𐴔𐴡𐴓𐴠𐴆𐴥𐴙𐴝 𐴘𐴠 𐴁𐴟𐴍𐴡𐴌𐴃𐴟 𐴃𐴟𐴓𐴧𐴠𐴀𐴓 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴕 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴝𐴘 𐴊𐴞𐴃 𐴉𐴝𐴌𐴠 𐴱𐴱

𐴅𐴟𐴕 𐴔𐴝𐴐𐴡𐴌 𐴸 𐴃𐴝𐴌𐴞𐴑𐴡𐴃 𐴓𐴡𐴚𐴑𐴝𐴖𐴞 𐴋𐴞𐴘𐴝𐴌 𐴈𐴝𐴣𐴏𐴠 𐴀𐴞𐴕𐴅𐴞𐴓 𐴈𐴥𐴡𐴌𐴝𐴉𐴢 𐴀𐴥𐴡𐴘𐴧𐴡𐴌𐴠 𐴁𐴥𐴝𐴐𐴠𐴌𐴊𐴠 𐴁𐴟𐴍𐴡𐴌𐴃𐴟 𐴱 𐴃𐴟𐴓𐴞 𐴓𐴡𐴙𐴀𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴹 𐴶 𐴲 𐴎𐴡𐴕𐴡𐴌𐴠 𐴁𐴟𐴄 𐴘𐴥𐴝𐴕 𐴇𐴥𐴡𐴚 𐴒𐴡𐴌𐴞 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴝𐴘 𐴊𐴞𐴁𐴝𐴌 𐴁𐴝𐴁𐴡𐴃𐴠 𐴔𐴡𐴓𐴠𐴆𐴥𐴙𐴝𐴌 𐴇𐴥𐴡𐴑𐴟𐴔𐴡𐴃𐴠 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴠 𐴁𐴡𐴓𐴞 𐴊𐴟𐴘 𐴎𐴡𐴕 𐴇𐴠𐴉𐴝𐴎𐴡𐴃𐴞 𐴉𐴟𐴓𐴞𐴆𐴠 𐴌𐴗𐴠𐴄𐴝𐴌 𐴈𐴥𐴡𐴁𐴡𐴌 𐴀𐴥𐴡𐴓𐴝 𐴌𐴠 𐴈𐴡𐴘𐴧𐴠 𐴱 𐴀𐴝𐴌𐴑𐴝𐴕 𐴂𐴡𐴌𐴡𐴅𐴥𐴠𐴑𐴄 𐴕𐴝𐴔𐴡𐴌 𐴀𐴟𐴒𐴧𐴗𐴝 𐴐𐴥𐴡𐴔𐴝𐴎𐴥𐴞𐴑 𐴋𐴦𐴝𐴘𐴧𐴠 , 𐴑𐴠𐴙𐴏𐴧𐴟 𐴊𐴞𐴕 𐴀𐴝𐴒𐴠 𐴊𐴡𐴙𐴅𐴧𐴙𐴝𐴌𐴃𐴟 𐴃𐴟 𐴃𐴟𐴓𐴧𐴞𐴀𐴓 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴕𐴡𐴌𐴠 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴝𐴘 𐴕𐴡𐴊𐴞𐴁𐴡𐴌𐴓𐴝 𐴔𐴡𐴓𐴠𐴆𐴥𐴙𐴝𐴌 𐴇𐴥𐴡𐴑𐴟𐴔𐴡𐴃𐴡𐴌𐴠 𐴈𐴡𐴘𐴧𐴠 𐴱 𐴁𐴡𐴌𐴔𐴤𐴝𐴌 𐴎𐴟𐴓𐴟𐴔 𐴐𐴥𐴡𐴘 𐴕𐴡𐴉𐴝𐴌𐴞 𐴁𐴤𐴝𐴓𐴝 𐴀𐴠𐴑𐴧𐴝𐴕 𐴀𐴝𐴐𐴥𐴝 𐴓𐴡𐴘 𐴀𐴠𐴈𐴡𐴕 𐴁𐴠𐴐𐴥𐴝 𐴁𐴠𐴐𐴥𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴡𐴃 𐴉𐴦𐴡𐴛𐴏𐴧𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴔𐴡𐴓𐴠𐴆𐴥𐴙𐴝𐴃 𐴉𐴦𐴡𐴛𐴏𐴧𐴠𐴊𐴠 𐴀𐴥𐴟𐴕𐴡𐴌 𐴁𐴝𐴁𐴡𐴃𐴠 𐴔𐴡𐴓𐴠𐴆𐴥𐴙𐴝 𐴇𐴥𐴡𐴑𐴟𐴔𐴡𐴃𐴡𐴌𐴃𐴟 𐴁𐴤𐴝𐴓𐴝 𐴀𐴠𐴑𐴧𐴝𐴕 𐴔𐴡𐴕𐴎𐴞𐴓 𐴃𐴥𐴝𐴑𐴞𐴓𐴠 𐴘𐴥𐴡 𐴱𐴱

𐴑𐴡𐴌𐴟𐴕𐴝 𐴖𐴝𐴘𐴌𐴠𐴏𐴡𐴌 𐴁𐴝𐴁𐴡𐴃𐴠 𐴏𐴝𐴙𐴌𐴀𐴥𐴡 𐴋𐴥𐴝𐴑𐴡𐴌𐴃𐴟 𐴁𐴡𐴖𐴋𐴝𐴌 𐴁𐴡𐴕 𐴒𐴡𐴌𐴞 𐴌𐴝𐴙𐴑𐴧𐴙𐴠 𐴊𐴠 𐴀𐴡𐴑𐴃𐴡𐴃 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴝𐴌 𐴑𐴡𐴁𐴟𐴓 𐴕𐴡 𐴒𐴡𐴌𐴥𐴞𐴁𐴡 𐴁𐴡𐴓𐴞 𐴔𐴡𐴓𐴠𐴆𐴥𐴙𐴝𐴌 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 𐴱 𐴔𐴡𐴓𐴠𐴆𐴥𐴙𐴝 𐴘𐴠 𐴸 / 𐴃𐴝𐴌𐴞𐴑 𐴅𐴟𐴕 𐴔𐴝𐴐𐴡𐴃 𐴊𐴡𐴙𐴅𐴧𐴙𐴝𐴌𐴃𐴟 𐴃𐴟𐴓𐴧𐴞𐴀𐴓𐴊𐴠 𐴹 𐴶 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴟𐴕𐴡𐴌𐴠 𐴖𐴝𐴉𐴠𐴏𐴢 𐴓𐴡𐴘 𐴁𐴡𐴌𐴓𐴝 𐴁𐴝𐴚𐴓𐴝𐴊𐴠𐴐𐴡𐴌𐴠 𐴔𐴡𐴓𐴠𐴆𐴥𐴙𐴝𐴌 𐴇𐴥𐴡𐴑𐴟𐴔𐴡𐴃𐴠 𐴈𐴦𐴡𐴘𐴓 𐴱 𐴔𐴡𐴕𐴃𐴡𐴌 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴓𐴡𐴒𐴠 𐴓𐴡𐴒𐴠 𐴀𐴞𐴚𐴑𐴝𐴌 𐴒𐴡𐴙𐴅𐴧𐴙𐴠 𐴱 𐴔𐴝𐴕𐴟𐴙𐴐𐴢 𐴀𐴥𐴟𐴀𐴕𐴡𐴌𐴠 𐴖𐴝𐴉𐴠𐴏𐴢 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴝𐴘 𐴊𐴞𐴁𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴝 𐴱 𐴔𐴡𐴕𐴃𐴡𐴌 𐴈𐴥𐴝𐴄𐴞 𐴉𐴝𐴘𐴏𐴠𐴓𐴝 𐴀𐴝𐴙𐴅𐴀𐴥𐴡 𐴕𐴡 𐴀𐴥𐴡 𐴱 𐴀𐴥𐴡𐴕𐴡𐴌 𐴏𐴥𐴟𐴌𐴡𐴃𐴡𐴃 𐴔𐴝𐴕𐴟𐴙𐴐𐴢 𐴀𐴥𐴟𐴕𐴡𐴌𐴠 𐴈𐴥𐴝𐴕𐴝 𐴉𐴝𐴕𐴞 𐴁𐴠𐴙𐴒𐴧𐴞𐴕 𐴊𐴞𐴘𐴡𐴌𐴠 𐴁𐴥𐴝𐴐𐴝𐴘 𐴊𐴞𐴁𐴡𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴠𐴉𐴝𐴎𐴡𐴃𐴞 𐴏𐴥𐴝𐴀𐴌𐴝 𐴃𐴟𐴖𐴝𐴘 𐴁𐴡𐴌𐴓𐴝 𐴱 𐴀𐴥𐴠𐴍𐴠 𐴒𐴞𐴘𐴠𐴊𐴠 𐴀𐴥𐴠𐴃𐴡𐴌𐴓𐴝 𐴀𐴡𐴙𐴕𐴧𐴡 𐴀𐴠𐴑𐴧𐴝𐴕 𐴊𐴠𐴐𐴡𐴃 𐴀𐴥𐴟𐴊𐴧𐴝 𐴉𐴦𐴡𐴣𐴏𐴝𐴘 𐴊𐴞 𐴕𐴡𐴉𐴝𐴌𐴥𐴞𐴁𐴡 𐴎𐴡𐴑𐴊𐴠 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴝𐴘 𐴊𐴞𐴁𐴡 𐴱 𐴎𐴡𐴊𐴞 𐴀𐴥𐴠𐴀𐴕 𐴒𐴡𐴌𐴠𐴌𐴊𐴠 𐴀𐴥𐴡𐴘𐴓𐴠 𐴘𐴥𐴝𐴕 𐴀𐴞𐴕𐴏𐴝𐴕𐴞𐴘𐴡𐴃𐴞 𐴈𐴝𐴔 𐴕𐴡𐴀𐴡𐴘𐴁𐴡 𐴱𐴱

Sources : https://www.dhakatribune.com/world/2020/06/18/malaysia-could-send-rohingya-detainees-back-out-to-sea