𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄𐴡𐴌 𐴓𐴝 𐴁𐴡𐴌𐴔𐴥𐴝𐴌 𐴊𐴠𐴐𐴤𐴞 , 𐴏𐴞𐴘𐴝𐴏𐴞 𐴀𐴟𐴉𐴥𐴝𐴙𐴌 𐴁𐴠𐴐𐴤𐴞 𐴊𐴡𐴌𐴈𐴝𐴌 𐴱𐴱

𐴁𐴠𐴐𐴤𐴞 𐴊𐴠𐴌𐴞 𐴀𐴥𐴡𐴘𐴃𐴠 𐴏𐴡𐴓𐴞 𐴀𐴝𐴘𐴧𐴠𐴌 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴌𐴃𐴟 𐴑𐴟𐴕𐴈𐴝𐴕 𐴔𐴝𐴌𐴞 , 𐴀𐴝𐴌 𐴁𐴦𐴝𐴊𐴠 𐴑𐴞 𐴀𐴥𐴡𐴘𐴁𐴡 , 𐴕𐴡 𐴀𐴥𐴡𐴘𐴁𐴡 𐴁𐴠𐴙𐴒𐴧𐴞𐴕 𐴁𐴟𐴎𐴞 𐴱 𐴇𐴥𐴝𐴔𐴞𐴐𐴤𐴝 𐴄𐴞𐴑𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴏𐴞𐴘𐴝𐴏𐴞 𐴀𐴟𐴉𐴥𐴝𐴘 𐴕𐴠𐴓𐴝𐴘 𐴁𐴡𐴌𐴓𐴧𐴝 𐴱 𐴘𐴟 𐴀𐴠𐴕𐴡𐴃𐴢 , 𐴈𐴡𐴃𐴤𐴝 𐴈𐴗𐴝 𐴈𐴡𐴘 𐴒𐴡𐴙𐴅𐴧𐴙𐴠𐴊𐴠 ( 𐴋𐴞𐴏𐴑𐴝𐴏𐴞𐴚 ) 𐴀𐴥𐴠𐴍𐴠 𐴊𐴠𐴐𐴁𐴞𐴊𐴠𐴐𐴤𐴡𐴌𐴠 𐴈𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴡𐴕𐴡𐴌𐴓𐴝 , 𐴀𐴥𐴞𐴃𐴝𐴌𐴝 𐴏𐴥𐴡𐴚𐴑𐴡𐴄𐴡𐴌 𐴏𐴞𐴘𐴝𐴏𐴞 𐴀𐴟𐴉𐴥𐴝𐴘𐴢 𐴃𐴟𐴖𐴝𐴘 𐴕𐴠𐴓𐴝𐴀𐴡𐴕𐴡𐴌 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴱 𐴊𐴠𐴐𐴤𐴡𐴌 𐴇𐴥𐴝𐴓𐴡𐴃𐴡𐴌𐴠 𐴄𐴤𐴞𐴑 𐴀𐴝𐴌 𐴐𐴤𐴟𐴕𐴊𐴡𐴌 𐴒𐴡𐴌𐴞 , 𐴈𐴡𐴏𐴟𐴌𐴁𐴡𐴕 𐴀𐴥𐴡𐴑𐴧𐴡𐴓𐴡𐴌𐴠 𐴐𐴤𐴝𐴎𐴝 𐴊𐴡𐴀𐴕 𐴎𐴡𐴌𐴟𐴌𐴞 𐴁𐴡𐴓𐴞 𐴱 𐴘𐴟𐴕𐴝𐴙𐴄𐴠𐴋 𐴕𐴠𐴆𐴤𐴕𐴡𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴇𐴥𐴝𐴔𐴞𐴐𐴤𐴝𐴌 𐴕𐴡𐴔𐴝𐴙𐴕𐴊𐴝 / 𐴌𐴡𐴁𐴝𐴁 𐴉𐴝𐴃𐴠𐴔𐴝 𐴘𐴠 𐴁𐴟𐴙𐴃 𐴁𐴝𐴌𐴠 𐴈𐴡𐴘𐴧𐴠 𐴱𐴱

𐴘𐴟 𐴀𐴠𐴕𐴡𐴌 ( 𐴂𐴝𐴌𐴔𐴠𐴕𐴥𐴠𐴕𐴄 𐴔𐴞𐴆𐴞𐴕𐴡𐴌 ) 𐴔𐴞𐴔𐴁𐴡𐴌 𐴊𐴠𐴐𐴢 𐴁𐴝𐴚𐴓𐴝𐴊𐴠𐴐𐴢 , 𐴑𐴠𐴕𐴠𐴋𐴝 , 𐴏𐴡𐴀𐴟𐴊𐴞 𐴀𐴝𐴌𐴡𐴁𐴢 𐴀𐴝𐴌 𐴃𐴟𐴌𐴑𐴞 𐴱 𐴀𐴠 𐴊𐴠𐴐𐴢 𐴀𐴞𐴀𐴕 𐴁𐴠𐴙𐴒𐴧𐴞𐴕𐴠 𐴔𐴞𐴓𐴞 ” 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄𐴡𐴌 𐴏𐴝𐴙𐴌 𐴁𐴡𐴏𐴡𐴌𐴡𐴃 ” 𐴈𐴡𐴘 𐴕𐴝𐴔 𐴊𐴞 𐴔𐴞𐴄𐴞𐴚 𐴒𐴡𐴙𐴅𐴧𐴠𐴙𐴠𐴊𐴠 𐴱 𐴈𐴥𐴝𐴔𐴝𐴈𐴥𐴝 𐴊𐴠𐴌𐴞𐴉𐴦𐴝𐴕 𐴄𐴞𐴑𐴠𐴁𐴡𐴊𐴠 𐴘𐴥𐴝𐴕𐴡𐴌 𐴒𐴠𐴌𐴝𐴕𐴄𐴞 𐴊𐴞𐴘𐴝 𐴀𐴟𐴉𐴥𐴝𐴘𐴢 𐴃𐴟𐴖𐴝𐴘𐴢 𐴓𐴟𐴖𐴝 𐴉𐴡𐴌𐴞𐴁𐴡 𐴁𐴡𐴓𐴞 / 𐴌𐴡𐴁𐴝𐴁𐴢 𐴉𐴝𐴃𐴠𐴔𐴝 𐴘𐴠 𐴈𐴡𐴘𐴧𐴠 𐴱 𐴀𐴠 𐴘𐴟 𐴀𐴠𐴕𐴡𐴌 𐴔𐴞𐴔𐴁𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓 𐴀𐴝𐴌 𐴊𐴠𐴐𐴡𐴃 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝 𐴀𐴝𐴌 𐴊𐴠𐴐𐴤𐴠 𐴊𐴠𐴐𐴤𐴠 𐴆𐴞𐴣𐴍𐴝 𐴆𐴤𐴞𐴄𐴧𐴝 𐴀𐴥𐴡𐴘𐴒𐴞𐴘𐴡𐴘𐴊𐴠 𐴀𐴥𐴞𐴃𐴝𐴌𐴝𐴌 𐴐𐴤𐴡𐴔𐴝𐴎𐴞 𐴃𐴡𐴕𐴎𐴞𐴔𐴠 𐴔𐴞𐴓𐴞 𐴒𐴡𐴙𐴅𐴧𐴙𐴠𐴊𐴠 𐴱 𐴁𐴡𐴓𐴢 𐴀𐴡𐴓𐴝 𐴁𐴠𐴘𐴝𐴏𐴝𐴕𐴝 𐴀𐴥𐴞𐴁𐴝𐴃𐴢 𐴁𐴡𐴖𐴃 𐴔𐴟𐴙𐴓𐴧𐴡𐴔𐴝𐴕 𐴉𐴝𐴘𐴏𐴠𐴓𐴝 𐴀𐴥𐴡𐴑𐴧𐴡𐴓𐴢 𐴕𐴠𐴙𐴓𐴧𐴙𐴠 𐴁𐴡𐴓𐴞 / 𐴌𐴡𐴁𐴝𐴁 𐴉𐴝𐴃𐴠𐴔𐴝 𐴘𐴠 𐴈𐴡𐴘𐴧𐴠 𐴱 ( 𐴀𐴝𐴘 𐴀𐴝𐴘 𐴀𐴠𐴔 𐴀𐴠𐴔 ) 𐴁𐴡𐴌𐴔𐴥𐴝𐴌 𐴀𐴝𐴎𐴝𐴊𐴝𐴕𐴝 𐴀𐴞𐴚𐴑𐴗𐴝𐴌𐴞 𐴔𐴞𐴆𐴞𐴕𐴡𐴌 𐴎𐴞𐴔𐴧𐴝𐴊𐴝𐴌 / 𐴕𐴞𐴑𐴡𐴓𐴝𐴏𐴢 𐴑𐴟𐴔𐴞𐴅𐴙𐴝𐴕𐴠 𐴀𐴠 𐴔𐴟𐴓𐴢 𐴈𐴡𐴃𐴤𐴝 𐴈𐴡𐴘𐴧𐴠 𐴀𐴝𐴌 𐴑𐴠𐴕𐴠𐴋𐴝𐴌 𐴇𐴥𐴝𐴔𐴞𐴐𐴤𐴝𐴌 𐴘𐴟 𐴀𐴠𐴕𐴡𐴌 𐴕𐴡𐴔𐴝𐴙𐴕𐴊𐴝 / 𐴁𐴡𐴁 𐴌𐴠 𐴘𐴠 𐴀𐴥𐴠 𐴁𐴞𐴘𐴝𐴏𐴝𐴕𐴝 𐴘𐴥𐴝𐴕𐴡𐴌𐴠 𐴐𐴤𐴟𐴕𐴊𐴡𐴌 𐴁𐴝𐴕𐴝𐴘𐴧𐴠 𐴱𐴱

Dhakatribune