𐴘𐴟 𐴀𐴠𐴕𐴡𐴌 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔 𐴃𐴡𐴕𐴎𐴞𐴔𐴠 𐴑𐴠𐴀𐴠𐴔𐴡𐴃 𐴑𐴤𐴠𐴃𐴧𐴞𐴓𐴝 𐴁𐴝𐴎𐴝𐴌 𐴀𐴝𐴁𐴝𐴌 𐴑𐴤𐴟𐴙𐴓𐴧𐴙𐴠 𐴱𐴱

𐴃𐴝𐴎𐴤𐴝 𐴈𐴥𐴝𐴕𐴝𐴌 𐴔𐴠𐴎𐴧𐴝𐴕 𐴓𐴝𐴒𐴝𐴀𐴡𐴕𐴡𐴌 𐴊𐴟𐴖𐴝𐴌𐴝 𐴌𐴞𐴉𐴟𐴎𐴞 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴝𐴕𐴟𐴙𐴐𐴢 , 𐴊𐴟𐴕𐴥𐴞 𐴋𐴦𐴝𐴙𐴓𐴧𐴝 𐴉𐴥𐴝𐴙𐴊𐴝 𐴀𐴥𐴡𐴘𐴧𐴠 𐴱 𐴘𐴟 𐴀𐴠𐴕𐴡𐴌 ( 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔 ) 𐴃𐴡𐴕𐴎𐴞𐴔𐴠 𐴑𐴡𐴌𐴟𐴕𐴝 𐴁𐴝𐴘𐴌𐴠𐴏𐴡𐴌 𐴎𐴡𐴌𐴞𐴘𐴝 𐴁𐴡𐴕𐴒𐴡𐴌𐴞 𐴉𐴥𐴠𐴓𐴥𐴝𐴀𐴝𐴙𐴓 𐴊𐴠 𐴃𐴝𐴎𐴤𐴝 𐴈𐴥𐴝𐴕𐴝𐴌 𐴔𐴠𐴎𐴧𐴝𐴕 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴁𐴧𐴝𐴌 𐴑𐴤𐴟𐴙𐴓𐴧𐴙𐴠 𐴱 𐴎𐴠𐴍𐴥𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴓𐴝 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴞𐴁𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴠 𐴱 𐴑𐴝𐴑𐴐𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴤𐴠𐴃𐴧𐴞𐴓𐴧𐴝 𐴀𐴝𐴌 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓𐴠 𐴈𐴝𐴔𐴝𐴘 𐴒𐴡𐴌𐴥𐴞 𐴉𐴝𐴌𐴡𐴕𐴡𐴌 𐴁𐴤𐴝𐴓𐴝 𐴔𐴡𐴖𐴑𐴝 𐴱 𐴖𐴝𐴓 𐴃𐴝𐴎𐴤𐴝 𐴈𐴥𐴝𐴕𐴝𐴌 𐴂𐴡𐴌𐴟𐴒𐴠𐴌𐴝𐴔 𐴀𐴞𐴁𐴤𐴝𐴌 𐴎𐴡𐴌𐴞𐴘𐴝 𐴌𐴞𐴉𐴟𐴎𐴞 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴂𐴝𐴂𐴓𐴞𐴑 𐴊𐴟𐴕𐴥𐴞 𐴋𐴦𐴝𐴘 𐴘𐴠 𐴉𐴥𐴝𐴘𐴊𐴝 𐴉𐴝𐴌𐴁𐴡𐴓𐴞 𐴁𐴟𐴙𐴃 𐴁𐴝𐴌𐴠 𐴂𐴠𐴌𐴠𐴏𐴢 𐴌𐴞𐴓𐴥𐴞𐴏𐴡𐴃 𐴈𐴡𐴘𐴧𐴠 𐴱𐴱

𐴀𐴠 𐴃𐴝𐴎𐴤𐴝 𐴈𐴥𐴝𐴕𐴝𐴌 𐴔𐴠𐴎𐴧𐴝𐴕 𐴘𐴝𐴕 𐴑𐴤𐴠𐴃𐴧𐴞𐴓𐴧𐴝 𐴔𐴝𐴌𐴑𐴤𐴠𐴄𐴡𐴌 𐴐𐴤𐴟𐴌𐴟𐴌 𐴀𐴥𐴞𐴏𐴧𐴝 , 𐴎𐴠𐴍𐴠 𐴒𐴟𐴌𐴝 𐴒𐴝𐴌𐴝 𐴑𐴤𐴠𐴃𐴧𐴞𐴓𐴝 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓𐴠 , 𐴕𐴞𐴎𐴡𐴌 𐴑𐴤𐴠𐴃𐴞𐴌 𐴔𐴝𐴓 𐴀𐴝𐴌 𐴃𐴝𐴌𐴥𐴝𐴌 𐴃𐴡𐴘𐴧𐴝𐴌 𐴒𐴡𐴙𐴅𐴧𐴝 𐴀𐴡𐴙𐴕𐴧𐴡 𐴔𐴝𐴓 𐴀𐴥𐴡𐴑𐴧𐴡𐴓 , 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔𐴡𐴌𐴠 𐴑𐴡𐴔𐴂𐴙𐴟𐴄𐴠𐴌𐴝𐴙𐴎 𐴁𐴡𐴗𐴆𐴝𐴌 𐴓𐴡𐴘 𐴁𐴠𐴏𐴡𐴕𐴡𐴃 𐴀𐴝𐴌 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴔𐴝𐴌𐴑𐴤𐴠𐴍𐴡𐴃 𐴁𐴠𐴏𐴡𐴕𐴡𐴃 𐴀𐴠𐴑 𐴔𐴡𐴕 𐴀𐴠𐴑 𐴊𐴤𐴞𐴘𐴝𐴕𐴠 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴥𐴝𐴃 𐴀𐴝𐴏𐴠 𐴱 𐴀𐴥𐴠 𐴔𐴠𐴎𐴧𐴝𐴕𐴡𐴌 𐴃𐴟 𐴌𐴞𐴉𐴟𐴎𐴞𐴌 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴠(𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔) 𐴃𐴡𐴕𐴎𐴞𐴔𐴡𐴌 𐴑𐴦𐴝𐴋 𐴓𐴡𐴘 𐴁𐴡𐴖𐴃 𐴋𐴦𐴡𐴙𐴓𐴧𐴝 𐴈𐴥𐴝𐴕𐴝 𐴀𐴥𐴡𐴑𐴧𐴡𐴓 𐴉𐴝𐴀𐴝𐴌 𐴱 𐴀𐴠 𐴈𐴝𐴔 𐴘𐴝𐴕𐴠 𐴀𐴞𐴕𐴏𐴝𐴕𐴙𐴡𐴃 𐴁𐴟𐴎𐴤𐴝𐴊𐴠 𐴊𐴟𐴕𐴝 𐴉𐴥𐴝𐴘𐴊𐴝 𐴊𐴠𐴈𐴥𐴝𐴌 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴀𐴝𐴌 𐴌𐴞𐴉𐴟𐴎𐴞𐴌𐴠 𐴀𐴝𐴉𐴡𐴏𐴥𐴡𐴃 𐴔𐴞𐴓𐴎𐴤𐴟𐴓 𐴌𐴝𐴑𐴤𐴞 𐴔𐴡𐴊𐴡𐴊 𐴒𐴡𐴌𐴞 𐴉𐴝𐴌𐴠𐴌 𐴊𐴠 𐴘𐴥𐴝𐴕𐴡𐴃 𐴁𐴠𐴐𐴤𐴞 𐴉𐴡𐴈𐴥𐴡𐴌 𐴒𐴡𐴌𐴠𐴌 𐴁𐴡𐴓𐴞 ( 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔𐴡𐴌 ) 𐴁𐴝𐴚𐴓𐴝𐴊𐴠𐴐𐴤𐴡𐴌 𐴎𐴞𐴔𐴧𐴝𐴊𐴝𐴌 / 𐴌𐴞𐴆𐴝𐴌𐴋 𐴌𐴝𐴒𐴝𐴕𐴠 𐴈𐴡𐴘𐴧𐴠 𐴱 𐴂𐴡𐴌𐴡𐴒𐴠𐴌𐴝𐴔 𐴀𐴞𐴁𐴤𐴝𐴌 𐴃𐴟 𐴑𐴤𐴠𐴃𐴧𐴞𐴓𐴧𐴝 𐴀𐴝𐴌 𐴑𐴤𐴟𐴏𐴝𐴌𐴝 𐴁𐴠𐴏𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴀𐴝𐴌𐴀𐴥𐴡 𐴁𐴠𐴙𐴐𐴢 𐴉𐴥𐴝𐴙𐴊𐴝 𐴒𐴡𐴌𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴔𐴦𐴟𐴔𐴧𐴞𐴑𐴧𐴙𐴝 𐴁𐴝𐴌𐴥𐴝𐴘𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔𐴡𐴌 𐴎𐴡𐴌𐴞𐴘𐴝 𐴔𐴝𐴌𐴑𐴤𐴠𐴄 𐴁𐴡𐴕 𐴒𐴡𐴌𐴞𐴁𐴝𐴌 𐴀𐴝𐴒𐴠 , 𐴲 𐴱 / 𐴊𐴠𐴐𐴤𐴡𐴙𐴃𐴧𐴝 𐴑𐴤𐴠𐴃𐴧𐴞𐴓𐴧𐴝 𐴀𐴝𐴌 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴠 , 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔 𐴀𐴡𐴓𐴝 𐴘𐴠 𐴉𐴡𐴃𐴧𐴞 𐴔𐴝𐴐𐴤𐴠 𐴰 𐴰 𐴰 𐴷 𐴴 𐴇𐴥𐴝𐴣𐴃 𐴆𐴝𐴓𐴞𐴆 𐴇𐴥𐴝𐴎𐴝𐴌 𐴋𐴡𐴓𐴝𐴌 𐴔𐴝𐴓𐴡𐴌 𐴊𐴝𐴔 𐴉𐴦𐴡𐴣𐴏𐴝𐴘𐴧𐴠 𐴱 𐴔𐴠 𐴔𐴥𐴝𐴐𐴢 𐴱 𐴲 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴀𐴥𐴡𐴘𐴃𐴠 % 𐴰 𐴳 𐴓𐴡𐴃 𐴑𐴤𐴠𐴃𐴧𐴞𐴓𐴧𐴝 𐴔𐴝𐴌𐴑𐴤𐴠𐴄 𐴁𐴝𐴌𐴥𐴝𐴘 𐴔𐴝𐴐𐴤𐴠 𐴰 𐴰 𐴰 𐴰 𐴰 𐴵 𐴉𐴝𐴣𐴏𐴢 𐴓𐴥𐴝𐴑 𐴋𐴡𐴓𐴝𐴌 𐴀𐴥𐴞𐴏𐴝𐴉𐴠 𐴉𐴦𐴡𐴣𐴏𐴝𐴘 𐴉𐴝𐴌𐴞𐴁𐴤𐴡 𐴁𐴡𐴓𐴞 𐴖𐴝𐴓 𐴉𐴦𐴟𐴋 𐴂𐴡𐴌𐴟𐴒𐴠𐴌𐴝𐴔 𐴀𐴡𐴓𐴝 𐴀𐴝𐴐𐴤𐴝 𐴒𐴡𐴌𐴠𐴌 𐴱𐴱

Sources : Dhakatribune