𐴔𐴡𐴓𐴠𐴆𐴥𐴙𐴝𐴃 𐴁𐴡𐴕 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴠 𐴁𐴝𐴚𐴓𐴝𐴊𐴠𐴐𐴠 𐴕𐴡 𐴀𐴝𐴕𐴥𐴞𐴁𐴥𐴡 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 𐴱 𐴁𐴟𐴄 𐴓𐴡𐴘 𐴔𐴡𐴓𐴠𐴆𐴥𐴙𐴝 𐴎𐴝𐴘𐴁𐴡𐴌𐴓𐴝 𐴒𐴞𐴀𐴓𐴊𐴠 𐴹 𐴶 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴀𐴥𐴟𐴀𐴕 𐴈𐴡𐴕𐴥𐴞𐴑𐴧𐴙𐴝𐴃 𐴑𐴟𐴓 𐴏𐴥𐴟𐴀𐴛 𐴕𐴡𐴉𐴝𐴌𐴞 𐴔𐴡𐴓𐴠𐴆𐴥𐴙𐴝𐴌 𐴓𐴡𐴚𐴑𐴝𐴖𐴞 𐴋𐴞𐴘𐴝𐴌 𐴈𐴝𐴣𐴏𐴠 𐴀𐴞𐴕𐴅𐴞𐴓 𐴈𐴥𐴡𐴌𐴝𐴉𐴢 𐴀𐴥𐴡𐴘 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴠𐴌𐴊𐴠 𐴀𐴥𐴠𐴃𐴧𐴟 𐴱 𐴔𐴡𐴓𐴠𐴆𐴥𐴙𐴝𐴌 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴆𐴠 𐴒𐴡𐴃𐴡 𐴐𐴥𐴡𐴔 𐴁𐴝𐴌𐴠 𐴃𐴟𐴓𐴞 𐴓𐴡𐴘 𐴁𐴝𐴊𐴠 𐴱 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴠 𐴖𐴝𐴉𐴠𐴏𐴢 𐴑𐴠𐴀𐴠𐴔𐴡𐴃 𐴓𐴡𐴘 𐴀𐴝𐴕𐴥𐴞𐴁𐴡𐴌𐴓𐴝 𐴁𐴝𐴚𐴓𐴝𐴊𐴠𐴐𐴡𐴌𐴠 𐴔𐴡𐴓𐴠𐴆𐴥𐴙𐴝𐴌 𐴇𐴥𐴡𐴑𐴟𐴔𐴡𐴃𐴠 𐴀𐴝𐴂𐴞𐴓 𐴒𐴡𐴙𐴅𐴧𐴞𐴀𐴓 𐴔𐴡𐴕𐴃𐴡𐴌 𐴁𐴝𐴚𐴓𐴝𐴊𐴠𐴐𐴠 𐴀𐴞𐴚𐴑𐴝𐴌 𐴒𐴡𐴙𐴅𐴧𐴙𐴠 𐴱 𐴕𐴦𐴡 𐴁𐴝𐴚𐴓𐴝𐴊𐴠𐴐𐴢 𐴀𐴥𐴞𐴃𐴝𐴌𐴝𐴌𐴠 𐴖𐴝𐴉𐴠𐴏𐴢 𐴀𐴝𐴕𐴞𐴁𐴝𐴌 𐴁𐴝𐴙𐴊𐴧𐴡 , 𐴕𐴦𐴡 𐴀𐴝𐴌𐴀𐴥𐴡 𐴁𐴠𐴐𐴥𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴠 𐴎𐴝𐴒𐴝 𐴊𐴞𐴁𐴝𐴌 𐴂𐴡𐴎𐴞𐴆𐴥𐴠𐴕𐴡𐴃 𐴀𐴝𐴏𐴠 , 𐴁𐴡𐴓𐴞 𐴒𐴡𐴃𐴡 𐴈𐴝𐴙𐴓𐴧𐴝 𐴁𐴝𐴚𐴓𐴝𐴊𐴠𐴐𐴡𐴌 𐴁𐴞𐴊𐴠𐴐𐴢 𐴀𐴟𐴎𐴞𐴌 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠 𐴱𐴱

𐴔𐴡𐴓𐴠𐴆𐴥𐴙𐴝 𐴇𐴥𐴡𐴑𐴟𐴔𐴡𐴃𐴡𐴌 𐴇𐴠𐴉𐴝𐴎𐴡𐴃𐴞 𐴋𐴞𐴂𐴦𐴝𐴌𐴔𐴠𐴕𐴡𐴌 𐴋𐴦𐴡𐴣𐴌 𐴀𐴟𐴎𐴞𐴌 / 𐴀𐴞𐴏𐴔𐴝𐴀𐴞𐴓 𐴏𐴥𐴝𐴁𐴠𐴌𐴞 𐴘𐴠 𐴈𐴡𐴘𐴧𐴠𐴊𐴠 , 𐴁𐴝𐴚𐴓𐴝𐴊𐴠𐴐𐴢 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴱 𐴎𐴠𐴍𐴠 𐴁𐴝𐴚𐴓𐴝𐴊𐴠𐴐𐴠 𐴀𐴞𐴕𐴏𐴝𐴕𐴞 𐴇𐴝𐴔𐴊𐴌𐴡𐴊𐴞 𐴓𐴡𐴘 𐴁𐴡𐴌𐴔𐴝𐴌 𐴅𐴠𐴕𐴡𐴏𐴥𐴝𐴙𐴋𐴡𐴌𐴃𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴏𐴥𐴝𐴀𐴌𐴝 𐴓𐴡𐴘𐴧𐴠𐴊𐴠 𐴱 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚 𐴌𐴠 𐴑𐴠𐴀𐴠𐴔 𐴁𐴝𐴕𐴝𐴘 𐴇𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴃𐴠 𐴌𐴝𐴙𐴑𐴧𐴙𐴠 𐴱 𐴀𐴠𐴈𐴥𐴡𐴕 𐴔𐴡𐴓𐴠𐴆𐴥𐴙𐴝𐴃 𐴁𐴡𐴕 𐴀𐴝𐴏𐴠𐴊𐴠 𐴹 𐴶 𐴲 𐴎𐴡𐴕 𐴌𐴟𐴇𐴝𐴙𐴚 𐴀𐴥𐴟𐴀𐴕 𐴱 𐴎𐴡𐴊𐴞 𐴀𐴥𐴠 𐴑𐴠𐴀𐴠𐴔𐴡𐴌𐴃𐴟 𐴀𐴝𐴙𐴐𐴧𐴙𐴠𐴊𐴠 𐴀𐴥𐴡𐴘𐴓𐴠 𐴀𐴥𐴞𐴃𐴝𐴌𐴝𐴌𐴠 𐴀𐴥𐴠 𐴑𐴠𐴀𐴠𐴔𐴡𐴃 𐴖𐴝𐴉𐴠𐴏𐴢 𐴕𐴞𐴎𐴝𐴘 𐴌𐴝𐴑𐴤𐴞𐴁𐴝𐴌 𐴁𐴝𐴁𐴡𐴃𐴠 𐴱 𐴋𐴥𐴝𐴇𐴑𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 / 𐴖𐴞𐴏𐴔𐴝 𐴂𐴟𐴃𐴌𐴝 𐴘𐴠 𐴈𐴡𐴘𐴧𐴠 𐴱 𐴔𐴡𐴕𐴃𐴡𐴌 / 𐴀𐴝𐴕𐴝𐴊𐴟𐴓 𐴈𐴥𐴡𐴁𐴡𐴌 𐴀𐴠𐴅𐴠𐴕𐴏𐴞𐴌 𐴏𐴟𐴖𐴝𐴓𐴡𐴌 𐴅𐴟𐴖𐴝𐴁𐴡𐴃 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠𐴊𐴠 , 𐴀𐴥𐴞𐴃𐴝𐴌𐴝 𐴁𐴝𐴚𐴓𐴝𐴊𐴠𐴐𐴡𐴙𐴃𐴧𐴝 𐴕𐴡𐴀 , 𐴀𐴥𐴞𐴃𐴝𐴌𐴝 𐴐𐴥𐴡𐴃𐴝 𐴐𐴥𐴡𐴃𐴞 𐴁𐴡𐴏𐴡𐴌 𐴀𐴥𐴡𐴘𐴃𐴠 𐴁𐴡𐴌𐴔𐴤𐴝𐴌 𐴊𐴠𐴐𐴡𐴙𐴃𐴧𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴉𐴟𐴣𐴎𐴥𐴝 𐴀𐴞𐴁𐴝 𐴒𐴝𐴒𐴝 𐴁𐴝𐴚𐴓𐴝𐴊𐴠𐴐𐴡𐴌 𐴖𐴡𐴌𐴠 𐴕𐴡𐴊𐴞 𐴊𐴠𐴐𐴢 𐴁𐴠𐴙𐴒𐴧𐴞𐴕𐴡𐴌𐴠 𐴁𐴡𐴌𐴝𐴃 𐴒𐴡𐴌𐴞 𐴓𐴡𐴘𐴁𐴡𐴌𐴓𐴝 𐴘𐴥𐴡 𐴈𐴡𐴘𐴧𐴠 𐴱

SOURCES : https://www.freemalaysiatoday.com/category/nation/2020/06/10/bangladesh-refuses-to-take-in-rohingya-detained-in-malaysia/