𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞𐴎𐴡𐴕 ” 𐴀𐴝𐴘 𐴏𐴞 𐴏𐴞 ” 𐴑𐴦𐴟𐴍𐴡𐴃 𐴒𐴡𐴁𐴤𐴝 𐴊𐴞𐴃𐴉𐴝𐴌𐴠 𐴁𐴡𐴓𐴞 ” 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄 ” 𐴒𐴟𐴌𐴟𐴂𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴔𐴞𐴌𐴃𐴟 ( 𐴔𐴠𐴓𐴠𐴄𐴠𐴌𐴞𐴌𐴃𐴟 ) 𐴊𐴤𐴝𐴘 𐴒𐴞𐴘𐴥𐴡𐴘𐴊𐴠 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞𐴎𐴡𐴕 𐴈𐴡𐴀𐴠𐴑𐴊𐴞𐴕 𐴀𐴝𐴒𐴠 𐴱 𐴀𐴝𐴘 𐴏𐴞 𐴏𐴞 𐴑𐴦𐴟𐴍𐴡𐴃 𐴒𐴡𐴁𐴤𐴝 𐴊𐴞𐴁𐴝𐴌 𐴏𐴡𐴔𐴁𐴤𐴡𐴗𐴕𐴝 𐴓𐴡𐴘 , 𐴊𐴠𐴐𐴁𐴞𐴊𐴠𐴐𐴤𐴞 𐴉𐴦𐴡𐴎𐴊𐴝𐴌𐴞 𐴀𐴝𐴊𐴝𐴓𐴡𐴃 𐴀𐴝𐴏𐴠𐴊𐴠 𐴕𐴠𐴊𐴝𐴌𐴓𐴥𐴠𐴕𐴡𐴌 𐴐𐴤𐴡𐴀𐴌 𐴊𐴞𐴇𐴥𐴠𐴒𐴡𐴃 𐴉𐴦𐴡𐴣𐴙𐴏𐴧𐴙𐴠 𐴁𐴡𐴓𐴞 ” 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴟𐴂𐴠 𐴈𐴡𐴘𐴧𐴠 𐴱 𐴔𐴡𐴒𐴁𐴝𐴒𐴞 ( 𐴀𐴠 𐴀𐴠 ) 𐴘𐴠 , 𐴀𐴥𐴠 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞 𐴎𐴡𐴕𐴡𐴌 𐴓𐴡𐴘 𐴒𐴡𐴙𐴅𐴧𐴙𐴠𐴊𐴠 , 𐴏𐴟𐴖𐴝𐴓𐴝𐴏𐴥𐴝𐴓𐴞𐴌 𐴀𐴥𐴞𐴕𐴄𐴝𐴌𐴁𐴙𐴟 𐴀𐴥𐴡𐴑𐴧𐴡𐴓 𐴡𐴃 , 𐴔𐴠𐴓𐴠𐴄𐴠𐴌𐴞𐴌 𐴋𐴦𐴡𐴣𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴀𐴝𐴌𐴑𐴝𐴕𐴡𐴌𐴃𐴟 𐴉𐴥𐴟𐴌𐴝𐴘 𐴉𐴥𐴠𐴓𐴝𐴘𐴁𐴡𐴓𐴧𐴝 , 𐴀𐴥𐴞𐴃𐴝𐴌𐴝𐴌𐴠 𐴀𐴝𐴌𐴑𐴝𐴕𐴡𐴃 𐴊𐴞𐴉𐴠𐴍𐴝𐴘𐴧𐴠 𐴊𐴠 𐴈𐴡𐴘 𐴀𐴠𐴑𐴌𐴝𐴌 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴞𐴋𐴞𐴘𐴟 𐴀𐴥𐴡𐴑𐴧𐴡𐴓 , 𐴒𐴡𐴃𐴡 𐴈𐴡𐴀𐴠𐴑 𐴔𐴥𐴝𐴐𐴢 𐴀𐴥𐴡𐴘𐴃𐴠 𐴀𐴡𐴕𐴓𐴥𐴝𐴘𐴕𐴡𐴃 𐴊𐴠𐴈𐴥𐴝 𐴎𐴝𐴀𐴌 𐴁𐴡𐴓𐴞 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴟𐴂𐴡𐴌 𐴀𐴠𐴏𐴄𐴠𐴙𐴄𐴔𐴠𐴕𐴡𐴃 𐴊𐴠𐴈𐴥𐴝𐴒𐴞𐴘𐴠 𐴱 𐴎𐴡𐴊𐴞 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞𐴎𐴡𐴕𐴠 𐴉𐴦𐴡𐴎𐴊𐴝𐴌𐴞 𐴀𐴝𐴊𐴝𐴓𐴡𐴃 𐴀𐴝𐴘 𐴏𐴞 𐴏𐴞 𐴑𐴦𐴟𐴍𐴡𐴃 𐴒𐴡𐴁𐴤𐴝 𐴊𐴠𐴌 𐴊𐴠 𐴀𐴥𐴡𐴘𐴓𐴠 , 𐴊𐴠𐴐𐴁𐴞𐴊𐴠𐴐𐴤𐴞 𐴉𐴦𐴡𐴎𐴊𐴝𐴌𐴞 𐴀𐴝𐴊𐴝𐴓𐴡𐴃𐴡𐴃 𐴁𐴡𐴌𐴔𐴥𐴝𐴌 𐴀𐴟𐴓𐴋𐴝 𐴀𐴠𐴑𐴀𐴡𐴔 𐴁𐴡𐴘𐴝𐴕 𐴀𐴥𐴡𐴘𐴁𐴡 𐴁𐴡𐴓𐴞 𐴉𐴥𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄𐴠 𐴈𐴡𐴘𐴧𐴠 𐴱𐴱

𐴀𐴥𐴠 𐴔𐴠𐴓𐴠𐴄𐴠𐴌𐴞 / 𐴔𐴙𐴥𐴟 𐴖𐴥𐴝𐴚 𐴄𐴤𐴗𐴥𐴠𐴚 𐴀𐴝𐴌 𐴎𐴡𐴕𐴝𐴙𐴚 𐴄𐴤𐴗𐴥𐴠𐴚 𐴊𐴟𐴕𐴥𐴞𐴎𐴡𐴕 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴉𐴥𐴟𐴣𐴖𐴝𐴣𐴃𐴞 𐴷 𐴱 𐴰 𐴲 𐴐𐴤𐴡𐴕𐴡𐴃 , 𐴊𐴠𐴐𐴢 𐴏𐴥𐴡𐴉𐴝𐴌 𐴕𐴝𐴔𐴊𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴍𐴠 𐴐𐴤𐴡𐴌𐴞𐴑 𐴀𐴝𐴏𐴠 𐴁𐴡𐴓𐴞 𐴔𐴟𐴑𐴎𐴟𐴁𐴝𐴕𐴞 𐴊𐴞𐴘𐴠 𐴱 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞𐴎𐴡𐴕𐴡𐴌𐴠 𐴀𐴝𐴘 𐴏𐴞 𐴏𐴞 𐴑𐴦𐴟𐴍𐴡𐴃 𐴎𐴝𐴣𐴏𐴝𐴘 𐴒𐴡𐴌𐴞 𐴁𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌𐴀𐴥𐴟𐴕𐴡𐴌𐴠 𐴘𐴥𐴡 𐴎𐴝𐴣𐴏𐴝𐴘 𐴒𐴡𐴌𐴞𐴁𐴝𐴌 𐴌𐴝𐴏𐴧𐴝 𐴑𐴤𐴟𐴓𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴀𐴡𐴓𐴝 𐴀𐴥𐴡𐴑𐴧𐴡𐴓𐴠 𐴈𐴡𐴀𐴌 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴉𐴟𐴖𐴝 𐴁𐴟𐴌𐴥𐴝 , 𐴔𐴝𐴘𐴧𐴝 𐴔𐴡𐴌𐴡𐴊 , 𐴑𐴠𐴣𐴏𐴝𐴉𐴡𐴕𐴝 𐴀𐴠𐴑𐴧𐴟𐴌𐴃𐴟 𐴓𐴡𐴃𐴞 𐴔𐴝𐴌𐴞 𐴁𐴞𐴏𐴥𐴝𐴘 𐴊𐴞𐴁𐴡𐴌𐴓𐴝 𐴱 𐴖𐴡𐴌𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 , 𐴀𐴥𐴞𐴃𐴝𐴌𐴝𐴌𐴠 𐴀𐴡𐴋𐴝𐴌 𐴊𐴞𐴘𐴠𐴊𐴠 𐴘𐴥𐴝𐴕 𐴁𐴞𐴋𐴞𐴘𐴟𐴃 𐴊𐴠𐴈𐴥𐴝 𐴎𐴝𐴌𐴊𐴠 𐴔𐴡𐴎𐴞𐴕 𐴱 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞𐴎𐴡𐴕𐴠 𐴑𐴦𐴟𐴍𐴡𐴃 𐴈𐴡𐴘𐴁𐴡 𐴁𐴡𐴓𐴞 / 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄𐴠 𐴀𐴝𐴐𐴤𐴝 𐴒𐴡𐴌𐴠𐴌 𐴁𐴡𐴓𐴞 𐴁𐴞 𐴁𐴞 𐴏𐴞 𐴘𐴠 𐴈𐴡𐴘𐴧𐴠 𐴱 𐴅𐴠𐴕𐴟𐴏𐴥𐴝𐴙𐴋𐴡𐴃 𐴐𐴤𐴡𐴌𐴝𐴐𐴤𐴡𐴌𐴞 𐴐𐴤𐴡𐴌𐴞𐴑 𐴀𐴝𐴏𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴔𐴠𐴓𐴠𐴄𐴠𐴌𐴞𐴌 𐴹 𐴱 𐴎𐴡𐴕𐴡𐴌 𐴕𐴝𐴔 𐴎𐴞𐴔𐴧𐴝𐴊𐴝𐴌𐴞 ( 𐴌𐴝𐴄𐴤𐴟 ) 𐴐𐴤𐴡𐴣𐴀 𐴈𐴡𐴘𐴧𐴠 𐴱 𐴀𐴝𐴌 𐴀𐴥𐴞𐴃𐴝𐴌𐴝𐴌𐴠 𐴀𐴡𐴋𐴝𐴌 𐴊𐴞𐴘𐴠𐴊𐴠 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴎𐴞𐴔𐴧𐴝𐴊𐴝𐴌 𐴶 𐴎𐴡𐴕 𐴀𐴝𐴌 𐴁𐴟𐴔𐴥𐴟𐴅𐴤𐴞 𐴀𐴠𐴑𐴎𐴡𐴕 𐴀𐴝𐴌 𐴁𐴟𐴅𐴤𐴞 𐴳 𐴎𐴡𐴕𐴡𐴌 𐴕𐴝𐴔𐴀𐴥𐴡 𐴈𐴡𐴘𐴧𐴠 𐴱 𐴀𐴠𐴑𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴊𐴧𐴝 𐴀𐴝𐴌𐴑𐴝𐴕𐴡𐴃 𐴕𐴡𐴃𐴤𐴝𐴑𐴠𐴉𐴝𐴕 𐴔𐴝𐴌𐴞 𐴉𐴥𐴠𐴓𐴝𐴘𐴁𐴡𐴌𐴓𐴝 𐴱 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴀𐴡𐴋𐴝𐴌 𐴊𐴞𐴘𐴠𐴊𐴠 𐴘𐴥𐴝𐴕 𐴀𐴥𐴞𐴃𐴝𐴌𐴝𐴌 𐴔𐴟𐴑𐴎𐴟𐴁𐴝𐴕𐴞 𐴔𐴡𐴎𐴞𐴕 𐴎𐴝𐴕𐴝𐴒𐴞𐴘𐴠 𐴱𐴱

Sources : BBC