𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴔𐴡𐴅𐴁𐴟𐴌 𐴀𐴥𐴡𐴘 , 𐴁𐴡𐴌𐴔𐴥𐴝𐴌𐴃𐴟 𐴊𐴤𐴝𐴘 𐴀𐴝𐴘𐴧𐴡𐴕𐴡𐴃 , 𐴉𐴠𐴙𐴏𐴁𐴦𐴟𐴑𐴡𐴌 𐴇𐴥𐴝𐴃 𐴀𐴝𐴏𐴠 𐴱𐴱

𐴏𐴟𐴆𐴙𐴠𐴓 𐴔𐴠𐴋𐴞𐴘𐴝𐴌 𐴂𐴠𐴓𐴠𐴄𐴉𐴥𐴡𐴔𐴠 , 𐴅𐴝𐴕𐴑𐴝𐴌𐴞 𐴀𐴥𐴡𐴑𐴧𐴡𐴓 𐴉𐴡𐴌𐴔𐴝𐴕 𐴒𐴡𐴌𐴞 𐴑𐴝𐴕𐴟𐴕𐴞 𐴑𐴠𐴙𐴏𐴡𐴃 𐴊𐴠𐴈𐴥𐴝𐴘 𐴉𐴝𐴌𐴠𐴉𐴝𐴀𐴕 , 𐴁𐴡𐴌𐴔𐴥𐴝𐴌 𐴀𐴝𐴎𐴝𐴊 𐴃𐴡𐴊𐴝𐴌𐴟𐴑𐴞 𐴔𐴠𐴑𐴝𐴕𐴞𐴎𐴠𐴔𐴡𐴌 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔 𐴒𐴡𐴌𐴠𐴌 𐴁𐴡𐴓𐴞 𐴱 𐴉𐴠𐴙𐴏𐴁𐴦𐴟𐴑𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴋𐴝𐴘𐴌𐴠𐴑𐴄𐴝𐴌𐴠 𐴈𐴡𐴘𐴧𐴠 𐴱 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴥𐴝𐴌 𐴎𐴟𐴓𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴞 𐴕𐴡𐴉𐴝𐴌𐴥𐴞 𐴱 𐴕𐴞𐴎𐴡𐴌 𐴕𐴝𐴒𐴤𐴞 𐴈𐴝𐴍𐴝 𐴊𐴠𐴐𐴢 𐴃𐴞𐴘𐴝𐴒𐴢 𐴒𐴡𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠𐴊𐴠 𐴘𐴥𐴝𐴕𐴡𐴃 𐴱 𐴏𐴟𐴆𐴙𐴠𐴓 𐴔𐴠𐴋𐴞𐴘𐴝 𐴉𐴠𐴙𐴏𐴁𐴦𐴟𐴑𐴡𐴌 𐴇𐴥𐴝𐴃 𐴀𐴝𐴏𐴠 , 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴑𐴡𐴖𐴔𐴡𐴌 𐴏𐴝𐴙𐴌𐴒𐴗𐴥𐴝 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 𐴱 𐴎𐴞𐴘𐴝𐴕𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴀𐴞𐴕𐴏𐴝𐴉𐴢 𐴉𐴦𐴡𐴕𐴡𐴃 𐴔𐴡𐴊𐴡𐴊 𐴒𐴡𐴌𐴞𐴁𐴡 𐴱 ( 𐴖𐴞 𐴀𐴡 𐴀𐴝𐴌 ) 𐴌𐴟𐴇𐴝𐴙𐴚𐴒𐴙𐴝𐴌 𐴀𐴝𐴁𐴝𐴎 ( 𐴀𐴠 𐴀𐴝𐴌 𐴀𐴠𐴏𐴢 𐴂𐴞 𐴀𐴠𐴆 ) 𐴀𐴝𐴌𐴑𐴝𐴕 𐴌𐴟𐴇𐴝𐴙𐴚𐴒𐴙𐴝 𐴏𐴟𐴏𐴝𐴙𐴄𐴞 𐴉𐴡𐴌 𐴂𐴦𐴞𐴏𐴢 𐴀𐴠𐴣𐴋 𐴇𐴙𐴟𐴔𐴥𐴠𐴕 𐴌𐴥𐴝𐴙𐴄 ( 𐴀𐴝𐴌 𐴖𐴝𐴘 𐴀𐴠𐴓 𐴀𐴠 ) 𐴌𐴟𐴇𐴝𐴙𐴚𐴒𐴙𐴝 𐴘𐴦𐴟𐴃𐴤 𐴉𐴡𐴌 𐴓𐴞𐴒𐴤𐴠𐴓 𐴀𐴠𐴑𐴆𐴤𐴠𐴕 ( 𐴀𐴝𐴌 𐴋𐴝𐴁𐴓𐴙𐴟 𐴅𐴠 𐴂𐴞 ) 𐴌𐴟𐴇𐴝𐴙𐴚𐴒𐴙𐴝 𐴀𐴡𐴔𐴥𐴠𐴕 𐴉𐴡𐴌 𐴅𐴝𐴏𐴄𐴤𐴞𐴏𐴢 𐴀𐴠𐴣𐴋 𐴂𐴦𐴞𐴏𐴢 𐴱 𐴀𐴠 𐴏𐴝𐴙𐴌𐴀𐴥𐴡 𐴃𐴡𐴕𐴎𐴞𐴔𐴡𐴌 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 𐴒𐴡𐴃𐴡 𐴁𐴞𐴐𐴤𐴞𐴃 𐴁𐴝𐴌𐴠 𐴱𐴱

𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴁𐴝𐴁𐴡𐴃𐴠 𐴉𐴠𐴙𐴏𐴁𐴦𐴟𐴑𐴡𐴌 𐴋𐴝𐴙𐴌𐴠𐴑𐴄𐴝𐴌 / 𐴔𐴞𐴌𐴝𐴕𐴋𐴝 𐴏𐴞𐴏𐴡𐴕 𐴀𐴝𐴌 𐴀𐴥𐴞𐴁𐴝𐴌 𐴈𐴝𐴔𐴐𐴤𐴡𐴌𐴞𐴑 / 𐴀𐴝𐴓𐴠𐴑𐴏𐴢 𐴖𐴝𐴌𐴝𐴀𐴡𐴉𐴑𐴝 , 𐴓𐴡𐴘 𐴄𐴠𐴓𐴞𐴉𐴟𐴕𐴠 𐴈𐴡𐴃𐴤𐴝 𐴈𐴡𐴘𐴧𐴠 𐴱 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴀𐴝𐴣𐴀𐴌𐴝𐴌𐴠 𐴎𐴟𐴓𐴟𐴔𐴡𐴌 𐴖𐴡𐴌𐴠 𐴎𐴟𐴓𐴟𐴔 𐴒𐴡𐴌𐴞 𐴒𐴡𐴌𐴞 𐴱 𐴕𐴞𐴎𐴡𐴌 𐴊𐴠𐴙𐴐𐴢 𐴏𐴥𐴝𐴌𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴘𐴧𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱 𐴎𐴞𐴘𐴝𐴕𐴡𐴃 𐴉𐴠𐴙𐴏𐴁𐴦𐴟𐴑𐴠 𐴘𐴥𐴡 𐴌𐴦𐴟𐴓 𐴑𐴤𐴠𐴓𐴝𐴘𐴧𐴠 𐴱 𐴀𐴠𐴈𐴥𐴡𐴕 𐴀𐴝𐴣𐴀𐴌𐴝 𐴀𐴞𐴕𐴏𐴝𐴉𐴢 𐴉𐴝𐴘𐴁𐴡𐴌𐴓𐴝 𐴔𐴡𐴊𐴡𐴊 𐴒𐴡𐴌𐴡𐴕 𐴀𐴝𐴌 𐴀𐴝𐴣𐴀𐴌𐴝𐴌 𐴎𐴞𐴕𐴊𐴞𐴒𐴞𐴌𐴠 𐴑𐴠𐴀𐴠𐴔𐴡𐴃 𐴁𐴤𐴝𐴓𐴝 𐴁𐴝𐴕𐴡𐴕 𐴉𐴠𐴙𐴏𐴁𐴦𐴟𐴑𐴡𐴌 𐴎𐴞𐴔𐴧𐴝𐴊𐴝𐴌𐴞 𐴱 𐴁𐴡𐴓𐴞 𐴏𐴝𐴙𐴌𐴀𐴥𐴡 𐴃𐴡𐴕𐴎𐴞𐴔𐴡𐴌 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 𐴄𐴠𐴓𐴞𐴉𐴟𐴕𐴡𐴃 𐴀𐴥𐴡 𐴈𐴡𐴘𐴧𐴠 𐴀𐴝𐴌 𐴁𐴠𐴙𐴒𐴧𐴟𐴕𐴠 𐴏𐴥𐴝𐴙𐴕𐴒𐴡𐴌𐴞 𐴀𐴠𐴏𐴄𐴠𐴙𐴄𐴔𐴥𐴠𐴕 𐴀𐴥𐴡 𐴕𐴠𐴓𐴝𐴘𐴧𐴠 𐴱 𐴄𐴠𐴓𐴞𐴉𐴟𐴕𐴠 𐴈𐴡𐴃𐴤𐴝 𐴈𐴡𐴘𐴧𐴠𐴊𐴠 𐴀𐴝𐴌 𐴉𐴠𐴙𐴏𐴁𐴦𐴟𐴑 𐴀𐴡𐴌𐴒𐴝𐴕𐴞𐴎𐴠𐴆𐴤𐴠𐴕𐴡𐴌 𐴂𐴠𐴙𐴅𐴡𐴃 𐴀𐴠𐴏𐴄𐴠𐴀𐴄𐴔𐴠𐴕 𐴉𐴦𐴡𐴣𐴏𐴝𐴘 𐴊𐴞𐴘𐴠𐴊𐴠 𐴀𐴥𐴞𐴕𐴡𐴌𐴠 ( 𐴀𐴠 𐴀𐴝𐴌 𐴀𐴠𐴏𐴢 𐴂𐴞 𐴀𐴠𐴆 ) 𐴃𐴡𐴕𐴎𐴞𐴔𐴡𐴌 𐴀𐴡𐴉𐴞𐴆𐴥𐴠𐴓 𐴎𐴞𐴔𐴧𐴝𐴊𐴝𐴌 / 𐴔𐴟𐴇𐴝𐴔𐴧𐴡𐴊 𐴔𐴡𐴃𐴞𐴕𐴠 , 𐴈𐴥𐴝𐴄𐴞 𐴒𐴡𐴌𐴞 𐴀𐴥𐴡𐴘 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴌 𐴅𐴝𐴕𐴑𐴝𐴌𐴞 𐴁𐴠𐴙𐴒𐴧𐴞𐴕 𐴊𐴠𐴐𐴁𐴞𐴊𐴠𐴐𐴢 𐴀𐴞𐴕𐴏𐴝𐴉𐴢 𐴔𐴠𐴑𐴝𐴕𐴞𐴎𐴠𐴔 𐴓𐴡𐴘 𐴆𐴤𐴙𐴠𐴌 𐴒𐴤𐴡𐴙𐴃𐴧𐴡 𐴘𐴥𐴡 𐴈𐴡𐴘𐴧𐴞 𐴁𐴡𐴓𐴞 𐴀𐴠𐴏𐴄𐴠𐴀𐴄𐴔𐴠𐴕𐴡𐴃 𐴓𐴠𐴙𐴑𐴧𐴙𐴠 𐴱 𐴑𐴠𐴙𐴏𐴡𐴃 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴅𐴝𐴕𐴑𐴝𐴌𐴞𐴌 𐴉𐴡𐴌𐴔𐴝𐴕 𐴊𐴞𐴉𐴝𐴌𐴡𐴉𐴝𐴀𐴕 𐴀𐴝𐴌 ( 𐴀𐴝𐴘 𐴏𐴞 𐴅𐴠 ) ( 𐴀𐴝𐴘 𐴏𐴞 𐴏𐴞 ) 𐴀𐴝𐴌 ( 𐴀𐴝𐴌𐴅𐴠𐴕𐴄𐴞𐴕𐴝𐴌 ) 𐴑𐴦𐴟𐴍𐴡𐴃 𐴔𐴝𐴎𐴤𐴠 𐴘𐴥𐴡 𐴉𐴡𐴌𐴔𐴝𐴕 𐴊𐴞𐴉𐴝𐴌𐴡𐴉𐴝𐴀𐴕 𐴉𐴠𐴙𐴏𐴁𐴦𐴟𐴑𐴠 𐴱 𐴁𐴡𐴌𐴔𐴥𐴝𐴌 𐴀𐴝𐴎𐴝𐴊 𐴃𐴡𐴊𐴝𐴌𐴟𐴑𐴞 𐴔𐴠𐴑𐴝𐴕𐴞𐴎𐴠𐴔𐴡𐴌 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔𐴒𐴡𐴌𐴠𐴌 𐴁𐴡𐴓𐴞 / 𐴏𐴞𐴏𐴡𐴕𐴠 𐴀𐴝𐴣𐴀𐴌𐴝𐴌𐴠 𐴈𐴡𐴘𐴧𐴠 𐴁𐴡𐴓𐴞 𐴃𐴡𐴕𐴎𐴞𐴔𐴡𐴌 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 , 𐴑𐴠𐴀𐴠𐴔𐴡𐴌 𐴈𐴝𐴔 𐴉𐴟𐴌𐴝 𐴒𐴡𐴌𐴞𐴁𐴡𐴌𐴓𐴝 𐴀𐴝𐴌 𐴅𐴟𐴖𐴝𐴕 𐴀𐴝𐴌 𐴁𐴟𐴌𐴥𐴝 𐴀𐴥𐴡𐴑𐴧𐴡𐴓𐴡𐴌𐴠 𐴃𐴝𐴀𐴓𐴞𐴔 𐴀𐴝𐴌 𐴐𐴤𐴞𐴑𐴧𐴝 𐴊𐴞𐴁𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴞𐴁𐴡𐴌𐴓𐴝 𐴱 𐴁𐴝𐴚𐴓𐴝𐴊𐴠𐴐𐴤𐴡𐴌𐴠 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴔𐴡𐴊𐴡𐴊 𐴒𐴡𐴌𐴞𐴁𐴡𐴌𐴓𐴝 𐴘𐴥𐴡 𐴈𐴡𐴘𐴧𐴠 𐴱 𐴁𐴡𐴌𐴔𐴥𐴝𐴌 𐴕𐴝𐴉𐴡𐴌𐴡𐴃𐴞 𐴃𐴡𐴑𐴌𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴟𐴑𐴝𐴁𐴠𐴓𐴝𐴃 𐴈𐴥𐴝𐴏𐴢 𐴒𐴡𐴌𐴞 𐴁𐴤𐴟𐴍𐴡𐴌 𐴀𐴡𐴑𐴃𐴡𐴃 𐴉𐴠𐴙𐴏𐴁𐴦𐴟𐴑 𐴑𐴟𐴔𐴂𐴝𐴕𐴞𐴘𐴠 𐴁𐴠𐴐𐴤𐴞 𐴈𐴝𐴔𐴒𐴡𐴌𐴠𐴌 𐴁𐴡𐴓𐴞 / 𐴏𐴞𐴏𐴡𐴕𐴠 𐴈𐴡𐴘𐴧𐴠 𐴱𐴱

Sources : https://www.dhakatribune.com/bangladesh/rohingya-crisis/2020/08/23/facebook-had-role-in-violence-in-myanmar-forcing-rohingyas-to-flee