𐴁𐴝𐴘𐴋𐴠𐴕 𐴇𐴥𐴡𐴑𐴟𐴔𐴡𐴃𐴠 𐴉𐴝𐴑𐴧𐴝 𐴀𐴞𐴕𐴏𐴝𐴉𐴢 𐴉𐴡𐴕𐴡𐴃 𐴔𐴡𐴊𐴡𐴊 𐴒𐴡𐴌𐴞𐴁𐴤𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴠𐴌 : 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱𐴱

𐴀𐴝𐴌𐴑𐴝𐴕 𐴌𐴟𐴇𐴝𐴙𐴚𐴒𐴙𐴝 𐴏𐴟𐴏𐴦𐴝𐴘𐴄𐴞 𐴉𐴡𐴌 𐴂𐴞𐴀𐴞𐴏𐴢 𐴀𐴠𐴕𐴋 𐴇𐴙𐴥𐴟𐴔𐴠𐴕 𐴌𐴥𐴝𐴙𐴄 ( 𐴀𐴠 𐴀𐴝𐴌 𐴀𐴠𐴏𐴢 𐴂𐴞 𐴀𐴠𐴆 )𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔𐴠 𐴁𐴡𐴌𐴔𐴥𐴝𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴀𐴡𐴕 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 𐴐𐴤𐴡𐴣𐴀𐴡 𐴹 𐴊𐴡𐴉𐴥𐴝 𐴀𐴡𐴓𐴝 𐴉𐴡𐴌𐴡𐴏𐴃𐴝𐴁 𐴕𐴝𐴔𐴝 𐴀𐴠𐴑𐴧𐴝𐴕 𐴊𐴟𐴕𐴞𐴘𐴝𐴙𐴌 𐴔𐴟𐴀𐴟𐴕𐴃𐴟 𐴌𐴝𐴙𐴑𐴧𐴙𐴠 𐴱 𐴀𐴝𐴔𐴠𐴌𐴞𐴑𐴝𐴌 𐴶 𐴴 𐴀𐴡𐴔 𐴌𐴝𐴎𐴝𐴌 𐴁𐴤𐴟𐴍𐴡𐴃 𐴎𐴞𐴃𐴧𐴠 𐴊𐴠 / 𐴅𐴗𐴠 𐴁𐴝𐴘𐴋𐴠𐴕 𐴇𐴥𐴡𐴑𐴟𐴔𐴡𐴃 , 𐴅𐴠𐴕𐴟𐴏𐴥𐴝𐴙𐴋 𐴐𐴤𐴡𐴣𐴀𐴡 𐴊𐴟𐴕𐴞𐴘𐴝𐴙𐴌 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴎𐴟𐴓𐴟𐴔 𐴈𐴥𐴝𐴘𐴧𐴝 , 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴥𐴝𐴄𐴞 𐴀𐴞𐴕𐴏𐴝𐴉𐴢 𐴉𐴡𐴕𐴡𐴃 𐴔𐴡𐴊𐴡𐴊𐴒𐴝𐴌 𐴁𐴡𐴕𐴞𐴁𐴤𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴠𐴌 𐴱 𐴎𐴠𐴇𐴥𐴠𐴃𐴟 ‘ 𐴀𐴝𐴔𐴠𐴌𐴞𐴑𐴝 𐴊𐴡𐴌𐴥𐴡 𐴔𐴡𐴌𐴥𐴡 𐴑𐴤𐴠𐴔𐴡𐴃𐴝 𐴀𐴡𐴓𐴝 , 𐴀𐴥𐴠𐴃𐴡𐴓𐴧𐴝 𐴀𐴝𐴘𐴁𐴤𐴡𐴊𐴠 / 𐴁𐴝𐴘𐴋𐴠𐴕 𐴇𐴥𐴡𐴑𐴟𐴔𐴡𐴃𐴠 𐴈𐴥𐴝𐴔𐴝𐴈𐴥𐴝 , 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴊𐴠𐴐𐴤𐴡𐴃 𐴁𐴡𐴌𐴝𐴁𐴡𐴙𐴅𐴧𐴙𐴝 𐴒𐴡𐴌𐴥𐴝𐴘 , 𐴈𐴥𐴝𐴄𐴞 𐴀𐴞𐴕𐴏𐴝𐴉𐴢 𐴉𐴦𐴝𐴁𐴝𐴘 𐴊𐴞𐴉𐴝𐴌𐴞𐴁𐴤𐴡 𐴁𐴡𐴓𐴞 , 𐴑𐴝𐴑𐴏𐴢 𐴁𐴝𐴎𐴝𐴌𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔 ( 𐴀𐴠 𐴀𐴝𐴌 𐴀𐴠𐴏𐴢 𐴂𐴞 𐴀𐴠𐴆𐴠 ) 𐴌𐴦𐴡𐴘 𐴁𐴝𐴌𐴠 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴓𐴝𐴘𐴧𐴠𐴊𐴠 𐴘𐴥𐴝𐴕𐴡𐴃 𐴁𐴤𐴝𐴓𐴝 𐴀𐴝𐴐𐴤𐴝 𐴎𐴦𐴝𐴙𐴌 𐴒𐴡𐴙𐴅𐴧𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴏𐴠𐴊𐴠 𐴊𐴟𐴕𐴞𐴘𐴝𐴙𐴌 𐴀𐴥𐴡𐴑𐴧𐴡𐴓𐴡𐴌𐴃𐴟 𐴁𐴤𐴝𐴌𐴡 𐴋𐴦𐴡𐴣𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴃𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴁𐴤𐴟𐴍𐴠 𐴁𐴡𐴙𐴕𐴧𐴙𐴠 𐴊𐴠 𐴌𐴝𐴎𐴝 / 𐴁𐴝𐴘𐴋𐴠𐴕 𐴀𐴝𐴌 𐴊𐴟𐴀𐴡𐴔 𐴌𐴝𐴎𐴝 / 𐴇𐴝𐴌𐴞𐴏𐴢 𐴊𐴟𐴕𐴥𐴞 𐴎𐴡𐴕𐴡 𐴌𐴠 𐴔𐴟𐴁𐴝𐴌𐴡𐴑 𐴁𐴝𐴊 𐴎𐴝𐴕𐴝𐴘 𐴁𐴝𐴊𐴠 𐴱 𐴊𐴠𐴐𐴁𐴞𐴊𐴠𐴐𐴤𐴠 𐴀𐴝𐴏𐴧𐴠 𐴀𐴝𐴏𐴧𐴠 𐴀𐴡𐴎𐴡𐴙𐴒𐴧 𐴙𐴡 𐴈𐴝𐴔 𐴒𐴡𐴌𐴥𐴞 𐴎𐴝𐴌 𐴊𐴠 𐴘𐴥𐴝𐴕𐴡𐴌𐴠 𐴏𐴝𐴀𐴝𐴘 , 𐴉𐴥𐴡𐴄𐴝𐴉𐴥𐴡𐴄 𐴑𐴝𐴌𐴖𐴝𐴘 𐴒𐴡𐴌𐴡𐴕𐴡𐴌 𐴊𐴡𐴌𐴈𐴝𐴌𐴡𐴌𐴠 𐴔𐴝𐴕𐴞 𐴓𐴡𐴘𐴧𐴠𐴊𐴠 𐴘𐴥𐴝𐴕 𐴀𐴥𐴡𐴙𐴓𐴊𐴠 𐴀𐴡𐴃𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴀𐴠𐴏𐴄𐴠𐴙𐴄𐴔𐴠𐴕𐴡𐴃 𐴈𐴡𐴘𐴧𐴠 𐴱 𐴃𐴡𐴕𐴎𐴞𐴔 𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ‘ 𐴀𐴝𐴔𐴠𐴌𐴞𐴑𐴝𐴌 𐴏𐴠𐴕𐴥𐴠𐴄 𐴀𐴝𐴌 𐴁𐴡𐴘𐴊𐴠𐴐𐴢 𐴃𐴝𐴓𐴧𐴟𐴑 𐴑𐴡𐴔𐴞𐴄𐴞 𐴌𐴠 𐴁𐴠𐴙𐴒𐴧𐴞𐴕𐴡𐴌 𐴀𐴝𐴒𐴠 𐴈𐴗𐴝 𐴉𐴡𐴌𐴠𐴌 𐴊𐴠 𐴀𐴥𐴞𐴀𐴞𐴕 𐴀𐴥𐴡𐴙𐴓𐴊𐴠 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴀𐴥𐴡𐴘𐴝𐴃 𐴔𐴡𐴃𐴡𐴌 𐴓𐴡𐴘 𐴄𐴡𐴓𐴄𐴡𐴓𐴝𐴌 𐴊𐴠 𐴀𐴝𐴁𐴡𐴏𐴃𐴝𐴃 , 𐴀𐴝𐴌𐴀𐴥𐴡 𐴊𐴠𐴌𐴞 𐴒𐴡𐴌𐴞𐴁𐴝𐴌 𐴀𐴡𐴑𐴃𐴡 𐴕𐴥𐴝𐴘 𐴱 𐴀𐴥𐴠𐴃𐴡𐴓𐴧𐴝 𐴀𐴝𐴔𐴠𐴌𐴞𐴑𐴝𐴌 𐴃𐴟 𐴈𐴝𐴔 𐴁𐴡𐴕𐴠 𐴉𐴥𐴝𐴕 𐴅𐴟𐴖𐴝𐴁𐴞 𐴑𐴝𐴌𐴖𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔𐴠 𐴀𐴝𐴔𐴠𐴌𐴞𐴑𐴝𐴃 𐴀𐴝𐴘 𐴁𐴤𐴡𐴊𐴠 𐴇𐴥𐴡𐴑𐴟𐴔𐴡𐴃𐴡𐴌𐴠 𐴹 𐴊𐴡𐴉𐴥𐴝 𐴀𐴡𐴓𐴝 𐴉𐴡𐴌𐴡𐴏𐴃𐴝𐴁 𐴎𐴝𐴕𐴝𐴘𐴧𐴠𐴊𐴠 𐴀𐴥𐴠𐴍𐴠 , 𐴀𐴠𐴑𐴀𐴡𐴔 𐴀𐴥𐴡𐴙𐴓𐴊𐴠 ‘ 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴐𐴤𐴣𐴡𐴀𐴡 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴀𐴡𐴕 𐴱 𐴀𐴝𐴌 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴘𐴥𐴝𐴕 𐴄𐴤𐴞𐴑 𐴒𐴡𐴌𐴞 𐴊𐴦𐴡𐴕 𐴱 𐴀𐴝𐴌 𐴃𐴡𐴕𐴎𐴞𐴔 𐴀𐴥𐴞𐴁𐴝 𐴘𐴠 ‘ 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃 , 𐴇𐴠𐴉𐴝𐴎𐴡𐴃 𐴀𐴝𐴌 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴈𐴥𐴝𐴌𐴝 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴞𐴁𐴡𐴌 𐴓𐴝 𐴘𐴥𐴡 𐴈𐴡𐴘𐴧𐴠 𐴱 𐴀𐴝𐴔𐴠𐴌𐴞𐴑𐴝 𐴌𐴠 𐴀𐴝𐴌𐴀𐴥𐴡 𐴀𐴝𐴂𐴞𐴓 𐴒𐴡𐴌𐴥𐴝 𐴒𐴞𐴘𐴠 𐴊𐴠 ‘ 𐴒𐴝𐴔𐴁𐴞𐴘𐴝 , 𐴔𐴝𐴓𐴋𐴞𐴂𐴢 , 𐴑𐴠𐴕𐴠𐴋𐴝 𐴀𐴝𐴌 𐴕𐴠𐴊𐴝𐴌𐴓𐴥𐴠𐴕𐴡𐴌 𐴋𐴦𐴡𐴙𐴓𐴧𐴝 𐴀𐴡𐴙𐴕𐴧𐴡 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡 𐴌𐴠 , 𐴁𐴡𐴌𐴔𐴥𐴝 𐴌𐴠 𐴑𐴦𐴟𐴍𐴡𐴃 𐴃𐴟𐴓𐴞𐴁𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴞𐴁𐴡𐴌 𐴓𐴝 𐴃𐴡𐴘𐴧𐴝𐴌 𐴒𐴡𐴙𐴃𐴧𐴡 𐴱 𐴀𐴝𐴌 𐴁𐴡𐴌𐴔𐴥𐴝 𐴓𐴡𐴘 𐴐𐴤𐴡𐴊𐴡𐴌𐴞 𐴒𐴡𐴌𐴞 𐴅𐴠𐴕𐴟𐴏𐴥𐴝𐴙𐴋𐴡𐴃 𐴔𐴡𐴊𐴡𐴊 𐴒𐴡𐴌𐴠𐴌 𐴊𐴠 𐴊𐴠𐴐𐴢 𐴀𐴥𐴞𐴕𐴡𐴌𐴠 𐴌𐴟𐴑𐴤𐴞𐴁𐴡𐴌 𐴓𐴝 𐴱 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴡𐴌 𐴑𐴠𐴀𐴠𐴔 𐴁𐴡𐴕𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴕𐴞𐴎𐴡𐴌 𐴎𐴝𐴒𐴝𐴃 𐴉𐴦𐴡𐴣𐴏𐴥𐴝𐴘 𐴊𐴞𐴁𐴡𐴌𐴓𐴝 , 𐴕𐴞𐴉𐴡𐴌𐴡𐴃𐴞 𐴈𐴡𐴃𐴤𐴝 𐴁𐴡𐴕𐴒𐴡𐴌𐴥𐴞 𐴁𐴡𐴌𐴓𐴝 , 𐴔𐴡𐴕𐴎𐴡𐴑𐴧𐴝 𐴑𐴠𐴙𐴏𐴢 𐴁𐴝𐴕𐴝𐴘 𐴎𐴞𐴘𐴡𐴓𐴡𐴃 𐴁𐴝𐴣𐴊𐴞 𐴌𐴝𐴙𐴑𐴧𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴀𐴠𐴌𐴞 𐴊𐴞𐴁𐴡𐴌 𐴓𐴝 𐴱 𐴁𐴡𐴌𐴔𐴥𐴝 𐴌𐴠 𐴀𐴟𐴉𐴡𐴎𐴟𐴑𐴃𐴡 𐴏𐴞𐴂𐴢 𐴊𐴞𐴁𐴡𐴌 𐴓𐴝 𐴘𐴥𐴡 𐴃𐴡𐴕𐴎𐴞𐴔 ( 𐴀𐴠 𐴀𐴝𐴌 𐴀𐴠𐴏𐴢 𐴂𐴞 𐴀𐴠𐴆𐴠 ) 𐴈𐴡𐴘𐴧𐴠 𐴱𐴱

Sources : Dhakatribune