𐴔𐴡𐴓𐴠𐴆𐴤𐴙𐴝𐴌 𐴈𐴝𐴣𐴏𐴥𐴠 𐴊𐴡𐴙𐴅𐴧𐴙𐴝𐴃 𐴴 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴋𐴟𐴉𐴥𐴞 𐴎𐴡𐴕𐴡𐴌 𐴈𐴥𐴡𐴃𐴡𐴌𐴝 𐴱𐴱

𐴉𐴟𐴓𐴞𐴆𐴡𐴌 𐴈𐴗𐴝 𐴔𐴡𐴎𐴞𐴕 𐴴 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴓𐴡𐴘 𐴀𐴠𐴑𐴧𐴝𐴕 𐴁𐴟𐴄 𐴄𐴤𐴝𐴘𐴓𐴠𐴕𐴡𐴌 𐴈𐴝𐴣𐴏𐴝 𐴓𐴡𐴘 𐴔𐴡𐴓𐴠𐴆𐴤𐴙𐴝𐴌 𐴊𐴡𐴙𐴅𐴧𐴙𐴝𐴃 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴃 𐴉𐴥𐴝𐴣𐴏𐴞 𐴎𐴦𐴡𐴕𐴠 𐴴 𐴲 𐴎𐴡𐴕 𐴁𐴠𐴙𐴒𐴧𐴟𐴕 𐴊𐴡𐴙𐴅𐴧𐴙𐴝𐴃 𐴎𐴤𐴝𐴂𐴢 𐴔𐴝𐴙𐴅𐴧𐴙𐴠 𐴱 𐴀𐴥𐴠𐴃𐴧𐴟 𐴐𐴤𐴟𐴊𐴠 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴑𐴟𐴓𐴡𐴃 𐴀𐴟𐴍𐴥𐴞 𐴉𐴝𐴙𐴅𐴧𐴙𐴠 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝𐴌 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴆𐴠 𐴀𐴡𐴉𐴞𐴆𐴙𐴠𐴓 𐴁𐴤𐴝𐴉𐴠 𐴌𐴦𐴡𐴘𐴁𐴝𐴌𐴠 𐴈𐴡𐴘𐴧𐴠 𐴱 𐴀𐴥𐴠 𐴴 𐴲 𐴎𐴡𐴕𐴡𐴌 𐴁𐴤𐴟𐴃𐴡𐴌𐴃𐴟 / 𐴕𐴟𐴌 𐴇𐴟𐴏𐴝𐴙𐴕 𐴁𐴡𐴐𐴢 𐴷 𐴲 𐴁𐴡𐴏𐴡𐴌 𐴐𐴤𐴟𐴊𐴠 𐴀𐴠𐴑 𐴎𐴡𐴕 𐴀𐴥𐴝𐴣𐴏𐴟𐴌𐴞 𐴓𐴡𐴚𐴑𐴝𐴖𐴞𐴌 𐴋𐴙𐴝𐴃 𐴑𐴟𐴓𐴡𐴃 𐴀𐴟𐴍𐴞 𐴉𐴝𐴙𐴅𐴧𐴙𐴠 𐴱 𐴃𐴦𐴡𐴘 𐴉𐴟𐴓𐴞𐴆𐴠 𐴀𐴥𐴞𐴃𐴝𐴌𐴠 𐴎𐴞𐴘𐴡𐴓𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴁𐴡𐴓𐴞 𐴱 𐴑𐴠𐴋𐴤𐴝 𐴀𐴝𐴌 𐴂𐴠𐴌 𐴓𐴞𐴏𐴡𐴌 𐴊𐴦𐴡𐴙𐴕 𐴀𐴠𐴓𐴝𐴑𐴝𐴌 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴆𐴡𐴌 𐴁𐴡𐴌𐴡 / 𐴔𐴟𐴇𐴝𐴔𐴧𐴡𐴊 𐴎𐴝𐴖𐴝𐴖𐴞 𐴀𐴝𐴁𐴊𐴟𐴓𐴧𐴝𐴇 𐴘𐴠 𐴈𐴡𐴘𐴧𐴠 𐴱 𐴔𐴡𐴓𐴠𐴆𐴤𐴙𐴝𐴌 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴆𐴡𐴌 𐴄𐴞𐴀𐴔 𐴀𐴟𐴒𐴧𐴗𐴝 𐴘𐴠 𐴊𐴡𐴙𐴅𐴧𐴙𐴝𐴃 𐴁𐴠𐴐𐴤𐴞 𐴃𐴟𐴖𐴝𐴘 𐴏𐴝𐴘𐴧𐴠 𐴔𐴡𐴕𐴃𐴡𐴌 𐴀𐴝𐴙𐴅𐴀𐴥𐴡 𐴉𐴡𐴙𐴅𐴧𐴡𐴕𐴃𐴡 𐴱 𐴕𐴥𐴡 𐴎𐴞𐴛𐴝𐴃𐴝 𐴕𐴥𐴡 𐴔𐴡𐴌𐴝 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴝 𐴕𐴥𐴡𐴀 𐴉𐴝𐴀 𐴱𐴱

𐴀𐴝𐴌 𐴁𐴟𐴄 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴑𐴞 𐴀𐴥𐴡𐴘𐴧𐴠 , 𐴈𐴡𐴕𐴥𐴡 𐴏𐴥𐴡𐴀𐴞 𐴈𐴥𐴡𐴁𐴡𐴌 𐴉𐴝𐴀 𐴕𐴥𐴡𐴀 𐴎𐴝𐴀 𐴱 𐴁𐴠𐴙𐴐𐴢 𐴐𐴤𐴡𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌 𐴔𐴟𐴓𐴧𐴟𐴑 𐴔𐴡𐴓𐴠𐴆𐴤𐴙𐴝 𐴀𐴥𐴡𐴙𐴓𐴊𐴠 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴔𐴡𐴒𐴤𐴡𐴌 𐴎𐴝𐴘 𐴎𐴟𐴓𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴞 𐴕𐴡 𐴉𐴝𐴌𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴊𐴙𐴅𐴧𐴙𐴝 𐴀𐴝𐴌 𐴏𐴥𐴝𐴀𐴌𐴝 𐴉𐴝𐴘𐴁𐴡𐴊𐴠 𐴀𐴝𐴐𐴤𐴝𐴌 𐴔𐴡𐴕𐴎𐴞𐴓 𐴱 𐴔𐴡𐴕𐴃𐴡𐴌 𐴑𐴡𐴌𐴟𐴕𐴝 𐴁𐴙𐴝𐴌𐴝𐴔𐴡𐴌 𐴀𐴡𐴑𐴃𐴡𐴃 𐴔𐴡𐴓𐴠𐴆𐴤𐴙𐴝𐴌 𐴇𐴥𐴡𐴑𐴟𐴔𐴡𐴃𐴠 𐴊𐴠𐴐𐴡𐴃 𐴒𐴤𐴡𐴓𐴡𐴕 𐴀𐴠𐴁𐴧𐴠𐴌𐴠 𐴁𐴡𐴕 𐴒𐴡𐴌𐴞 𐴊𐴞𐴘𐴠 𐴱 𐴃𐴞𐴕 𐴁𐴡𐴏𐴡𐴌 𐴀𐴥𐴡𐴘𐴃𐴠 , 𐴁𐴡𐴌𐴔𐴥𐴝𐴌 𐴅𐴠𐴕𐴟𐴏𐴥𐴝𐴙𐴋𐴡𐴌 𐴃𐴟 𐴉𐴡𐴌𐴝𐴕 𐴁𐴝𐴏𐴝𐴘 , 𐴁𐴝𐴚𐴓𐴝𐴊𐴠𐴐𐴢 𐴑𐴡𐴑𐴆𐴡𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠𐴊𐴠 𐴱 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴌 𐴁𐴝𐴀𐴌𐴠 𐴎𐴤𐴝𐴉𐴝 𐴎𐴤𐴝𐴙𐴂𐴧𐴝 𐴑𐴠𐴀𐴠𐴔𐴡𐴃𐴌𐴃𐴟 𐴀𐴡𐴐𐴤𐴝𐴕𐴃𐴞𐴌 𐴎𐴡𐴌𐴞𐴘𐴝 𐴁𐴟𐴄 𐴓𐴡𐴘 𐴀𐴞𐴕𐴋𐴟 𐴕𐴞𐴆𐴤𐴙𐴝 𐴀𐴝𐴌 𐴔𐴡𐴓𐴠𐴆𐴤𐴙𐴝 𐴎𐴝𐴌𐴒𐴤𐴡𐴘𐴊𐴠 𐴱 𐴐𐴟𐴁𐴤𐴝 𐴓𐴝𐴒𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴔𐴝𐴕𐴟𐴙𐴐𐴢 𐴀𐴦𐴟𐴕𐴡𐴌𐴠 𐴃𐴟𐴖𐴝𐴘 𐴁𐴡𐴌𐴓𐴝 𐴊𐴟𐴘𐴧𐴝𐴕 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴆𐴡𐴌 𐴕𐴠𐴁𐴤𐴞 𐴀𐴝𐴌 𐴊𐴟𐴘𐴧𐴝𐴕 𐴁𐴟𐴄 𐴓𐴡𐴘 𐴎𐴝𐴘 𐴃𐴟𐴖𐴝𐴌 𐴁𐴡𐴓𐴞 / 𐴎𐴝𐴖𐴝𐴖𐴞 𐴘𐴠 𐴈𐴡𐴘𐴧𐴠 𐴱 𐴑𐴡𐴌𐴟𐴕𐴝 𐴁𐴙𐴝𐴌𐴝𐴔𐴡𐴌 𐴐𐴤𐴟𐴌𐴟𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝𐴌 𐴁𐴟𐴄 𐴑𐴟𐴓𐴡𐴃 𐴁𐴤𐴞𐴌𐴞 𐴕𐴡𐴉𐴝𐴌𐴥𐴠 𐴉𐴝𐴀𐴕 𐴔𐴡𐴓𐴠𐴆𐴤𐴙𐴝 𐴘𐴠 𐴈𐴥𐴝𐴀𐴏𐴢 𐴉𐴟𐴓𐴞𐴆 𐴁𐴦𐴝𐴙𐴌 𐴒𐴡𐴙𐴅𐴧𐴙𐴠 𐴱 𐴁𐴝𐴊𐴠 𐴘𐴥𐴡 𐴁𐴡𐴀𐴃 𐴁𐴟𐴄 𐴃𐴟𐴓𐴞 𐴓𐴡𐴘𐴧𐴠 𐴱 𐴀𐴝𐴌𐴑𐴠𐴙𐴏𐴧𐴟 𐴖𐴝𐴉𐴠𐴏𐴢 𐴉𐴥𐴞𐴌𐴝𐴘 𐴊𐴞𐴘𐴠 𐴱 𐴎𐴞𐴘𐴝𐴕𐴡𐴌𐴓𐴝 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴕𐴝𐴌𐴝𐴎𐴞 𐴊𐴠𐴈𐴝𐴘𐴧𐴠 𐴱𐴱

Sources : https://www.dhakatribune.com/world/2020/07/26/24-rohingya-migrants-feared-drowned-off-malaysia