𐴀𐴝𐴌𐴑𐴝𐴕𐴡𐴃 𐴃𐴠𐴓 𐴀𐴝𐴌 𐴑𐴟𐴊𐴟𐴌𐴟𐴃𐴞 𐴐𐴥𐴡𐴔𐴁𐴡𐴃𐴧𐴞 𐴃𐴟𐴖𐴡𐴕𐴡𐴌 𐴔𐴡𐴕𐴏𐴟𐴁𐴝 𐴁𐴡𐴕𐴒𐴡𐴌𐴞 𐴉𐴥𐴠𐴓𐴝𐴘𐴃𐴡 𐴈𐴡𐴘𐴧𐴠 ( 𐴀𐴠 𐴀𐴡 𐴋𐴝𐴁𐴓𐴙𐴟 ) 𐴱𐴱

𐴌𐴠𐴚𐴒𐴟𐴕𐴡𐴃 𐴃𐴥𐴝𐴑𐴠𐴊𐴠 𐴀𐴝𐴌𐴑𐴝𐴕𐴡𐴌 𐴃𐴠𐴓 𐴀𐴝𐴌 𐴑𐴟𐴊𐴟𐴌𐴟𐴃𐴞 𐴐𐴥𐴡𐴔𐴁𐴡𐴃𐴧𐴞 𐴏𐴝𐴀𐴏𐴞𐴃𐴝 𐴒𐴡𐴌𐴡𐴙𐴕𐴧𐴝 ( 𐴀𐴠 𐴀𐴡 𐴋𐴝𐴁𐴓𐴙𐴟 ) 𐴘𐴠 𐴅𐴟𐴓𐴝𐴙𐴌 𐴸 𐴃𐴝𐴌𐴞𐴑𐴡𐴃 𐴀𐴠𐴓𐴝𐴕 𐴕𐴝𐴔𐴤𐴝 𐴕𐴠𐴓𐴝𐴘 𐴱 𐴀𐴝𐴌𐴑𐴝𐴕𐴡𐴃 𐴎𐴠𐴃𐴥𐴡𐴃𐴡 𐴓𐴝𐴌𐴥𐴝𐴘 𐴁𐴠𐴙𐴐𐴢 𐴀𐴥𐴡𐴌𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴁𐴞𐴊𐴠𐴐𐴞 𐴑𐴟𐴔𐴂𐴝𐴕𐴞 𐴔𐴞𐴓𐴞 𐴀𐴝𐴌𐴑𐴝𐴕𐴡𐴃 𐴃𐴠𐴓 𐴀𐴝𐴌 𐴑𐴟𐴊𐴟𐴌𐴟𐴃𐴞 𐴐𐴥𐴡𐴔𐴁𐴡𐴃𐴧𐴞 𐴃𐴟𐴖𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴡𐴕 𐴒𐴡𐴌𐴞 𐴉𐴥𐴠𐴓𐴝𐴘𐴃𐴡 𐴈𐴡𐴘𐴧𐴠 𐴱 𐴀𐴝𐴌𐴑𐴝𐴕𐴡𐴃 𐴑𐴟𐴊𐴟𐴌𐴟𐴃𐴞 𐴐𐴥𐴡𐴔𐴁𐴡𐴃𐴧𐴞 𐴃𐴟𐴖𐴝𐴌 𐴈𐴝𐴔𐴠 𐴔𐴡𐴒𐴁𐴝𐴒𐴞 (𐴀𐴠 𐴀𐴠 ) 𐴀𐴝𐴌 𐴇𐴥𐴡𐴑𐴟𐴔𐴡𐴃𐴡𐴌 𐴔𐴝𐴎𐴠 𐴱 𐴓𐴝𐴌𐴥𐴝𐴘 𐴁𐴝𐴌𐴥𐴝𐴘𐴧𐴡𐴌𐴠 𐴀𐴝𐴌𐴑𐴝𐴕 𐴁𐴥𐴝𐴐𐴞 𐴀𐴥𐴡𐴑𐴧𐴡𐴓𐴡𐴌𐴃𐴟 𐴏𐴥𐴝𐴀𐴌𐴝 𐴏𐴥𐴝𐴌𐴝 𐴖𐴥𐴝𐴉𐴡𐴌𐴠𐴌𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴌𐴊𐴠 𐴀𐴥𐴠𐴃𐴡𐴓𐴧𐴝 ( 𐴀𐴠 𐴀𐴡 𐴋𐴝𐴁𐴓𐴙𐴟𐴌 ) 𐴋𐴝𐴘𐴌𐴠𐴑𐴄𐴝𐴌 / 𐴀𐴥𐴟𐴀 𐴆𐴙𐴡 𐴑𐴝𐴙𐴚𐴠 𐴂𐴡𐴌𐴟𐴒𐴠𐴌𐴝𐴔 𐴁𐴡𐴕𐴒𐴡𐴌𐴞 𐴉𐴥𐴠𐴓𐴝𐴘𐴃𐴡 𐴈𐴡𐴘𐴧𐴠𐴊𐴠 𐴱𐴱

𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴠 𐴁𐴞𐴊𐴠𐴐𐴥𐴞 𐴑𐴟𐴔𐴂𐴝𐴕𐴞 𐴓𐴡𐴘 𐴔𐴞𐴓𐴞 𐴀𐴝𐴌𐴑𐴝𐴕 𐴁𐴥𐴝𐴐𐴞𐴌 𐴔𐴡𐴌𐴎𐴞 𐴏𐴥𐴝𐴌𐴝 𐴁𐴡𐴓𐴝𐴎𐴟𐴌𐴞 𐴑𐴟𐴊𐴟𐴌𐴟𐴃𐴞 𐴐𐴥𐴡𐴔𐴁𐴡𐴃𐴧𐴞 𐴃𐴟𐴖𐴝𐴌𐴊𐴠 𐴀𐴥𐴠𐴃𐴡𐴓𐴧𐴝 ( 𐴀𐴠 𐴀𐴡 𐴋𐴝𐴁𐴓𐴙𐴟 ) 𐴘𐴠 𐴈𐴝𐴔 𐴃𐴥𐴞𐴘𐴝 𐴒𐴡𐴌𐴥𐴝𐴘 𐴉𐴥𐴠𐴓𐴝𐴘𐴃𐴡 𐴈𐴡𐴘𐴧𐴠𐴊𐴠 𐴱 𐴀𐴝𐴌𐴑𐴝𐴕𐴡𐴌 𐴂𐴡𐴌𐴟𐴒𐴠𐴌𐴝𐴔 𐴁𐴠𐴙𐴒𐴧𐴞𐴕 𐴎𐴠𐴕𐴋𐴞𐴓𐴧𐴝 𐴒𐴡𐴌𐴥𐴝𐴉𐴡𐴌𐴠 𐴱 𐴁𐴡𐴇𐴟 𐴇𐴥𐴡𐴑𐴟𐴔𐴡𐴃𐴠 𐴒𐴡𐴌𐴞𐴁𐴡𐴊𐴠 𐴁𐴡𐴓𐴞 𐴈𐴦𐴡𐴘 𐴸 𐴰 𐴰 𐴲 𐴐𐴡𐴕𐴡𐴃 𐴔𐴡𐴕𐴎𐴡𐴑𐴧𐴝 𐴑𐴝𐴕𐴟𐴕 𐴁𐴝𐴕𐴝𐴘 𐴌𐴝𐴙𐴑𐴧𐴙𐴠 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴡𐴌 𐴀𐴠𐴅𐴝𐴎𐴡𐴃 𐴓𐴡𐴘 𐴈𐴝𐴔 𐴒𐴡𐴌𐴠𐴌𐴊𐴠 𐴀𐴡𐴏𐴄𐴡𐴌𐴡𐴓𐴞𐴘𐴝𐴌 𐴑𐴟𐴔𐴂𐴝𐴕𐴞 𐴘𐴠 𐴎𐴡𐴊𐴞 𐴈𐴝𐴔 𐴁𐴡𐴕 𐴕𐴡 𐴒𐴡𐴌𐴥𐴠 𐴱 𐴊𐴠𐴐𐴡𐴙𐴃𐴧𐴝 𐴂𐴝𐴂𐴓𐴞𐴑 𐴉𐴝𐴄𐴞 , 𐴏𐴞𐴘𐴝𐴏𐴞 𐴉𐴝𐴄𐴞 𐴀𐴝𐴌 𐴊𐴠𐴐𐴡𐴙𐴃𐴧𐴝 𐴁𐴠𐴙𐴒𐴧𐴟𐴕 𐴔𐴞𐴓𐴞 𐴀𐴡𐴏𐴄𐴡𐴌𐴡𐴓𐴞𐴘𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴎𐴝𐴕𐴝𐴘𐴁𐴡 𐴁𐴡𐴓𐴞 ( 𐴀𐴠 𐴀𐴡 𐴋𐴝𐴁𐴓𐴙𐴟 ) 𐴘𐴠 𐴕𐴠𐴓𐴝𐴘𐴧𐴠𐴊𐴠 𐴀𐴠𐴓𐴝𐴕 𐴕𐴝𐴔𐴝𐴃 𐴈𐴡𐴘𐴧𐴠 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴠 𐴴 𐴱 𐴰 𐴲 𐴐𐴥𐴡𐴕𐴡𐴃 𐴉𐴠𐴌𐴝𐴣𐴀𐴏𐴢 𐴀𐴝𐴌 𐴀𐴡𐴏𐴄𐴡𐴌𐴡𐴓𐴞𐴘𐴝𐴌 𐴑𐴟𐴔𐴂𐴝𐴕𐴞 𐴓𐴡𐴘 𐴈𐴝𐴁𐴡𐴏𐴢 𐴒𐴡𐴌𐴞 𐴃𐴠𐴙𐴓 𐴀𐴝𐴌 𐴑𐴟𐴊𐴟𐴌𐴟𐴃𐴞 𐴒𐴥𐴠𐴀𐴏𐴢 𐴀𐴥𐴞𐴕 𐴄𐴝𐴘𐴓𐴠𐴕 𐴀𐴝𐴌 𐴆𐴞𐴕𐴝 𐴌𐴠 𐴊𐴞𐴁𐴡𐴌𐴓𐴝 𐴋𐴞𐴏𐴡𐴔𐴁𐴡𐴌 𐴹 𐴱 𐴰 𐴲 𐴐𐴥𐴡𐴕𐴡𐴃 𐴏𐴥𐴝𐴙𐴕 𐴊𐴡𐴏𐴃𐴡𐴑 𐴀𐴥𐴡𐴘 𐴒𐴞𐴘𐴡𐴘 𐴱𐴱

Sources : https://www.rfa.org/burmese/news/arakan-oil-watch-statement-rakhine-nautral-gas-project-07082020203321.html