𐴁𐴟𐴌𐴞𐴏𐴠 ‘ 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴓𐴡𐴕𐴋𐴤𐴡𐴕𐴡𐴌 𐴀𐴡𐴐𐴤𐴝𐴕𐴃𐴞 𐴊𐴠𐴈𐴥𐴝𐴘𐴧𐴠 𐴱𐴱

𐴁𐴞𐴄𐴞𐴐𐴡𐴌 𐴁𐴡𐴌 𐴀𐴟𐴎𐴞𐴌 / 𐴁𐴟𐴌𐴞𐴏𐴢 𐴅𐴤𐴡𐴕 𐴏𐴥𐴡𐴕𐴠 , 𐴁𐴡𐴌𐴔𐴥𐴝𐴌 𐴀𐴠𐴏𐴄𐴠𐴙𐴄 𐴑𐴡𐴕𐴏𐴞𐴓𐴝𐴌 / 𐴀𐴡𐴚𐴏𐴥𐴠𐴚 𐴏𐴥𐴟𐴆𐴞𐴌 𐴓𐴡𐴘 𐴈𐴡𐴃𐴤𐴝 𐴈𐴡𐴘𐴧𐴠𐴊𐴠 𐴀𐴥𐴠𐴍𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄 𐴀𐴝𐴌 𐴀𐴝𐴌𐴑𐴝𐴕𐴡𐴌 𐴓𐴝𐴌𐴥𐴝𐴘𐴌 𐴁𐴝𐴁𐴡𐴃𐴠 , 𐴁𐴞𐴄𐴞𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴐𐴤𐴝𐴕𐴃𐴞 𐴎𐴦𐴝𐴙𐴌 𐴒𐴡𐴙𐴅𐴧𐴙𐴠 𐴱 𐴁𐴡𐴌𐴔𐴥𐴝 𐴘𐴠 𐴀𐴠𐴈𐴥𐴡𐴕 𐴔𐴟𐴑𐴝𐴁𐴠𐴓𐴝 𐴒𐴡𐴌𐴠𐴌 𐴊𐴠 𐴆𐴠𐴓𐴥𐴠𐴕𐴅𐴡𐴌 𐴁𐴝𐴁𐴡𐴃𐴠 𐴱 𐴁𐴞𐴄𐴞𐴐𐴡𐴌 𐴁𐴡𐴌 𐴀𐴟𐴎𐴞𐴌 𐴀𐴝𐴌 𐴏𐴥𐴟𐴆𐴞 𐴘𐴠 𐴄𐴠𐴓𐴞𐴉𐴥𐴟𐴕𐴠 𐴈𐴡𐴃𐴤𐴝 𐴈𐴗𐴝 𐴈𐴡𐴘 𐴒𐴡𐴙𐴅𐴧𐴙𐴠 𐴱 𐴏𐴥𐴟𐴆𐴞𐴌 𐴉𐴝𐴄𐴞 𐴁𐴤𐴟𐴍𐴡𐴃 𐴎𐴞𐴃𐴧𐴠 𐴊𐴠 𐴀𐴥𐴠𐴃𐴡𐴓𐴧𐴝 𐴏𐴥𐴟𐴆𐴞𐴌𐴠 𐴔𐴟𐴁𐴝𐴌𐴡𐴑𐴁𐴝𐴊 𐴎𐴝𐴕𐴝𐴘 𐴁𐴝𐴊𐴠 𐴈𐴡𐴃𐴤𐴝 𐴐𐴤𐴟𐴌𐴟 𐴒𐴡𐴙𐴅𐴧𐴙𐴠 𐴁𐴡𐴓𐴞 𐴁𐴞𐴄𐴞𐴐𐴡𐴌 𐴁𐴡𐴌 𐴀𐴟𐴎𐴞𐴌𐴡𐴌 𐴀𐴡𐴉𐴞𐴏𐴡𐴌 𐴃𐴡𐴌𐴉𐴡𐴌 𐴃𐴟 𐴎𐴝𐴕𐴝𐴒𐴞𐴘𐴠 𐴱 𐴁𐴤𐴟𐴄 𐴀𐴞𐴁𐴤𐴝 ‘ 𐴁𐴡𐴌𐴔𐴥𐴝 𐴋𐴞𐴔𐴟𐴑𐴠𐴌𐴠𐴏𐴞𐴌 𐴀𐴟𐴎𐴟 𐴎𐴝𐴌 𐴊𐴠 𐴘𐴥𐴝𐴕𐴡𐴌 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴈𐴝𐴛 𐴁𐴡𐴓𐴞 , 𐴁𐴞𐴄𐴞𐴐𐴡𐴌 𐴁𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱 𐴊𐴟𐴕𐴞𐴘𐴝𐴘 𐴌𐴠 𐴀𐴦𐴝𐴣𐴎𐴝𐴌 𐴁𐴤𐴟𐴃𐴡𐴌𐴠 𐴓𐴡𐴘 𐴉𐴥𐴝𐴓𐴝𐴘𐴧𐴠𐴊𐴠 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔𐴡𐴌 𐴃𐴟 , 𐴊𐴟𐴕𐴥𐴞 𐴊𐴠𐴐𐴢 𐴑𐴠𐴀𐴠𐴕 𐴒𐴡𐴌𐴞 𐴕𐴞𐴔𐴄𐴞 𐴉𐴝𐴌𐴞 𐴁𐴤𐴡𐴊𐴠 𐴱𐴱

𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴊𐴟𐴕𐴥𐴞 𐴓𐴞𐴋𐴝𐴌𐴠 𐴁𐴠𐴐𐴤𐴞 𐴒𐴡𐴌𐴞 𐴎𐴝𐴕𐴝 𐴎𐴝𐴕𐴞 𐴒𐴡𐴙𐴅𐴧𐴙𐴠 𐴱 𐴏𐴥𐴝𐴔𐴧𐴡𐴌 𐴁𐴡𐴏𐴡𐴌 𐴁𐴞𐴄𐴞𐴐𐴠 𐴔𐴠𐴎𐴁𐴝𐴕𐴞 𐴒𐴡𐴌𐴞𐴁𐴤𐴡𐴊𐴠 ( 𐴏𐴞 𐴀𐴡 𐴂𐴞 𐴶 𐴲 ) 𐴀𐴡𐴌 𐴁𐴝𐴁𐴡𐴃𐴠 𐴌𐴞𐴃 𐴁𐴡𐴊𐴡𐴓𐴝𐴘𐴁𐴝𐴌 𐴓𐴝 𐴑𐴟𐴐𐴞𐴐𐴢 𐴒𐴡𐴌𐴡𐴕 𐴎𐴡𐴌𐴟𐴌𐴞 𐴊𐴠 𐴘𐴥𐴝𐴕𐴡𐴌 𐴖𐴡𐴌𐴠 𐴘𐴥𐴡 𐴊𐴟𐴕𐴥𐴞 𐴓𐴞𐴋𐴝𐴌 𐴌𐴝𐴎𐴞 𐴀𐴥𐴡𐴘𐴧𐴠 𐴱 𐴀𐴞𐴕𐴋𐴟 – 𐴂𐴠𐴏𐴞𐴉𐴥𐴞𐴑 𐴀𐴠𐴓𐴝𐴑𐴝𐴌𐴠 𐴋𐴦𐴡𐴣𐴌 𐴒𐴡𐴌𐴞 , 𐴀𐴝𐴏𐴞𐴘𐴠𐴕𐴡𐴌 𐴁𐴠𐴐𐴤𐴞 𐴈𐴝𐴣𐴏𐴡𐴌 𐴂𐴝𐴄𐴕𐴝𐴌 𐴐𐴤𐴞𐴂𐴢 𐴁𐴡𐴕𐴞𐴁𐴝𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴌 𐴊𐴞𐴓𐴡𐴌 𐴀𐴝𐴒𐴧𐴡𐴌𐴥𐴡 𐴌𐴠 𐴕𐴟𐴖𐴝 𐴁𐴤𐴝𐴉𐴠 𐴁𐴞𐴄𐴞𐴐𐴡𐴌 𐴁𐴡𐴌 𐴀𐴟𐴎𐴞𐴌𐴠 𐴈𐴥𐴝𐴄𐴞 𐴒𐴡𐴙𐴅𐴧𐴙𐴠 𐴱 𐴁𐴡𐴌𐴔𐴥𐴝𐴃 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴇𐴝𐴓𐴡𐴃 𐴈𐴥𐴡𐴌𐴝𐴁 𐴀𐴥𐴡𐴘 𐴒𐴞𐴘𐴡𐴘𐴊𐴠 , 𐴈𐴥𐴝𐴀𐴝𐴏𐴢 𐴒𐴡𐴌𐴞 𐴀𐴝𐴌𐴑𐴝𐴕 𐴀𐴝𐴌 𐴆𐴤𐴞𐴕 𐴋𐴞𐴐𐴄𐴞𐴑𐴡𐴃 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠 , 𐴀𐴝𐴌 𐴂𐴝𐴂𐴓𐴞𐴑 𐴀𐴥𐴡𐴑𐴧𐴡𐴓 𐴓𐴝𐴌𐴥𐴝𐴘𐴌 𐴏𐴥𐴡𐴊𐴔𐴝 𐴓𐴡𐴘 𐴕𐴝𐴑𐴠 𐴔𐴟𐴑𐴠 𐴎𐴟𐴑 𐴒𐴤𐴡𐴙𐴓𐴧𐴠 𐴉𐴝𐴕 𐴀𐴥𐴡𐴘𐴒𐴞𐴘𐴡𐴘 𐴱 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴅𐴠𐴌 ) 𐴀𐴡𐴋𐴝𐴌 𐴔𐴝𐴕𐴞 𐴎𐴝𐴘 𐴁𐴡𐴓𐴧𐴝 , 𐴁𐴞𐴄𐴞𐴐𐴠 𐴁𐴡𐴌𐴔𐴥𐴝 𐴌𐴠 𐴈𐴡𐴘𐴧𐴠 𐴱 𐴎𐴦𐴝𐴣 𐴇𐴥𐴡𐴑 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃 𐴀𐴝𐴌 𐴔𐴟𐴓𐴥𐴝 𐴇𐴥𐴡𐴑𐴧𐴡𐴌 𐴃𐴟 𐴓𐴝𐴒𐴝𐴃𐴝𐴌 𐴔𐴝𐴇𐴌𐴟𐴔 𐴱𐴱

Sources : Rohingyavision