐴒𐴡𐴌𐴞 , 𐴒𐴤𐴡𐴌 𐴁𐴝𐴣𐴊𐴞 𐴕𐴝𐴓 𐴒𐴡𐴙𐴅𐴧𐴙𐴠 𐴱 𐴁𐴤𐴝𐴐𐴡𐴕 𐴏𐴡𐴌𐴡𐴌𐴥𐴠 𐴄𐴦𐴟𐴙𐴕𐴧𐴝 𐴉𐴝𐴌𐴝 ( 𐴑𐴝𐴓𐴝𐴏𐴄𐴝𐴌 𐴖𐴠𐴓𐴠𐴙𐴅 ) 𐴈𐴦𐴡𐴘 𐴕𐴝𐴔 𐴊𐴞 ” 𐴰 𐴶 𐴳 𐴱 𐴰 𐴱 ” 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴌𐴝𐴑𐴤𐴞𐴁𐴝𐴌 𐴂𐴡𐴌𐴟𐴒𐴠𐴌𐴝𐴔 𐴱𐴱

𐴁𐴞𐴓𐴋𐴤𐴞𐴚 ( 𐴒𐴤𐴡𐴌 ) 𐴁𐴠𐴙𐴒𐴧𐴞𐴕 𐴔𐴠𐴍𐴞𐴌 𐴃𐴟 𐴏𐴝𐴙𐴌 𐴉𐴥𐴟𐴄 𐴀𐴟𐴏𐴡𐴓 𐴒𐴡𐴌𐴞 𐴁𐴝𐴕𐴝𐴘𐴧𐴠 𐴱 𐴉𐴡𐴃𐴧𐴞 ( 𐴑𐴝𐴓𐴝𐴏𐴄𐴝𐴌 𐴖𐴠𐴓𐴠𐴅𐴡𐴃 ) 𐴄𐴦𐴟𐴙𐴕𐴧𐴝 𐴉𐴝𐴌𐴝𐴃𐴢 𐴲 𐴱 𐴁𐴝𐴌𐴥𐴡𐴖𐴧𐴝𐴕 𐴒𐴤𐴡𐴌 𐴶 𐴱 𐴐𐴤𐴟𐴓𐴧𐴡𐴖𐴧𐴝 𐴑𐴝𐴔𐴌𐴝 , 𐴉𐴡𐴃𐴧𐴞 𐴑𐴝𐴔𐴌𐴝𐴃 𐴏𐴝𐴙𐴌 𐴄𐴝𐴓𐴝 𐴀𐴡𐴓𐴝 𐴀𐴠𐴏𐴄𐴞𐴓𐴡𐴌 𐴐𐴤𐴠𐴓𐴄𐴝𐴌 𐴀𐴠𐴏𐴄𐴠𐴐𐴤𐴠𐴕 𐴁𐴝𐴕𐴝𐴘𐴧𐴠 𐴱 𐴀𐴝𐴌 𐴀𐴥𐴠𐴍𐴠 𐴰 𐴲 𐴱 ( 𐴑𐴝𐴓𐴝𐴏𐴄𐴝𐴌 𐴖𐴠𐴓𐴠𐴅𐴤𐴡𐴃 ) 𐴄𐴦𐴟𐴕𐴧𐴝 𐴉𐴝𐴌𐴝𐴃 𐴰 𐴲 𐴱 𐴘𐴥𐴝𐴕 𐴐𐴤𐴠𐴓𐴄𐴝𐴌 𐴀𐴠𐴏𐴄𐴠𐴐𐴤𐴠𐴕 𐴰 𐴴 𐴴 𐴱 𐴐𐴤𐴗𐴝 𐴑𐴝𐴔𐴌𐴝 𐴱 𐴉𐴡𐴃𐴧𐴞 𐴑𐴝𐴔𐴌𐴝𐴃 𐴏𐴝𐴙𐴌 𐴎𐴡𐴕𐴡𐴌 𐴊𐴡𐴌𐴠 𐴃𐴤𐴝𐴑𐴞 𐴉𐴝𐴌𐴞𐴁𐴡 𐴱 𐴈𐴡𐴕𐴥𐴡 𐴔𐴦𐴟𐴏𐴡𐴙𐴔𐴧𐴝 𐴔𐴡𐴏𐴞𐴁𐴡𐴃𐴡𐴌 𐴀𐴡𐴑𐴃𐴡𐴃 , 𐴇𐴥𐴡𐴑𐴟𐴔𐴡𐴃𐴞 𐴌𐴠𐴂𐴟𐴄 𐴔𐴡𐴎𐴞𐴕 𐴀𐴠𐴑𐴧𐴝𐴕 𐴐𐴤𐴠𐴓𐴄𐴝𐴌𐴡𐴃 𐴰 𐴶 𐴸 𐴎𐴡𐴕𐴡𐴌 𐴊𐴡𐴌𐴠 𐴃𐴤𐴝𐴑𐴞 𐴉𐴝𐴌𐴞𐴁𐴡 𐴱 𐴒𐴤𐴡𐴕𐴋𐴝 𐴘𐴠 𐴰 𐴶 𐴲 𐴑𐴞𐴓𐴟𐴔𐴞𐴄𐴝𐴌 𐴀𐴠𐴏𐴂𐴞𐴋 𐴓𐴡𐴘 𐴏𐴝𐴙𐴑𐴡𐴓𐴟𐴕 𐴁𐴦𐴝𐴘 𐴓𐴠 𐴘𐴥𐴡 𐴈𐴡𐴕𐴥 𐴡 𐴓𐴟𐴏𐴧𐴝𐴕 𐴕𐴡 𐴀𐴥𐴡𐴙𐴁𐴡 𐴱 𐴀𐴥𐴠𐴍𐴠 𐴌𐴝𐴑𐴤𐴞𐴁𐴡𐴊𐴠 𐴓𐴝𐴑𐴤𐴡𐴌 𐴖𐴡𐴌𐴠 𐴔𐴝𐴙𐴕𐴐𐴤𐴡𐴌 𐴓𐴝 𐴃𐴞𐴕 𐴔𐴥𐴝𐴐𐴤𐴡𐴌 𐴌𐴝𐴙𐴐𐴡𐴕 𐴎𐴡𐴔𐴝 𐴌𐴝𐴑𐴤𐴞 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴒𐴟𐴊𐴝𐴔 𐴁𐴝𐴕𐴝𐴘𐴧𐴠 𐴱𐴱

Sources : Dhakatribune