𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴉𐴟𐴓𐴞𐴆𐴠 𐴒𐴟𐴓𐴞 𐴔𐴝𐴙𐴅𐴧𐴙𐴠 𐴊𐴠 𐴈𐴡𐴘𐴧𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴡𐴃 𐴒𐴡𐴃𐴡 𐴈𐴝𐴙𐴓𐴧𐴝 𐴌𐴝𐴃𐴞𐴘𐴝 𐴓𐴡𐴒𐴁𐴤𐴡𐴒𐴢 𐴰 𐴱 𐴁𐴝𐴎𐴠 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴱 𐴏𐴝𐴙𐴑𐴧𐴝 𐴓𐴡𐴘 𐴀𐴝𐴘𐴧𐴠𐴌𐴊𐴠 𐴀𐴥𐴠𐴍𐴠 𐴋𐴤𐴗𐴥𐴝𐴚 𐴔𐴡𐴌𐴡𐴚 ( 𐴊𐴤𐴗𐴝 𐴔𐴡𐴌𐴡𐴚 ) 𐴉𐴝𐴌𐴝𐴌𐴃𐴟 𐴁𐴠𐴐𐴤𐴞 𐴊𐴟𐴌𐴥𐴠 𐴕𐴡𐴀𐴊𐴠 𐴏𐴠𐴑 𐴂𐴥𐴟𐴀𐴏𐴄𐴡𐴃 𐴉𐴟𐴓𐴞𐴆𐴠 𐴒𐴟𐴓𐴞 𐴔𐴝𐴠𐴅𐴧𐴙𐴠 𐴱 𐴏𐴝𐴑𐴧𐴞 𐴉𐴝𐴌𐴝𐴃 𐴃𐴤𐴝𐴑𐴠𐴊𐴠 / 𐴑𐴟 𐴓𐴟𐴓𐴥𐴝𐴘𐴧𐴝 𐴁𐴡𐴐𐴢 𐴰 𐴳 𐴁𐴡𐴏𐴡𐴌 𐴒𐴟𐴓𐴞 𐴏𐴥𐴞𐴕𐴝𐴃 𐴉𐴡𐴌𐴞 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴡𐴘 𐴱 𐴀𐴝𐴌 𐴌𐴝𐴁𐴝 𐴒𐴤𐴗𐴥𐴝𐴚 𐴌𐴞𐴉𐴘𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 / 𐴑𐴟 𐴀𐴝𐴁𐴟 𐴏𐴞𐴊𐴧𐴞𐴑 𐴁𐴡𐴐𐴢 𐴲 𐴳 𐴁𐴡𐴏𐴡𐴌 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴀𐴥 𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞 𐴎𐴡𐴕 𐴏𐴝𐴔𐴃𐴡𐴓𐴞𐴌𐴃𐴟 𐴁𐴠𐴌𐴝𐴘𐴃𐴡 𐴀𐴝𐴐𐴧𐴞𐴀𐴓 𐴊𐴠 𐴉𐴥𐴟𐴣𐴖𐴝𐴣𐴙𐴅𐴧𐴙𐴝 𐴌𐴠 𐴏𐴝𐴔𐴃𐴡𐴓𐴞 𐴁𐴝𐴌𐴥𐴝𐴘𐴊𐴞 𐴖𐴝𐴉𐴠𐴏𐴢 𐴕𐴞𐴎𐴠 𐴃𐴤𐴝𐴑𐴠𐴊𐴠 𐴋𐴠𐴁𐴝𐴙𐴚 𐴀𐴝𐴌 𐴏𐴝𐴑𐴧𐴞𐴉𐴝𐴌𐴝𐴃 𐴀𐴝𐴘𐴧𐴠𐴌𐴊𐴠 𐴱 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞𐴎𐴡𐴕 𐴀𐴝𐴉𐴡𐴏𐴡𐴃 𐴈𐴡𐴙𐴅𐴧𐴙𐴝 𐴊𐴞 𐴔𐴝𐴌𐴝𐴔𐴝𐴌𐴞𐴃 𐴔𐴡𐴙𐴅𐴧𐴙𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴁𐴡𐴓𐴞 𐴱 𐴋𐴞𐴆𐴄𐴤𐴞𐴑 𐴇𐴠𐴉𐴝𐴎𐴡𐴃𐴞 𐴀𐴝𐴌 𐴁𐴡𐴖𐴋𐴝𐴌 𐴔𐴝𐴀𐴔𐴠𐴓𐴝𐴌 𐴀𐴟𐴎𐴞𐴌 / 𐴁𐴟𐴔𐴥𐴟𐴅𐴤𐴞 𐴔𐴥𐴝𐴚 𐴏𐴥𐴠𐴣 𐴀𐴝𐴌 𐴋𐴞𐴆𐴄𐴤𐴞𐴑 𐴉𐴟𐴓𐴞𐴆𐴡𐴌 𐴊𐴟𐴘𐴀𐴡𐴔 𐴁𐴡𐴌𐴡 / 𐴔𐴡𐴚 𐴔𐴡𐴚 𐴏𐴥𐴟𐴀 𐴊𐴟𐴕𐴥𐴞 𐴎𐴡𐴕𐴠 ( 𐴊𐴤𐴡𐴓𐴝 𐴔𐴞𐴏𐴥𐴝 𐴈𐴡𐴃𐴤𐴝 ) 𐴈𐴡𐴘𐴧 𐴱𐴱

𐴃𐴝𐴌𐴥𐴝𐴌 𐴉𐴡𐴣𐴃𐴡𐴃 𐴉𐴡𐴙𐴅𐴧𐴙𐴠𐴊𐴠 𐴀𐴠𐴑𐴀𐴡𐴔 , 𐴔𐴥𐴝𐴚 𐴒𐴠𐴣 𐴏𐴠𐴑 𐴂𐴥𐴟𐴀𐴏𐴄 𐴉𐴥𐴝𐴍𐴞 𐴀𐴝𐴘𐴁𐴝𐴌 𐴐𐴤𐴡𐴣𐴀𐴃 𐴱 𐴉𐴟𐴓𐴞𐴆𐴠 𐴏𐴝𐴙𐴑𐴧𐴝 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘𐴃𐴡 𐴈𐴡𐴘 𐴁𐴝𐴊𐴠 𐴘𐴥𐴡 𐴕𐴡 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘 𐴊𐴤𐴝𐴘 𐴀𐴝𐴘 𐴒𐴞𐴘𐴥𐴡𐴘 𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴋𐴤𐴗𐴥𐴝𐴚 𐴔𐴡𐴌𐴡𐴚 𐴉𐴝𐴌𐴝𐴌 𐴈𐴝𐴣𐴏𐴠 𐴀𐴝𐴏𐴠𐴊𐴠 𐴊𐴟𐴘𐴀𐴡𐴔 𐴏𐴠𐴑𐴂𐴥𐴟𐴀𐴏𐴄𐴡𐴌 𐴉𐴟𐴓𐴞𐴆𐴠 𐴒𐴟𐴓𐴞 𐴔𐴝𐴙𐴅𐴧𐴙𐴠𐴊𐴠 𐴁𐴡𐴓𐴞 𐴊𐴠𐴐𐴥𐴡𐴙𐴃𐴧𐴝 ( 𐴔𐴡𐴒𐴢 ) 𐴀𐴠𐴑 𐴎𐴡𐴕𐴠 𐴁𐴝𐴕𐴝𐴘𐴧𐴡𐴌𐴠 𐴊𐴤𐴡𐴓𐴝 𐴔𐴞𐴏𐴥𐴝 𐴈𐴡𐴃𐴤𐴝 𐴈𐴡𐴘𐴧𐴠𐴊𐴠 𐴐𐴤𐴝𐴀𐴂𐴢 𐴊𐴟𐴕𐴥𐴞 𐴎𐴡𐴕𐴡𐴌 𐴃𐴝𐴙𐴊 𐴀𐴥𐴡𐴘𐴁𐴡𐴌𐴓𐴝 𐴈𐴡𐴘𐴧𐴠 𐴱 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴝𐴁𐴟 𐴏𐴞𐴊𐴧𐴞𐴑𐴡𐴌𐴠 𐴀𐴠𐴔𐴝𐴌𐴅𐴤𐴠𐴕𐴏𐴞 𐴃𐴡𐴖𐴌𐴠 𐴀𐴝𐴙𐴑𐴧𐴙𐴝𐴁𐴡𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

𐴇𐴥𐴡𐴑𐴟𐴔𐴡𐴃𐴞 𐴉𐴟𐴓𐴞𐴆𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴀𐴌𐴊𐴠 𐴀𐴥𐴞𐴀𐴕 𐴓𐴡𐴘 , 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴀𐴌𐴊𐴠 𐴀𐴥𐴞𐴀𐴕 𐴓𐴡𐴘 𐴕𐴡 𐴁𐴡𐴕𐴠𐴌𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴟𐴏𐴡𐴓𐴔𐴝𐴕𐴡𐴌 𐴐𐴤𐴡𐴔𐴝𐴎𐴞 𐴔𐴟𐴌𐴡𐴁𐴧𐴞 𐴀𐴝𐴌 𐴊𐴤𐴡𐴌𐴔𐴞𐴘𐴡 𐴔𐴟𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴡𐴌𐴃𐴟 ( 𐴀𐴝𐴌 𐴀𐴠𐴉𐴢 𐴀𐴠 ) 𐴘𐴠 𐴇𐴥𐴝𐴑𐴞𐴑𐴡𐴃 𐴎𐴝𐴕𐴞𐴁𐴡𐴌𐴓𐴝 𐴉𐴟𐴏𐴥𐴝𐴌 𐴒𐴡𐴙𐴅𐴧𐴙𐴠𐴊𐴠 𐴅𐴟𐴖𐴝𐴁𐴡𐴃 𐴱 𐴉𐴟𐴓𐴞𐴆𐴠 𐴒𐴟𐴓𐴞 𐴔𐴝𐴙𐴅𐴧𐴙𐴠𐴊𐴠 𐴘𐴥𐴝𐴕 𐴁𐴥𐴠 𐴀𐴝𐴣𐴀𐴌𐴝 𐴎𐴝𐴕𐴞𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴝𐴔𐴒𐴡𐴌𐴠𐴊𐴠 ( 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄 ) 𐴃𐴡𐴕𐴎𐴞𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 , 𐴔𐴝𐴀𐴔𐴠𐴓𐴝 𐴘𐴝𐴕𐴡𐴌𐴠 𐴃𐴡𐴊𐴝𐴌𐴟𐴑 𐴒𐴡𐴌𐴦𐴡𐴕 𐴎𐴡𐴌𐴟𐴌𐴞 𐴱 𐴔𐴡𐴕𐴃𐴡𐴌 𐴁𐴡𐴌𐴔𐴥𐴝𐴌 𐴀𐴠𐴈𐴥𐴡𐴕𐴡𐴌 𐴇𐴝𐴓𐴡𐴃 𐴔𐴡𐴎𐴞𐴕 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴉𐴟𐴓𐴞𐴆𐴡𐴌 𐴔𐴝𐴀𐴔𐴠𐴓𐴝 𐴊𐴠 𐴀𐴥𐴠𐴃𐴡𐴓𐴧𐴝 𐴏𐴥𐴡𐴀𐴞𐴒𐴤𐴝𐴕 𐴕𐴠𐴓𐴞 𐴀𐴝𐴘𐴁𐴡𐴊𐴠 𐴕𐴡𐴊𐴠𐴑𐴤𐴠𐴌 𐴁𐴡𐴓𐴞 𐴈𐴡𐴘𐴧𐴠 𐴱 𐴔𐴝𐴀𐴔𐴠𐴓𐴝 𐴘𐴝𐴕 𐴏𐴥𐴡𐴀𐴞 𐴂𐴟𐴌𐴟𐴉𐴢 𐴀𐴥𐴡𐴘𐴁𐴡𐴌𐴓𐴝 𐴃𐴡𐴊𐴝𐴌𐴟𐴑 𐴒𐴡𐴌𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴈𐴡𐴀𐴌 𐴱𐴱

Sources : https://www.rfa.org/burmese/news/locals-accuse-police-for-two-rohingya-shooting-08032020100125.html