𐴀𐴝𐴙𐴑𐴧𐴙𐴝𐴁𐴡𐴌 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔𐴡𐴃 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 ( 𐴕𐴝𐴙𐴚𐴠𐴕 𐴏𐴥𐴝 ) 𐴑𐴝𐴀𐴋 𐴉𐴝𐴘𐴁𐴝𐴌 𐴀𐴝𐴐𐴤𐴝 𐴒𐴡𐴌𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴡𐴌 𐴀𐴥𐴟𐴚 𐴋𐴤𐴡 𐴅𐴤𐴞 𐴔𐴟𐴏𐴡𐴓𐴔𐴝𐴕 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴱 𐴅𐴝𐴕𐴖𐴝𐴌𐴞 𐴔𐴥𐴝𐴐𐴡𐴌 𐴷 𐴃𐴝𐴌𐴞𐴑𐴡𐴃 𐴀𐴠𐴔𐴞𐴒𐴞𐴌𐴞𐴆𐴤𐴠𐴕 𐴎𐴝𐴘𐴧𐴡𐴌𐴠 𐴕𐴝𐴙𐴚𐴠𐴕 𐴏𐴥𐴝 𐴑𐴝𐴀𐴋 𐴊𐴞𐴁𐴡 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴀𐴝𐴙𐴅𐴧𐴙𐴝 𐴷 𐴔𐴥𐴝𐴐𐴢 𐴉𐴥𐴟𐴌𐴝𐴘 𐴒𐴞𐴘𐴡𐴘 𐴱 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴠 𐴈𐴡𐴘𐴧𐴠 𐴱 𐴃𐴞𐴕 𐴈𐴥𐴡𐴙𐴑𐴧𐴙𐴝 𐴉𐴡𐴄𐴤𐴟 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴀𐴞𐴔𐴞𐴒𐴞𐴌𐴞𐴆𐴤𐴠𐴕𐴠 𐴕𐴝𐴙𐴚𐴠𐴕 𐴏𐴥𐴝 𐴁𐴡𐴕𐴞𐴁𐴡𐴌𐴓𐴝 𐴊𐴡𐴌𐴈𐴝𐴏𐴢 𐴊𐴞𐴃𐴡 𐴈𐴡𐴘𐴧𐴠 𐴘𐴝𐴌 𐴁𐴠𐴙𐴒𐴧𐴟𐴕𐴠 𐴊𐴡𐴌𐴈𐴝𐴏𐴢 𐴃𐴟𐴓𐴥𐴞𐴊𐴞 𐴁𐴝𐴊𐴠 𐴘𐴥𐴡 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴱 𐴑𐴙𐴡𐴑𐴂𐴟𐴌𐴌𐴃𐴟 𐴀𐴥𐴟𐴚 𐴋𐴤𐴡 𐴅𐴤𐴞 𐴔𐴟𐴏𐴡𐴓𐴔𐴝𐴕 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴙𐴐𐴧𐴠𐴊𐴠 / 𐴀𐴥𐴟𐴀 𐴁𐴤𐴝 𐴏𐴞𐴚𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴠 𐴈𐴡𐴘𐴧𐴠 𐴱 𐴀𐴝𐴘𐴧𐴠𐴌𐴊𐴠 𐴁𐴤𐴟𐴍𐴡𐴃 , 𐴃𐴞𐴕𐴈𐴥𐴡𐴙𐴑𐴧𐴙𐴝 𐴉𐴡𐴄𐴤𐴟 𐴀𐴡𐴓𐴝 𐴁𐴤𐴟𐴄 𐴊𐴞𐴉𐴝𐴌𐴠 𐴉𐴝𐴕 𐴕𐴝𐴙𐴚𐴠𐴕 𐴏𐴥𐴝 𐴑𐴝𐴀𐴋 𐴅𐴡𐴓𐴊𐴞 𐴉𐴦𐴡𐴕 𐴎𐴡𐴌𐴟𐴌𐴞 𐴀𐴡𐴘𐴧𐴠𐴁𐴡𐴓𐴞 / 𐴀𐴥𐴟𐴀 𐴁𐴤𐴝 𐴏𐴞𐴚𐴠 𐴈𐴡𐴘𐴧𐴠 𐴱𐴱

𐴘𐴝𐴌𐴃𐴟 𐴷 𐴔𐴥𐴝𐴐𐴢 𐴀𐴝𐴒𐴠 𐴅𐴝𐴕𐴖𐴝𐴌𐴞 𐴔𐴥𐴝𐴐𐴡𐴃 𐴀𐴠𐴔𐴞𐴒𐴞𐴌𐴞𐴆𐴤𐴠𐴕𐴠 𐴀𐴝𐴣𐴀𐴌𐴝𐴌 𐴊𐴝𐴊𐴝 𐴉𐴡𐴊𐴧𐴝𐴊𐴝𐴌 𐴅𐴝𐴕𐴑𐴝𐴌𐴞 𐴓𐴡𐴘 𐴃𐴡𐴊𐴝𐴌𐴟𐴑 𐴒𐴡𐴙𐴅𐴧𐴙𐴝 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴌𐴝 𐴈𐴥𐴝𐴌𐴝 𐴑𐴝𐴀𐴋 𐴉𐴝𐴘𐴃𐴡 𐴏𐴦𐴝𐴙𐴌𐴊𐴠 𐴁𐴡𐴓𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 / 𐴀𐴥𐴟𐴀 𐴖𐴠 𐴓𐴥𐴝 𐴀𐴡𐴚𐴠 𐴈𐴡𐴘𐴧𐴠 𐴱 𐴀𐴠𐴔𐴞𐴒𐴞𐴌𐴞𐴆𐴤𐴠𐴕 , 𐴀𐴥𐴟𐴚 𐴋𐴤𐴡 𐴅𐴤𐴞 𐴑𐴠𐴀𐴠𐴔𐴡𐴃 𐴀𐴝𐴐𐴧𐴞𐴀𐴓 𐴊𐴠 𐴀𐴡𐴑𐴃𐴡𐴃 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴃𐴟 𐴀𐴝𐴌 𐴁𐴦𐴝𐴌𐴃𐴟 𐴔𐴞𐴓𐴝𐴘 𐴊𐴡𐴐𐴢 𐴀𐴥𐴝𐴎𐴝𐴌 𐴔𐴝𐴙𐴕𐴐𐴠 𐴕𐴝𐴙𐴚𐴠𐴕 𐴏𐴥𐴝 𐴁𐴡𐴕𐴞𐴁𐴡𐴌𐴓𐴝 𐴊𐴡𐴌𐴈𐴝𐴏𐴢 𐴊𐴠𐴘𐴠 , 𐴁𐴠𐴙𐴒𐴧𐴟𐴕 𐴃𐴞𐴕 𐴈𐴥𐴡𐴙𐴑𐴧𐴙𐴝 𐴉𐴡𐴄𐴤𐴟 𐴀𐴡𐴓𐴝 𐴱 𐴕𐴝𐴙𐴚𐴠𐴕 𐴏𐴥𐴝 𐴁𐴡𐴕𐴞𐴁𐴡𐴌𐴓𐴝 𐴊𐴡𐴌𐴈𐴝𐴏𐴢 𐴊𐴞𐴘𐴠𐴊𐴠 𐴀𐴥𐴞𐴃𐴝𐴌𐴝𐴌 𐴔𐴝𐴀𐴔𐴠𐴓𐴝 𐴌𐴠 𐴃𐴡𐴑𐴧𐴝 𐴃𐴡𐴑𐴧𐴝 𐴃𐴡𐴊𐴝𐴌𐴟𐴑 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴠 𐴀𐴥𐴠𐴃𐴡𐴓𐴧𐴝 𐴑𐴝𐴀𐴋 𐴕𐴠𐴓𐴝𐴘 𐴊𐴞𐴃𐴠 𐴊𐴠𐴌𐴞 𐴀𐴥𐴡𐴌𐴊𐴠 𐴁𐴡𐴓𐴞 𐴀𐴝𐴌𐴑𐴝𐴕𐴡𐴌 𐴀𐴠𐴔𐴞𐴒𐴞𐴌𐴞𐴆𐴤𐴠𐴕𐴡𐴌 𐴁𐴡𐴌𐴡 / 𐴀𐴥𐴟𐴀 𐴏𐴥𐴟𐴀 𐴓𐴗𐴝𐴚𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴠 𐴈𐴡𐴘𐴧𐴠 𐴱𐴱

𐴊𐴡𐴌𐴈𐴝𐴏𐴢 𐴊𐴞𐴀𐴓𐴊𐴠 𐴀𐴥𐴞𐴕𐴡𐴌 𐴁𐴤𐴟𐴃𐴡𐴌𐴃𐴟 𐴈𐴡𐴊𐴞𐴀𐴕 𐴑𐴝𐴀𐴋 𐴕𐴠𐴓𐴝𐴘 𐴊𐴞𐴘𐴝 𐴒𐴞𐴘𐴠 𐴀𐴝𐴌 𐴈𐴡𐴊𐴞𐴀𐴕 𐴊𐴞𐴘𐴝 𐴕𐴥𐴡𐴀𐴎𐴝 𐴈𐴥𐴝𐴄𐴞 𐴁𐴤𐴝𐴉𐴠 𐴕𐴡𐴎𐴝𐴕𐴥𐴞𐴊𐴠 𐴀𐴥𐴠𐴃𐴡𐴓𐴧𐴝 𐴌𐴞𐴉𐴟𐴎𐴞 𐴀𐴥𐴑𐴧𐴡𐴓𐴠 𐴁𐴤𐴟𐴍𐴡𐴌 𐴀𐴝𐴒𐴠 𐴑𐴝𐴀𐴋 𐴈𐴥𐴝𐴔𐴝𐴈𐴥𐴝 𐴉𐴝𐴘𐴁𐴡 𐴁𐴡𐴓𐴞 𐴈𐴦𐴡𐴘 𐴕𐴡 𐴉𐴝𐴅𐴧𐴙𐴟𐴔 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴀𐴠𐴔𐴞𐴒𐴞𐴌𐴞𐴆𐴥𐴠𐴕𐴡𐴌 𐴔𐴡𐴇𐴝 𐴀𐴡𐴉𐴞𐴏𐴡𐴃 𐴔𐴟𐴌𐴈𐴝𐴘 𐴃𐴡𐴊𐴝𐴌𐴟𐴑 𐴒𐴡𐴌𐴥𐴝 𐴉𐴡𐴌𐴠𐴌𐴊𐴠 𐴀𐴥𐴠𐴃𐴡𐴓𐴧𐴝 𐴑𐴝𐴀𐴋 𐴕𐴠𐴓𐴝𐴘 𐴊𐴞𐴃𐴠 𐴊𐴠𐴌𐴞 𐴀𐴥𐴡𐴌 𐴁𐴡𐴓𐴞 𐴱 𐴀𐴝𐴌𐴑𐴝𐴕𐴡𐴌 𐴀𐴠𐴔 𐴂𐴞 𐴀𐴠𐴑𐴎𐴡𐴕 / 𐴀𐴥𐴟𐴀 𐴑𐴞𐴚 𐴔𐴡𐴚 𐴓𐴥𐴠 𐴘𐴠 𐴈𐴡𐴘𐴧𐴠 𐴱 𐴃𐴞𐴕 𐴈𐴡𐴙𐴑𐴧𐴙𐴝 𐴑𐴝𐴀𐴋 𐴁𐴤𐴝𐴓𐴝 𐴒𐴡𐴌𐴞 𐴃𐴡𐴊𐴝𐴌𐴟𐴑 𐴒𐴡𐴌𐴞 𐴁𐴝𐴊𐴠 𐴊𐴞𐴘𐴠𐴊𐴠 𐴀𐴥𐴠𐴃𐴡𐴓𐴧𐴝 𐴀𐴥𐴞𐴃𐴝𐴌𐴝 𐴕𐴝𐴙𐴚𐴠𐴕 𐴏𐴥𐴝 𐴑𐴝𐴀𐴋 𐴉𐴝𐴘𐴁𐴡 𐴱 𐴀𐴥𐴠𐴕𐴋𐴞𐴓𐴧𐴝 𐴔𐴝𐴕𐴟𐴙𐴐𐴢 𐴈𐴡𐴔 𐴀𐴥𐴡𐴓𐴠 𐴘𐴦𐴡 𐴱 𐴀𐴠𐴔𐴞𐴒𐴞𐴌𐴞𐴆𐴥𐴠𐴕𐴠 𐴵 𐴴 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴃𐴟𐴣𐴖𐴝𐴣𐴌𐴝 𐴑𐴝𐴀𐴋 𐴉𐴝𐴘𐴁𐴝 𐴈𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴀𐴝𐴐𐴤𐴝 𐴒𐴡𐴌𐴠𐴌𐴊𐴠 𐴱 𐴃𐴞𐴕 𐴈𐴡𐴙𐴑𐴧𐴙𐴝 𐴉𐴡𐴄𐴤𐴟 𐴀𐴡𐴓𐴝 𐴀𐴥𐴡𐴑𐴧𐴡𐴓𐴠 𐴰 𐴹 𐴹 𐴱 , 𐴰 𐴱 𐴰 𐴲 𐴐𐴤𐴡𐴕𐴡𐴃 𐴁𐴤𐴟𐴄 𐴊𐴞𐴉𐴝𐴅𐴧𐴞𐴀𐴓 , 𐴵 𐴱 𐴰 𐴲 𐴐𐴤𐴡𐴕𐴡𐴃 𐴁𐴤𐴟𐴄 𐴊𐴞𐴃𐴡 𐴕𐴥𐴡𐴀𐴊𐴠 𐴱𐴱

Sources : https://www.rfa.org/burmese/program_2/sittwe-muslim-nrc-card-08132020060700.html