𐴀𐴠𐴒𐴤𐴡𐴙𐴐𐴀𐴡𐴔 𐴂𐴝𐴚𐴓𐴟𐴚 𐴔𐴞𐴄𐴞𐴚𐴡𐴃 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴁𐴠𐴙𐴒𐴧𐴟𐴕 𐴀𐴟𐴍𐴞𐴁𐴝𐴌 𐴀𐴠𐴅𐴝𐴎𐴡𐴃 𐴉𐴝𐴘𐴁𐴡𐴊𐴠 𐴒𐴠𐴌𐴝𐴕𐴄𐴞 𐴕𐴥𐴝𐴘 𐴱𐴱

𐴀𐴟𐴃𐴧𐴡𐴌𐴡𐴌 𐴀𐴠𐴓𐴥𐴝𐴛𐴏𐴡𐴌 𐴏𐴝𐴙𐴌 𐴉𐴝𐴄𐴞 ( 𐴑𐴠 𐴀𐴝𐴘 𐴀𐴠 , 𐴄𐴞 𐴀𐴠𐴕 𐴀𐴠𐴓 𐴀𐴠 , 𐴀𐴠𐴔 𐴀𐴠𐴕 𐴋𐴞 𐴀𐴠 𐴀𐴠 , 𐴀𐴠 𐴀𐴠 ) 𐴀𐴠 𐴉𐴝𐴄𐴞 𐴀𐴟𐴀𐴕 𐴓𐴡𐴘 𐴇𐴥𐴡𐴑𐴟𐴔𐴡𐴃𐴠 𐴅𐴟𐴕 𐴔𐴥𐴝𐴐𐴡𐴌 𐴐𐴤𐴟𐴌𐴟𐴃 𐴀𐴡𐴕𐴓𐴝𐴙𐴕𐴡𐴃 𐴃𐴝𐴀𐴓𐴧𐴟𐴑 𐴒𐴡𐴌𐴞 𐴐𐴤𐴝𐴕𐴃𐴞𐴌 𐴁𐴝𐴁𐴡𐴃𐴠 𐴔𐴡𐴐𐴟𐴖𐴝𐴌𐴝 𐴒𐴡𐴌𐴞𐴁𐴡𐴌𐴓𐴝 𐴈𐴡𐴘𐴓𐴠 𐴘𐴦𐴡 , 𐴏𐴝𐴙𐴌𐴀𐴥𐴡 𐴉𐴝𐴄𐴞 𐴘𐴠 𐴁𐴤𐴝𐴓𐴝 𐴕𐴡 𐴀𐴥𐴡𐴘𐴁𐴡 𐴈𐴦𐴡𐴘 𐴅𐴟𐴖𐴝𐴁 𐴊𐴞𐴘𐴠 𐴱 𐴀𐴥𐴠𐴃𐴡𐴌𐴓𐴝 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴌𐴉𐴡𐴌𐴃𐴟 , 𐴓𐴝𐴌𐴥𐴝𐴘 𐴃𐴤𐴞𐴘𐴧𐴝 𐴒𐴡𐴌𐴥𐴝𐴘𐴁𐴝𐴌 𐴌𐴝𐴎𐴞𐴕𐴝𐴔𐴝𐴃 𐴏𐴥𐴝𐴙𐴕 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴠𐴐𐴤𐴞 𐴉𐴝𐴄𐴞𐴌𐴠 𐴀𐴠𐴒𐴤𐴡𐴙𐴐𐴀𐴡𐴔 𐴂𐴝𐴚𐴓𐴟𐴚 𐴔𐴞𐴄𐴞𐴚𐴡𐴃 𐴀𐴟𐴍𐴞 𐴁𐴡𐴌𐴓𐴝 𐴤𐴊𐴝𐴖𐴡𐴃𐴞 𐴆𐴞𐴣𐴍𐴞 𐴉𐴦𐴡𐴣𐴏𐴝𐴘𐴧𐴠 𐴱 𐴔𐴡𐴕𐴃𐴡𐴌 𐴑𐴡𐴌𐴟𐴕𐴝 𐴏𐴡𐴓𐴠𐴌𐴊𐴠 𐴀𐴡𐴑𐴃𐴡𐴃 𐴏𐴠𐴇𐴠𐴃𐴡𐴌 𐴋𐴞𐴂𐴝𐴌𐴔𐴠𐴕𐴠 𐴁𐴠𐴁𐴡𐴏𐴃𐴝 𐴒𐴡𐴌𐴞𐴁𐴡𐴊𐴠 𐴀𐴥𐴠𐴀𐴕 𐴔𐴡𐴎𐴞𐴕 𐴈𐴝𐴔𐴒𐴡𐴌𐴥𐴝 𐴉𐴡𐴌𐴞𐴁𐴡 𐴁𐴡𐴓𐴞 / 𐴀𐴥𐴟𐴀 𐴎𐴡𐴄𐴤𐴠 𐴘𐴠 𐴈𐴡𐴘𐴧𐴠 𐴱 𐴘𐴝𐴕 𐴀𐴥𐴡𐴙𐴓𐴊𐴠 , 𐴅𐴟𐴓𐴝𐴙𐴌 𐴵 𐴲 𐴃𐴝𐴌𐴞𐴑𐴡𐴡𐴌𐴃𐴟 𐴓𐴡𐴃𐴞 𐴌𐴠𐴚𐴒𐴟𐴕𐴡𐴃 ( 𐴀𐴠𐴕 𐴀𐴝𐴌 𐴂𐴞 𐴏𐴞𐴃 ) 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴓𐴝𐴌𐴥𐴝𐴘 𐴃𐴤𐴞𐴘𐴧𐴝𐴒𐴡𐴌𐴥𐴝𐴘𐴁𐴝𐴌 𐴌𐴝𐴎𐴞𐴕𐴝𐴔𐴝𐴃 𐴏𐴥𐴝𐴙𐴕 𐴒𐴡𐴙𐴅𐴧𐴙𐴠𐴊𐴠 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴃𐴞𐴕𐴊𐴞𐴕 𐴔𐴡𐴐𐴟𐴖𐴝𐴌𐴝 𐴒𐴡𐴌𐴞 𐴁𐴝𐴊𐴠 𐴅𐴟𐴓𐴝𐴙𐴌 𐴹 𐴲 𐴃𐴝𐴌𐴞𐴑𐴡𐴃 𐴈𐴥𐴡𐴁𐴡𐴌𐴞 𐴕𐴡𐴔𐴝𐴙𐴕𐴊𐴝𐴌 𐴔𐴡𐴅𐴓𐴞𐴏𐴡𐴃 𐴈𐴡𐴘𐴧𐴠𐴊𐴠 𐴈𐴡𐴃𐴤𐴝 𐴱 𐴓𐴝𐴌𐴥𐴝𐴘 𐴁𐴡𐴕 𐴌𐴝𐴎𐴞𐴕𐴝𐴔𐴝𐴃 𐴏𐴥𐴝𐴙𐴕 𐴕𐴥𐴡𐴀 𐴒𐴡𐴌𐴠𐴊𐴠 𐴉𐴝𐴄𐴞 ( 𐴄𐴞 𐴀𐴠𐴕 𐴀𐴠𐴓 𐴀𐴠 , 𐴀𐴠 𐴀𐴠 , 𐴀𐴠𐴔 𐴀𐴠𐴕 𐴋𐴞 𐴀𐴠 𐴀𐴠 ) 𐴀𐴞𐴃𐴝𐴌𐴥𐴝 𐴘𐴥𐴡 , 𐴅𐴟𐴓𐴝𐴙𐴌 𐴱 𐴲 𐴃𐴝𐴌𐴞𐴑𐴡𐴃 𐴀𐴠𐴒𐴤𐴡𐴙𐴐𐴀𐴡𐴔 𐴂𐴝𐴚𐴓𐴟𐴚 𐴔𐴞𐴄𐴞𐴚𐴡𐴃 𐴀𐴟𐴍𐴞𐴁𐴝𐴌 𐴔𐴡𐴕𐴐𐴤𐴝 𐴎𐴦𐴝𐴙𐴌 𐴒𐴡𐴙𐴅𐴧𐴙𐴠 𐴱 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴃𐴟 𐴁𐴠𐴙𐴒𐴧𐴟𐴕𐴌𐴠 𐴕𐴡𐴋𐴝𐴑𐴞 𐴁𐴝𐴏𐴥𐴞 𐴁𐴝𐴏𐴥𐴞 𐴏𐴦𐴝𐴘 𐴏𐴦𐴝𐴘 𐴋𐴝𐴙𐴑𐴧𐴙𐴠𐴊𐴠 𐴱 𐴀𐴥𐴠 𐴔𐴞𐴄𐴞𐴚𐴡𐴃 𐴀𐴝𐴣𐴀𐴌𐴝 𐴕𐴡 𐴀𐴟𐴙𐴄𐴧𐴟𐴔 𐴁𐴡𐴓𐴞 , ( 𐴑𐴠 𐴀𐴝𐴘 𐴀𐴡 ) 𐴉𐴝𐴄𐴞𐴌 𐴈𐴡𐴃𐴤𐴝 𐴈𐴡𐴙𐴕𐴧𐴝 / 𐴁𐴟𐴔𐴥𐴟𐴅𐴤𐴞 𐴕𐴡𐴁𐴟 𐴘𐴠 𐴈𐴡𐴘𐴧𐴠 𐴱𐴱

𐴀𐴝𐴙𐴅𐴀𐴥𐴡 𐴉𐴡𐴙𐴅𐴧𐴡𐴕𐴃𐴡 𐴇𐴥𐴡𐴑𐴟𐴔𐴡𐴃𐴡𐴌 𐴑𐴝𐴕𐴟𐴕𐴞 𐴊𐴝𐴖𐴡𐴃𐴕𐴝𐴔𐴝 𐴕𐴡𐴉𐴝𐴘𐴓𐴠 𐴘𐴥𐴡 , 𐴂𐴝𐴚𐴓𐴟𐴚 𐴔𐴞𐴄𐴞𐴚𐴡𐴃 𐴀𐴟𐴍𐴞𐴁𐴝𐴌 𐴀𐴠𐴅𐴝𐴎𐴡𐴃 𐴕𐴡 𐴉𐴝𐴘𐴓𐴠 𐴘𐴥𐴡 , 𐴇𐴥𐴡𐴑𐴟𐴔𐴡𐴃𐴠 𐴋𐴝𐴑𐴠𐴌 𐴈𐴡𐴘𐴓𐴠 , 𐴔𐴞𐴄𐴞𐴚𐴡𐴃 𐴀𐴟𐴍𐴞 𐴁𐴟𐴎𐴞𐴏𐴦𐴡𐴕 𐴏𐴝𐴀 𐴁𐴡𐴓𐴞 ( 𐴄𐴞 𐴀𐴠𐴕 𐴀𐴠𐴓 𐴀𐴠 ) 𐴉𐴝𐴄𐴞𐴌 𐴈𐴡𐴃𐴤𐴝 𐴈𐴡𐴙𐴕𐴧𐴝 / 𐴁𐴟 𐴔𐴥𐴟 𐴆𐴤𐴙𐴑 𐴃𐴝𐴁𐴤𐴟𐴕 𐴆𐴙𐴡 𐴘𐴠 𐴈𐴡𐴘𐴧𐴠 𐴱 𐴑𐴝𐴕𐴟𐴕𐴞 𐴆𐴞𐴣𐴍𐴞 𐴕𐴡 𐴉𐴝𐴘𐴓𐴠 𐴘𐴥𐴡 , 𐴕𐴡 𐴒𐴡𐴌𐴠𐴌𐴊𐴠 𐴊𐴠𐴌𐴞 𐴀𐴥𐴡𐴌𐴊𐴠 𐴂𐴝𐴚𐴓𐴟𐴚 𐴔𐴞𐴄𐴞𐴚𐴡𐴃 𐴀𐴟𐴍𐴞𐴓𐴠 𐴁𐴤𐴝𐴓𐴝 𐴀𐴥𐴡𐴘𐴁𐴡 𐴁𐴡𐴓𐴞 ( 𐴘𐴟 𐴋𐴝𐴓𐴙𐴟 𐴀𐴠𐴏𐴢 𐴀𐴠 ) 𐴖𐴥𐴝 𐴑𐴡𐴖𐴔𐴡𐴌 𐴉𐴝𐴄𐴞𐴌 𐴎𐴞𐴔𐴧𐴝𐴊𐴝𐴌 / 𐴀𐴥𐴟𐴀 𐴛𐴞 𐴌𐴥𐴠𐴔𐴠 𐴈𐴡𐴘𐴧𐴠 𐴱 𐴓𐴝𐴌𐴥𐴝𐴘 𐴁𐴡𐴕 𐴌𐴝𐴎𐴞𐴕𐴝𐴔𐴝𐴃 𐴏𐴥𐴝𐴙𐴕 𐴕𐴥𐴡𐴀 𐴒𐴡𐴌𐴥𐴠𐴊𐴠 𐴁𐴡𐴖𐴃 𐴉𐴝𐴄𐴞 ( 𐴀𐴠𐴕 𐴀𐴠𐴓 𐴋𐴞 ) 𐴇𐴥𐴡𐴑𐴟𐴔𐴡𐴃𐴞 𐴄𐴝𐴀𐴔𐴡𐴃 𐴃𐴞𐴕 𐴁𐴝𐴌 𐴂𐴝𐴚𐴓𐴟𐴚 𐴔𐴞𐴄𐴞𐴚 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴍𐴠 𐴁𐴟𐴎𐴞 𐴏𐴝𐴘𐴁𐴡𐴌𐴓𐴝 𐴔𐴞𐴄𐴞𐴚𐴡𐴃 𐴇𐴝𐴎𐴞𐴌 𐴀𐴥𐴡𐴘𐴧𐴠𐴊𐴠 𐴀𐴝𐴏𐴠 𐴱 𐴉𐴝𐴄𐴞 𐴁𐴠𐴙𐴒𐴧𐴟𐴕𐴡𐴌𐴠 𐴊𐴝𐴖𐴡𐴃 𐴊𐴞𐴁𐴡𐴌𐴓𐴝 ( 𐴀𐴠𐴕 𐴏𐴞 𐴀𐴠 ) 𐴓𐴝𐴌𐴥𐴝𐴘 𐴁𐴡𐴕 𐴌𐴝𐴎𐴞𐴕𐴝𐴔𐴝𐴃 𐴏𐴥𐴝𐴙𐴕 𐴒𐴡𐴙𐴅𐴧𐴙𐴠𐴊𐴠 𐴔𐴦𐴟𐴕 𐴉𐴝𐴄𐴞 𐴀𐴟𐴒𐴧𐴗𐴝𐴌 𐴁𐴡𐴌𐴡 / 𐴕𐴝𐴙𐴚 𐴀𐴡𐴚 𐴔𐴥𐴝𐴚𐴥𐴠 𐴘𐴠 𐴈𐴡𐴘𐴧𐴠 𐴱𐴱

Sources : https://www.rfa.org/burmese/news/armed-group-will-not-sure-to-attend-21panglong-07312020055143.html

𐴀𐴞𐴊 𐴔𐴟𐴁𐴝𐴌𐴡𐴑

𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕 𐴑𐴡𐴔𐴞𐴄𐴞 𐴀𐴝𐴌 𐴀𐴝𐴌𐴖𐴞𐴆𐴠𐴕 𐴄𐴞𐴀𐴔𐴡𐴌 𐴃𐴡𐴌𐴉𐴡𐴌𐴃𐴟 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴝𐴌 𐴁𐴦𐴝𐴌𐴠 𐴎𐴠𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴘 𐴁𐴤𐴡𐴙𐴕 𐴀𐴝𐴏𐴠 𐴱 𐴁𐴠𐴙𐴒𐴧𐴟𐴕𐴡𐴌𐴠 / 𐴲 𐴳 𐴲 𐴱 𐴌𐴟𐴇𐴝𐴙𐴚𐴒𐴙 / 𐴰 𐴲 𐴰 𐴲 𐴀𐴞𐴚𐴌𐴝𐴎𐴞 / 𐴱 𐴴 𐴴 𐴱 𐴇𐴞𐴅𐴞𐴌𐴞 𐴐𐴤𐴡𐴕𐴡𐴌 𐴑𐴟𐴌𐴁𐴝𐴕𐴡𐴌 𐴀𐴞𐴊𐴡𐴌 𐴏𐴡𐴓𐴝𐴔 𐴱 𐴀𐴝𐴌 𐴎𐴠 𐴎𐴞𐴛𐴡𐴃 𐴀𐴝𐴏𐴠 𐴑𐴟𐴌𐴁𐴝𐴕𐴡𐴌 𐴑𐴤𐴟𐴐𐴞 𐴔𐴟𐴁𐴝𐴌𐴡𐴑 𐴀𐴥𐴡𐴑 𐴱 𐴁𐴠𐴙𐴒𐴧𐴟𐴕𐴠 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴀𐴝 𐴒𐴡𐴌𐴦𐴡 , 𐴀𐴝𐴣𐴀𐴌𐴝 𐴀𐴡𐴕𐴡𐴌𐴝 𐴐𐴤𐴡𐴣𐴀 𐴀𐴝𐴘𐴧𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴎𐴝𐴘 𐴀𐴞𐴊 𐴀𐴝𐴌 𐴑𐴟𐴌𐴁𐴝𐴕𐴡𐴌 𐴑𐴤𐴟𐴐𐴞 𐴒𐴡𐴌𐴞 𐴉𐴝𐴌𐴞𐴉𐴝𐴀𐴕 𐴀𐴦𐴝𐴔𐴞𐴀𐴕 𐴱𐴱