𐴌𐴟𐴇𐴝𐴙𐴚𐴒𐴙𐴝 𐴏𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴀𐴠𐴓𐴝𐴑𐴝𐴀𐴞 𐴅𐴟𐴖𐴝𐴁 𐴁𐴡𐴊𐴡𐴓𐴝 𐴉𐴡𐴌𐴞𐴁𐴡 : 𐴀𐴝𐴏𐴞𐴘𐴠𐴕 𐴱𐴱

𐴏𐴥𐴝𐴀𐴌𐴝 𐴃𐴟𐴖𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴝𐴏𐴝𐴘 𐴓𐴡𐴀 , 𐴁𐴡𐴌𐴔𐴤𐴝𐴌𐴠 𐴎𐴟𐴓𐴟𐴔 𐴈𐴥𐴡𐴃𐴡𐴔 𐴒𐴡𐴌𐴞𐴁𐴡𐴌𐴓𐴝 𐴁𐴠𐴐𐴥𐴞 𐴒𐴡𐴌𐴞 𐴏𐴞𐴂𐴢 𐴊𐴡𐴀 𐴱

𐴁𐴡𐴌𐴔𐴤𐴝𐴌 𐴁𐴥𐴟𐴃𐴡𐴌𐴠 𐴀𐴝𐴌 𐴁𐴦𐴝𐴌𐴠 𐴊𐴟𐴑 𐴉𐴝𐴌 𐴊𐴠 𐴈𐴡𐴔 𐴐𐴥𐴡𐴙𐴚𐴒𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴏𐴡𐴚𐴑𐴡𐴄 𐴉𐴥𐴟𐴌𐴝𐴘 𐴁𐴡𐴌𐴓𐴝 𐴁𐴥𐴝𐴉𐴞𐴁𐴝𐴌 𐴁𐴝𐴁𐴡𐴃𐴠 𐴀𐴝𐴌𐴅𐴥𐴠𐴕 𐴔𐴞𐴄𐴞𐴚 𐴔𐴝𐴃𐴝𐴘 𐴈𐴥𐴝𐴄𐴞 𐴂𐴠𐴓𐴝𐴕 𐴁𐴝𐴕𐴝 𐴉𐴡𐴌𐴞𐴁𐴥𐴡 𐴁𐴡𐴓𐴞 𐴱 𐴀𐴝𐴙𐴅𐴧𐴙𐴝 ( 𐴇𐴙𐴥𐴟 𐴔𐴥𐴠𐴕 𐴌𐴥𐴝𐴙𐴄 𐴖𐴥𐴝𐴆𐴠 ) 𐴀𐴝𐴏𐴞𐴘𐴠𐴕 𐴓𐴞𐴀𐴋𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴇𐴥𐴡𐴑𐴧𐴡𐴌 𐴔𐴝𐴀𐴔𐴠𐴓𐴝 𐴌𐴠 𐴀𐴟𐴎𐴟 𐴒𐴡𐴌𐴞𐴁𐴡𐴌𐴓𐴝 / 𐴁𐴞𐴘𐴠𐴄𐴕𐴝𐴔 𐴀𐴠 𐴁𐴡𐴏𐴡𐴌 𐴀𐴝𐴏𐴞𐴘𐴠𐴕𐴡𐴌 𐴏𐴥𐴡𐴊𐴡𐴌 𐴀𐴥𐴞𐴏𐴝𐴉𐴠 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴔𐴠𐴓𐴝 𐴓𐴡𐴘 𐴁𐴝𐴙𐴅𐴧𐴝𐴇 𐴀𐴝𐴏𐴠𐴊𐴠 𐴊𐴠𐴐𐴢 𐴀𐴥𐴡𐴑𐴧𐴡𐴓 𐴀𐴝𐴌 𐴑𐴡𐴖𐴔𐴞 𐴏𐴥𐴡𐴔𐴡𐴒𐴝 𐴌𐴠 𐴘𐴥𐴡 𐴉𐴥𐴟𐴣𐴖𐴝𐴣𐴃𐴞 𐴔𐴞𐴓𐴝𐴘 𐴀𐴠𐴓𐴝𐴑𐴝𐴀𐴞 𐴐𐴥𐴡𐴀𐴎𐴟𐴒𐴞𐴃𐴝 𐴀𐴝𐴌 𐴂𐴡𐴌𐴟𐴒𐴠𐴌𐴝𐴔𐴡𐴌𐴠 𐴔𐴟𐴀𐴔𐴧𐴞𐴑𐴧𐴙𐴝 𐴁𐴝𐴌𐴥𐴝𐴘 𐴁𐴡𐴌𐴓𐴝 𐴑𐴟𐴐𐴞𐴐𐴢 𐴒𐴡𐴌𐴡𐴕 𐴏𐴝𐴀 𐴱 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴔𐴡𐴓𐴠𐴆𐴥𐴙𐴝𐴌 𐴁𐴡𐴌 𐴀𐴟𐴎𐴞𐴌 / 𐴘𐴝𐴏𐴞𐴕 𐴔𐴟𐴇𐴞𐴘𐴟𐴊𐴧𐴞𐴕 𐴋𐴦𐴡𐴣𐴌 𐴒𐴡𐴌𐴞 𐴀𐴦𐴟𐴣𐴏𐴝 𐴓𐴡𐴘𐴁𐴡𐴌𐴓𐴝 𐴁𐴞𐴘𐴠𐴄𐴕𐴝𐴔𐴡𐴌𐴠 𐴈𐴡𐴘𐴧𐴠 𐴱 𐴀𐴝𐴏𐴞𐴘𐴝𐴌 𐴋𐴝𐴘𐴌𐴠𐴑𐴄𐴝𐴌 / 𐴁𐴡𐴌𐴝𐴋 𐴀𐴝𐴊𐴡𐴔𐴠 𐴈𐴡𐴘𐴧𐴠𐴊𐴠 , 𐴈𐴡𐴀𐴠𐴑 𐴁𐴡𐴏𐴡𐴌 𐴀𐴥𐴡𐴌𐴊𐴠 𐴀𐴝𐴏𐴞𐴘𐴠𐴕𐴡𐴌 𐴓𐴞𐴀𐴋𐴝𐴌 𐴀𐴥𐴡𐴑𐴧𐴡𐴓𐴠 𐴑𐴠𐴙𐴏𐴧𐴟 𐴕𐴥𐴡𐴀 𐴒𐴡𐴌𐴠 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴏𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴕𐴟𐴖𐴝 𐴁𐴥𐴝𐴉𐴠 𐴁𐴠𐴐𐴥𐴞 𐴒𐴡𐴌𐴞 𐴁𐴥𐴝𐴉𐴡𐴕 𐴎𐴡𐴌𐴟𐴌𐴞 𐴱𐴱

𐴁𐴡𐴌𐴔𐴤𐴝𐴌 𐴁𐴥𐴟𐴃𐴡𐴌𐴠 𐴀𐴝𐴌 𐴁𐴦𐴝𐴌𐴠 𐴑𐴠𐴀𐴠𐴔𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴠𐴉𐴝𐴎𐴡𐴃 𐴀𐴝𐴌 𐴏𐴥𐴝𐴀𐴌𐴝𐴌 𐴁𐴝𐴁𐴡𐴃𐴠 𐴱 𐴀𐴝𐴏𐴞𐴘𐴠𐴕𐴡𐴌 𐴀𐴠𐴓𐴝𐴑𐴝𐴀𐴞 𐴅𐴟𐴖𐴝𐴁 𐴀𐴝𐴌 ( 𐴌𐴞𐴀𐴠𐴑𐴆𐴥𐴠𐴕𐴡𐴌 ) 𐴊𐴡𐴌𐴤𐴡 𐴔𐴡𐴌𐴤𐴡 𐴎𐴡𐴌𐴟𐴌𐴡𐴃 𐴀𐴥𐴡𐴘𐴧𐴠 𐴱 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴠𐴙𐴒𐴧𐴟𐴕 𐴐𐴥𐴝𐴕𐴃𐴞 𐴀𐴝𐴌 𐴇𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴃𐴠 𐴕𐴞𐴎𐴡𐴌 𐴒𐴤𐴡𐴌𐴡𐴃 𐴎𐴝𐴘 𐴉𐴝𐴌𐴞𐴁𐴝𐴌 𐴇𐴥𐴝𐴓𐴡𐴃 𐴁𐴝𐴕𐴝𐴘 𐴁𐴡𐴌𐴓𐴝 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴏𐴞𐴂𐴢 𐴊𐴡𐴕 𐴎𐴡𐴌𐴟𐴌𐴞 𐴱 𐴒𐴡𐴃𐴡 𐴅𐴝𐴕𐴖𐴝𐴌𐴞 𐴀𐴥𐴡𐴘𐴃𐴠 𐴔𐴝𐴌𐴠𐴆 𐴓𐴡𐴃 𐴁𐴝𐴚𐴓𐴝𐴊𐴠𐴐𐴢 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 𐴱 𐴏𐴥𐴝𐴀𐴌𐴝 ( 𐴉𐴝𐴕𐴤𐴝 ) 𐴃𐴟𐴖𐴝𐴘𐴁𐴝𐴌 𐴀𐴞𐴏𐴧𐴝 𐴓𐴡𐴘 𐴐𐴥𐴡𐴃𐴝 𐴐𐴥𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴱 𐴁𐴠𐴐𐴥𐴝 𐴁𐴠𐴐𐴥𐴞 𐴁𐴟𐴄 𐴓𐴡𐴘 𐴔𐴡𐴓𐴠𐴆𐴥𐴙𐴝 𐴀𐴝𐴙𐴐𐴧𐴞𐴀𐴓 𐴔𐴡𐴕𐴃𐴡𐴌 𐴔𐴡𐴓𐴠𐴆𐴥𐴙𐴝 𐴇𐴥𐴡𐴑𐴟𐴔𐴡𐴃𐴠 𐴈𐴥𐴝𐴕𐴝 𐴉𐴝𐴕𐴥𐴞 𐴕𐴡𐴊𐴞 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴌 𐴀𐴟𐴎𐴟 𐴄𐴥𐴠𐴓𐴞 𐴊𐴞𐴘𐴠 𐴱 𐴀𐴠 𐴇𐴥𐴝𐴉𐴃𐴝𐴌 𐴐𐴥𐴟𐴌𐴟𐴃 𐴀𐴞𐴕𐴋𐴟𐴕𐴞𐴆𐴥𐴙𐴌 𐴀𐴥𐴠𐴑𐴇 𐴀𐴠𐴓𐴝𐴑𐴝𐴌 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓 𐴀𐴝𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴁𐴥𐴝𐴐𐴠𐴌𐴊𐴠 𐴁𐴟𐴄 𐴀𐴠𐴑𐴧𐴝𐴕𐴡𐴌𐴃𐴟 𐴰 𐴳 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴐𐴥𐴡𐴣𐴀 𐴴 𐴹 𐴎𐴡𐴕 𐴌𐴟𐴇𐴝𐴙𐴕𐴒𐴙𐴝 𐴁𐴝𐴏𐴝𐴘 𐴑𐴟𐴓𐴡𐴃 𐴃𐴟𐴓𐴤𐴞 𐴓𐴡𐴘𐴧𐴠 𐴱𐴱

Sources : https://www.hrw.org/news/2020/06/26/asean-overhaul-regional-response-rohingya-crisis