𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴝𐴌𐴝𐴌 𐴀𐴝𐴉𐴡𐴏𐴡𐴃 𐴔𐴝𐴌𐴝 𐴔𐴝𐴌𐴞𐴃 𐴐𐴤𐴡𐴃𐴝 𐴐𐴤𐴡𐴃𐴞 𐴒𐴤𐴝𐴙𐴓 𐴱𐴱

𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴀𐴟𐴑𐴞𐴘𐴝𐴌 𐴑𐴟𐴃𐴤𐴟 𐴉𐴝𐴓𐴡𐴚𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴱 𐴊𐴝𐴊𐴝𐴒𐴞𐴌𐴞 𐴒𐴡𐴌𐴞 𐴁𐴡𐴌𐴓𐴝 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴊𐴟𐴘 𐴋𐴦𐴝𐴙𐴌 𐴔𐴝𐴅𐴠 𐴀𐴥𐴡𐴘𐴧𐴠𐴊𐴠 𐴓𐴝𐴒𐴝𐴃𐴝𐴌 𐴔𐴝𐴌𐴝 𐴔𐴝𐴌𐴞𐴃 𐴱 𐴀𐴠𐴑 𐴎𐴡𐴕 𐴁𐴝𐴚𐴓𐴝𐴊𐴠𐴐𐴞 𐴐𐴤𐴡𐴣𐴀𐴡 𐴀𐴝𐴣𐴐𐴄𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴌 𐴔𐴡𐴗𐴃 𐴱 𐴁𐴟𐴙𐴃 𐴁𐴝𐴌𐴠 𐴊𐴞𐴕 𐴁𐴤𐴡𐴌 𐴀𐴥𐴡 𐴎𐴞𐴌𐴝𐴘 𐴎𐴞𐴌𐴝𐴘 𐴀𐴥𐴡𐴘𐴧𐴠𐴊𐴠 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞𐴃 𐴱 𐴈𐴡𐴔𐴡𐴃 𐴰 𐴵 𐴎𐴡𐴕 𐴔𐴝𐴕𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱 𐴇𐴥𐴡𐴑𐴟𐴔𐴡𐴃𐴞 𐴑𐴠𐴀𐴠𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴊𐴟𐴘 𐴋𐴦𐴙𐴌 𐴔𐴝𐴎𐴠 𐴏𐴡𐴓𐴠𐴌𐴊𐴠 𐴔𐴝𐴌𐴝 𐴔𐴝𐴌𐴞 𐴌𐴠 𐴃𐴤𐴞𐴘𐴝 𐴒𐴡𐴌𐴝𐴘 𐴁𐴡𐴌𐴓𐴝 𐴈𐴝𐴔 𐴒𐴡𐴌𐴠𐴌 𐴱 𐴏𐴞𐴄𐴝𐴚𐴡𐴌 ( 𐴋𐴞 𐴀𐴝𐴘 𐴅𐴞 ) 𐴔𐴟𐴇𐴝𐴔𐴧𐴡𐴊 𐴀𐴝𐴕𐴖𐴝𐴌 𐴇𐴟𐴏𐴝𐴙𐴕 ٬ 𐴑𐴠𐴀𐴠𐴔𐴡𐴃 𐴔𐴝𐴌𐴝 𐴔𐴝𐴌𐴞 𐴏𐴡𐴓𐴠𐴌𐴊𐴠 𐴀𐴡𐴑𐴃𐴡𐴃 𐴇𐴥𐴝𐴓𐴡𐴃𐴡𐴌𐴠 𐴏𐴝𐴘𐴁𐴡𐴌𐴓𐴝 𐴀𐴝𐴙𐴐𐴧𐴙𐴠 𐴱 𐴁𐴝𐴊𐴠 𐴑𐴠𐴀𐴠𐴔𐴡𐴃 𐴎𐴞𐴔𐴧𐴝𐴊𐴝𐴌𐴞 𐴒𐴡𐴌𐴠𐴌𐴊𐴠 𐴉𐴟𐴓𐴞𐴆 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴏𐴡𐴓𐴠𐴌𐴊𐴠 𐴇𐴥𐴝𐴓𐴡𐴃𐴡𐴌 𐴁𐴝𐴁𐴡𐴃𐴠 𐴔𐴞𐴄𐴞𐴚 𐴒𐴡𐴙𐴅𐴧𐴙𐴠 𐴱 𐴏𐴝𐴙𐴌 𐴎𐴡𐴕 𐴔𐴝𐴕𐴟𐴙𐴐𐴢 𐴔𐴝𐴌𐴞 𐴉𐴥𐴠𐴓𐴡𐴕𐴡 𐴁𐴝𐴊𐴠 𐴀𐴡𐴙𐴕 𐴀𐴞𐴁𐴤𐴝 𐴎𐴡𐴓𐴞 𐴀𐴟𐴙𐴄𐴧𐴙𐴠𐴊𐴠 𐴱 𐴊𐴟𐴘 𐴋𐴦𐴝𐴙𐴌 𐴔𐴝𐴌𐴝 𐴔𐴝𐴌𐴞 𐴀𐴞𐴁𐴤𐴝 𐴀𐴠𐴑𐴧𐴟 𐴉𐴥𐴟𐴣𐴖𐴝𐴣𐴃𐴞 𐴔𐴡𐴚𐴒𐴡𐴓 𐴁𐴝𐴌𐴠 𐴌𐴝𐴙𐴃𐴡𐴌𐴃𐴟 𐴐𐴤𐴟𐴌𐴟 𐴀𐴥𐴡𐴘 𐴁𐴟𐴙𐴃 𐴁𐴝𐴌𐴠 𐴁𐴞𐴘𐴝𐴕𐴠 𐴉𐴡𐴙𐴅𐴧𐴡𐴕𐴃𐴡 𐴃𐴤𐴝𐴙𐴑𐴧𐴙𐴠 𐴱𐴱

𐴁𐴟𐴙𐴃 𐴁𐴝𐴌𐴠 𐴁𐴞𐴘𐴝𐴕𐴠 / 𐴔𐴟𐴕𐴧𐴝𐴌 𐴋𐴦𐴝𐴘𐴧𐴠 𐴑𐴟𐴃𐴤𐴟𐴉𐴝𐴓𐴡𐴚 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴃 𐴀𐴦𐴝𐴘 𐴀𐴦𐴝𐴔 𐴂𐴝𐴂𐴓𐴞𐴑𐴡𐴌 𐴖𐴡𐴌𐴠 𐴀𐴝𐴣𐴊𐴤𐴝𐴊𐴤𐴟𐴕 𐴉𐴥𐴝𐴘𐴧𐴝𐴌 𐴐𐴤𐴟𐴌𐴟 𐴒𐴡𐴌𐴞𐴊𐴠𐴘𐴠 𐴱 𐴔𐴟𐴕𐴧𐴝 𐴒𐴟𐴌𐴟𐴂𐴢 𐴀𐴝𐴌 𐴀𐴝𐴕𐴡𐴏𐴢 𐴒𐴟𐴌𐴟𐴂𐴡𐴌 𐴔𐴝𐴎𐴠 𐴘𐴝𐴁𐴝 𐴄𐴠𐴙𐴁𐴓𐴠𐴄𐴡𐴌 𐴁𐴡𐴌𐴝𐴃 𐴀𐴝𐴌 𐴀𐴠𐴓𐴝𐴑𐴝𐴀𐴞 𐴊𐴝𐴊𐴝𐴒𐴞𐴌𐴞𐴌 𐴁𐴝𐴁𐴡𐴃𐴠 𐴱 𐴁𐴦𐴡𐴃 𐴊𐴠𐴌𐴞 𐴀𐴥𐴡𐴘𐴃𐴠 𐴈𐴡𐴙𐴅𐴧𐴙𐴝 𐴀𐴞𐴁𐴤𐴝 𐴏𐴡𐴓𐴞 𐴀𐴝𐴘𐴧𐴠𐴌 𐴊𐴠 𐴁𐴡𐴓𐴞 ٬ 𐴑𐴟𐴃𐴤𐴟𐴉𐴝𐴓𐴡𐴚 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴌 𐴌𐴗𐴝𐴏𐴞𐴒𐴞𐴌𐴞 / 𐴇𐴝𐴉𐴠𐴎 𐴔𐴟𐴇𐴝𐴔𐴧𐴡𐴊 𐴅𐴡𐴓𐴝𐴓𐴠𐴈𐴡𐴘𐴧𐴠 𐴱 𐴎𐴝𐴘 𐴀𐴥𐴡𐴑 ! 𐴀𐴡𐴑𐴃𐴟𐴁𐴡𐴌𐴡𐴌 𐴴 𐴃𐴝𐴌𐴞𐴑 𐴀𐴥𐴡𐴘𐴃𐴠 𐴐𐴤𐴟𐴌𐴟 𐴀𐴥𐴡𐴘𐴧𐴠𐴊𐴠 𐴔𐴝𐴌𐴝 𐴔𐴝𐴌𐴞 𐴀𐴞𐴁𐴤𐴝 𐴘𐴠 𐴂𐴝𐴂𐴓𐴞𐴑𐴡𐴌 𐴔𐴝𐴎𐴠 𐴁𐴠𐴐𐴤𐴞 𐴋𐴡𐴌 𐴉𐴡𐴘𐴊𐴝 𐴒𐴡𐴙𐴅𐴧𐴙𐴠 𐴱 𐴁𐴟𐴙𐴃 𐴁𐴝𐴌𐴠 𐴁𐴠𐴙𐴕𐴧𐴝 / 𐴔𐴟𐴕𐴧𐴝 𐴒𐴟𐴌𐴟𐴂𐴠 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴃 𐴎𐴞𐴌𐴝𐴘 𐴎𐴞𐴌𐴝𐴘 𐴉𐴥𐴝𐴘𐴧𐴝𐴌 𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 ٬ 𐴔𐴡𐴌𐴡𐴊 𐴀𐴝𐴌 𐴉𐴟𐴖𐴝𐴙𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱 𐴀𐴠 𐴔𐴟𐴕𐴧𐴝 𐴒𐴟𐴌𐴟𐴂𐴡𐴌 𐴇𐴥𐴝𐴔𐴓𐴝𐴌 𐴋𐴡𐴌𐴠 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 ٬ 𐴔𐴡𐴌𐴡𐴊 𐴀𐴝𐴌 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔 𐴀𐴞𐴕𐴆𐴝𐴅𐴡𐴌 𐴀𐴡𐴉𐴞𐴏𐴡𐴃 𐴎𐴝𐴘 𐴉𐴝𐴕𐴥𐴝 𐴓𐴡𐴘𐴧𐴠 𐴁𐴡𐴓𐴞 / 𐴏𐴟𐴔𐴝 𐴀𐴝𐴑𐴃𐴡𐴌𐴠 𐴈𐴡𐴘𐴧𐴠 𐴱 𐴀𐴠 𐴉𐴥𐴟𐴍𐴝 𐴉𐴟𐴍𐴞𐴌 𐴀𐴡𐴑𐴃𐴡𐴃 / 𐴀𐴠 𐴂𐴞 𐴁𐴞 𐴀𐴠𐴕𐴡𐴌 𐴔𐴞𐴔𐴁𐴡𐴌 𐴀𐴥𐴡𐴑𐴧𐴡𐴓 ٬ 𐴉𐴟𐴓𐴞𐴆 ٬ 𐴀𐴝𐴕𐴏𐴝𐴌 𐴀𐴝𐴌 𐴀𐴝𐴌𐴔𐴞 𐴀𐴥𐴡𐴑𐴧𐴡𐴓 𐴎𐴝𐴘 𐴱 𐴏𐴡𐴓𐴠𐴌𐴊𐴠 𐴄𐴠𐴕𐴆𐴤𐴠𐴕 𐴈𐴥𐴡𐴃𐴡𐴔 𐴒𐴡𐴌𐴞𐴁𐴡𐴌𐴓𐴝 𐴊𐴡𐴌𐴥𐴡 𐴔𐴡𐴌𐴥𐴡 𐴂𐴠𐴄𐴌𐴟𐴓 𐴏𐴝𐴓𐴝𐴘 𐴱 𐴏𐴝𐴙𐴌 𐴎𐴡𐴕 𐴌𐴟𐴇𐴝𐴙𐴕𐴒𐴙𐴝 𐴀𐴝𐴃𐴡𐴚𐴁𐴝𐴊𐴞 𐴊𐴤𐴡𐴙𐴅𐴧𐴙𐴠 𐴱𐴱

Sources : Dhakatribune