𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴡𐴌𐴔𐴥𐴝 𐴇𐴡𐴑𐴟𐴔𐴡𐴃𐴡𐴌𐴠 𐴁𐴞𐴐𐴧𐴝𐴐𐴢 𐴕𐴡 𐴒𐴡𐴌𐴠 𐴁𐴡𐴓𐴞 𐴁𐴞𐴊𐴠𐴐𐴢 𐴀𐴟𐴎𐴞𐴌𐴠 𐴀𐴝𐴏𐴞𐴘𐴠𐴕𐴡𐴌𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝 𐴇𐴡𐴑𐴟𐴔𐴡𐴃𐴠 𐴎𐴟𐴓𐴟𐴔 𐴒𐴡𐴌𐴞 𐴁𐴡𐴓𐴝𐴎𐴟𐴌𐴞 𐴁𐴝𐴚𐴓𐴝𐴊𐴠𐴐𐴡𐴃 𐴉𐴝𐴌𐴒𐴝𐴌𐴥𐴝𐴘 𐴊𐴞𐴘𐴠𐴊𐴠 𐴱 𐴱 𐴓𐴝𐴑 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴱 𐴎𐴦𐴟𐴕𐴡𐴌𐴠 𐴁𐴝𐴚𐴓𐴝𐴊𐴠𐴐𐴠 𐴏𐴥𐴝𐴀𐴝𐴌𐴝 𐴊𐴞 𐴌𐴝𐴙𐴑𐴧𐴙𐴠 , 𐴀𐴥𐴟𐴕𐴡𐴌 𐴁𐴝𐴁𐴡𐴃𐴠 𐴁𐴝𐴚𐴓𐴝𐴊𐴠𐴐𐴠 𐴀𐴝𐴌𐴀𐴥𐴡 𐴀𐴠𐴑𐴁𐴝𐴌 𐴊𐴠𐴐𐴁𐴞𐴊𐴠𐴐𐴡𐴌𐴠 𐴈𐴡𐴀𐴌𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴔𐴟𐴓 𐴃𐴦𐴡𐴗𐴌𐴠 𐴀𐴥𐴞𐴃𐴝𐴌𐴝𐴌 𐴊𐴠𐴐𐴡𐴃 𐴎𐴦𐴡𐴙𐴕𐴧𐴝 𐴕𐴡𐴀𐴡 𐴱 𐴀𐴥𐴞𐴃𐴝𐴌𐴝 𐴕𐴞𐴎𐴡𐴌 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴱 𐴐𐴤𐴝𐴕𐴃𐴞 𐴀𐴝𐴌 𐴇𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴉𐴝𐴌𐴞𐴁𐴡𐴊𐴠 𐴘𐴥𐴝𐴕𐴡𐴃 𐴱 𐴁𐴡𐴌𐴔𐴥𐴝 𐴇𐴡𐴑𐴟𐴔𐴡𐴃𐴡𐴌𐴠 𐴁𐴞𐴐𐴧𐴝𐴐𐴢 𐴕𐴡 𐴒𐴡𐴌𐴠 𐴱 𐴀𐴥𐴠𐴃𐴡𐴓𐴧𐴝 𐴌𐴞𐴉𐴟𐴎𐴞 𐴀𐴝𐴌 𐴊𐴠𐴐𐴁𐴞𐴊𐴠𐴐𐴢 , 𐴁𐴠𐴙𐴒𐴧𐴟𐴕𐴠 𐴐𐴤𐴝𐴕𐴃𐴞 𐴀𐴥𐴡𐴘 𐴉𐴝𐴌𐴠𐴉𐴝𐴕 𐴱 𐴀𐴠 𐴔𐴝𐴀𐴔𐴠𐴓𐴝𐴃 𐴔𐴠𐴓𐴠𐴄𐴠𐴌𐴞𐴌𐴠 𐴁𐴝𐴃𐴊𐴞 𐴊𐴟𐴏𐴃𐴡 𐴊𐴠𐴐𐴢 , 𐴎𐴠𐴕𐴋𐴞𐴓𐴧𐴝 𐴀𐴝𐴏𐴞𐴘𐴠𐴕 , 𐴆𐴞𐴕𐴝 , 𐴌𐴝𐴆𐴞𐴘𐴝 , 𐴀𐴞𐴕𐴋𐴞𐴘𐴝 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴊𐴟𐴏𐴃𐴡 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌𐴃𐴟 𐴂𐴝𐴁𐴓𐴞𐴑 𐴕𐴡𐴔𐴝𐴙𐴕𐴊𐴝 𐴓𐴡𐴘 𐴱𐴱

𐴌𐴞𐴉𐴟𐴎𐴞𐴌 𐴔𐴝𐴀𐴔𐴠𐴓𐴝𐴌 𐴀𐴟𐴉𐴥𐴝𐴘 𐴃𐴟𐴖𐴝𐴘𐴁𐴡𐴌𐴓𐴝 𐴐𐴤𐴡𐴕𐴞𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴡𐴌 𐴁𐴞𐴃𐴠𐴐𐴢 𐴀𐴟𐴎𐴞𐴌 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴀𐴝𐴏𐴞𐴘𐴠𐴕 𐴊𐴠𐴐𐴡𐴌 𐴷 𐴲 𐴀𐴡𐴔 𐴁𐴞𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴞𐴄𐴞𐴚𐴡𐴃 𐴔𐴡𐴐𐴖𐴝𐴌𐴝 𐴊𐴞𐴘𐴠 𐴱 ( 𐴀𐴠 𐴀𐴝𐴌 𐴀𐴠𐴉𐴢 ) 𐴀𐴝𐴏𐴞𐴘𐴠𐴕 𐴌𐴠𐴒𐴞𐴀𐴡𐴕𐴠𐴓 𐴉𐴡𐴌𐴥𐴠𐴕 𐴔𐴞𐴕𐴞𐴏𐴄𐴝𐴌 𐴀𐴥𐴡𐴑𐴧𐴡𐴓𐴡𐴌 𐴔𐴞𐴄𐴞𐴚 𐴏𐴡𐴓𐴠𐴌𐴊𐴠 𐴀𐴡𐴑𐴃𐴡𐴃 , 𐴀𐴠 𐴀𐴝𐴌 𐴀𐴠𐴉𐴡𐴌 𐴔𐴞𐴔𐴁𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓 𐴐𐴤𐴡𐴣𐴀𐴡 𐴀𐴡𐴏𐴄𐴡𐴌𐴡𐴓𐴞𐴘𐴝 , 𐴀𐴞𐴕𐴋𐴞𐴘𐴝 , 𐴀𐴞𐴕𐴋𐴟𐴕𐴞𐴆𐴤𐴙𐴝 , 𐴔𐴡𐴓𐴠𐴆𐴤𐴙𐴝 , 𐴕𐴙𐴟𐴎𐴞𐴓𐴠𐴕 , 𐴉𐴞𐴓𐴞𐴂𐴞𐴕 , 𐴑𐴟𐴌𐴞𐴘𐴝 , 𐴏𐴞𐴚𐴒𐴝𐴂𐴟𐴌 , 𐴀𐴝𐴔𐴠𐴌𐴞𐴑𐴝 𐴀𐴝𐴌 𐴘𐴟𐴌𐴞𐴂𐴞 𐴘𐴟𐴕𐴞𐴘𐴥𐴡𐴕 𐴁𐴠𐴙𐴒𐴧𐴞𐴕𐴠 𐴎𐴠𐴃𐴡 𐴈𐴥𐴝𐴌𐴝 𐴉𐴝𐴌𐴠 𐴌𐴞𐴉𐴟𐴎𐴞𐴌 𐴔𐴝𐴀𐴔𐴠𐴓𐴝 𐴉𐴥𐴟𐴌𐴝𐴘 𐴉𐴥𐴠𐴓𐴝𐴘𐴁𐴡𐴌𐴓𐴝 𐴁𐴠𐴐𐴤𐴞 𐴎𐴟𐴌 𐴊𐴞𐴘𐴠 𐴱 𐴀𐴦𐴝𐴛 𐴀𐴝𐴏𐴞𐴘𐴠𐴕𐴡𐴌 𐴁𐴞𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴇𐴠𐴔𐴝𐴘𐴡𐴃 𐴉𐴝𐴘𐴁𐴡𐴌𐴓𐴝 𐴀𐴝𐴌𐴡𐴎 𐴒𐴡𐴌𐴞𐴌 , 𐴃𐴝𐴑𐴤𐴞 𐴀𐴠 𐴉𐴟𐴌𐴝 𐴑𐴙𐴝𐴙𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃 , 𐴇𐴠𐴉𐴝𐴎𐴡𐴃 𐴀𐴝𐴌 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴕𐴞𐴎𐴡𐴌 𐴊𐴠𐴐𐴡𐴃 𐴎𐴝𐴘 𐴐𐴤𐴡𐴔𐴝𐴎 𐴁𐴝𐴕𐴝𐴘 𐴃𐴤𐴑𐴞𐴉𐴝𐴌𐴠𐴉𐴝𐴕 𐴱 𐴁𐴡𐴓𐴞 / 𐴀𐴠 𐴑𐴠 𐴋𐴞 𐴀𐴝𐴌 , 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠 𐴱𐴱

Sources : Dhakatribune