𐴁𐴡𐴌𐴔𐴥𐴝𐴌 𐴰 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴍𐴡𐴌 𐴂𐴠𐴓𐴝𐴕𐴡𐴌 𐴐𐴤𐴝𐴌 𐴀𐴡𐴚𐴐𐴤𐴡 𐴱𐴱

𐴀𐴠 𐴈𐴡𐴃𐴤𐴝 𐴀𐴝𐴘𐴕𐴝𐴌 𐴔𐴡𐴃𐴡 𐴏𐴥𐴝𐴉𐴢 𐴊𐴠 , 𐴁𐴡𐴌𐴔𐴥𐴝𐴌 𐴰 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴄 𐴀𐴝𐴎𐴝𐴊𐴝𐴕𐴝 , 𐴔𐴟𐴕𐴏𐴞𐴉𐴝𐴕𐴝 𐴀𐴝𐴌 𐴓𐴟𐴑 𐴃𐴡𐴕𐴃𐴡𐴌𐴞𐴑 𐴕𐴡 𐴀𐴥𐴡𐴘𐴁𐴡 𐴱 𐴁𐴡𐴀𐴡𐴃 𐴉𐴝𐴄𐴞 𐴀𐴥𐴡𐴑𐴧𐴡𐴓𐴠 𐴀𐴥𐴞𐴏𐴧𐴝 𐴓𐴡𐴘𐴁𐴡𐴊𐴠 𐴁𐴡𐴌𐴔𐴥𐴝𐴌 𐴊𐴟𐴘𐴀𐴡𐴔 𐴎𐴞𐴁𐴧𐴝𐴃 𐴀𐴡𐴓𐴝 𐴁𐴤𐴟𐴄 𐴕𐴡𐴖𐴡𐴔𐴁𐴡𐴌𐴡𐴌 𐴸 𐴃𐴝𐴌𐴞𐴑𐴡𐴃 𐴀𐴥𐴡𐴘𐴁𐴡𐴊𐴠 𐴘𐴥𐴝𐴕 𐴉𐴝𐴏𐴢 𐴒𐴡𐴙𐴅𐴧𐴝 𐴱 𐴁𐴤𐴟𐴄 𐴀𐴞𐴁𐴤𐴝 𐴁𐴡𐴌𐴔𐴥𐴝 𐴓𐴟𐴑 𐴃𐴡𐴕𐴃𐴡𐴌𐴞𐴑𐴡𐴌 𐴀𐴟𐴎𐴟 𐴎𐴡𐴕𐴡𐴌 𐴀𐴥𐴟𐴃𐴧𐴟𐴌 𐴊𐴠 𐴘𐴥𐴝𐴕 𐴏𐴥𐴡𐴄𐴞𐴑 𐴒𐴡𐴙𐴅𐴧𐴙𐴝 𐴱 𐴀𐴠 𐴈𐴡𐴃𐴤𐴝 𐴒𐴤𐴝𐴕 𐴏𐴥𐴝𐴉𐴢 𐴊𐴠 , 𐴑𐴤𐴞 ! 𐴁𐴡𐴌𐴔𐴥𐴝𐴌 𐴁𐴤𐴟𐴍𐴡𐴌 𐴌𐴝𐴏𐴧𐴝𐴌 𐴏𐴥𐴞𐴓𐴏𐴞𐴓𐴝 𐴁𐴞𐴓𐴑𐴤𐴟𐴓 𐴓𐴟𐴑 𐴃𐴡𐴕𐴃𐴡𐴌𐴞𐴑𐴡𐴌 𐴀𐴟𐴓𐴋𐴝 𐴱 𐴎𐴝𐴕𐴞 𐴉𐴥𐴟𐴕𐴞 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴖𐴔 𐴀𐴝𐴌 𐴊𐴤𐴡𐴌𐴔𐴡 𐴉𐴡𐴌𐴑 𐴒𐴡𐴌𐴥𐴞 𐴁𐴤𐴟𐴍𐴡𐴌 𐴃𐴟 𐴔𐴥𐴝𐴇𐴌𐴟𐴔 𐴒𐴡𐴌𐴥𐴝 𐴎𐴝𐴀𐴝𐴌 , 𐴀𐴝𐴌 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴃𐴤𐴝𐴑𐴠𐴊𐴠 𐴓𐴡𐴒𐴁𐴤𐴡𐴒𐴢 𐴊𐴟𐴘 𐴔𐴡𐴓𐴞𐴘𐴟𐴕 𐴔𐴝𐴙𐴕𐴐𐴤𐴡𐴌𐴠 𐴘𐴥𐴡 𐴁𐴤𐴟𐴍𐴡𐴌 𐴃𐴟 𐴔𐴥𐴝𐴇𐴌𐴟 𐴒𐴡𐴌𐴥𐴝 𐴎𐴝𐴀𐴝𐴌 𐴱 𐴁𐴤𐴟𐴍𐴡𐴌 𐴃𐴟 𐴔𐴥𐴝𐴇𐴌𐴟𐴔 𐴒𐴡𐴙𐴅𐴧𐴙𐴠𐴊𐴠 𐴓𐴞𐴐𐴄𐴤𐴞𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴒𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴏𐴞𐴘𐴝𐴏𐴡𐴃𐴡𐴌 𐴃𐴟 𐴔𐴥𐴝𐴇𐴌𐴟𐴔 𐴒𐴡𐴙𐴅𐴧𐴙𐴠𐴟𐴊𐴠 𐴘𐴥𐴝𐴕𐴡𐴌𐴠 𐴕𐴝𐴉𐴡𐴏𐴥𐴡𐴕 𐴒𐴡𐴌𐴞 , 𐴀𐴥𐴞𐴃𐴝𐴌𐴝𐴌 𐴇𐴥𐴡𐴑 𐴁𐴡𐴌𐴝𐴁𐴡𐴌 𐴉𐴦𐴡𐴕𐴧𐴝𐴕 𐴏𐴝𐴀𐴝𐴌 𐴱𐴱

𐴱 = 𐴁𐴡𐴌𐴔𐴥𐴝𐴃 𐴀𐴥𐴡𐴘𐴁𐴡𐴊𐴠 𐴁𐴤𐴟𐴄 𐴁𐴠𐴒𐴧𐴟𐴕𐴡𐴃 𐴁𐴤𐴟𐴍𐴡𐴌 𐴇𐴥𐴡𐴑 𐴉𐴡𐴀𐴡𐴕 ٫

𐴲 = 𐴀𐴥𐴡𐴘𐴁𐴡𐴊𐴠 𐴁𐴤𐴟𐴄 𐴀𐴥𐴡𐴑𐴧𐴡𐴓𐴡𐴃 𐴉𐴝𐴄𐴞 𐴁𐴝𐴕𐴝𐴘 𐴁𐴤𐴟𐴄 𐴓𐴡𐴘𐴁𐴝𐴌 𐴊𐴞𐴁𐴝𐴌 𐴇𐴥𐴡𐴑 𐴀𐴡𐴙𐴕𐴧𐴡 𐴑𐴡𐴖𐴔𐴡𐴌 𐴋𐴦𐴡𐴙𐴓𐴧𐴝 𐴁𐴡𐴌𐴝𐴁𐴡𐴌 𐴉𐴡𐴀𐴡𐴕 ٫

𐴳 = 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓 𐴐𐴤𐴡𐴣𐴀𐴡 𐴀𐴞𐴕𐴄𐴝𐴌𐴕𐴥𐴠𐴄 𐴀𐴝𐴌 𐴔𐴟𐴕𐴏𐴞𐴉𐴝𐴕𐴝 𐴅𐴝𐴕𐴑𐴝𐴌𐴞 𐴓𐴡𐴘 𐴁𐴤𐴟𐴄 𐴀𐴥𐴡𐴘 𐴉𐴝𐴌𐴡𐴕𐴡𐴌 𐴇𐴥𐴡𐴑 ٫

𐴴 = 𐴊𐴠𐴐𐴤𐴡𐴙𐴃𐴧𐴝 𐴇𐴥𐴡𐴑 𐴉𐴡𐴀𐴡𐴕 ٫ 𐴱𐴱

𐴁𐴡𐴌𐴔𐴥𐴝𐴌 𐴁𐴤𐴟𐴍𐴡𐴌 𐴏𐴥𐴞𐴓𐴏𐴞𐴓𐴝 𐴀𐴞𐴁𐴤𐴝 𐴘𐴠 , 𐴐𐴤𐴟𐴊𐴠 𐴎𐴝𐴃 𐴉𐴡𐴌𐴡𐴑 𐴀𐴝𐴌 𐴊𐴤𐴡𐴌𐴔𐴡 𐴉𐴡𐴌𐴡𐴑 𐴒𐴡𐴌𐴞 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴖𐴔𐴡𐴌𐴠 , 𐴕𐴞𐴎𐴡𐴌 𐴇𐴥𐴡𐴑𐴧𐴡𐴌 𐴃𐴟 𐴔𐴥𐴝𐴇𐴌𐴟𐴔 𐴒𐴡𐴙𐴅𐴧𐴙𐴠 𐴊𐴠 𐴕𐴡 , 𐴁𐴤𐴡𐴓𐴑𐴤𐴞 𐴊𐴠𐴐𐴁𐴞𐴊𐴠𐴐𐴤𐴠 𐴈𐴡𐴊𐴦𐴞𐴕 𐴔𐴡𐴑𐴏𐴥𐴡𐴊 𐴓𐴡𐴘 , 𐴁𐴤𐴟𐴄 𐴔𐴝𐴕𐴞 𐴓𐴡𐴘𐴧𐴠𐴊𐴠 𐴓𐴟𐴑𐴃𐴡𐴕𐴃𐴡𐴌𐴡𐴌 𐴀𐴟𐴎𐴟 𐴁𐴡𐴌𐴔𐴥𐴝 𐴎𐴝𐴌 𐴁𐴡𐴓𐴞 𐴈𐴡𐴀𐴡𐴌 𐴊𐴠 𐴀𐴥𐴞𐴕𐴡𐴌 𐴁𐴞𐴓𐴑𐴤𐴟 𐴀𐴟𐴓𐴋𐴝 𐴱 𐴁𐴡𐴌𐴔𐴥𐴝 𐴀𐴝𐴎𐴝𐴊 𐴀𐴥𐴡𐴘𐴧𐴠 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴤𐴟𐴍𐴡𐴃 𐴐𐴤𐴡𐴌𐴞𐴑 𐴀𐴥𐴡𐴘 𐴀𐴝𐴘𐴧𐴠𐴌 𐴊𐴠 𐴇𐴥𐴡𐴑 𐴘𐴥𐴝𐴕𐴡𐴌 𐴃𐴟 𐴱 𐴀𐴝𐴃𐴤𐴞𐴑𐴧𐴙𐴝 𐴒𐴡𐴌𐴞 𐴵 𐴱 𐴰 𐴲 𐴐𐴤𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴔𐴥𐴝𐴇𐴌𐴟𐴔 𐴒𐴡𐴌𐴞 𐴊𐴞𐴘𐴠 𐴱 𐴀𐴠𐴈𐴥𐴡𐴕 𐴰 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴍𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴇𐴥𐴡𐴑 𐴉𐴝𐴘𐴁𐴡𐴌 𐴓𐴝 𐴊𐴠𐴐𐴁𐴞𐴊𐴠𐴐𐴤𐴡𐴌 𐴃𐴟 𐴁𐴟𐴎𐴤𐴝 𐴁𐴟𐴎𐴞 𐴒𐴡𐴌𐴥𐴝 𐴉𐴡𐴌𐴞𐴁𐴡 𐴱 𐴀𐴠 𐴈𐴡𐴃𐴤𐴝 𐴘𐴝𐴕 𐴏𐴥𐴝𐴉𐴢 𐴊𐴠 𐴁𐴤𐴟𐴄 𐴀𐴞𐴁𐴤𐴝 𐴀𐴝𐴎𐴝𐴊𐴝𐴕𐴝 𐴀𐴝𐴌 𐴔𐴟𐴕𐴏𐴞𐴉𐴝𐴕𐴝 𐴕𐴡 𐴀𐴥𐴡𐴘𐴁𐴡 𐴱 𐴁𐴤𐴟𐴄 𐴀𐴞𐴁𐴤𐴝𐴌 𐴕𐴡𐴃𐴞𐴅𐴤𐴝 𐴘𐴝𐴓𐴡𐴃𐴞 𐴕𐴡 𐴔𐴝𐴙𐴕𐴧𐴙𐴝 𐴱 𐴏𐴥𐴝𐴌𐴔𐴠 𐴀𐴥𐴡𐴘𐴁𐴡𐴊𐴠 𐴁𐴤𐴟𐴄 𐴀𐴥𐴡𐴑𐴧𐴡𐴓 𐴑𐴝𐴕𐴟𐴕𐴞 𐴀𐴥𐴡𐴉𐴝𐴕 𐴒𐴡𐴌𐴞 𐴈𐴥𐴝𐴄𐴞 𐴋𐴞𐴔𐴟𐴑𐴠𐴌𐴠𐴏𐴞𐴌 𐴔𐴡𐴑𐴏𐴡𐴊 𐴉𐴟𐴌𐴝 𐴀𐴥𐴡𐴉𐴝𐴕 𐴊𐴠𐴐𐴁𐴞𐴊𐴐𐴢 𐴔𐴞𐴓𐴞 𐴒𐴡𐴌𐴥𐴝 𐴉𐴡𐴌𐴞𐴁𐴦𐴡 𐴱𐴱

Sources : Rohingyakhobor