𐴉𐴟𐴌𐴝 𐴊𐴟𐴕𐴞𐴘𐴝𐴘 𐴌𐴠 𐴀𐴝𐴣𐴀𐴎𐴝𐴃 𐴓𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡 𐴌𐴠 𐴇𐴥𐴡𐴓 𐴒𐴡𐴌𐴠 𐴁𐴡𐴌 𐴓𐴝 𐴀𐴟𐴏𐴞𐴃 𐴌𐴟𐴓 𐴀𐴝𐴊𐴝𐴘 𐴒𐴡𐴌𐴞𐴃𐴡 𐴘𐴟 𐴀𐴠𐴕𐴡𐴌𐴠 𐴈𐴡𐴘𐴧𐴠 : 𐴂𐴞 𐴀𐴠𐴔 / 𐴐𐴠𐴙𐴑 𐴇𐴝𐴏𐴞𐴕𐴝 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴑 𐴇𐴝𐴏𐴞𐴕𐴝 𐴘𐴠 , 𐴁𐴝𐴚𐴓𐴝𐴊𐴠𐴐𐴢 , 𐴘𐴟 𐴀𐴠𐴕 𐴀𐴝𐴌 𐴊𐴠𐴐𐴁𐴞𐴊𐴠𐴐𐴢 𐴓𐴡𐴘 𐴔𐴞𐴓𐴞 𐴈𐴝𐴔 𐴒𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 𐴱 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴌𐴠 𐴁𐴠𐴌𐴡𐴃 𐴓𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄 𐴐𐴤𐴡𐴣𐴀𐴡 𐴀𐴥𐴡𐴑𐴧𐴡𐴓 𐴀𐴡𐴐𐴤𐴝𐴕𐴃𐴞 𐴌𐴠 𐴱 𐴀𐴟𐴏𐴞𐴃 𐴀𐴝𐴌 𐴀𐴟𐴉𐴥𐴝𐴘 𐴕𐴠𐴓𐴠 𐴉𐴥𐴝𐴀𐴝𐴕 𐴌𐴟𐴓 𐴀𐴝𐴊𐴝𐴘 𐴒𐴡𐴌𐴞 𐴁𐴡𐴌 𐴓𐴝 𐴱 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴑 𐴇𐴝𐴏𐴞𐴕𐴝 𐴘𐴠 𐴘𐴟 𐴀𐴠𐴕 𐴡𐴌𐴠 𐴈𐴡𐴘𐴧𐴠 𐴱 𐴘𐴟 𐴀𐴠𐴕 𐴁𐴡𐴙𐴕𐴧𐴙𐴠𐴊𐴠 𐴵 𐴷 𐴀𐴡𐴔 , 𐴁𐴡𐴕𐴝𐴌 𐴘𐴝𐴊𐴒𐴝𐴌𐴞 𐴊𐴞𐴕 𐴔𐴝𐴕𐴝𐴘𐴧𐴠𐴊𐴠 𐴔𐴡𐴖𐴑𐴝𐴃 𐴱 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴔𐴟𐴁𐴝𐴌𐴡𐴑 𐴁𐴝𐴊 𐴕𐴝𐴔𐴝 𐴆𐴞𐴣𐴍𐴥𐴞𐴃 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴑 𐴇𐴝𐴏𐴞𐴕𐴝 𐴘𐴠 𐴈𐴡𐴘𐴧𐴠𐴊𐴠 ! 𐴀𐴠𐴈𐴥𐴡𐴕 𐴊𐴟𐴕𐴞𐴘𐴝𐴙𐴃 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴋𐴦𐴡𐴙𐴓𐴧𐴝 𐴱 𐴀𐴟𐴉𐴥𐴝𐴘 𐴃𐴟𐴖𐴡𐴕 𐴉𐴠𐴙𐴣𐴏𐴢 𐴀𐴥𐴡𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴠𐴐𐴤𐴞 𐴏𐴥𐴡𐴚𐴑𐴡𐴄 𐴀𐴥𐴡𐴑𐴧𐴡𐴓 𐴕𐴠𐴀𐴠𐴓𐴧𐴙𐴠 𐴱 𐴎𐴠𐴍𐴥𐴠 𐴇𐴥𐴡𐴓 𐴕𐴠𐴓𐴝𐴘 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴟𐴏𐴞𐴃 𐴌𐴟𐴓 𐴘𐴟 𐴀𐴠𐴕𐴠 𐴀𐴝𐴊𐴝𐴘 𐴒𐴡𐴌𐴥𐴞 𐴉𐴝𐴌𐴞𐴁𐴡 𐴱 𐴀𐴠𐴈𐴥𐴡𐴕 𐴊𐴟𐴕𐴞𐴘𐴝𐴘 𐴀𐴡𐴁𐴤𐴝𐴉𐴢 , 𐴁𐴤𐴟𐴑 , 𐴓𐴝𐴌𐴥𐴝𐴘 , 𐴀𐴝𐴃𐴡𐴚𐴁𐴝𐴊𐴞 , 𐴀𐴡 𐴕𐴞𐴌𐴝𐴉𐴡𐴃𐴧𐴝 , 𐴔𐴦𐴟𐴏𐴥𐴡𐴔𐴞 𐴀𐴝𐴉𐴡𐴃 𐴀𐴝𐴌𐴀𐴥𐴡 𐴀𐴝𐴌𐴀𐴥𐴡 𐴁𐴦𐴡𐴃 𐴋𐴡𐴙𐴓𐴧𐴝 𐴔𐴡𐴏𐴞𐴁𐴡𐴃 𐴀𐴝𐴌 𐴀𐴡 𐴐𐴤𐴝𐴕𐴃𐴞 𐴘𐴠 𐴒𐴤𐴞𐴌𐴞 𐴊𐴤𐴡𐴙𐴅𐴧𐴙𐴠𐴊𐴠 𐴀𐴡𐴑𐴃𐴡𐴃 𐴱 𐴊𐴟𐴕𐴞𐴘𐴝𐴘 𐴄𐴤𐴞𐴘𐴝𐴃𐴧𐴟 𐴔𐴞𐴓𐴞 𐴎𐴤𐴟𐴓𐴞 𐴑𐴟𐴐𐴞𐴐𐴢 𐴀𐴝𐴌 𐴋𐴦𐴡𐴣𐴌 𐴈𐴝𐴔 𐴒𐴡𐴌𐴡𐴕 𐴎𐴡𐴌𐴞𐴌𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱

𐴁𐴡𐴌𐴔𐴥𐴝𐴌𐴠 𐴊𐴠𐴐𐴁𐴞𐴊𐴠𐴐𐴤𐴞 𐴑𐴦𐴟𐴍𐴡𐴌 𐴈𐴡𐴃𐴤𐴝 𐴔𐴝𐴕𐴞 𐴎𐴟𐴓𐴟𐴔 𐴈𐴥𐴡𐴃𐴡𐴔 𐴒𐴡𐴌𐴞 𐴁𐴡𐴌 𐴓𐴝 𐴈𐴗𐴝 𐴒𐴞𐴘𐴠 𐴱 𐴒𐴝𐴔𐴁𐴞𐴘𐴝 𐴘𐴠 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴉𐴝𐴣𐴏𐴢 𐴐𐴤𐴡𐴃 𐴏𐴥𐴡𐴁𐴧𐴝𐴌 𐴖𐴡𐴌𐴠 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴡𐴏𐴥𐴝𐴙𐴋𐴡𐴌 𐴁𐴝𐴁𐴡𐴃𐴠 ( 𐴀𐴝𐴘 𐴏𐴞 𐴅𐴠 ) 𐴑𐴦𐴟𐴍𐴡𐴃 , 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴏𐴥𐴡𐴁𐴧𐴝𐴌 𐴃𐴟 𐴁𐴤𐴝𐴌𐴡 𐴁𐴠𐴙𐴐𐴢 𐴃𐴝𐴘𐴊𐴞 𐴔𐴠𐴄𐴠𐴌𐴞𐴘𐴠𐴓 𐴐𐴤𐴡𐴣𐴀𐴡 𐴊𐴝𐴈𐴥𐴞𐴓 𐴒𐴡𐴙𐴅𐴧𐴙𐴠 𐴱 𐴎𐴠𐴍𐴠 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴡𐴏𐴥𐴝𐴙𐴋𐴡𐴌 𐴎𐴞𐴔𐴧𐴝𐴊𐴝𐴌 𐴊𐴠 𐴘𐴥𐴝𐴕 𐴐𐴤𐴟𐴕𐴊𐴡𐴌 𐴒𐴡𐴌𐴞 𐴁𐴟𐴎𐴤𐴝𐴘 𐴊𐴞𐴘𐴠 𐴱 𐴁𐴡𐴌𐴔𐴥𐴝𐴌 𐴃𐴟 𐴈𐴥𐴝𐴔𐴝𐴈𐴥𐴝 𐴃𐴡𐴌𐴝𐴃𐴡𐴌𐴥𐴞 𐴀𐴝𐴘 𐴏𐴞 𐴅𐴠 𐴀𐴞𐴕𐴏𐴝𐴉𐴢 𐴑𐴦𐴟𐴍𐴡𐴌 𐴈𐴡𐴃𐴤𐴝 𐴔𐴝𐴕𐴞 𐴱 𐴅𐴠𐴕𐴡𐴏𐴥𐴝𐴙𐴋 𐴏𐴥𐴝𐴁𐴟𐴃 𐴀𐴥𐴡𐴊𐴠 𐴎𐴟𐴓𐴟𐴔 𐴀𐴥𐴞𐴀𐴞𐴕 𐴁𐴡𐴕 𐴒𐴡𐴌𐴞 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌𐴠 𐴅𐴠𐴕𐴡𐴏𐴥𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴁𐴤𐴟𐴎𐴝𐴘 𐴕𐴡 𐴉𐴥𐴠𐴓𐴝𐴘 𐴁𐴡𐴌𐴝 𐴁𐴡𐴌 𐴌𐴝𐴑𐴤𐴞 𐴁𐴡𐴌 𐴓𐴝 ( 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄 ) 𐴒𐴟𐴌𐴟𐴂𐴠 𐴈𐴡𐴘𐴧𐴠 𐴱𐴱

Sources : Dhakatrebune