𐴑𐴙𐴡𐴑𐴄𐴡𐴃 𐴔𐴝𐴕𐴟𐴙𐴐𐴢 𐴊𐴟𐴘 𐴎𐴡𐴕 𐴁𐴡𐴕 𐴀𐴥𐴡𐴘𐴧𐴠 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴑𐴙𐴡𐴑𐴄𐴡 𐴀𐴠𐴓𐴝𐴑𐴝𐴌 𐴂𐴞𐴕𐴧𐴠𐴀 𐴆𐴥𐴙𐴡𐴚 𐴉𐴝𐴌𐴝𐴃 𐴃𐴥𐴝𐴑𐴠𐴊𐴠 / 𐴑𐴟 𐴕𐴠 𐴔𐴙𐴥𐴟 𐴄𐴥𐴗𐴠𐴚 𐴁𐴡𐴐𐴢 𐴰 𐴲 𐴁𐴡𐴏𐴡𐴌 / 𐴑𐴟 𐴌𐴥𐴠 𐴄𐴗𐴥𐴠𐴚 𐴴 𐴲 𐴁𐴡𐴐𐴢 𐴁𐴡𐴏𐴡𐴌 𐴱 𐴀𐴠 𐴊𐴟𐴕𐴥𐴞 𐴎𐴡𐴕 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴞𐴑𐴡𐴃 𐴑𐴙𐴡𐴑𐴄𐴡𐴌 𐴁𐴝𐴎𐴝𐴌𐴡𐴌𐴃𐴟 𐴉𐴦𐴟𐴄 𐴁𐴦𐴡𐴓 𐴀𐴟𐴒𐴧𐴗𐴝 𐴑𐴞𐴕𐴞 𐴖𐴝𐴉𐴠𐴏𐴢 𐴉𐴝𐴌𐴝𐴃 𐴀𐴝𐴘𐴧𐴠𐴌 𐴊𐴠 𐴐𐴥𐴡𐴣𐴀𐴃 𐴱 𐴑𐴝𐴏𐴧𐴝 𐴂𐴡𐴕𐴥𐴝 𐴉𐴟𐴓𐴡𐴌 𐴒𐴟𐴌𐴝𐴃 𐴀𐴝𐴏𐴠𐴊𐴠 𐴔𐴠𐴓𐴠𐴄𐴠𐴌𐴞𐴌 𐴏𐴠𐴙𐴑 𐴂𐴗𐴥𐴝𐴕𐴡𐴃 𐴵 𐴷 𐴳 𐴓𐴡𐴔𐴁𐴡𐴌 𐴄𐴥𐴠 𐴌𐴥𐴝𐴚𐴡𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 / 𐴑𐴟 𐴕𐴠 𐴔𐴙𐴥𐴟 𐴄𐴥𐴗𐴠𐴚𐴡𐴌 𐴔𐴝𐴣 / 𐴋𐴡 𐴄𐴞𐴚 𐴄𐴞𐴚 𐴀𐴥𐴠 𐴘𐴠 𐴈𐴡𐴘𐴧𐴠 𐴱 𐴀𐴥𐴠 𐴉𐴟𐴓𐴡𐴌 𐴒𐴟𐴌𐴝𐴃 𐴀𐴝𐴏𐴠𐴊𐴠 𐴵 𐴷 𐴳 𐴓𐴡𐴔𐴁𐴡𐴌 𐴄𐴥𐴠 𐴌𐴥𐴝𐴚𐴡𐴃 𐴎𐴝𐴘 / 𐴑𐴟 𐴌𐴥𐴠 𐴄𐴥𐴗𐴠𐴚𐴡𐴌 𐴈𐴥𐴝𐴓𐴝 / 𐴋𐴡 𐴑𐴞𐴚 𐴏𐴥𐴠𐴕 𐴕𐴥𐴟 𐴘𐴠 / 𐴑𐴟 𐴌𐴥𐴠 𐴄𐴥𐴗𐴠𐴚𐴡𐴌 𐴁𐴝𐴁𐴡𐴃𐴠 𐴉𐴟𐴏𐴝𐴌 𐴒𐴡𐴙𐴅𐴧𐴙𐴠𐴘𐴝𐴌 𐴱 𐴀𐴥𐴠𐴈𐴡𐴕 𐴀𐴝𐴏𐴠𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 , 𐴀𐴝𐴣𐴀𐴌𐴝 𐴕𐴡𐴎𐴝𐴕𐴞 𐴁𐴠𐴙𐴕𐴧𐴝 𐴀𐴝𐴐𐴧𐴞𐴀𐴓𐴊𐴠 𐴀𐴥𐴞𐴃𐴝𐴌𐴝𐴌 𐴋𐴙𐴟𐴄𐴞 𐴁𐴡𐴊𐴡𐴓𐴞 𐴒𐴞𐴘𐴡𐴘 𐴱 𐴀𐴥𐴠 𐴑𐴟 𐴌𐴥𐴠 𐴄𐴥𐴗𐴠𐴚 𐴀𐴝𐴌 𐴑𐴟 𐴕𐴠 𐴔𐴙𐴥𐴟 𐴄𐴥𐴗𐴠𐴚 𐴊𐴟𐴕𐴥𐴞 𐴎𐴡𐴕 𐴈𐴡𐴕𐴥𐴡 𐴑𐴙𐴡𐴌 𐴀𐴝𐴙𐴓𐴡𐴃 𐴈𐴡𐴙𐴓𐴡𐴃 𐴕𐴡𐴎𐴝𐴘 𐴀𐴠𐴑 𐴎𐴡𐴕 𐴊𐴞𐴕𐴝𐴌𐴞 𐴈𐴝𐴔 𐴒𐴡𐴌𐴞 𐴈𐴥𐴝𐴀 𐴱 𐴀𐴝𐴌 𐴀𐴠𐴑 𐴎𐴡𐴕 𐴏𐴝𐴙𐴑𐴧𐴙𐴝 𐴓𐴡𐴘 𐴁𐴤𐴝𐴌𐴝𐴔𐴝𐴌𐴞 𐴏𐴡𐴓𐴠 𐴊𐴠 𐴔𐴝𐴕𐴟𐴙𐴐𐴢 𐴱 𐴑𐴙𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴁𐴡𐴕 𐴒𐴡𐴙𐴅𐴧𐴙𐴠 𐴊𐴠 𐴈𐴡𐴘 𐴕𐴡 𐴉𐴝𐴌𐴞 𐴀𐴝𐴌 𐴈𐴡𐴕𐴥𐴡 𐴈𐴥𐴡𐴁𐴡𐴌𐴀𐴥𐴡 𐴕𐴥𐴝𐴘 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴈𐴡𐴘𐴧𐴠 𐴱𐴱

SOURCES : https://www.rfa.org/burmese/

𐴌𐴝𐴏𐴞𐴊𐴡𐴚𐴡𐴃 𐴳 𐴎𐴡𐴕 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴠𐴍𐴞 𐴀𐴟𐴒𐴧𐴗𐴝 𐴌𐴠 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴌𐴝𐴏𐴞𐴊𐴡𐴚𐴡𐴌 𐴊𐴦𐴡𐴙𐴕 𐴀𐴠𐴓𐴝𐴑𐴝𐴌 𐴀𐴥𐴟𐴀 𐴒𐴝 𐴉𐴝𐴌𐴝𐴃 𐴅𐴟𐴕 𐴔𐴥𐴝𐴐𐴡𐴌 𐴰 𐴳 𐴃𐴝𐴌𐴞𐴑𐴡𐴃 𐴌𐴝𐴃𐴞𐴘𐴝 𐴓𐴡𐴒𐴁𐴤𐴡𐴒 𐴱 𐴱 𐴁𐴝𐴎𐴠 𐴒𐴤𐴡𐴌𐴡𐴌 𐴃𐴡𐴓𐴠 𐴓𐴝𐴌𐴥𐴝𐴙𐴌 𐴏𐴡𐴓𐴞𐴓𐴠 𐴓𐴗𐴝𐴘𐴁𐴝𐴌 𐴎𐴝𐴒𐴝 𐴁𐴝𐴕𐴥𐴝𐴘𐴧𐴠𐴊𐴠 𐴀𐴥𐴠𐴍𐴠 𐴓𐴗𐴝𐴘 𐴃𐴥𐴝𐴙𐴑𐴧𐴙𐴠𐴊𐴠 𐴀𐴥𐴠𐴃𐴧𐴟 𐴴 𐴎𐴡𐴕 𐴉𐴟𐴖𐴝𐴙𐴕𐴊𐴡𐴌 𐴔𐴝𐴣 𐴁𐴡𐴐𐴢 𐴶 𐴳 𐴁𐴡𐴏𐴡𐴌 𐴱 𐴁𐴠𐴍𐴞 𐴀𐴥𐴞𐴁𐴝 𐴌𐴠 𐴀𐴞𐴚𐴑𐴗𐴝𐴌𐴞 𐴒𐴡𐴌𐴥𐴝 𐴉𐴡𐴌𐴠𐴌 𐴈𐴡𐴘 𐴁𐴡𐴓𐴝𐴎𐴟𐴌𐴞 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴠 𐴊𐴤𐴡𐴌𐴞 𐴕𐴞𐴎𐴝𐴘 𐴳 𐴎𐴡𐴕 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴙𐴠 𐴱 𐴁𐴦𐴝𐴊𐴠 𐴈𐴡𐴕𐴥𐴞𐴑𐴧𐴙𐴝 𐴌𐴠 𐴕𐴡𐴈𐴡𐴘 𐴁𐴡𐴌𐴓𐴝 𐴰 𐴰 𐴰 𐴰 𐴲 𐴄𐴞𐴛𐴝 𐴓𐴡𐴘𐴎𐴝 𐴁𐴡𐴓𐴞 𐴈𐴦𐴡𐴘 𐴌𐴝𐴘𐴃𐴡𐴌 𐴀𐴠𐴑 𐴁𐴝𐴎𐴠𐴌 𐴊𐴠 𐴀𐴥𐴠𐴃𐴡𐴑𐴧𐴡𐴕𐴡𐴃 𐴊𐴤𐴡𐴌𐴞 𐴕𐴞𐴎𐴦𐴝𐴙𐴓 𐴊𐴠 𐴛𐴥𐴡𐴀𐴃 𐴁𐴝𐴌𐴥𐴝𐴘 𐴊𐴞𐴘𐴠 𐴱 𐴔𐴝𐴣 𐴌𐴠 𐴁𐴝𐴌𐴥𐴝𐴘 𐴊𐴞 𐴁𐴝𐴊𐴠 𐴀𐴥𐴞𐴁𐴝𐴌 𐴎𐴥𐴞 𐴀𐴟𐴒𐴧𐴗𐴝 𐴉𐴟𐴖𐴝 𐴁𐴞𐴘𐴝𐴘𐴧𐴠 𐴊𐴠 𐴔𐴟𐴄𐴥𐴠 𐴶 𐴊𐴞𐴕 𐴀𐴥𐴡𐴘𐴧𐴠𐴊𐴠 𐴱 𐴀𐴥𐴞𐴁𐴝𐴌𐴠 𐴁𐴡𐴕𐴋𐴟𐴑𐴡𐴌 𐴁𐴡𐴓𐴠 𐴓𐴡𐴘𐴎𐴝𐴌𐴒𐴡𐴘 𐴀𐴥𐴞𐴁𐴝 𐴁𐴠𐴐𐴥𐴞 𐴈𐴝𐴣𐴊𐴠𐴌𐴝𐴌 𐴱 𐴁𐴠𐴙𐴒𐴧𐴟𐴕 𐴔𐴝𐴌𐴞 𐴉𐴥𐴠𐴓𐴧𐴟𐴔 𐴁𐴡𐴓𐴞 𐴈𐴡𐴘 𐴊𐴤𐴡𐴔𐴑𐴞 𐴊𐴞 𐴁𐴡𐴓𐴝𐴎𐴟𐴌𐴞 𐴓𐴡𐴘 𐴎𐴝𐴌𐴒𐴡𐴘 𐴱 𐴀𐴥𐴞𐴁𐴝𐴌 𐴈𐴝𐴣𐴊𐴝𐴕𐴞 𐴐𐴥𐴡𐴘 𐴕𐴡𐴉𐴝𐴌𐴞 𐴀𐴥𐴞𐴁𐴝𐴌 𐴀𐴥𐴡𐴖 𐴌𐴠 𐴉𐴞𐴏𐴠 𐴉𐴞𐴏𐴠 𐴎𐴝𐴀𐴃 𐴃𐴥𐴝𐴙𐴑𐴧𐴙𐴠 𐴱 𐴃𐴦𐴡𐴘 𐴈𐴡𐴊𐴧𐴟𐴌 𐴎𐴝𐴘𐴁𐴝𐴊𐴠 𐴀𐴠𐴌𐴞 𐴊𐴞𐴉𐴥𐴠𐴙𐴓𐴧𐴙𐴠 𐴱𐴱

SOURCES : https://www.rfa.org/burmese/news/rakhine-rathedaung-woman-army-rape-07032020164747.html