𐴔𐴡𐴓𐴠𐴆𐴥𐴙𐴝𐴃 𐴀𐴝𐴌𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴐𐴥𐴡𐴔𐴒𐴡𐴌𐴞 𐴕𐴡𐴉𐴝𐴌𐴞𐴁𐴡 𐴈𐴡𐴘𐴧𐴠 / 𐴔𐴟𐴇𐴞𐴘𐴟𐴊𐴧𐴞𐴕 𐴱𐴱

𐴔𐴡𐴓𐴠𐴆𐴥𐴙𐴝𐴌 𐴁𐴡𐴌𐴡 𐴀𐴟𐴎𐴞𐴌 / 𐴔𐴟𐴇𐴞𐴘𐴟𐴊𐴧𐴞𐴕 𐴘𐴝𐴏𐴞𐴕𐴠 , 𐴊𐴟𐴕𐴞𐴘𐴝𐴘 𐴒𐴟𐴣𐴍𐴝 𐴏𐴥𐴡𐴌𐴝𐴘 𐴒𐴞𐴘𐴡𐴘𐴊𐴠 𐴑𐴡𐴌𐴟𐴕𐴝 𐴁𐴙𐴝𐴌𐴝𐴔𐴡𐴌 𐴊𐴟𐴖𐴝𐴌𐴝 𐴊𐴠𐴐𐴡𐴌 𐴀𐴝𐴔𐴡𐴊𐴡𐴕𐴞 𐴈𐴡𐴔𐴞 𐴊𐴠𐴐𐴢 𐴏𐴡𐴓𐴝𐴌 𐴀𐴝𐴁𐴡𐴏𐴃𐴝 𐴈𐴥𐴡𐴌𐴝𐴉𐴢 𐴀𐴥𐴡𐴘𐴧𐴠𐴊𐴠 𐴘𐴥𐴝𐴕𐴡𐴌 𐴁𐴝𐴎𐴝𐴊𐴞 , 𐴔𐴡𐴓𐴠𐴆𐴥𐴙𐴝𐴃 𐴀𐴝𐴌𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴐𐴥𐴡𐴔𐴒𐴡𐴌𐴞 𐴕𐴡𐴉𐴝𐴙𐴅𐴧𐴙𐴟𐴔 𐴁𐴡𐴓𐴞 𐴈𐴡𐴘𐴧𐴠 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴡𐴌 𐴎𐴟𐴓𐴟𐴔 𐴐𐴥𐴡𐴀𐴘 𐴕𐴡𐴉𐴝𐴌𐴞 𐴷 𐴱 𐴰 𐴲 𐴐𐴥𐴡𐴕 𐴓𐴡𐴃𐴞 𐴁𐴡𐴌𐴔𐴤𐴝𐴌 𐴁𐴥𐴟𐴃𐴡𐴌𐴃𐴟 𐴀𐴝𐴌 𐴁𐴝𐴚𐴓𐴝𐴊𐴠𐴐𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 𐴱 𐴁𐴤𐴝𐴓𐴝 𐴎𐴞𐴕𐴊𐴞𐴒𐴞 𐴁𐴝𐴕𐴝𐴘𐴁𐴝𐴌 𐴐𐴥𐴡𐴂𐴧𐴡𐴕 𐴓𐴡𐴘 𐴔𐴡𐴓𐴠𐴆𐴥𐴙𐴝 𐴀𐴝𐴘𐴧𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴑𐴠𐴙𐴏𐴧𐴟 𐴒𐴡𐴌𐴞 𐴁𐴡𐴌𐴓𐴝 𐴱 𐴔𐴡𐴓𐴠𐴆𐴥𐴙𐴝 𐴇𐴥𐴡𐴑𐴟𐴔𐴡𐴃𐴡𐴌𐴃𐴟 𐴁𐴤𐴝𐴓𐴝 𐴂𐴡𐴌𐴟𐴒𐴠𐴌𐴝𐴔 𐴀𐴝𐴐𐴧𐴞𐴀𐴓 𐴱 𐴔𐴡𐴕𐴃𐴡𐴌 𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴒𐴟𐴆𐴧𐴝 𐴀𐴥𐴡𐴘𐴧𐴡𐴌𐴠 , 𐴁𐴡𐴘𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴓𐴡𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝𐴌 𐴊𐴠𐴐𐴡𐴃 𐴑𐴡𐴌𐴟𐴕𐴝 𐴏𐴥𐴡𐴌𐴝𐴘 𐴎𐴝𐴌 𐴒𐴡𐴘𐴊𐴠 𐴈𐴦𐴡𐴌𐴊𐴠 𐴀𐴡𐴑𐴃𐴡𐴃 𐴀𐴝𐴌 𐴊𐴠𐴐𐴡𐴌 𐴀𐴝𐴔𐴡𐴊𐴡𐴕𐴞 𐴘𐴥𐴡 𐴁𐴠𐴃𐴝𐴓 𐴀𐴥𐴡𐴘 𐴎𐴝𐴌 𐴒𐴡𐴘𐴊𐴠 𐴀𐴡𐴑𐴃𐴡𐴃 𐴱 𐴌𐴟𐴇𐴝𐴙𐴚𐴒𐴙𐴝𐴌𐴓𐴝 𐴁𐴤𐴝𐴓𐴝 𐴁𐴤𐴝𐴉𐴝 𐴀𐴝𐴐𐴧𐴞𐴀𐴓 𐴊𐴠 𐴘𐴥𐴝𐴕 𐴊𐴠𐴈𐴝𐴘 𐴕𐴡𐴉𐴝𐴌𐴞 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝𐴘𐴧𐴝 𐴁𐴠𐴐𐴥𐴞 𐴁𐴟𐴄 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴌 𐴀𐴟𐴎𐴟 𐴄𐴥𐴠𐴓𐴞 𐴊𐴞𐴉𐴥𐴠𐴓𐴝𐴘𐴧𐴠 𐴀𐴝𐴌 𐴁𐴠𐴐𐴥𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴙𐴠 𐴱 𐴀𐴝𐴏𐴞𐴘𐴠𐴕 𐴑𐴡𐴔𐴞𐴄𐴞𐴃 𐴀𐴝𐴏𐴠𐴊𐴠 𐴁𐴡𐴌𐴔𐴤𐴝 𐴐𐴥𐴡𐴣𐴀 𐴰 𐴱 𐴊𐴠𐴐𐴡𐴌 𐴓𐴞𐴋𐴝𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴄𐴠𐴓𐴞𐴉𐴟𐴕𐴠 𐴔𐴞𐴄𐴞𐴚 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴍𐴠 𐴱 𐴁𐴡𐴌𐴡 𐴀𐴟𐴎𐴞𐴌 / 𐴔𐴟𐴇𐴞𐴘𐴟𐴊𐴧𐴞𐴕𐴠 𐴈𐴡𐴘𐴧𐴠𐴊𐴠 , 𐴀𐴝𐴣𐴀𐴌 𐴊𐴠𐴐𐴡𐴃 𐴑𐴡𐴖𐴥𐴞𐴋 – 𐴹 𐴱 𐴐𐴡𐴌 𐴊𐴟𐴖𐴝𐴌𐴝 𐴁𐴠𐴙𐴒𐴧𐴞𐴕 𐴄𐴝𐴕𐴝 𐴑𐴥𐴠𐴣𐴏𐴝 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴡𐴃 𐴀𐴝𐴌𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴌𐴝𐴑𐴤𐴞 𐴕𐴡𐴉𐴝𐴙𐴅𐴧𐴙𐴟𐴔 𐴱 𐴃𐴝𐴌𐴁𐴝𐴊𐴠 𐴘𐴥𐴡 𐴁𐴡𐴓𐴝𐴎𐴟𐴌𐴞 𐴀𐴝𐴐𐴤𐴝 𐴒𐴡𐴌𐴝 𐴎𐴝𐴌𐴊𐴠 𐴑𐴞 𐴈𐴡𐴘𐴓𐴠 𐴏𐴥𐴝𐴌𐴔𐴠 𐴎𐴝𐴘𐴁𐴡𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴓𐴡𐴘 𐴁𐴤𐴝𐴓𐴝 𐴁𐴡𐴌𐴃𐴡𐴖 𐴒𐴡𐴌𐴥𐴞𐴃 𐴉𐴝𐴌𐴠 𐴱 𐴀𐴝𐴏𐴞𐴘𐴠𐴕𐴠 𐴀𐴝𐴊𐴡𐴔 𐴁𐴞𐴘𐴝𐴌𐴞𐴌 𐴎𐴡𐴌𐴞𐴘𐴝 𐴁𐴟𐴄 𐴉𐴟𐴌𐴝𐴘 𐴉𐴟𐴌𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴓𐴠𐴆𐴥𐴙𐴝 , 𐴀𐴞𐴕𐴋𐴟𐴕𐴞𐴆𐴥𐴙𐴝 𐴉𐴦𐴡𐴣𐴏𐴡𐴕𐴠 𐴀𐴡𐴐𐴥𐴝𐴕𐴃𐴞 𐴉𐴡𐴘𐴊𐴝 𐴀𐴥𐴡𐴌𐴊𐴠 𐴘𐴥𐴝𐴕𐴡𐴌𐴓𐴝 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴕𐴞𐴕𐴊𐴝 𐴒𐴡𐴙𐴅𐴧𐴙𐴠 𐴱 𐴑𐴞𐴕𐴃𐴟 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴠𐴃𐴠 𐴀𐴝𐴌𐴑𐴝𐴕𐴡𐴃 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔𐴡𐴌𐴠 𐴎𐴟𐴓𐴟𐴔 𐴕𐴡𐴒𐴡𐴌𐴠𐴌 𐴈𐴡𐴘𐴧𐴠 𐴱 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴤𐴝𐴌 𐴊𐴡𐴐𐴥𐴡𐴙𐴃𐴧𐴝 𐴕𐴡𐴀 𐴀𐴥𐴞𐴃𐴝𐴌𐴝 𐴊𐴦𐴡𐴙𐴕 𐴀𐴝𐴏𐴞𐴘𐴝𐴌 𐴊𐴠𐴐𐴡𐴌𐴃𐴟 𐴁𐴠𐴑𐴝𐴕𐴟𐴕𐴞 𐴏𐴟𐴌𐴒𐴡𐴌𐴞 𐴁𐴡𐴌𐴔𐴤𐴝𐴃 𐴒𐴥𐴡𐴙𐴓𐴧𐴙𐴠 𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴔𐴡𐴓𐴠𐴆𐴥𐴙𐴝𐴃 𐴀𐴝𐴏𐴠𐴊𐴠 𐴓𐴝𐴑𐴤𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴃𐴡𐴌𐴝𐴃𐴡𐴌𐴞 𐴀𐴡𐴙𐴕𐴧𐴡 𐴀𐴠𐴑𐴧𐴝𐴕 𐴊𐴠𐴐𐴡𐴃 𐴉𐴦𐴡𐴣𐴏𐴝𐴘 𐴊𐴞𐴁𐴡𐴌𐴓𐴝 / 𐴔𐴟𐴇𐴞𐴘𐴟𐴊𐴧𐴞𐴕𐴠 𐴘𐴟 𐴀𐴠𐴕𐴡𐴌𐴠 𐴈𐴡𐴘𐴧𐴠 𐴱𐴱

Sources : https://www.freemalaysiatoday.com/category/nation/2020/06/26/malaysia-cant-take-any-more-rohingya-refugees-says-muhyiddin/