𐴁𐴝𐴚𐴓𐴝𐴊𐴠𐴐𐴤𐴠 𐴑𐴠𐴙𐴏𐴧𐴟 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴦𐴡𐴣𐴏𐴝𐴙𐴃 𐴉𐴝𐴌𐴠 : 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴱𐴱

𐴕𐴡𐴖𐴡𐴔𐴁𐴡𐴌𐴡𐴌 𐴀𐴠𐴑𐴀𐴡𐴔 𐴇𐴥𐴝𐴉𐴃𐴝𐴃 𐴑𐴠𐴙𐴏𐴧𐴟 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴦𐴡𐴣𐴏𐴝𐴘 𐴁𐴡 𐴁𐴡𐴓𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 , 𐴁𐴞𐴐𐴤𐴞𐴃 𐴁𐴝𐴌𐴠 𐴀𐴥𐴞𐴁𐴝𐴌 𐴀𐴡𐴉𐴞𐴏𐴡𐴃 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠 𐴱 𐴔𐴡𐴕𐴃𐴡𐴌 𐴈𐴡𐴖𐴧𐴝 𐴒𐴤𐴡𐴌𐴒𐴟𐴐𐴧𐴞 𐴉𐴦𐴡𐴣𐴏𐴝𐴘 𐴁𐴡𐴊𐴠 𐴘𐴥𐴝𐴕 𐴊𐴤𐴡𐴌𐴞 𐴕𐴥𐴡 𐴈𐴡𐴀𐴡 𐴱 𐴁𐴝𐴚𐴓𐴝𐴊𐴠𐴐𐴢𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴉𐴦𐴡𐴣𐴏𐴝𐴘 𐴁𐴝𐴌 𐴉𐴝𐴘𐴏𐴠𐴓𐴝 𐴒𐴡𐴙𐴅𐴧𐴙𐴠 𐴊𐴠 𐴘𐴥𐴝𐴕𐴡𐴃 , 𐴁𐴝𐴚𐴓𐴝𐴊𐴠𐴐𐴢 𐴀𐴡𐴄𐴡𐴓 𐴁𐴡𐴓𐴞 / 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔𐴡𐴌 𐴋𐴝𐴘𐴌𐴠𐴑𐴄𐴝𐴌 𐴅𐴞𐴕𐴞𐴌𐴠𐴓𐴠 𐴈𐴡𐴘𐴧𐴠𐴊𐴠 , 𐴀𐴝𐴣𐴀𐴌𐴝 𐴔𐴠𐴎𐴧𐴝𐴕 𐴑𐴤𐴟𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴠 𐴈𐴥𐴝𐴕𐴝 𐴈𐴥𐴝𐴁𐴝𐴙𐴌 𐴊𐴠 𐴈𐴥𐴡𐴏𐴧𐴝 𐴑𐴟𐴃𐴤𐴟𐴉𐴝𐴓𐴡𐴚𐴡𐴌 𐴃𐴟 𐴁𐴤𐴝𐴌𐴡 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴈𐴡𐴔 𐴀𐴥𐴡𐴘𐴁𐴡 𐴱 𐴀𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴁𐴡𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴠 𐴀𐴥𐴠𐴍𐴠 𐴈𐴝𐴔 𐴒𐴡𐴌𐴞 𐴉𐴝𐴌𐴥𐴞𐴁𐴡 𐴱𐴱

𐴎𐴠𐴙𐴕𐴧𐴞𐴑𐴞 𐴕𐴞𐴑𐴞 , 𐴔𐴝𐴏𐴧𐴝𐴘 𐴉𐴝𐴌𐴞𐴁𐴡 , 𐴉𐴥𐴝𐴌𐴡𐴔 𐴒𐴡𐴌𐴞 𐴉𐴝𐴌𐴥𐴞𐴁𐴡 𐴀𐴝𐴌 𐴒𐴡𐴌𐴟 𐴏𐴥𐴡𐴀𐴡𐴓 𐴉𐴝𐴓𐴞𐴉𐴝𐴌𐴞𐴁𐴡 𐴁𐴡𐴓𐴞 / 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔𐴠 𐴈𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴌𐴞𐴉𐴟𐴎𐴞 𐴀𐴥𐴡𐴘𐴧𐴠𐴊𐴠 𐴃𐴞𐴕 𐴁𐴡𐴏𐴥𐴡𐴌 𐴉𐴟𐴌𐴝𐴘 𐴁𐴝𐴊𐴠 𐴘𐴥𐴡 𐴈𐴡𐴕𐴥𐴡 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴒𐴞𐴘𐴠𐴊𐴠 𐴕𐴥𐴝𐴘 𐴱 𐴈𐴡 𐴀𐴠𐴑 𐴊𐴞𐴕 𐴀𐴝𐴒𐴠 𐴅𐴝𐴂𐴝𐴕𐴡𐴌 𐴏𐴥𐴡𐴉𐴞𐴌 𐴀𐴝𐴣𐴀𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘 𐴈𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴝𐴉𐴞𐴏𐴞𐴃 𐴔𐴡𐴊𐴡𐴊𐴒𐴡𐴌𐴞 𐴁𐴡 𐴁𐴡𐴓𐴞 𐴁𐴠𐴐𐴤𐴞 𐴁𐴠𐴐𐴤𐴞 𐴐𐴤𐴡𐴀𐴑 𐴎𐴝𐴀𐴞𐴌 𐴒𐴡𐴙𐴅𐴧𐴙𐴠 𐴱 𐴁𐴡𐴌𐴔𐴥𐴝 𐴀𐴝𐴌 𐴅𐴝𐴂𐴝𐴕𐴡𐴌 𐴃𐴝𐴓𐴧𐴟𐴑 𐴁𐴤𐴝𐴓𐴝 𐴀𐴝𐴏𐴥𐴠𐴊𐴠 𐴀𐴥𐴠𐴃𐴡𐴓𐴧𐴝 𐴁𐴡𐴌𐴔𐴥𐴝 𐴘𐴠 𐴅𐴝𐴂𐴝𐴕𐴡𐴌 𐴈𐴡𐴃𐴤𐴝 𐴉𐴥𐴟𐴕𐴞𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴀𐴝𐴏𐴌𐴝𐴘𐴝𐴕 𐴂𐴡𐴌𐴡𐴅𐴤𐴠𐴑𐴄 𐴳 𐴕𐴝𐴔 𐴊𐴞 𐴶 𐴱 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴠 𐴎𐴝𐴒𐴝 𐴊𐴞𐴁𐴡𐴌 𐴓𐴝 , 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴈𐴝𐴔 𐴐𐴤𐴟𐴌𐴟 𐴒𐴡𐴙𐴅𐴧𐴙𐴠 𐴊𐴠 𐴱𐴱

Sources : Rohigyakhobor