𐴁𐴝𐴚𐴓𐴝𐴊𐴠𐴐𐴡𐴌 𐴈𐴝𐴣𐴏𐴡𐴌 𐴒𐴤𐴡𐴌𐴈𐴝𐴛𐴏𐴧𐴝 𐴀𐴥𐴞𐴏𐴝𐴉𐴠 𐴀𐴞𐴕𐴋𐴞𐴘𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴁𐴝𐴁𐴡𐴃𐴠 𐴁𐴡𐴌𐴔𐴥𐴝𐴌 𐴓𐴡𐴘 𐴈𐴗𐴝𐴈𐴡𐴘 𐴒𐴡𐴙𐴅𐴧𐴙𐴠 𐴱𐴱

𐴀𐴞𐴕𐴋𐴞𐴘𐴝𐴌 𐴁𐴡𐴘𐴊𐴠𐴐𐴢 𐴏𐴠𐴑𐴠𐴄𐴠𐴌𐴞 / 𐴇𐴥𐴝𐴌𐴆 𐴁𐴝𐴌𐴊𐴤𐴝𐴕 𐴆𐴝𐴌𐴞𐴚𐴓𐴝 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴡𐴌𐴡 / 𐴀𐴠𐴔 𐴀𐴠𐴔 𐴕𐴝𐴌𐴝𐴁𐴝𐴕𐴞 𐴱 𐴊𐴟𐴕𐴥𐴞𐴎𐴡𐴕 𐴁𐴡𐴌𐴔𐴥𐴝𐴃 𐴊𐴟𐴘 𐴊𐴞𐴕𐴡𐴌𐴓𐴝 𐴁𐴠𐴌𐴥𐴝𐴘𐴃𐴡 𐴒𐴞𐴘𐴠𐴊𐴠 𐴀𐴥𐴠𐴍𐴠 𐴱 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴁𐴡𐴌𐴔𐴥𐴝 𐴊𐴟𐴕𐴥𐴞 𐴊𐴠𐴐𐴡𐴌 𐴒𐴤𐴡𐴌𐴈𐴝𐴛𐴏𐴧𐴝 𐴀𐴥𐴞𐴏𐴝𐴉𐴠 𐴱 𐴀𐴠𐴏𐴄𐴠𐴙𐴄 𐴑𐴡𐴕𐴏𐴞𐴓𐴝𐴌 / 𐴋𐴡 𐴀𐴡𐴚𐴏𐴥𐴠𐴚 𐴏𐴥𐴟𐴆𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴡𐴌 / 𐴔𐴥𐴞𐴚 𐴀𐴡𐴚 𐴓𐴝𐴙𐴕 𐴓𐴡𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴈𐴥𐴝𐴌𐴥𐴝 𐴈𐴥𐴝𐴌𐴥𐴝 𐴖𐴝𐴉𐴠𐴏𐴢 𐴊𐴠𐴐𐴡𐴃 𐴎𐴝𐴘 𐴉𐴝𐴌𐴞𐴁𐴝𐴌 𐴁𐴝𐴁𐴡𐴃𐴠 𐴐𐴤𐴡𐴔𐴁𐴝𐴌𐴠 𐴈𐴗𐴝𐴈𐴡𐴘 𐴒𐴡𐴙𐴅𐴧𐴙𐴠 𐴱 𐴀𐴞𐴕𐴋𐴞𐴓𐴧𐴝 𐴂𐴝𐴖𐴝𐴌 𐴀𐴡𐴓𐴝 𐴋𐴠𐴓𐴞𐴒𐴠𐴆𐴤𐴕 𐴘𐴝𐴌 𐴀𐴝𐴒𐴠 𐴀𐴠𐴕𐴋𐴞𐴘𐴝 𐴘𐴠 𐴁𐴡𐴌𐴔𐴥𐴝𐴃 𐴊𐴞𐴕𐴥𐴡𐴉𐴠𐴍𐴝 𐴀𐴞𐴕𐴋𐴞𐴘𐴝 𐴇𐴥𐴝𐴔𐴞𐴆𐴝 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴁𐴡𐴌𐴔𐴥𐴝 𐴊𐴟𐴕𐴥𐴞𐴎𐴡𐴕𐴡𐴌 𐴈𐴝𐴣𐴏𐴡𐴌 𐴊𐴟𐴏𐴃𐴡 ٬ 𐴂𐴝𐴄𐴕𐴝𐴌 𐴀𐴝𐴌 𐴒𐴤𐴡𐴌𐴈𐴝𐴛𐴏𐴧𐴝 𐴀𐴥𐴞𐴏𐴝𐴉𐴠 𐴀𐴝𐴏𐴠𐴊𐴠 𐴀𐴥𐴠𐴃𐴡𐴌𐴓𐴝 𐴈𐴝𐴔 𐴀𐴥𐴡𐴉𐴝𐴕 𐴊𐴞𐴓𐴡𐴌 𐴁𐴤𐴟𐴃𐴡𐴌𐴃𐴟 𐴱 𐴌𐴟𐴇𐴝𐴙𐴚𐴒𐴙𐴌 𐴔𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴈𐴗𐴝𐴈𐴡𐴘 𐴒𐴡𐴙𐴅𐴧𐴙𐴠𐴊𐴠 𐴀𐴝𐴌 𐴇𐴥𐴝𐴔𐴞𐴐𐴝𐴌 𐴉𐴥𐴝𐴘𐴊𐴝𐴌𐴓𐴝 𐴀𐴝𐴌𐴑𐴝𐴕𐴡𐴌 𐴇𐴥𐴝𐴓𐴡𐴃𐴡𐴌𐴠 𐴄𐴦𐴡𐴒𐴧𐴡𐴌𐴞 𐴀𐴝𐴒𐴠𐴁𐴤𐴝𐴌𐴠 𐴄𐴤𐴞𐴑 𐴒𐴡𐴌𐴥𐴝 𐴉𐴡𐴌𐴞𐴁𐴡 𐴱𐴱

𐴀𐴞𐴕𐴋𐴞𐴘𐴝 𐴘𐴠 𐴏𐴡𐴓𐴠𐴌𐴊𐴠 𐴇𐴥𐴝𐴓𐴡𐴃𐴡𐴌𐴠 𐴑𐴤𐴟𐴀𐴁 𐴁𐴤𐴝𐴓𐴝 𐴒𐴡𐴌𐴞 𐴎𐴝𐴕𐴠𐴊𐴠 𐴘𐴥𐴝𐴕 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴎𐴝𐴕𐴝𐴘 𐴊𐴞𐴘𐴠 𐴱 𐴀𐴝𐴌 𐴀𐴞𐴕𐴋𐴞𐴘𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴌𐴠 𐴀𐴝𐴏𐴝𐴕 𐴀𐴝𐴌 𐴈𐴥𐴝𐴌𐴝 𐴀𐴥𐴡𐴘 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴝𐴕𐴝𐴘 𐴁𐴡𐴌𐴓𐴝 𐴱 𐴁𐴡𐴌𐴔𐴥𐴝 ٬ 𐴁𐴝𐴚𐴓𐴝𐴊𐴠𐴐𐴢 𐴊𐴟𐴕𐴥𐴞𐴊𐴠𐴐𐴱 𐴓𐴡𐴘 𐴀𐴞𐴕𐴏𐴝𐴕𐴞 𐴑𐴟𐴐𐴞𐴐𐴢 𐴒𐴡𐴙𐴅𐴧𐴙𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴠 𐴀𐴥𐴟𐴀𐴕 𐴁𐴡𐴌𐴔𐴥𐴝𐴌 𐴈𐴡𐴔𐴐𐴡𐴙𐴚𐴒𐴙𐴝 𐴑𐴡𐴖𐴔 𐴔𐴟𐴏𐴡𐴓𐴔𐴝𐴕 𐴱 𐴁𐴦𐴡𐴃 𐴓𐴝𐴔𐴁𐴝 𐴀𐴡𐴑𐴃𐴡 𐴀𐴥𐴡𐴘𐴃𐴠 𐴏𐴡𐴓𐴞 𐴀𐴝𐴘𐴧𐴠𐴌𐴊𐴠 𐴓𐴝𐴌𐴥𐴝𐴙𐴌 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴊𐴠𐴐𐴢 𐴏𐴥𐴝𐴌𐴠 𐴊𐴤𐴝𐴘𐴧𐴡𐴌𐴠 𐴌𐴞𐴉𐴟𐴎𐴞 𐴁𐴡𐴙𐴕𐴧𐴙𐴠 𐴱 𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴀𐴝𐴏𐴠𐴊𐴠 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴱 𐴒𐴡𐴃𐴡 𐴔𐴝𐴐𐴤𐴡𐴃 𐴀𐴥𐴡𐴘𐴧𐴠𐴊𐴠 𐴀𐴞𐴕𐴋𐴞𐴘𐴝 – 𐴁𐴝𐴚𐴓𐴝𐴊𐴠𐴐𐴢 𐴁𐴞𐴘𐴝𐴏𐴝𐴕𐴝 𐴔𐴞𐴄𐴚𐴡𐴃 ٬ 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴡𐴌 𐴔𐴝𐴔𐴠𐴓𐴝𐴌 𐴓𐴡𐴒𐴠 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴃𐴟𐴓𐴞𐴊𐴞𐴘𐴠 𐴱 𐴀𐴞𐴕𐴋𐴞𐴘𐴝 𐴘𐴠 𐴁𐴝𐴚𐴓𐴝𐴊𐴠𐴐𐴤𐴡𐴌𐴠 𐴵 𐴄𐴠𐴌𐴥𐴠𐴣𐴆 𐴌𐴝𐴘𐴆𐴡𐴕 𐴊𐴠𐴘𐴠 𐴀𐴝𐴌𐴀𐴥𐴡 𐴊𐴞𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱 𐴀𐴞𐴕𐴋𐴞𐴘𐴝 𐴘𐴠 𐴀𐴝𐴒𐴠𐴓𐴡𐴃𐴞 ( 𐴀𐴝𐴌𐴑𐴝𐴕 𐴋𐴤𐴠𐴁𐴠𐴓𐴡𐴂𐴔𐴠𐴕𐴄 𐴂𐴡𐴌𐴡𐴅𐴤𐴠𐴑𐴄 ) 𐴕𐴝𐴔𐴡𐴌 𐴑𐴟𐴔𐴂𐴝𐴕𐴞 𐴑𐴤𐴟𐴓𐴞 𐴱 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴔𐴡𐴊𐴡𐴊 𐴒𐴡𐴌𐴠𐴌 ٬ 𐴃𐴝𐴑𐴤𐴞 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴌𐴞𐴉𐴟𐴎𐴞𐴌𐴠 𐴖𐴝𐴉𐴠𐴏𐴢 𐴀𐴝𐴕𐴞 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴌𐴝𐴑𐴤𐴞 𐴉𐴝𐴌𐴠𐴉𐴝𐴕 𐴱𐴱

Sources : The print