𐴁𐴝𐴚𐴓𐴝𐴊𐴠𐴐𐴡𐴌𐴠 𐴁𐴤𐴝𐴐𐴡𐴕𐴏𐴡𐴌𐴡𐴌 𐴑𐴠𐴀𐴠𐴔𐴡𐴌𐴠 𐴎𐴝𐴣𐴏𐴝𐴘 𐴒𐴡𐴌𐴞𐴁𐴡𐴌𐴓𐴝 ، 𐴘𐴟 𐴀𐴠𐴕𐴡𐴌 𐴔𐴝𐴇𐴠𐴌𐴞𐴕 𐴀𐴥𐴡𐴑𐴧𐴡𐴓𐴡𐴌𐴠 𐴎𐴝𐴘𐴁𐴡𐴌𐴓𐴝 𐴀𐴠𐴅𐴝𐴎𐴡𐴃 𐴊𐴞𐴃𐴡 𐴈𐴡𐴘𐴧𐴠 : 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 𐴱𐴱

𐴁𐴤𐴝𐴐𐴡𐴕𐴏𐴡𐴌𐴡𐴃 𐴀𐴡𐴐𐴤𐴝𐴕𐴃𐴞 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴥𐴞𐴃𐴝𐴌𐴝𐴌 𐴒𐴤𐴡𐴌𐴡𐴃 𐴎𐴝𐴘 𐴒𐴤𐴡𐴌𐴒𐴟𐴐𐴧𐴞 ، 𐴀𐴠𐴒𐴝𐴕𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 𐴁𐴡𐴌𐴓𐴝 𐴀𐴠𐴅𐴝𐴎𐴡𐴃 𐴊𐴞𐴘𐴝 𐴎𐴝𐴘𐴁𐴡 𐴱 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴌𐴔𐴡𐴃𐴡𐴌𐴠 ، 𐴘𐴟 𐴀𐴠𐴕𐴡𐴌 𐴔𐴝𐴇𐴠𐴌𐴞𐴕 𐴀𐴥𐴡𐴑𐴧𐴡𐴓𐴡𐴌𐴠 𐴁𐴤𐴝𐴐𐴡𐴕𐴏𐴡𐴌𐴡𐴃 𐴎𐴝𐴘 𐴇𐴝𐴓𐴡𐴃 𐴎𐴝𐴣𐴏𐴝𐴘 𐴒𐴡𐴌𐴞𐴁𐴡𐴌𐴓𐴝 𐴀𐴠𐴅𐴝𐴎𐴡𐴃 𐴊𐴞𐴁𐴡𐴌𐴓𐴝 𐴇𐴙𐴥𐴟𐴔𐴠𐴕 𐴌𐴥𐴝𐴙𐴄 𐴖𐴥𐴝𐴆𐴠 𐴈𐴡𐴘𐴧𐴠 𐴱 𐴁𐴤𐴝𐴐𐴡𐴕𐴏𐴡𐴌𐴡𐴃 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴓𐴝𐴍𐴞 𐴀𐴝𐴌 𐴒𐴝𐴏𐴥𐴡𐴌 𐴄𐴤𐴠𐴙𐴓𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴝𐴙𐴅𐴧𐴙𐴠 𐴱 𐴏𐴠𐴃𐴡𐴔𐴁𐴡𐴌𐴡𐴌 𐴱 𐴲 𐴃𐴝𐴌𐴞𐴑 𐴓𐴡𐴃𐴞 ، 𐴁𐴤𐴝𐴐𐴡𐴕𐴏𐴡𐴌𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 ، 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴃 𐴎𐴝𐴘 𐴒𐴤𐴡𐴌𐴒𐴟𐴐𐴧𐴞 𐴀𐴝𐴌 𐴀𐴠𐴒𐴝𐴕𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 𐴁𐴡𐴌𐴓𐴝 𐴁𐴤𐴟𐴑 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴙𐴠𐴊𐴠 𐴱 𐴘𐴥𐴝𐴕𐴡𐴌𐴓𐴝 𐴁𐴝𐴚𐴓𐴝𐴊𐴠𐴐𐴡𐴌 𐴕𐴠𐴁𐴞𐴌 𐴉𐴡𐴖𐴏𐴠 ، 𐴒𐴟𐴌𐴝 𐴉𐴟𐴖𐴝𐴙𐴕 𐴐𐴤𐴡𐴣𐴀 𐴀𐴠𐴑𐴧𐴟𐴌𐴃𐴟 𐴓𐴡𐴃𐴞 𐴁𐴠𐴙𐴒𐴧𐴟𐴕𐴡𐴌𐴠 𐴁𐴠𐴐𐴤𐴞 𐴔𐴝𐴙𐴅𐴧𐴙𐴠 𐴱𐴱

𐴌𐴠𐴂𐴟𐴄 𐴔𐴡𐴎𐴞𐴕 ، 𐴁𐴤𐴝𐴐𐴡𐴕𐴏𐴡𐴌𐴡𐴃 𐴎𐴝𐴘 𐴃𐴤𐴝𐴑𐴡𐴕𐴡𐴃 𐴁𐴠𐴐𐴤𐴝 𐴁𐴠𐴐𐴤𐴞 𐴋𐴡𐴌 𐴈𐴥𐴡𐴃𐴡𐴌𐴝 𐴃𐴤𐴝𐴑𐴞 𐴁𐴝𐴊𐴠 𐴘𐴥𐴡 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴊𐴠 𐴀𐴠𐴑 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴁𐴤𐴝𐴐𐴡𐴕𐴏𐴡𐴌𐴡𐴃 𐴕𐴞𐴎𐴝𐴘 𐴌𐴝𐴑𐴤𐴞 𐴁𐴡𐴌𐴓𐴝 𐴱 𐴐𐴤𐴡𐴑𐴃𐴞𐴔𐴝𐴕 𐴑𐴡𐴔𐴞𐴄𐴞 𐴀𐴟𐴒𐴧𐴗𐴝 𐴁𐴝𐴕𐴡𐴕𐴡𐴌 𐴁𐴝𐴊𐴠 ، 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴙𐴠𐴊𐴠 𐴌𐴞𐴉𐴟𐴎𐴞 𐴀𐴥𐴟𐴕𐴡𐴌𐴠 𐴉𐴞𐴄𐴧𐴙𐴠𐴊𐴠 𐴱 𐴁𐴤𐴝𐴐𐴡𐴕𐴏𐴡𐴌𐴃 𐴃𐴤𐴝𐴑𐴡𐴕𐴡𐴌𐴠 𐴐𐴤𐴝𐴕𐴃𐴞 𐴀𐴝𐴌 𐴇𐴠𐴉𐴝𐴎𐴡𐴃𐴞 𐴃𐴤𐴝𐴑𐴝 𐴱 𐴐𐴤𐴟𐴊𐴠 𐴘𐴥𐴝𐴕 𐴁𐴟𐴎𐴝𐴘 𐴁𐴡𐴌𐴓𐴝 ، 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴎𐴟𐴓𐴟𐴔 𐴘𐴝𐴕 𐴒𐴡𐴙𐴓𐴧𐴡𐴊𐴠 𐴁𐴡𐴓𐴞 ، 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟𐴌 𐴋𐴝𐴘𐴌𐴠𐴑𐴄𐴝𐴌 / 𐴁𐴠𐴌𐴝𐴋 𐴀𐴝𐴋𐴤𐴝𐴔𐴏𐴠 𐴈𐴡𐴘𐴧𐴠 𐴱 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 𐴘𐴠 𐴁𐴤𐴟𐴑 𐴇𐴥𐴡𐴌𐴃𐴝𐴓 𐴒𐴡𐴌𐴞 𐴉𐴞𐴍𐴝 𐴈𐴥𐴝𐴘𐴧𐴠𐴊𐴠 𐴌𐴞𐴉𐴟𐴎𐴞 𐴸 𐴎𐴡𐴕𐴡𐴌𐴃𐴟 𐴀𐴞𐴕𐴄𐴝𐴌𐴁𐴙𐴟 𐴓𐴡𐴘𐴧𐴠𐴊𐴠 𐴀𐴥𐴠𐴍𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴱𐴱

𐴀𐴝𐴣𐴀𐴌𐴝𐴌𐴠 𐴕𐴠𐴁𐴞𐴌 𐴉𐴡𐴖𐴏𐴠 𐴈𐴝𐴓𐴝 𐴂𐴠𐴓𐴝𐴆𐴄𐴞𐴑𐴡𐴌 𐴓𐴝𐴍𐴞 𐴀𐴝𐴌 𐴒𐴝𐴏𐴡𐴌 𐴄𐴤𐴠𐴙𐴓𐴝 𐴓𐴡𐴘 𐴒𐴟𐴌𐴝 𐴉𐴟𐴖𐴝𐴙𐴕 𐴐𐴤𐴡𐴣𐴀 𐴀𐴠𐴑𐴆𐴝𐴙𐴄𐴧𐴙𐴝 𐴉𐴞𐴄𐴧𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴔𐴝𐴘𐴌𐴡𐴌 𐴎𐴡𐴌𐴞𐴘𐴝 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴉𐴡𐴄𐴟 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 𐴘𐴠 𐴃𐴡𐴊𐴝𐴌𐴟𐴑 𐴒𐴡𐴌𐴞 𐴏𐴝𐴘𐴧𐴠 𐴱 𐴔𐴡𐴕𐴃𐴡𐴌 𐴀𐴥𐴠 𐴒𐴤𐴝𐴙𐴓 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴀𐴠𐴓𐴝𐴅 𐴒𐴡𐴌𐴞 𐴉𐴝𐴙𐴅𐴧𐴙𐴠𐴕𐴠 𐴕𐴥𐴝𐴑𐴞 𐴕𐴥𐴡 𐴉𐴝𐴌𐴠 𐴕𐴡 𐴎𐴝𐴕𐴥𐴠 𐴁𐴡𐴓𐴞 𐴀𐴥𐴞𐴃𐴝𐴌𐴝𐴌 𐴌𐴠𐴂𐴟𐴄𐴡𐴃 𐴈𐴡𐴘𐴧𐴠 𐴱 𐴁𐴤𐴝𐴐𐴡𐴕𐴏𐴡𐴌𐴡𐴃 𐴁𐴤𐴟𐴑 𐴇𐴥𐴡𐴌𐴃𐴝𐴓 𐴒𐴡𐴌𐴥𐴝 𐴐𐴤𐴟𐴌𐴟 𐴀𐴥𐴡𐴘 𐴈𐴡𐴀𐴠𐴑 𐴊𐴞𐴕 𐴁𐴝𐴊𐴠 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 ، 𐴀𐴥𐴞𐴃𐴝𐴌𐴝𐴌 𐴑𐴠𐴙𐴏𐴧𐴟 𐴀𐴠𐴒𐴝𐴕𐴝 𐴀𐴝𐴌 𐴑𐴠𐴙𐴏𐴧𐴟 𐴌𐴞𐴉𐴟𐴎𐴞𐴌 𐴔𐴟𐴌𐴡𐴁𐴧𐴞 𐴑𐴟𐴓𐴠 𐴔𐴞𐴓𐴝𐴘 𐴰 𐴴 𐴎𐴡𐴕 𐴓𐴡𐴃𐴞 𐴌𐴞𐴉𐴟𐴎𐴞 𐴁𐴤𐴝𐴐𐴡𐴕𐴏𐴡𐴌𐴡𐴃 𐴕𐴞𐴎𐴝𐴘 𐴃𐴞𐴕 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴌𐴝𐴑𐴤𐴞 𐴁𐴠𐴙𐴒𐴧𐴞𐴕 𐴊𐴠𐴈𐴥𐴝𐴘𐴧𐴠 𐴱 𐴏𐴝𐴘𐴃𐴡 𐴕𐴞𐴎𐴝𐴙𐴀𐴓𐴊𐴠 𐴋𐴠𐴓𐴞𐴒𐴠𐴆𐴠𐴕 𐴀𐴥𐴞𐴁𐴝 𐴘𐴠 ، 𐴁𐴤𐴝𐴐𐴡𐴕𐴏𐴡𐴌𐴡𐴃 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴈𐴡𐴔𐴞 ،𐴓𐴡𐴌𐴝 𐴏𐴡𐴌𐴝𐴌 𐴂𐴝𐴁𐴡𐴕𐴊𐴞 ، 𐴎𐴞𐴕𐴊𐴞𐴒𐴞𐴌 𐴔𐴡𐴑𐴝 𐴁𐴤𐴝𐴓𐴝 𐴕𐴡𐴀𐴡 𐴀𐴝𐴌 𐴁𐴝𐴌𐴞𐴆𐴤𐴝𐴌 𐴔𐴟𐴏𐴡𐴔𐴡𐴃 𐴇𐴠𐴉𐴝𐴎𐴡𐴃𐴞𐴌 𐴁𐴠𐴐𐴤𐴞 𐴋𐴡𐴌 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴘 𐴌𐴠𐴂𐴟𐴄 𐴊𐴞𐴘𐴠 𐴱𐴱

Sources : Dhakatribune