𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 , 𐴃𐴟𐴌𐴑𐴞 𐴘𐴥𐴡 𐴁𐴝𐴚𐴓𐴝𐴊𐴠𐴐𐴤𐴡𐴌 𐴉𐴥𐴟𐴣𐴖𐴝𐴣𐴃𐴞 𐴊𐴞𐴓 𐴔𐴡𐴕 𐴊𐴞𐴘𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴠 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌𐴃𐴟 𐴁𐴤𐴝𐴌𐴡 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝𐴌𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴑𐴠𐴀𐴠𐴔 𐴁𐴝𐴕𐴝𐴘 𐴏𐴥𐴝𐴀𐴝𐴌𐴝 𐴊𐴞 𐴌𐴝𐴙𐴑𐴧𐴙𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴃𐴟𐴌𐴑𐴞𐴌 𐴃𐴝𐴙𐴊𐴢 𐴔𐴡𐴊𐴡𐴊𐴢 𐴁𐴝𐴚𐴓𐴝𐴊𐴠𐴐𐴤𐴡𐴌 𐴏𐴥𐴝𐴣𐴀𐴝𐴃𐴠 𐴀𐴝𐴏𐴥𐴠 𐴁𐴡𐴓𐴞 𐴱 𐴁𐴝𐴚𐴓𐴝𐴃𐴠𐴐𐴤𐴡𐴃 𐴀𐴝𐴏𐴥𐴠𐴃𐴠 𐴃𐴟𐴌𐴑𐴞𐴌 𐴏𐴥𐴡𐴉𐴞𐴌 / 𐴔𐴟𐴏𐴃𐴡𐴉𐴝 𐴀𐴟𐴏𐴔𐴝𐴕 𐴃𐴟𐴌𐴝𐴕𐴠 , 𐴑𐴠𐴀𐴠𐴔𐴡𐴌 𐴕𐴟𐴖𐴝 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) / 𐴐𐴤𐴝 𐴌𐴞𐴎𐴖𐴝𐴕 𐴇𐴝𐴘𐴝𐴃 𐴀𐴝𐴌 𐴊𐴟𐴘𐴀𐴡𐴔 𐴑𐴡𐴔𐴞𐴐𐴕𐴝𐴌 / 𐴔𐴟𐴇𐴝𐴔𐴧𐴡𐴊 𐴑𐴡𐴔𐴝𐴓 𐴇𐴟𐴏𐴝𐴙𐴕 𐴓𐴡𐴘 𐴔𐴞𐴓𐴞 𐴁𐴡𐴌 𐴓𐴝 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴝𐴙𐴐𐴧𐴙𐴠𐴊𐴠 𐴀𐴥𐴠𐴍𐴠 𐴁𐴝𐴌 𐴁𐴝𐴌 𐴒𐴡𐴌𐴞 𐴁𐴞𐴐𐴧𐴝𐴐𐴢 𐴊𐴞 𐴈𐴡𐴘𐴧𐴠 𐴱 𐴃𐴟𐴌𐴑𐴞𐴌 𐴏𐴥𐴡𐴉𐴞𐴌 𐴀𐴝𐴌 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) 𐴐𐴤𐴡𐴣𐴀𐴡 𐴋𐴞 𐴏𐴞 𐴔𐴞𐴓𐴞 𐴒𐴡𐴙𐴅𐴧𐴙𐴠𐴊𐴠 𐴔𐴞𐴄𐴞𐴚𐴡𐴃 𐴱𐴱

𐴀𐴠𐴈𐴥𐴡𐴕 𐴏𐴡𐴓𐴠𐴌𐴊𐴠 𐴀𐴞𐴕𐴏𐴝𐴕𐴞𐴘𐴡𐴃𐴞 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 , 𐴑𐴤𐴟𐴁 𐴁𐴠𐴐𐴤𐴞 𐴈𐴡𐴃𐴤𐴝 𐴈𐴝𐴍𐴝 𐴈𐴝𐴍𐴞 𐴒𐴡𐴌𐴡𐴕𐴡𐴌 𐴁𐴝𐴊𐴠 𐴇𐴥𐴝𐴃 𐴓𐴡𐴘 𐴇𐴥𐴝𐴃 𐴔𐴞𐴓𐴝𐴘 𐴈𐴝𐴔 𐴒𐴡𐴌𐴞𐴁𐴡𐴌 𐴓𐴝 𐴊𐴟𐴕𐴥𐴞 𐴋𐴤𐴝𐴑𐴡𐴌 𐴃𐴟 𐴌𐴝𐴎𐴞 𐴀𐴥𐴡𐴘𐴧𐴠 𐴱 𐴀𐴞𐴕𐴏𐴝𐴕𐴞 𐴈𐴠𐴊𐴔𐴡𐴃𐴡𐴌 𐴖𐴡𐴌𐴠 𐴈𐴝𐴔 𐴒𐴡𐴌𐴠𐴌 𐴊𐴠 , 𐴃𐴟𐴌𐴑𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴕𐴎𐴞𐴔 ( 𐴄𐴞 𐴀𐴝𐴘 𐴑𐴠 𐴀𐴠 , 𐴀𐴠 𐴀𐴠𐴉𐴢 𐴀𐴠 𐴋𐴞 , 𐴃𐴟𐴌𐴑𐴤𐴞𐴐𐴢 𐴊𐴞𐴘𐴝𐴕𐴥𐴠𐴄 𐴉𐴥𐴡𐴕𐴋𐴠𐴆𐴤𐴠𐴕 𐴀𐴝𐴌 𐴃𐴟𐴌𐴑𐴤𐴞𐴐𐴢 𐴌𐴥𐴠𐴋𐴑𐴡𐴌𐴡𐴏𐴢 ) 𐴀𐴥𐴡𐴑𐴧𐴡𐴓𐴡𐴌 𐴀𐴠𐴈𐴥𐴡𐴕𐴡𐴌 𐴈𐴝𐴔𐴡𐴌 𐴁𐴝𐴁𐴡𐴃𐴠 𐴘𐴥𐴡 / 𐴏𐴥𐴡𐴉𐴞𐴌𐴠 𐴕𐴡𐴎𐴡𐴌 𐴊𐴞 𐴏𐴝𐴘𐴧𐴠 𐴱 𐴃𐴟𐴌𐴑𐴞𐴌 𐴇𐴥𐴠𐴓𐴃𐴤 𐴔𐴞𐴕𐴞𐴏𐴄𐴞𐴌𐴞 𐴀𐴝𐴌 ( 𐴀𐴠 𐴀𐴠𐴉𐴢 𐴀𐴠 𐴋𐴞 ) 𐴔𐴞𐴘𐴥𐴝𐴘 , 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴀𐴠𐴓𐴝𐴑𐴝𐴌 𐴁𐴝𐴚𐴓𐴝𐴊𐴠𐴐𐴤𐴞 𐴔𐴞𐴓𐴝𐴘 𐴉𐴡𐴙𐴃𐴧𐴡 𐴊𐴞𐴕 𐴰 𐴰 𐴰 𐴱 𐴀𐴠𐴑 𐴇𐴥𐴝𐴎𐴝𐴌 𐴉𐴡𐴙𐴅𐴧𐴡𐴕𐴃𐴡 𐴌𐴟𐴑𐴞𐴌𐴠 𐴊𐴝𐴁𐴝𐴘 𐴒𐴡𐴌𐴠𐴌 𐴊𐴠 𐴔𐴡𐴙𐴊𐴝𐴕𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴀𐴠𐴑𐴧𐴝𐴕𐴡𐴃 𐴀𐴥𐴡 𐴎𐴝𐴘 𐴏𐴝𐴘𐴧𐴠 𐴱𐴱

𐴃𐴟𐴌𐴑𐴞𐴌 𐴔𐴡𐴙𐴊𐴝𐴕𐴞 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴘𐴥𐴝𐴕𐴠 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴔𐴝𐴙𐴕𐴐𐴤𐴡𐴌𐴠 𐴊𐴝𐴁𐴝𐴘 𐴒𐴡𐴌𐴞 𐴉𐴝𐴌𐴠 𐴉𐴥𐴝𐴀𐴝𐴕 , 𐴀𐴝𐴌 𐴉𐴥𐴝𐴘𐴊𐴝 𐴉𐴦𐴡𐴣𐴏𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴀𐴠𐴓𐴝𐴑𐴝 𐴀𐴝𐴌𐴀𐴥𐴡 𐴁𐴝𐴌𐴥𐴝𐴘 𐴁𐴡𐴌 𐴓𐴝 𐴱 𐴏𐴥𐴡𐴉𐴞𐴌 / 𐴃𐴟𐴌𐴝𐴕𐴠 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 , 𐴀𐴝𐴌 𐴀𐴝𐴌 𐴀𐴝𐴌 𐴏𐴞 𐴀𐴝𐴌 𐴹 𐴓𐴡𐴔𐴁𐴡𐴌 𐴑𐴠𐴀𐴠𐴔𐴡𐴌 𐴏𐴞 𐴀𐴝𐴘 𐴏𐴞 ) 𐴓𐴡𐴘 𐴈𐴡𐴃𐴤𐴝 𐴈𐴗𐴝𐴈𐴡𐴘 𐴒𐴡𐴙𐴅𐴧𐴙𐴠 , 𐴀𐴠𐴑𐴧𐴝𐴕 𐴑𐴤𐴠𐴓𐴝𐴌 𐴔𐴝𐴍𐴥𐴡𐴃 𐴓𐴦𐴡𐴃 𐴉𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕𐴊𐴡𐴌𐴠 𐴑𐴤𐴐𐴞 𐴒𐴡𐴌𐴞 𐴁𐴡𐴌 𐴓𐴝 ( 𐴔𐴝𐴘𐴑𐴡𐴌𐴟 𐴀𐴠𐴒𐴌𐴞𐴑𐴤𐴝𐴓𐴆𐴤𐴝𐴌𐴡𐴌 )𐴏𐴥𐴠𐴄 𐴀𐴥𐴡𐴑𐴧𐴡𐴓 𐴊𐴞𐴘𐴠 𐴱 𐴀𐴝𐴌 ( 𐴄𐴞 𐴀𐴝𐴘 𐴑𐴠 𐴀𐴠 ) 𐴘𐴠 𐴈𐴡𐴀𐴠𐴑 𐴋𐴦𐴡𐴙𐴓𐴧𐴝 𐴔𐴡𐴑𐴏𐴡𐴊𐴡𐴌𐴠 𐴃𐴡𐴌𐴑𐴞 𐴒𐴡𐴌𐴞𐴁𐴡𐴌 𐴓𐴝 𐴈𐴝𐴔 𐴒𐴡𐴌𐴠𐴌 𐴊𐴠 𐴔𐴡𐴌𐴑𐴡𐴎𐴡𐴃 𐴀𐴥𐴡 𐴎𐴝𐴘 𐴏𐴝𐴘𐴧𐴠 𐴱 𐴃𐴟𐴌𐴑𐴞𐴌 𐴊𐴞𐴘𐴝𐴕𐴠𐴄 𐴉𐴥𐴡𐴕𐴋𐴞𐴐𐴤𐴠𐴕𐴡𐴌, 𐴏𐴥𐴞𐴓𐴝𐴙𐴌 𐴈𐴝𐴌𐴈𐴝𐴕𐴝 𐴀𐴝𐴌 𐴏𐴥𐴝𐴁𐴟𐴕𐴡𐴌 𐴈𐴝𐴌𐴈𐴝𐴕𐴝 , 𐴀𐴝𐴌 𐴃𐴟𐴌𐴑𐴞𐴌 𐴌𐴥𐴠𐴋𐴑𐴡𐴌𐴡𐴏𐴡𐴌 𐴁𐴝𐴁𐴡𐴃𐴠 𐴘𐴥𐴡 𐴅𐴝𐴕𐴑𐴝𐴌𐴞 𐴓𐴠𐴘𐴧𐴠 𐴱 𐴐𐴤𐴡𐴕 𐴷 𐴱 𐴰 𐴲 𐴀𐴥𐴡𐴘𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴡𐴌𐴟𐴌𐴞 𐴀𐴞𐴕𐴏𐴝𐴕𐴞 𐴈𐴥𐴠𐴊𐴔𐴡𐴃 𐴒𐴡𐴌𐴞 𐴀𐴝𐴘𐴧𐴠𐴌 𐴊𐴠 𐴀𐴠𐴑𐴀𐴡𐴔 𐴔𐴟𐴓𐴧𐴟𐴑 𐴃𐴟𐴌𐴑𐴞 𐴱𐴱

Sources : Dhakatribune