𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴥𐴟𐴄 𐴊𐴞𐴁𐴝𐴌 𐴇𐴥𐴡𐴑 𐴔𐴝𐴒𐴠𐴌𐴊𐴠 𐴘𐴥𐴝𐴕𐴡𐴌𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴁𐴝𐴁𐴡𐴃𐴠 𐴈𐴝𐴔 𐴒𐴡𐴌𐴡𐴙𐴕𐴧𐴝 𐴘𐴠 𐴇𐴠𐴔𐴝𐴘𐴡𐴃 𐴒𐴡𐴙𐴅𐴧𐴙𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴰 𐴲 𐴰 𐴲 𐴕𐴡𐴖𐴡𐴔𐴁𐴡𐴌 𐴔𐴝𐴐𐴡𐴃 𐴀𐴥𐴡𐴘𐴁𐴡𐴊𐴠 𐴱 𐴂𐴝𐴓𐴞𐴔𐴠𐴕 𐴀𐴠𐴔𐴂𐴞 𐴁𐴝𐴏𐴥𐴝𐴃 𐴱 𐴁𐴥𐴟𐴄 𐴊𐴞𐴉𐴝𐴌𐴞𐴁𐴝𐴌 𐴀𐴝𐴌 𐴀𐴝𐴌 𐴀𐴠𐴔𐴂𐴞 𐴁𐴡𐴕𐴞 𐴉𐴝𐴌𐴞𐴁𐴝𐴌 𐴇𐴥𐴡𐴑 𐴊𐴞𐴁𐴡𐴌𐴓𐴝 𐴱 𐴋𐴞𐴔𐴟𐴑𐴠𐴌𐴠𐴏𐴞 , 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴝𐴔 𐴓𐴡𐴘 𐴊𐴟𐴣𐴌𐴝 𐴊𐴟𐴣𐴌𐴞 𐴒𐴡𐴌𐴠𐴌 𐴊𐴠 ( 𐴋𐴞 𐴀𐴠𐴆 𐴀𐴝𐴌 𐴂𐴞 ) 𐴉𐴝𐴄𐴞 𐴘𐴠 𐴀𐴠𐴓𐴠𐴑𐴆𐴠𐴕 𐴑𐴡𐴔𐴞𐴆𐴠𐴕𐴡𐴌 𐴈𐴝𐴣𐴏𐴠 𐴊𐴡𐴌𐴈𐴝𐴏𐴢 𐴊𐴞𐴘𐴠 𐴱 𐴋𐴞 𐴀𐴠𐴆 𐴀𐴝𐴌 𐴂𐴞 𐴉𐴝𐴄𐴞𐴌 𐴉𐴡𐴓𐴡𐴏𐴞 𐴔𐴡𐴎𐴞𐴕 𐴒𐴞𐴘𐴡𐴘 𐴊𐴠 𐴎𐴡𐴁𐴝𐴕𐴝𐴃 𐴁𐴥𐴟𐴄 𐴊𐴞 𐴀𐴝𐴌 𐴓𐴡𐴘 𐴀𐴝𐴙𐴐𐴧𐴙𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴠 𐴁𐴝𐴌𐴡𐴃 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝𐴌𐴃𐴟 𐴁𐴥𐴟𐴄 𐴊𐴞𐴁𐴝𐴌 𐴀𐴝𐴌 𐴓𐴡𐴘𐴁𐴝𐴌 𐴇𐴥𐴡𐴑 𐴃𐴥𐴝𐴑𐴡𐴕 𐴏𐴝𐴀 𐴁𐴡𐴓𐴞 𐴈𐴡𐴘𐴧𐴠 𐴱 𐴀𐴝𐴣𐴀𐴌𐴝 𐴕𐴡𐴘𐴧𐴝 𐴑𐴠𐴙𐴏𐴧𐴟 𐴔𐴝𐴒𐴞𐴌 𐴊𐴠 𐴕𐴡𐴀 𐴱 𐴀𐴝𐴣𐴀𐴌𐴝𐴌 𐴇𐴥𐴡𐴑 𐴎𐴞𐴘𐴝𐴕 𐴌𐴝𐴎𐴝 / 𐴀𐴥𐴟𐴀 𐴃𐴤𐴞𐴚𐴏𐴞𐴚𐴠 𐴀𐴝𐴣𐴀𐴌𐴝𐴌𐴃𐴟 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴙𐴀𐴓 𐴘𐴥𐴝𐴕 𐴔𐴝𐴒𐴞𐴌 𐴊𐴠 𐴁𐴡𐴓𐴞 ( 𐴋𐴞 𐴀𐴠𐴆 𐴀𐴝𐴌 𐴂𐴞𐴌 ) 𐴏𐴠𐴒𐴠𐴄𐴠𐴌𐴞 / 𐴀𐴥𐴟𐴀 𐴑𐴙𐴡 𐴏𐴥𐴟𐴀 𐴀𐴡𐴚𐴠 𐴈𐴡𐴘𐴧𐴠 𐴱𐴱

𐴖𐴡𐴌𐴠 𐴓𐴠𐴑𐴤𐴝 𐴒𐴞𐴘𐴠𐴊𐴠 𐴈𐴡𐴃𐴥𐴝 𐴀𐴥𐴞𐴕𐴡𐴌 𐴁𐴝𐴁𐴡𐴃𐴠 𐴀𐴠𐴓𐴠𐴑𐴆𐴠𐴕 𐴑𐴡𐴔𐴞𐴆𐴠𐴕𐴡𐴌 𐴎𐴞𐴔𐴧𐴝𐴊𐴝𐴌𐴡𐴌𐴃𐴟 ( 𐴀𐴝𐴌 𐴀𐴠𐴉𐴢 𐴀𐴠 ) 𐴘𐴠 𐴄𐴠𐴓𐴞𐴉𐴟𐴕 𐴒𐴡𐴌𐴞 𐴎𐴝𐴙𐴕𐴃𐴡 𐴏𐴝𐴘𐴧𐴠 𐴊𐴠 𐴀𐴡𐴑𐴃𐴡𐴃 𐴱 𐴎𐴞𐴔𐴧𐴝𐴊𐴝𐴌𐴠 𐴈𐴡𐴘𐴧𐴠𐴊𐴠 𐴀𐴠𐴈𐴥𐴡𐴕 𐴅𐴟𐴖𐴝𐴁 𐴊𐴞 𐴕𐴡𐴉𐴝𐴙𐴅𐴧𐴟𐴔 𐴈𐴥𐴡𐴁𐴡𐴌𐴞 𐴔𐴡𐴅𐴓𐴞𐴏𐴡𐴌 𐴀𐴡𐴑𐴃𐴡𐴃 𐴅𐴟𐴖𐴝𐴁 𐴊𐴞𐴘𐴟𐴔 𐴱 𐴘𐴝𐴘𐴞 𐴑𐴝𐴀𐴋 𐴈𐴡𐴘 𐴔𐴡𐴐𐴟𐴀𐴌 𐴀𐴝𐴏𐴠𐴊𐴠 ( 𐴊𐴤𐴡𐴓𐴝 𐴑𐴝𐴀𐴋 ) 𐴓𐴡𐴘 𐴀𐴠𐴑 𐴓𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴰 𐴱 𐴰 𐴲 𐴐𐴥𐴡𐴕𐴡𐴃 𐴁𐴥𐴟𐴄 𐴊𐴞𐴘𐴡𐴌𐴠 ( 𐴂𐴠𐴌𐴠𐴄𐴡𐴚𐴏𐴥𐴟 𐴑𐴥𐴠𐴌𐴥𐴠𐴚 𐴑𐴝𐴙𐴚 𐴌𐴥𐴠 𐴕𐴥𐴝 𐴂𐴥𐴗𐴠𐴣𐴂𐴟𐴌𐴟 𐴌𐴥𐴠 ) 𐴉𐴝𐴄𐴞𐴌𐴃𐴟 𐴃𐴥𐴞𐴘𐴝𐴙𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘𐴎𐴡𐴕𐴡𐴌𐴠 𐴎𐴞𐴃𐴝𐴘𐴓 𐴱 𐴀𐴥𐴞𐴃𐴝𐴌𐴝 𐴀𐴠𐴔𐴂𐴞 𐴁𐴡𐴕𐴞 𐴂𐴝𐴓𐴞𐴔𐴠𐴕𐴡𐴃 𐴀𐴥𐴟𐴊𐴧𐴝 𐴀𐴟𐴄𐴧𐴞𐴀𐴓 𐴱 𐴊𐴠𐴐𐴢 𐴈𐴝𐴙𐴌 𐴏𐴟𐴒𐴝𐴓𐴞 𐴉𐴝𐴄𐴞𐴌 𐴀𐴠𐴈𐴥𐴡𐴕𐴡𐴌 𐴁𐴡𐴌𐴡 / 𐴎𐴝𐴌𐴒𐴗𐴝 𐴏𐴟𐴌𐴥𐴝 𐴀𐴥𐴟𐴀 𐴆𐴗𐴠 𐴔𐴥𐴠𐴚 , 𐴁𐴡𐴌𐴔𐴤𐴝𐴌 𐴂𐴝𐴓𐴞𐴔𐴠𐴕𐴡𐴌 𐴕𐴝 𐴘𐴥𐴝 𐴑𐴝𐴌 𐴎𐴞𐴔𐴧𐴝𐴊𐴝𐴌 𐴀𐴝𐴐𐴧𐴞𐴓 𐴊𐴠 𐴀𐴡𐴑𐴃𐴡𐴃 𐴱𐴱

𐴔𐴡𐴕𐴎𐴡𐴑𐴧𐴝 𐴑𐴝𐴕𐴟𐴕 𐴁𐴝𐴕𐴝𐴘 𐴘𐴝𐴘𐴞 𐴑𐴝𐴀𐴋 𐴀𐴡𐴓𐴝 𐴁𐴥𐴟𐴄 𐴊𐴞𐴕𐴡𐴉𐴝𐴌𐴞𐴁𐴡 𐴁𐴡𐴓𐴞 𐴈𐴦𐴡𐴘 𐴵 𐴱 𐴰 𐴲 𐴐𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴥𐴟𐴄 𐴊𐴞𐴃𐴡 , 𐴓𐴡𐴘𐴃𐴡 𐴕𐴥𐴡𐴀 𐴊𐴠 𐴱 𐴊𐴠𐴐𐴡𐴙𐴃𐴧𐴝 𐴀𐴥𐴡𐴘𐴕𐴠 𐴑𐴞 𐴕𐴡𐴀 𐴏𐴞𐴕 𐴒𐴡𐴌𐴞 𐴕𐴥𐴡 𐴉𐴝𐴌𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴇𐴥𐴡𐴑𐴟𐴔𐴡𐴃𐴠 𐴊𐴤𐴡𐴓𐴝 𐴑𐴝𐴀𐴋 𐴊𐴞𐴘𐴠𐴊𐴠 𐴱 𐴔𐴝𐴕𐴟𐴙𐴐𐴢 𐴀𐴥𐴟𐴀𐴕 𐴁𐴡𐴌𐴔𐴤𐴝 𐴀𐴝𐴎𐴝𐴊 𐴀𐴥𐴡𐴘 𐴁𐴝𐴊𐴠 𐴁𐴝𐴚𐴓𐴝𐴊𐴠𐴐𐴡𐴌𐴃𐴟 𐴀𐴝𐴙𐴐𐴧𐴙𐴠𐴊𐴠 𐴁𐴡𐴓𐴞 𐴈𐴦𐴡𐴘 𐴵 𐴱 𐴰 𐴲 𐴐𐴥𐴡𐴕𐴡𐴌 𐴐𐴥𐴠𐴐𐴠 ( 𐴀𐴠𐴕 𐴁𐴞 𐴏𐴞 ) 𐴑𐴝𐴀𐴋 𐴊𐴞𐴘𐴝 𐴐𐴥𐴟𐴌𐴟 𐴒𐴡𐴙𐴅𐴧𐴙𐴠 𐴱 𐴁𐴥𐴟𐴏𐴞𐴊𐴡𐴚𐴡𐴌𐴃𐴟 𐴰 𐴱 𐴰 𐴲 𐴐𐴡𐴕𐴡𐴃 𐴀𐴠𐴔𐴂𐴞 𐴁𐴡𐴕𐴧𐴞𐴀𐴓 𐴊𐴠 / 𐴀𐴥𐴟𐴀 𐴆𐴗𐴠𐴔𐴡𐴚𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴥𐴟𐴄 𐴊𐴞𐴁𐴝𐴌 𐴓𐴡𐴘𐴁𐴝𐴌 𐴇𐴥𐴡𐴑 𐴊𐴞𐴁𐴡𐴌𐴓𐴝 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴠 𐴀𐴝𐴂𐴞𐴓 𐴒𐴡𐴙𐴅𐴧𐴙𐴠 𐴀𐴝𐴌 𐴰 𐴲 𐴰 𐴲 𐴐𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴘𐴥𐴡 𐴁𐴡𐴌𐴔𐴤𐴝𐴌 𐴀𐴡𐴙𐴕𐴧𐴡 𐴑𐴡𐴖𐴔𐴡𐴌 𐴁𐴡𐴌𐴝𐴁𐴡𐴌 𐴇𐴥𐴡𐴑 𐴊𐴞𐴁𐴡𐴓𐴧𐴝 𐴘𐴥𐴡 𐴈𐴡𐴘𐴧𐴠 𐴱 𐴀𐴝𐴒𐴡𐴌 𐴋𐴦𐴡𐴙𐴓𐴧𐴝 𐴰 𐴲 𐴰 𐴲 𐴐𐴡𐴕𐴡𐴃 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴥𐴟𐴄 𐴓𐴡𐴘𐴁𐴝𐴌 𐴊𐴞𐴁𐴝𐴌 𐴇𐴥𐴡𐴑 𐴊𐴞𐴁𐴡𐴌𐴓𐴝 𐴔𐴡𐴚𐴋𐴥𐴟𐴃 𐴃𐴥𐴝𐴑𐴠𐴊𐴠 / 𐴀𐴥𐴟𐴀 𐴑𐴞𐴚 𐴔𐴡𐴚𐴠 𐴈𐴡𐴘𐴧𐴠 𐴱𐴱

Sources : https://www.rfa.org/burmese/program_2/rohingya-voting-rights-07092020060429.html