𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴆𐴥𐴙𐴡𐴑 𐴋𐴥𐴠𐴚𐴡𐴃 𐴎𐴟𐴌𐴠𐴐𐴥𐴟𐴌𐴠 𐴓𐴝𐴌𐴥𐴝𐴘 , 𐴊𐴠𐴐𐴡𐴙𐴃𐴧𐴝 𐴏𐴝𐴙𐴌 𐴎𐴡𐴕 𐴒𐴥𐴝𐴙𐴓 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴆𐴥𐴙𐴡𐴑 𐴋𐴥𐴠𐴚 𐴉𐴝𐴌𐴝𐴌 𐴈𐴝𐴣𐴏𐴠 𐴱 𐴅𐴟𐴓𐴝𐴙𐴌 𐴶 𐴱 𐴃𐴝𐴌𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴁𐴝𐴒𐴞𐴌 𐴔𐴝𐴎𐴠 𐴁𐴠𐴙𐴕𐴧𐴝 𐴓𐴡𐴒𐴁𐴤𐴡𐴒𐴢 𐴰 𐴱 𐴁𐴝𐴎𐴠 𐴓𐴡𐴃𐴞 𐴓𐴝𐴌𐴥𐴝𐴘 𐴎𐴟𐴌𐴠𐴐𐴥𐴟𐴌𐴠 𐴐𐴥𐴟𐴌𐴟 𐴀𐴥𐴡𐴘𐴧𐴠 𐴁𐴡𐴓𐴞 𐴉𐴝𐴌𐴝𐴌 𐴀𐴥𐴟𐴑𐴆𐴥𐴙𐴟𐴑 𐴌𐴥𐴠𐴔𐴤𐴟 𐴀𐴝𐴌 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴁𐴞 𐴁𐴞 𐴏𐴞 𐴌𐴠 𐴈𐴡𐴘𐴧𐴠 𐴱 𐴀𐴥𐴠 𐴓𐴝𐴌𐴥𐴝𐴙𐴃 𐴁𐴟𐴌𐴤𐴝 𐴁𐴠𐴍𐴞 𐴀𐴠𐴑 𐴎𐴡𐴕𐴡𐴌 𐴄𐴥𐴠𐴚𐴡𐴃 𐴒𐴟𐴓𐴞 𐴉𐴡𐴙𐴅𐴧𐴙𐴠 𐴀𐴝𐴌 𐴰 𐴴 – 𐴰 𐴵 𐴁𐴡𐴏𐴡𐴌 𐴔𐴝𐴎𐴠 𐴀𐴥𐴝𐴓 𐴏𐴦𐴡𐴌𐴊𐴠 𐴀𐴥𐴝𐴙𐴓𐴧𐴝 𐴃𐴞𐴕 𐴎𐴡𐴕 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴱 𐴀𐴠𐴑 𐴎𐴡𐴕𐴡𐴌 𐴁𐴝𐴔 𐴀𐴝𐴣𐴍𐴥𐴟𐴃 , 𐴀𐴝𐴌 𐴀𐴠𐴑 𐴎𐴡𐴕𐴡𐴌 𐴁𐴝𐴔 𐴋𐴟𐴣𐴖𐴥𐴝𐴣𐴃 , 𐴀𐴝𐴌 𐴀𐴠𐴑 𐴎𐴡𐴕𐴡𐴌 𐴉𐴠𐴍𐴡𐴃 𐴒𐴟𐴓𐴞 𐴉𐴡𐴙𐴅𐴧𐴙𐴠 𐴱 𐴓𐴝𐴌𐴥𐴝𐴘 𐴀𐴥𐴠𐴃𐴡 𐴊𐴠𐴌𐴞 𐴉𐴥𐴝𐴀𐴕 𐴕𐴦𐴡 𐴃𐴥𐴝𐴑𐴠𐴓𐴠 𐴘𐴦𐴡 𐴔𐴡𐴕𐴃𐴡𐴌 𐴉𐴥𐴟𐴌𐴝𐴕𐴃𐴥𐴞𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴥𐴝𐴣𐴎𐴡𐴙𐴕𐴧𐴝 𐴉𐴡𐴙𐴅𐴧𐴡𐴕𐴃𐴡 𐴀𐴥𐴝𐴁𐴝𐴌 𐴓𐴝𐴙𐴕𐴠 𐴇𐴠𐴓𐴞𐴑𐴝𐴂𐴄𐴝𐴌 𐴓𐴡𐴘 𐴋𐴡𐴣𐴀𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴁𐴟𐴔 𐴔𐴝𐴌𐴝𐴃 𐴃𐴥𐴝𐴑𐴧𐴞𐴀𐴓 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴓𐴝𐴌𐴥𐴝𐴘 𐴁𐴡𐴕 𐴀𐴥𐴡𐴘 𐴁𐴝𐴊𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴠𐴑 𐴃𐴡𐴌𐴉𐴝 𐴋𐴡𐴣𐴀𐴌 𐴐𐴥𐴡𐴣𐴍𐴡 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴝𐴃 𐴀𐴝𐴐𐴧𐴞𐴀𐴓 𐴊𐴠 𐴀𐴥𐴠𐴃𐴡𐴓𐴧𐴝 𐴱𐴱

𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴉𐴝𐴌𐴝𐴌 𐴁𐴥𐴟𐴃𐴡𐴌𐴠 𐴎𐴝𐴘 𐴓𐴡𐴘 𐴕𐴡 𐴉𐴝𐴌𐴥𐴡𐴕𐴠 𐴊𐴝𐴁𐴝𐴘 𐴒𐴡𐴌𐴞 𐴁𐴡𐴌𐴓𐴝 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴀𐴥𐴟𐴊𐴧𐴝 𐴓𐴡𐴘𐴎𐴝𐴘 𐴕𐴦𐴡 𐴉𐴝𐴌𐴠 𐴱 𐴀𐴥𐴠 𐴓𐴝𐴌𐴥𐴝𐴙𐴃 𐴄𐴥𐴡𐴖𐴌𐴡𐴌 𐴑𐴙𐴝𐴚 𐴀𐴝𐴌 𐴑𐴠𐴙𐴏𐴧𐴟 𐴒𐴤𐴡𐴌 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠 𐴀𐴝𐴌 𐴀𐴡𐴚 𐴏𐴝𐴎𐴞 𐴉𐴝𐴌𐴝𐴃 𐴔𐴝𐴎𐴠 𐴘𐴥𐴡 𐴇𐴥𐴠𐴓𐴞𐴑𐴝𐴂𐴄𐴝𐴌 𐴓𐴡𐴘 𐴋𐴡𐴣𐴀𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴡𐴕𐴠 𐴒𐴤𐴡𐴌 𐴊𐴟𐴘𐴧𐴝𐴕 𐴎𐴡𐴓𐴞 𐴒𐴞𐴘𐴡𐴘 𐴁𐴡𐴓𐴞 𐴆𐴥𐴙𐴡𐴑 𐴋𐴥𐴠𐴚 𐴉𐴝𐴌𐴝𐴌 𐴀𐴥𐴟𐴑 𐴆𐴥𐴙𐴟𐴑 𐴌𐴥𐴠𐴔𐴤𐴟 𐴘𐴠 𐴈𐴡𐴘𐴧𐴠 𐴱 𐴅𐴟𐴕 𐴔𐴝𐴐𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴆𐴥𐴙𐴡𐴑 𐴋𐴥𐴠𐴚 𐴀𐴝𐴂𐴧𐴝𐴙𐴚𐴡𐴃 𐴊𐴠𐴐𐴢 𐴏𐴥𐴡𐴉𐴝𐴘 𐴑𐴝𐴌𐴖𐴝𐴘 𐴒𐴡𐴌𐴞 𐴁𐴡 𐴁𐴡𐴓𐴞 𐴀𐴡𐴋𐴝𐴌 𐴕𐴠𐴓𐴝𐴘 𐴊𐴞𐴀𐴓 𐴊𐴠 𐴘𐴥𐴝𐴕𐴃𐴟 𐴓𐴡𐴃𐴞 𐴰 𐴴 𐴐𐴥𐴝𐴕 𐴓𐴡𐴃𐴞 𐴉𐴝𐴌𐴝𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴕𐴟𐴙𐴐𐴢 𐴇𐴠𐴉𐴝𐴎𐴡𐴃𐴞 𐴎𐴝𐴒𐴝𐴌 𐴀𐴥𐴞𐴑𐴧𐴙𐴝 𐴐𐴥𐴡𐴌𐴞 𐴒𐴞𐴘𐴠 𐴒𐴥𐴡𐴘𐴊𐴠 𐴱 𐴀𐴥𐴠 𐴎𐴝𐴀𐴃 𐴔𐴝𐴕𐴟𐴙𐴐𐴢 𐴀𐴝𐴑𐴧𐴙𐴝𐴁 𐴉𐴡𐴙𐴅𐴧𐴡𐴕𐴃𐴡 𐴉𐴡𐴣𐴙𐴏𐴧𐴠 𐴒𐴥𐴡𐴘 𐴱 𐴓𐴝𐴌𐴥𐴝𐴘 𐴕𐴡 𐴀𐴥𐴡𐴌𐴀𐴝𐴌 𐴑𐴠𐴙𐴏𐴧𐴟 𐴔𐴝𐴕𐴟𐴙𐴐𐴢 𐴀𐴥𐴝𐴓 𐴒𐴡𐴌𐴞 𐴁𐴡𐴌𐴓𐴝 𐴉𐴝𐴌𐴝𐴃 𐴖𐴝𐴉𐴠𐴏𐴢 𐴀𐴝𐴐𐴧𐴞𐴀𐴓 𐴱 𐴔𐴡𐴕𐴃𐴡𐴌 𐴉𐴥𐴞𐴃𐴞𐴕 𐴀𐴥𐴡 𐴓𐴝𐴌𐴥𐴝𐴘 𐴀𐴥𐴡𐴌𐴀𐴝𐴌 𐴉𐴝𐴌𐴝 𐴏𐴥𐴝𐴌𐴞 𐴀𐴝𐴁𐴧𐴝𐴌𐴀𐴥𐴡 𐴊𐴤𐴝𐴘𐴒𐴞𐴘𐴡𐴘 𐴔𐴡𐴕𐴃𐴡𐴌 𐴰 𐴵 𐴎𐴡𐴕 𐴓𐴡𐴃𐴞 𐴔𐴝𐴕𐴟𐴙𐴐𐴢 𐴉𐴝𐴌𐴝𐴌𐴃𐴟 𐴕𐴠𐴓𐴞 𐴕𐴡𐴉𐴥𐴝𐴌𐴞 𐴁𐴡𐴕 𐴈𐴥𐴝𐴘 𐴃𐴥𐴝𐴑𐴞 𐴒𐴞𐴀𐴓 𐴒𐴥𐴡𐴘 𐴁𐴡𐴓𐴞 𐴉𐴝𐴌𐴝𐴌 𐴀𐴥𐴟𐴑 𐴆𐴥𐴙𐴟𐴑 𐴌𐴥𐴠𐴔𐴤𐴟 𐴘𐴠 𐴈𐴡𐴘𐴧𐴠 𐴱 𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴥𐴝 , 𐴔𐴝𐴕𐴟𐴙𐴐𐴢 𐴀𐴥𐴟𐴀𐴕𐴡𐴌 𐴁𐴥𐴟𐴃𐴡𐴌𐴃𐴟 𐴀𐴥𐴡𐴘𐴧𐴠𐴊𐴠 𐴱𐴱

Sources : https://www.bbc.com/burmese/burma-53430967