𐴑𐴡𐴑𐴆𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴡𐴌 𐴃𐴟 𐴁𐴝𐴚𐴓𐴝𐴊𐴠𐴐𐴤𐴡𐴌 𐴂𐴝𐴂𐴓𐴞𐴑𐴡𐴌 𐴓𐴝 𐴀𐴠𐴑𐴧𐴝𐴕 𐴑𐴤𐴟𐴓𐴝 𐴆𐴞𐴣𐴍𐴞 𐴱𐴱

𐴀𐴝𐴊𐴡𐴌𐴡𐴌 , 𐴀𐴞𐴎𐴧𐴡𐴃𐴡𐴌 𐴁𐴝𐴚𐴓𐴝𐴊𐴠𐴐𐴤𐴞 𐴁𐴤𐴝𐴘 𐴁𐴤𐴡𐴙𐴕 𐴀𐴥𐴡𐴑𐴧𐴡𐴓 ” 𐴃𐴟𐴣𐴖𐴝𐴣𐴌𐴝 𐴌𐴠 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝 𐴘𐴠 𐴌𐴝𐴇𐴔𐴡𐴃 𐴒𐴡𐴌𐴡𐴗𐴑 𐴀𐴝𐴌 𐴐𐴤𐴝𐴕𐴃𐴞 𐴕𐴡𐴏𐴞𐴁 𐴒𐴡𐴌𐴡𐴗𐴑 ” 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴷 𐴱 𐴰 𐴲 𐴐𐴤𐴡𐴕𐴡𐴌 𐴀𐴝𐴒𐴠 𐴉𐴞𐴏𐴠 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴅𐴠𐴕𐴡𐴏𐴥𐴝𐴙𐴋𐴡𐴌 𐴃𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴞 𐴓𐴡𐴃𐴞 𐴱 𐴃𐴟𐴣𐴖𐴝𐴣𐴌𐴝 𐴈𐴡𐴕𐴥𐴡 𐴒𐴡𐴌𐴥𐴡𐴏𐴢 𐴏𐴥𐴝𐴌𐴝 𐴁𐴠𐴐𐴤𐴞 𐴋𐴦𐴡𐴣𐴌 𐴊𐴞𐴓 𐴓𐴡𐴘 𐴀𐴝𐴣𐴀𐴌𐴝 𐴌𐴠 𐴏𐴥𐴝𐴀𐴝𐴌𐴝 𐴊𐴞𐴘𐴡 , 𐴈𐴥𐴝𐴕𐴝 𐴉𐴝𐴕𐴞 𐴊𐴞 𐴎𐴡𐴌𐴟𐴌𐴡𐴃 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴒𐴡𐴙𐴅𐴧𐴙𐴡 𐴱 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 , 𐴀𐴝𐴌𐴔𐴞 𐴀𐴝𐴌 𐴇𐴠𐴉𐴝𐴎𐴡𐴃𐴞 𐴉𐴡𐴖𐴏𐴢 𐴀𐴥𐴡𐴑𐴧𐴡𐴓𐴠 𐴀𐴝𐴣𐴀𐴌𐴝𐴌 𐴇𐴠𐴉𐴝𐴎𐴡𐴃 𐴀𐴝𐴌 𐴁𐴤𐴝𐴓𐴝𐴙𐴌 𐴓𐴝 𐴁𐴡𐴓𐴞 𐴕𐴡 𐴎𐴞𐴌𐴝𐴘 𐴈𐴝𐴔 𐴒𐴡𐴌𐴠𐴌 𐴱 𐴀𐴠𐴈𐴥𐴡𐴕 𐴁𐴝𐴚𐴓𐴝𐴊𐴠𐴐𐴤𐴠 𐴑𐴝𐴕𐴟𐴕𐴞 , 𐴀𐴟𐴏𐴥𐴟𐴓𐴞 𐴃𐴡𐴗𐴌𐴠 𐴱 𐴀𐴝𐴣𐴀𐴌𐴝𐴌 𐴇𐴥𐴑𐴧𐴡𐴌 𐴓𐴝 𐴀𐴝𐴁𐴝𐴎 𐴊𐴡𐴙𐴕𐴧𐴝 𐴀𐴠𐴑 𐴎𐴡𐴕 𐴔𐴟𐴀𐴕𐴃𐴟 𐴀𐴝𐴕𐴞 𐴊𐴞𐴘𐴠 𐴱 𐴎𐴞𐴁𐴤𐴝𐴘𐴠 𐴀𐴝𐴣𐴀𐴌𐴝𐴌 𐴀𐴞𐴕𐴏𐴝𐴉𐴢 , 𐴇𐴥𐴡𐴑 𐴀𐴝𐴌 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴃𐴠 𐴖𐴝𐴉𐴠𐴏𐴢 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴎𐴝𐴘𐴁𐴝𐴌 𐴁𐴝𐴁𐴡𐴃𐴠 𐴊𐴟𐴕𐴞𐴘𐴝𐴘 𐴌𐴠 𐴈𐴡𐴀𐴡𐴌 𐴱 𐴀𐴝𐴌 𐴓𐴝𐴒𐴝𐴃𐴝𐴌 𐴃𐴝𐴙𐴊 𐴒𐴡𐴌𐴞 𐴀𐴝𐴘𐴧𐴠𐴌 𐴊𐴠 𐴘𐴥𐴝𐴕𐴡𐴌 𐴓𐴝 𐴀𐴝𐴣𐴀𐴌𐴝 𐴊𐴞𐴓𐴡𐴌 𐴁𐴤𐴟𐴃𐴡𐴌 𐴃𐴟 𐴐𐴤𐴟𐴑𐴟𐴌𐴞𐴘𐴝 𐴎𐴝𐴕𐴝𐴙𐴌 𐴱𐴱

𐴅𐴡𐴁𐴑𐴤𐴞 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴑𐴡𐴁𐴤𐴞𐴋 – 𐴹 𐴱 𐴁𐴞𐴘𐴝𐴌𐴝𐴔 𐴓𐴡𐴘 𐴔𐴡𐴐𐴑𐴞𐴓 𐴇𐴥𐴝𐴓𐴡𐴃𐴡𐴃 𐴏𐴡𐴓𐴠𐴌 𐴊𐴠 𐴀𐴡𐴑𐴃𐴡𐴃 𐴱 𐴀𐴥𐴠𐴍𐴠 𐴖𐴡𐴌𐴠 𐴀𐴝𐴌𐴥𐴡 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴓𐴝𐴌𐴥𐴝𐴘 𐴀𐴝𐴌 𐴔𐴝𐴌𐴝𐴔𐴝𐴌𐴞 𐴏𐴡𐴓𐴠𐴌 𐴊𐴠 𐴀𐴥𐴞𐴕𐴠 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴂𐴝𐴂𐴓𐴞𐴑𐴡 𐴌𐴠 𐴀𐴡𐴐𐴤𐴝𐴕𐴃𐴞𐴃 𐴉𐴥𐴠𐴓𐴝𐴘 𐴊𐴞𐴘𐴠 𐴱 𐴁𐴡𐴀𐴡𐴃 𐴈𐴡𐴏𐴥𐴟𐴌𐴞 𐴏𐴥𐴝𐴌𐴝 𐴔𐴝𐴕𐴟𐴙𐴐𐴢 𐴀𐴠 𐴔𐴝𐴌𐴝𐴔𐴝𐴌𐴞𐴃 𐴎𐴝𐴕 𐴀𐴥𐴝𐴌𐴝𐴘 𐴉𐴥𐴠𐴓𐴝𐴘𐴧𐴠 𐴱 𐴀𐴝𐴣𐴀𐴌𐴝 𐴈𐴡𐴊𐴟𐴕 𐴕𐴞𐴌 𐴀𐴝𐴐𐴤𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴠𐴐𐴤𐴞 𐴒𐴡𐴌𐴞 𐴏𐴞𐴕𐴃𐴝 𐴒𐴡𐴌𐴞𐴌 𐴱 𐴀𐴥𐴠 𐴀𐴝𐴃𐴡𐴚𐴁𐴝𐴊𐴞 𐴈𐴝𐴔 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴣𐴀𐴌𐴝 𐴊𐴡𐴌𐴥𐴡 𐴔𐴡𐴌𐴥𐴡 𐴕𐴞𐴕𐴊𐴝 𐴒𐴡𐴌𐴞𐴌 𐴱 𐴁𐴝𐴚𐴓𐴝𐴊𐴠𐴐𐴤𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴂𐴝𐴂𐴓𐴞𐴑 𐴀𐴥𐴡𐴑𐴧𐴡𐴓𐴡𐴌𐴠 𐴇𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴃𐴠 𐴌𐴝𐴑𐴤𐴞 𐴀𐴝𐴌 𐴋𐴦𐴡𐴣𐴌 𐴓𐴟𐴏𐴧𐴝𐴕𐴞𐴌 𐴃𐴟 𐴁𐴝𐴏𐴥𐴝𐴘 𐴌𐴝𐴑𐴤𐴞 𐴁𐴡𐴌𐴓𐴝 𐴱 𐴑𐴟𐴐𐴞𐴐𐴢 𐴒𐴡𐴌𐴠𐴌 𐴊𐴠 𐴘𐴥𐴝𐴕𐴡𐴌𐴓𐴝 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌𐴠 𐴀𐴝𐴣𐴀𐴌𐴝 𐴊𐴞𐴓𐴡𐴌𐴊𐴟 𐴐𐴤𐴟𐴑𐴟𐴌𐴞𐴘𐴝 𐴎𐴝𐴕𐴝𐴙𐴌 𐴱 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴠𐴈𐴓𐴝𐴏𐴢 𐴀𐴝𐴌 𐴀𐴟𐴉𐴡𐴎𐴟𐴑𐴃𐴡 𐴈𐴝𐴔 𐴒𐴡𐴌𐴠𐴌𐴊𐴠 𐴘𐴥𐴝𐴕𐴡𐴃 𐴀𐴝𐴣𐴀𐴌𐴝 𐴁𐴠𐴐𐴤𐴞 𐴀𐴠𐴃𐴔𐴞𐴕𐴝𐴕 𐴱 𐴀𐴦𐴡 𐴀𐴝𐴣𐴀𐴌𐴝𐴌𐴠 𐴔𐴠𐴇𐴔𐴝𐴕 𐴊𐴝𐴌𐴞 𐴒𐴡𐴌𐴡𐴀𐴡𐴌 𐴊𐴠 𐴁𐴤𐴝𐴘𐴧𐴝𐴙𐴕 𐴃𐴟𐴣𐴖𐴝𐴣𐴌𐴝 𐴎𐴝𐴕𐴡 , 𐴉𐴡𐴙𐴃𐴧𐴡 𐴑𐴡𐴖𐴔𐴡𐴌 𐴁𐴤𐴟𐴃𐴡𐴌𐴠 𐴁𐴤𐴝𐴓𐴝 𐴈𐴥𐴡𐴌𐴝𐴁 𐴀𐴝𐴏𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝𐴌 𐴁𐴤𐴟𐴃𐴡𐴌𐴠 𐴘𐴥𐴡 𐴀𐴝𐴏𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴕𐴝 𐴀𐴠𐴃𐴧𐴠𐴉𐴝𐴑𐴞 𐴀𐴝𐴌 𐴈𐴡𐴙𐴅𐴧𐴙𐴝𐴌 𐴏𐴥𐴡𐴁𐴡𐴁𐴠 𐴱 𐴀𐴦𐴡 𐴀𐴝𐴣𐴀𐴌𐴝𐴌 𐴀𐴝𐴊𐴡𐴙𐴅𐴧𐴙𐴝 𐴁𐴝𐴚𐴓𐴝𐴊𐴠𐴐𐴞 𐴁𐴤𐴝𐴘𐴧𐴝𐴙𐴕 𐴃𐴟𐴣𐴖𐴝𐴣𐴌𐴝 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴃 𐴉𐴡𐴙𐴅𐴧𐴙𐴡 𐴀𐴝𐴌 𐴀𐴡𐴐𐴤𐴝𐴕𐴃𐴞𐴃 𐴀𐴝𐴏𐴡 𐴱 𐴀𐴝𐴣𐴀𐴌𐴝 𐴃𐴟𐴣𐴖𐴝𐴣𐴌𐴝𐴌 𐴋𐴡𐴌 𐴀𐴝𐴌 𐴀𐴡𐴐𐴤𐴝𐴕𐴃𐴞 𐴁𐴟𐴎𐴞 𐴉𐴝𐴌𐴞𐴌 𐴀𐴝𐴌 𐴈𐴡𐴊𐴟𐴕 𐴈𐴥𐴡𐴌𐴝𐴁 𐴔𐴝𐴙𐴕𐴐𐴡𐴌 𐴒𐴡𐴓𐴧𐴡𐴃 𐴈𐴝𐴔𐴡𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌𐴝 𐴒𐴤𐴡𐴄𐴞𐴘𐴝 𐴀𐴠𐴔𐴃𐴝𐴕𐴡𐴃 𐴉𐴡𐴌𐴞 𐴒𐴞𐴘𐴞 𐴒𐴤𐴡𐴘 𐴱 ” 𐴈𐴡𐴊𐴟𐴕 𐴈𐴥𐴡𐴌𐴝𐴁 𐴔𐴝𐴙𐴕𐴐𐴡𐴌 𐴊𐴟𐴖𐴝𐴌𐴝 𐴉𐴟𐴌𐴝 𐴑𐴡𐴖𐴔𐴡𐴌𐴠 𐴕𐴞𐴉𐴌𐴡𐴃 𐴒𐴡𐴌𐴝 𐴎𐴡𐴕 𐴏𐴝𐴀𐴕𐴠 “؟ 𐴀𐴡𐴕𐴡𐴌𐴝 𐴌𐴟𐴇𐴝𐴙𐴚𐴒𐴙𐴝𐴌 𐴓𐴡𐴘 𐴒𐴟𐴐𐴧𐴝𐴀𐴥𐴡𐴘𐴓𐴠 𐴀𐴝𐴌 𐴉𐴡𐴌𐴡𐴑 𐴒𐴡𐴌𐴥𐴝 𐴔𐴝𐴔𐴠𐴓𐴝 𐴒𐴡𐴙𐴓𐴧𐴙𐴠 , 𐴑𐴞 𐴐𐴤𐴝𐴕𐴃𐴞 𐴉𐴝𐴘𐴁𐴝 𐴕𐴦𐴠 ؟ 𐴀𐴝𐴃𐴡𐴚𐴁𐴝𐴊𐴞 𐴌𐴠 𐴋𐴡𐴓𐴞 𐴉𐴥𐴟𐴌𐴝𐴘 𐴉𐴥𐴠𐴓𐴞 𐴐𐴤𐴝𐴕𐴃𐴞 𐴀𐴝𐴕𐴞𐴁𐴡𐴌 𐴓𐴝 𐴀𐴡𐴙𐴕𐴧𐴡 𐴑𐴟𐴆𐴤𐴡𐴓 𐴈𐴡𐴕𐴡 𐴀𐴝𐴏𐴠𐴕𐴠 ؟ 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴕𐴞𐴉𐴌𐴡𐴃 𐴒𐴡𐴌𐴞𐴓𐴠 𐴀𐴝𐴌 𐴈𐴡𐴊𐴟𐴕 𐴀𐴝𐴓𐴥𐴁𐴤𐴟𐴓𐴝 𐴌𐴟𐴇𐴙𐴚𐴒𐴙𐴝𐴌 𐴐𐴤𐴠𐴑𐴝𐴘𐴡𐴃 𐴒𐴡𐴌𐴞𐴓𐴠 𐴀𐴡𐴕𐴝𐴌𐴝𐴌 𐴀𐴡𐴐𐴤𐴝𐴕𐴃𐴞 𐴑𐴞 𐴀𐴟𐴉𐴥𐴝𐴘 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘𐴕𐴠 ؟ 𐴀𐴡𐴕𐴡𐴌𐴝 𐴁𐴞𐴐𐴧𐴝𐴐𐴢 𐴒𐴡𐴌𐴥𐴡 , % 𐴹 𐴹 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴝𐴕𐴃𐴞 𐴉𐴡𐴏𐴡𐴕 𐴒𐴡𐴌𐴡𐴙𐴕𐴧𐴝 𐴱 𐴀𐴝𐴌 𐴀𐴥𐴞𐴃𐴝𐴌𐴝 𐴈𐴥𐴡𐴌𐴝𐴁 𐴔𐴝𐴙𐴕𐴐𐴡𐴌𐴠 𐴑𐴠𐴀𐴠𐴔𐴡𐴌𐴃𐴟 𐴕𐴠𐴓𐴝𐴘 𐴊𐴞𐴁𐴡𐴌𐴓𐴝 𐴇𐴥𐴝𐴔𐴞𐴐𐴤𐴝 𐴑𐴟𐴐𐴞𐴐𐴢 𐴒𐴡𐴌𐴝𐴃 𐴀𐴝𐴏𐴠 𐴱 𐴑𐴠𐴀𐴠𐴔𐴡𐴃 𐴐𐴤𐴝𐴕𐴃𐴞 𐴀𐴝𐴕𐴞𐴁𐴡𐴌𐴓𐴝 , 𐴈𐴥𐴝𐴔𐴝𐴈𐴥𐴝 𐴀𐴡𐴕𐴡𐴌𐴝 𐴀𐴝𐴣𐴀𐴌𐴝 𐴔𐴞𐴓𐴞 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔 𐴒𐴡𐴌𐴥𐴝 𐴉𐴡𐴌𐴞𐴁𐴡 𐴱 𐴀𐴦𐴡 𐴀𐴝𐴊𐴡𐴙𐴅𐴧𐴙𐴝 𐴁𐴝𐴚𐴓𐴝𐴊𐴠𐴐𐴞 𐴐𐴤𐴝𐴕𐴃𐴞 𐴉𐴡𐴏𐴡𐴕 𐴊𐴟𐴏𐴃𐴡 𐴀𐴥𐴡𐴑𐴧𐴡𐴓 ! 𐴀𐴝𐴕𐴊𐴤𐴝𐴌𐴡 𐴌𐴠 𐴉𐴦𐴡𐴌 𐴏𐴥𐴝𐴌𐴝 𐴈𐴡𐴕𐴥𐴡 𐴊𐴞𐴕 𐴀𐴝𐴕𐴊𐴤𐴝𐴌 𐴓𐴡𐴘 𐴉𐴦𐴡𐴌 𐴒𐴡𐴌𐴞 𐴕𐴡 𐴉𐴝𐴌𐴥𐴠 , 𐴀𐴥𐴠𐴕𐴋𐴞𐴓𐴧𐴝 𐴕𐴞𐴉𐴌𐴡𐴃𐴡 𐴌𐴠 𐴔𐴟𐴇𐴝𐴁𐴧𐴡𐴃 𐴏𐴥𐴝𐴌𐴝 𐴕𐴞𐴉𐴌𐴡𐴃 𐴓𐴡𐴘 𐴁𐴡𐴊𐴡𐴓𐴞 𐴕𐴡 𐴉𐴝𐴌𐴥𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓 𐴱𐴱

Sources : Ukhiyanews