𐴔𐴡𐴏𐴞𐴁𐴡𐴃𐴡𐴌 𐴀𐴡𐴑𐴃𐴡 𐴉𐴥𐴟𐴌𐴝𐴘𐴓𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴖𐴝𐴉𐴠𐴏𐴢 𐴓𐴡𐴕𐴡𐴌 𐴈𐴝𐴔 𐴀𐴥𐴡𐴘𐴁𐴡 𐴱𐴱

𐴑𐴡𐴌𐴟𐴕𐴝 𐴖𐴝𐴘𐴌𐴠𐴏𐴡 𐴌𐴠 𐴑𐴝𐴁𐴟 𐴒𐴡𐴌𐴞 𐴀𐴥𐴠𐴃𐴧𐴟 𐴁𐴝𐴏𐴞 𐴉𐴝𐴌𐴞𐴌 𐴊𐴠 𐴀𐴥𐴡𐴘𐴓𐴠 𐴱 𐴁𐴝𐴚𐴓𐴝𐴊𐴠𐴐𐴡𐴌𐴃𐴟 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴖𐴝𐴉𐴠𐴏𐴢 𐴓𐴡𐴕𐴡𐴌 𐴈𐴝𐴔 𐴐𐴥𐴟𐴌𐴟 𐴀𐴥𐴡𐴘𐴁𐴡 𐴁𐴡𐴓𐴞 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴖𐴝𐴉𐴠𐴏𐴢 𐴓𐴡𐴘𐴧𐴟𐴔 𐴁𐴡𐴓𐴞 𐴈𐴡𐴘𐴓𐴠 𐴘𐴥𐴡 𐴱 𐴌𐴞𐴉𐴟𐴎𐴞 𐴖𐴝𐴉𐴠𐴏𐴢 𐴓𐴡𐴕𐴡𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴃𐴡𐴘𐴧𐴝𐴌𐴞 𐴕𐴡 𐴒𐴡𐴌𐴠𐴌 𐴁𐴡𐴓𐴞 𐴱 𐴌𐴞𐴉𐴟𐴎𐴞 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴝𐴔𐴒𐴡𐴌𐴦𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴑𐴡𐴌𐴟𐴕𐴝𐴌 𐴔𐴡𐴏𐴡𐴓𐴝 𐴑𐴝𐴁𐴟𐴌 𐴁𐴥𐴟𐴃𐴡𐴌𐴠 𐴀𐴝𐴘𐴓𐴠 𐴁𐴝𐴚𐴓𐴝𐴊𐴠𐴐𐴢 – 𐴁𐴡𐴌𐴔𐴤𐴝 𐴊𐴟𐴘 𐴊𐴠𐴐𐴡𐴌 𐴂𐴡𐴌𐴟𐴒𐴠𐴌𐴝𐴔 𐴔𐴡𐴎𐴞𐴕 𐴁𐴝𐴚𐴓𐴝𐴊𐴠𐴐𐴡𐴌𐴃𐴟 𐴌𐴟𐴇𐴝𐴣𐴚𐴒𐴙𐴝 𐴌𐴞𐴉𐴟𐴎𐴞 𐴒𐴡𐴏𐴞 𐴓𐴡𐴘𐴁𐴝𐴌 𐴈𐴝𐴔 𐴐𐴥𐴟𐴌𐴟 𐴒𐴡𐴌𐴞𐴁𐴡 𐴁𐴡𐴓𐴞 𐴱 𐴀𐴝𐴌𐴑𐴝𐴕𐴡𐴃 𐴔𐴝𐴙𐴕𐴐𐴡𐴌 𐴊𐴟𐴑 𐴐𐴥𐴟𐴑 𐴁𐴟𐴎𐴞 𐴔𐴡𐴊𐴡𐴊 𐴒𐴡𐴌𐴠𐴊𐴠 𐴀𐴝𐴌 𐴏𐴝𐴀𐴏𐴞𐴃𐴝 𐴒𐴡𐴌𐴠𐴊𐴠 𐴀𐴟𐴎𐴞𐴌 / 𐴋𐴝𐴑𐴄𐴡𐴌 𐴖𐴥𐴝𐴚 𐴔𐴠𐴌𐴥𐴠 𐴀𐴥𐴠 𐴘𐴠 𐴈𐴡𐴘𐴧𐴠 𐴱 𐴊𐴟𐴕𐴞𐴘𐴝𐴘 𐴁𐴠𐴙𐴒𐴧𐴟𐴓𐴧𐴝 𐴑𐴡𐴌𐴟𐴕𐴝 𐴖𐴝𐴘𐴌𐴠𐴏𐴡𐴌 𐴔𐴡𐴏𐴞𐴁𐴡𐴃 𐴐𐴥𐴟𐴌𐴟 𐴀𐴥𐴡𐴕𐴠 𐴱 𐴌𐴝𐴎𐴞𐴕𐴝𐴔𐴝 𐴔𐴡𐴎𐴞𐴕 𐴒𐴡𐴃𐴡 𐴀𐴠𐴂𐴌𐴞𐴓 𐴔𐴝𐴐𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴒𐴡𐴏𐴞 𐴓𐴡𐴘𐴁𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴡𐴌𐴔𐴤𐴝 𐴘𐴠 𐴃𐴡𐴙𐴃𐴧𐴝 𐴃𐴥𐴞𐴘𐴝 𐴒𐴡𐴌𐴝𐴘𐴧𐴠 𐴊𐴠 𐴱𐴱

𐴁𐴝𐴚𐴓𐴝𐴊𐴠𐴐𐴡𐴌𐴃𐴟 𐴌𐴞𐴉𐴟𐴎𐴞 𐴒𐴡𐴏𐴥𐴞 𐴓𐴡𐴘𐴁𐴡𐴌𐴓𐴝 𐴸 𐴱 𐴰 𐴲 𐴐𐴡𐴕 𐴓𐴡𐴃𐴞 𐴁𐴡𐴌𐴔𐴤𐴝 𐴘𐴠 𐴑𐴟𐴐𐴞𐴐𐴢 𐴒𐴡𐴙𐴓𐴧𐴠 𐴘𐴥𐴡 𐴀𐴝𐴙𐴅𐴀𐴥𐴡 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴈𐴝𐴔 𐴕𐴡 𐴀𐴥𐴡 𐴱 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴀𐴝𐴘𐴁𐴡𐴊𐴠 𐴀𐴥𐴞𐴃𐴝𐴌𐴝 𐴌𐴠 𐴕𐴞𐴎𐴡𐴌 𐴕𐴞𐴎𐴡𐴌 𐴎𐴝𐴒𐴝𐴃 𐴃𐴥𐴝𐴑𐴞𐴃𐴡 𐴊𐴦𐴡𐴕 𐴀𐴝𐴌 𐴊𐴠𐴐𐴡𐴙𐴃𐴧𐴝 𐴇𐴥𐴡𐴑 𐴁𐴠𐴙𐴒𐴧𐴞𐴕 𐴊𐴡𐴕𐴡𐴌 𐴱 𐴌𐴞𐴉𐴟𐴎𐴞𐴌 𐴊𐴝𐴁𐴞 𐴀𐴝𐴏𐴠𐴊𐴠 𐴀𐴥𐴞𐴕𐴡𐴌 𐴁𐴝𐴁𐴡𐴃𐴠 𐴁𐴡𐴌𐴔𐴤𐴝 𐴇𐴥𐴡𐴑𐴟𐴔𐴡𐴃𐴠 𐴀𐴝𐴙𐴎𐴀𐴥𐴡 𐴑𐴠𐴙𐴏𐴧𐴟 𐴕𐴦𐴡 𐴒𐴡𐴌𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴖𐴝𐴉𐴠𐴏𐴢 𐴎𐴦𐴡𐴕 𐴀𐴥𐴡𐴘 𐴕𐴡 𐴉𐴝𐴌𐴥𐴞 𐴁𐴡𐴁𐴡𐴓𐴞 𐴱 𐴌𐴞𐴉𐴟𐴎𐴞𐴌 𐴅𐴟𐴖𐴝𐴕 𐴉𐴝𐴄𐴞𐴌 𐴋𐴝𐴘𐴌𐴠𐴑𐴄𐴝𐴌 / 𐴑𐴟 𐴑𐴞𐴚 𐴔𐴡𐴚𐴠 𐴈𐴡𐴘𐴧𐴠 𐴱 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴑𐴠𐴀𐴠𐴔𐴡𐴃 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝 𐴀𐴝𐴌 𐴑𐴠𐴀𐴠𐴔𐴡𐴌 𐴁𐴦𐴝𐴌𐴠 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴝𐴘𐴅𐴀𐴥𐴡 𐴉𐴡𐴙𐴅𐴧𐴡𐴕𐴃𐴡 𐴊𐴠𐴐𐴡𐴙𐴃𐴧𐴝 𐴇𐴥𐴡𐴑 𐴕𐴦𐴡 𐴉𐴝𐴊𐴠 𐴀𐴥𐴠𐴃𐴡𐴓𐴧𐴝 𐴁𐴝𐴚𐴓𐴝𐴊𐴠𐴐𐴢 𐴑𐴠𐴀𐴠𐴔𐴡𐴌𐴃𐴟 𐴌𐴞𐴉𐴟𐴎𐴞 𐴎𐴦𐴡𐴕 𐴔𐴡𐴐𐴑𐴞𐴓 𐴀𐴥𐴡𐴘𐴁𐴡 𐴁𐴡𐴓𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴀𐴝𐴌𐴑𐴝𐴕𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴙𐴒𐴧𐴟𐴕𐴡𐴌𐴠 𐴉𐴟𐴌𐴟𐴏𐴧𐴝𐴉𐴢 𐴊𐴠𐴐𐴡𐴙𐴃𐴧𐴝 𐴇𐴥𐴡𐴑 𐴊𐴞𐴉𐴥𐴠𐴓𐴝𐴘𐴓𐴠 𐴱 𐴁𐴝𐴚𐴓𐴝𐴊𐴠𐴐𐴢 𐴑𐴠𐴀𐴠𐴔𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴓𐴡𐴌𐴠 𐴀𐴝𐴘𐴃𐴡 𐴈𐴗𐴝 𐴀𐴥𐴟𐴊𐴧𐴝 𐴕𐴡 𐴉𐴡𐴌𐴞𐴁𐴡 𐴱 𐴃𐴝𐴌𐴝 𐴕𐴞𐴎𐴠 𐴕𐴞𐴎𐴠 𐴀𐴦𐴝𐴘 𐴎𐴝𐴘𐴁𐴡𐴒𐴡𐴘 𐴁𐴡𐴓𐴞 𐴑𐴟𐴉𐴞 𐴀𐴝𐴕𐴧𐴝𐴕 𐴑𐴡𐴔𐴞𐴆𐴠𐴕𐴡𐴌 𐴉𐴟𐴌𐴝𐴕 𐴔𐴠𐴔𐴁𐴡𐴌 / 𐴀𐴥𐴟𐴀 𐴀𐴥𐴠 𐴓𐴗𐴝𐴚𐴠 𐴈𐴡𐴘𐴧𐴠 𐴱𐴱

Sources : https://www.rfa.org/burmese/program_2/rohingya-repatriation-06162020050543.html