𐴎𐴠𐴀𐴠𐴕 𐴕𐴞𐴑𐴞 𐴀𐴝𐴣𐴀𐴝𐴌𐴝 𐴔𐴟𐴌𐴊𐴝 : 𐴁𐴤𐴟𐴄 𐴊𐴞𐴁𐴝𐴌 𐴀𐴟𐴉𐴡𐴎𐴟𐴃𐴧𐴡 𐴕𐴥𐴝𐴘 , 𐴁𐴡𐴌𐴔𐴥𐴝𐴌 𐴁𐴤𐴟𐴍𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴝𐴐𐴤𐴝 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘𐴧𐴠 𐴱𐴱

𐴁𐴡𐴌𐴔𐴥𐴝𐴃 𐴁𐴡𐴀𐴡𐴃 𐴁𐴡𐴏𐴥𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴁𐴝𐴊𐴠 𐴱 𐴕𐴡𐴖𐴡𐴔𐴁𐴡𐴌𐴡𐴌 𐴸 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴀𐴥𐴡𐴘𐴁𐴡𐴊𐴠 , 𐴋𐴞𐴔𐴟𐴑𐴠𐴌𐴠𐴏𐴞𐴌 𐴀𐴥𐴞𐴑𐴧𐴙𐴝 𐴔𐴟𐴑 𐴊𐴞𐴘𐴝 𐴁𐴤𐴟𐴍𐴡𐴌 𐴃𐴟 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 , 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴖𐴔 𐴌𐴟𐴇𐴝𐴙𐴚𐴒𐴙𐴝𐴌𐴠 𐴁𐴤𐴟𐴍𐴡𐴌 𐴇𐴥𐴡𐴑𐴧𐴡𐴌 𐴃𐴟 𐴔𐴥𐴝𐴇𐴌𐴟𐴔 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱 𐴐𐴤𐴡𐴕 𐴴 𐴷 𐴹 𐴱 𐴀𐴥𐴡𐴘𐴃𐴠 𐴰 𐴱 𐴰 𐴲 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴤𐴟𐴄 𐴊𐴞 𐴀𐴝𐴘𐴧𐴠𐴌 𐴊𐴠 𐴁𐴡𐴓𐴞 , 𐴃𐴞𐴕 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴊𐴠𐴐𐴤𐴡𐴌 𐴘𐴝𐴊 𐴒𐴡𐴌𐴥𐴞 𐴒𐴡𐴌𐴥𐴞 𐴌𐴞𐴉𐴟𐴎𐴞𐴌 𐴑𐴠𐴀𐴠𐴔𐴡𐴃 𐴊𐴞𐴕 𐴈𐴝𐴍𐴝𐴌 𐴊𐴠 / 𐴔𐴟𐴇𐴝𐴔𐴧𐴡𐴊 𐴘𐴟𐴏𐴟𐴉𐴠 𐴈𐴡𐴘𐴧𐴠 𐴱 𐴁𐴡𐴀𐴡𐴃 𐴁𐴡𐴏𐴥𐴡𐴌 𐴔𐴠𐴓𐴠𐴄𐴠𐴌𐴞𐴌 𐴇𐴥𐴡𐴑𐴟𐴔𐴡𐴃𐴡𐴌 𐴁𐴝𐴊𐴠 , 𐴋𐴞𐴔𐴟𐴑𐴠𐴌𐴠𐴏𐴞 𐴔𐴟𐴑𐴤𐴝 𐴌𐴦𐴡𐴘 𐴁𐴝𐴌𐴠 𐴀𐴥𐴡𐴌 𐴊𐴠 , 𐴊𐴟𐴘𐴀𐴡𐴔 𐴁𐴤𐴟𐴍𐴡𐴌 𐴇𐴥𐴡𐴑𐴧𐴡𐴌 𐴃𐴟 𐴔𐴥𐴇𐴌𐴟𐴔 𐴀𐴥𐴡𐴘𐴧𐴠𐴊𐴠 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 / 𐴘𐴟𐴏𐴉𐴢 𐴀𐴥𐴡 𐴀𐴝𐴏𐴠 , 𐴎𐴠 𐴁𐴤𐴟𐴄 𐴀𐴝𐴎𐴝𐴊𐴝𐴕𐴝 𐴀𐴝𐴌 𐴔𐴟𐴕𐴏𐴞𐴉𐴝𐴕𐴝 𐴕𐴡 𐴀𐴥𐴘𐴁𐴡 𐴁𐴡𐴓𐴞 ( 𐴘𐴟 𐴀𐴠𐴕𐴡𐴌 ) 𐴈𐴥𐴡𐴁𐴡𐴊𐴧𐴝𐴌𐴞 𐴀𐴝𐴏𐴠 𐴱𐴱

𐴁𐴤𐴟𐴄 𐴊𐴞 𐴕𐴡 𐴉𐴝𐴌𐴥𐴞𐴌 𐴊𐴠 𐴘𐴥𐴝𐴕𐴠 𐴀𐴝𐴣𐴀𐴝𐴌𐴠 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞 𐴒𐴡𐴙𐴅𐴧𐴙𐴠 , 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴀𐴦𐴝𐴛 𐴁𐴟𐴎𐴤𐴞𐴌 𐴊𐴠 𐴎𐴠𐴀𐴠𐴕 𐴕𐴞𐴑𐴞 𐴀𐴝𐴣𐴀𐴝𐴌𐴝 𐴔𐴟𐴌𐴊𐴝 𐴁𐴤𐴟𐴄 𐴊𐴞𐴁𐴝𐴌 𐴀𐴟𐴉𐴡𐴎𐴟𐴃𐴧𐴡 𐴕𐴡𐴀𐴡 𐴱 𐴊𐴟𐴕𐴞𐴘𐴝𐴙𐴌 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴋𐴦𐴡𐴣𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴘𐴟𐴏𐴟𐴉𐴠 / 𐴃𐴤𐴡𐴔𐴏𐴡𐴕 𐴌𐴗𐴠𐴄𐴝𐴌 𐴉𐴡𐴕𐴋𐴠𐴆𐴤𐴠𐴕𐴡𐴌𐴠 𐴄𐴠𐴓𐴥𐴞𐴉𐴟𐴕𐴠 𐴈𐴡𐴘𐴧𐴠 𐴱 𐴁𐴤𐴟𐴍𐴡𐴌 𐴇𐴥𐴡𐴑 𐴈𐴡𐴊𐴠 𐴘𐴥𐴝𐴕 𐴀𐴡𐴃𐴞 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴱 𐴀𐴝𐴣𐴀𐴝𐴌𐴝𐴌 𐴉𐴟𐴖𐴝𐴙𐴕 𐴀𐴠𐴑 𐴊𐴞𐴕 𐴀𐴞𐴅𐴞𐴕𐴥𐴙𐴝𐴌 𐴀𐴝𐴌 𐴀𐴟𐴑𐴞𐴓 𐴁𐴡𐴕𐴞 𐴉𐴝𐴌𐴞𐴁𐴡 , 𐴔𐴡𐴕𐴃𐴡𐴌 𐴈𐴡𐴣𐴀𐴡𐴃𐴧𐴠 𐴀𐴥𐴡𐴘 𐴉𐴝𐴌𐴞𐴁𐴤𐴡𐴊𐴠 𐴘𐴥𐴝𐴕 𐴁𐴟𐴎𐴤𐴞 𐴕𐴡 𐴉𐴝𐴌𐴞𐴌 𐴱 𐴀𐴦𐴝𐴛 𐴑𐴠𐴙𐴏𐴧𐴟 𐴁𐴞𐴐𐴧𐴝𐴐𐴢 𐴒𐴡𐴌𐴞 𐴕𐴡 𐴉𐴝𐴌𐴞𐴌 , 𐴎𐴡𐴊𐴞 𐴘𐴥𐴡 𐴀𐴝𐴣𐴀𐴝𐴌𐴝 𐴵 𐴲 𐴰 𐴲 𐴐𐴤𐴡𐴕𐴡𐴃 𐴁𐴤𐴟𐴄 𐴊𐴞𐴉𐴝𐴌𐴞𐴁𐴝𐴌 𐴎𐴡𐴙𐴒𐴧𐴙𐴡 𐴀𐴥𐴡𐴘𐴓𐴠 𐴘𐴥𐴡 𐴱 𐴁𐴤𐴟𐴄 𐴀𐴞𐴁𐴤𐴝 𐴁𐴠𐴐𐴤𐴞 𐴀𐴝𐴎𐴝𐴊𐴝𐴕𐴝 𐴀𐴝𐴌 𐴔𐴟𐴕𐴏𐴞𐴉𐴝𐴕𐴝 𐴀𐴥𐴡𐴘𐴁𐴡 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴁𐴠𐴙𐴒𐴧𐴟𐴕𐴠 𐴁𐴤𐴟𐴍𐴡𐴃 𐴀𐴥𐴞𐴏𐴧𐴝 𐴓𐴡𐴘𐴉𐴝𐴌𐴞𐴁𐴡 , 𐴁𐴡𐴓𐴞 𐴘𐴟 𐴀𐴠𐴕𐴡𐴌 𐴁𐴡𐴌𐴔𐴥𐴝𐴌 𐴏𐴧𐴡𐴉𐴞𐴌𐴠 𐴈𐴡𐴘𐴧𐴠 𐴱𐴱

𐴔𐴡𐴕𐴃𐴡𐴌 𐴁𐴡𐴌𐴔𐴥𐴝𐴌 𐴁𐴤𐴟𐴄 𐴑𐴡𐴔𐴞𐴐𐴠𐴕𐴠 𐴉𐴡𐴖𐴌𐴞 𐴃𐴡𐴌𐴠 𐴈𐴡𐴕𐴥𐴡 𐴅𐴟𐴖𐴝𐴁 𐴕𐴥𐴡 𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴞 𐴕𐴡 𐴓𐴡𐴘 𐴁𐴝𐴊𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴟 𐴏𐴟𐴌𐴒𐴡𐴌𐴞 𐴁𐴠 𐴑𐴝𐴕𐴟𐴕𐴞 𐴁𐴡𐴌𐴔𐴥𐴝𐴃 𐴒𐴤𐴡𐴙𐴓𐴧𐴙𐴠𐴊𐴠 𐴁𐴡𐴓𐴞 𐴈𐴡𐴀𐴡𐴌 𐴱 𐴇𐴥𐴝𐴓𐴠𐴑𐴤𐴠 ! 𐴐𐴤𐴡𐴃𐴝 𐴐𐴤𐴡𐴃𐴞 𐴁𐴡𐴏𐴥𐴡𐴌 𐴀𐴝𐴒𐴠 𐴀𐴥𐴡𐴘𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴞𐴏𐴝𐴉𐴠 𐴁𐴡𐴌𐴔𐴥𐴝𐴃 𐴃𐴤𐴝𐴑𐴠𐴌𐴊𐴠 𐴘𐴥𐴝𐴕𐴡𐴃 𐴇𐴥𐴞𐴏𐴄𐴟𐴌𐴞 𐴔𐴡𐴎𐴞𐴕 𐴁𐴠𐴐𐴤𐴞 𐴏𐴥𐴝𐴁𐴟𐴃 𐴀𐴝𐴏𐴠 𐴱 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔𐴠 𐴰 𐴰 𐴰 𐴰 𐴵 𐴸 𐴐𐴤𐴝𐴀𐴝𐴌𐴡 𐴀𐴝𐴣𐴐𐴄𐴡𐴓 𐴓𐴥𐴝𐴑 𐴓𐴡𐴃𐴞 𐴌𐴟𐴇𐴙𐴝𐴚𐴒𐴙𐴝 𐴌𐴞𐴉𐴟𐴎𐴞𐴌 𐴇𐴥𐴝𐴓𐴡𐴃𐴡 𐴌𐴠 𐴁𐴠𐴐𐴤𐴞 𐴔𐴡𐴐𐴑𐴞𐴓 𐴁𐴝𐴕𐴝𐴘 𐴉𐴥𐴠𐴓𐴝𐴘𐴧𐴠 𐴱 𐴀𐴠𐴃𐴡 𐴋𐴦𐴡𐴙𐴓𐴧𐴝 𐴀𐴟𐴓𐴅𐴤𐴡𐴕 𐴀𐴥𐴡𐴘𐴓𐴠 𐴘𐴥𐴡 𐴀𐴠𐴑 𐴊𐴞𐴕 𐴃𐴡 𐴊𐴠𐴐𐴤𐴡𐴃 𐴎𐴝𐴘𐴁𐴡 𐴱 𐴔𐴡𐴕𐴃𐴡𐴌 𐴁𐴡𐴌𐴔𐴥𐴝𐴌 𐴃𐴟 𐴀𐴝𐴣𐴀𐴝𐴌𐴝𐴌𐴠 𐴖𐴝𐴉𐴠𐴏𐴢 𐴕𐴞𐴁𐴝𐴌 𐴈𐴡𐴕𐴥𐴡 𐴀𐴠𐴌𐴝𐴊𐴝 𐴕𐴥𐴝𐴘 𐴁𐴡𐴓𐴞 , 𐴑𐴟𐴃𐴤𐴟 𐴉𐴝𐴓𐴡𐴚 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴀𐴞𐴏𐴔𐴝𐴙𐴓 𐴁𐴡𐴐𐴢 𐴵 𐴳 𐴁𐴡𐴏𐴥𐴡𐴌𐴠 𐴈𐴡𐴘𐴧𐴠 𐴱𐴱

𐴎𐴡𐴊𐴞 𐴘𐴥𐴡 𐴀𐴝𐴣𐴀𐴝𐴌𐴝 𐴖𐴝𐴉𐴠𐴏𐴢 𐴁𐴡𐴌𐴔𐴥𐴝𐴃 𐴎𐴝𐴘 , 𐴀𐴝𐴣𐴀𐴝𐴌𐴝 𐴌𐴠 𐴁𐴤𐴟𐴄 𐴊𐴞𐴃𐴡 𐴕𐴡 𐴊𐴠𐴓𐴠 𐴑𐴠𐴀𐴠𐴕 𐴀𐴥𐴡𐴘𐴁𐴡 ؟ 𐴀𐴝𐴣𐴀𐴝𐴌𐴝𐴌 𐴃𐴟 𐴉𐴟𐴖𐴝𐴙𐴕 𐴀𐴝𐴏𐴠 𐴀𐴥𐴞𐴃𐴝𐴌𐴝 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴇𐴥𐴡𐴑 𐴕𐴡 𐴉𐴝𐴘𐴓𐴠 , 𐴑𐴠𐴀𐴠𐴕𐴠 𐴁𐴝𐴏𐴞 𐴃𐴤𐴝𐴑𐴞 𐴉𐴝𐴌𐴞𐴁𐴡 ؟ 𐴎𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴊𐴠𐴐𐴤𐴡𐴙𐴃𐴧𐴝𐴃𐴝 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴈𐴝𐴌𐴥𐴞 𐴓𐴡𐴘𐴉𐴥𐴠𐴓𐴝𐴘𐴧𐴠 𐴱 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴡𐴓𐴞 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴀𐴥𐴡𐴘 𐴒𐴞𐴘𐴦𐴡𐴘 𐴱 𐴎𐴡𐴊𐴞 𐴁𐴡𐴌𐴔𐴥𐴝𐴌 𐴃𐴟 𐴔𐴡𐴕𐴠 𐴈𐴡𐴘𐴃𐴡 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴝 , 𐴁𐴤𐴟𐴄 𐴊𐴞𐴁𐴝𐴌 𐴀𐴠𐴑𐴧𐴝𐴕 𐴃𐴡𐴌𐴞𐴑𐴝 𐴒𐴡𐴙𐴃𐴧𐴡 𐴱 𐴎𐴠𐴕𐴋𐴞𐴓𐴧𐴝 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴊𐴠 𐴀𐴡𐴙𐴕𐴧𐴡 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌 𐴓𐴝 𐴒𐴡𐴙𐴅𐴧𐴙𐴠 𐴁𐴡𐴓𐴞 / 𐴌𐴟 𐴕𐴠 𐴏𐴝𐴕 𐴓𐴗𐴠𐴕𐴠 𐴈𐴡𐴘𐴧𐴠 𐴱𐴱

Sources : Dhakatribune