𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴀𐴝𐴃𐴠 𐴈𐴝𐴣𐴏𐴠 𐴑𐴡𐴖𐴞𐴋 – 𐴹 𐴱 𐴐𐴡𐴌 ( 𐴌𐴥𐴠𐴋 𐴎𐴟𐴕 ) 𐴀𐴥𐴞𐴏𐴝𐴉𐴠 𐴀𐴠𐴓𐴝𐴕 𐴒𐴡𐴙𐴅𐴧𐴙𐴠 𐴁𐴝𐴚𐴓𐴝𐴊𐴠𐴐𐴠 𐴱𐴱

𐴁𐴝𐴚𐴓𐴝𐴃𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴐𐴥𐴡𐴣𐴀 𐴀𐴝𐴃𐴠 𐴈𐴝𐴣𐴏𐴠𐴌 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴁𐴠𐴐𐴥𐴞 𐴒𐴡𐴌𐴞 𐴑𐴡𐴌𐴟𐴕𐴝 𐴖𐴝𐴙𐴌𐴠𐴏𐴢 𐴉𐴝𐴀 𐴎𐴡𐴕𐴡𐴌 𐴎𐴡𐴌𐴞𐴘𐴝 ( 𐴑𐴡𐴌𐴟𐴕𐴝 𐴖𐴝𐴙𐴌𐴠𐴏𐴢 𐴌𐴥𐴠𐴋 𐴎𐴟𐴕 ) 𐴁𐴡𐴓𐴞𐴈𐴡𐴘 𐴓𐴡𐴑 𐴋𐴦𐴡𐴕𐴡𐴌 𐴀𐴠𐴓𐴝𐴕 𐴒𐴡𐴙𐴅𐴧𐴙𐴠 𐴱 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴀𐴠𐴑 𐴇𐴥𐴝𐴉𐴃𐴝𐴌𐴓𐴝 𐴓𐴡𐴑 𐴋𐴦𐴡𐴕 𐴑𐴤𐴟𐴓𐴞𐴊𐴞 𐴁𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴁𐴠𐴐𐴥𐴞 𐴃𐴠𐴎𐴞𐴌 𐴏𐴥𐴝𐴣𐴀𐴃𐴠 𐴑𐴡𐴖𐴞𐴋 – 𐴹 𐴱 𐴐𐴡𐴌 𐴁𐴙𐴝𐴌𐴝𐴙𐴔𐴧𐴙𐴝 𐴁𐴝𐴌𐴥𐴞 𐴎𐴡𐴕𐴠 𐴱 𐴀𐴥𐴠 𐴀𐴠𐴓𐴝𐴑𐴝𐴃 𐴓𐴡𐴑 𐴋𐴦𐴡𐴕 𐴊𐴞𐴁𐴝𐴌 𐴉𐴝𐴘𐴏𐴠𐴓𐴝 𐴵 / 𐴅𐴟𐴕 𐴐𐴥𐴟𐴑𐴧𐴟𐴌 𐴁𐴝𐴌𐴠 𐴒𐴡𐴙𐴅𐴧𐴙𐴠 𐴁𐴡𐴓𐴞 𐴱 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 / 𐴔𐴟𐴇𐴝𐴔𐴧𐴡𐴊 𐴑𐴡𐴔𐴝𐴓 𐴇𐴟𐴏𐴠𐴙𐴕𐴠 𐴈𐴡𐴘𐴧𐴠 𐴱 𐴀𐴠 𐴓𐴡𐴑 𐴋𐴦𐴡𐴕 𐴀𐴞𐴁𐴝 𐴅𐴟𐴕𐴡𐴌 𐴰 𐴲 𐴃𐴝𐴌𐴞𐴑 𐴉𐴡𐴙𐴅𐴧𐴡𐴕𐴃𐴡 𐴃𐴥𐴝𐴑𐴞𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴕𐴡𐴘𐴧𐴝 𐴁𐴙𐴝𐴌𐴝𐴙𐴔𐴧𐴙𐴝 𐴵 𐴳 𐴎𐴡𐴕 𐴉𐴝𐴒𐴞𐴘𐴠 𐴱 𐴀𐴥𐴠𐴃𐴡𐴓𐴧𐴝 𐴔𐴝𐴕𐴟𐴙𐴐𐴢 𐴊𐴡𐴓𐴝 𐴀𐴥𐴡𐴘 𐴁𐴝𐴌 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴏𐴦𐴟𐴌𐴡𐴃 𐴐𐴡𐴑𐴡𐴓 𐴀𐴝𐴏𐴠 𐴱 𐴁𐴠𐴙𐴒𐴧𐴞𐴕 𐴔𐴝𐴕𐴥𐴝 𐴒𐴡𐴌𐴞 𐴊𐴞𐴘𐴠 𐴀𐴠𐴑𐴎𐴡𐴕 𐴀𐴡𐴉𐴡𐴌 𐴎𐴡𐴕𐴡𐴌 𐴃𐴟 𐴊𐴟𐴌𐴥𐴠 𐴃𐴥𐴝𐴑𐴞 𐴒𐴤𐴡𐴌𐴡𐴌𐴃𐴟 𐴁𐴦𐴝𐴌𐴠 𐴕𐴡 𐴕𐴠𐴙𐴓𐴃𐴡 𐴈𐴡𐴘𐴧𐴠 𐴱 𐴒𐴝𐴌𐴞 𐴒𐴟𐴌𐴥𐴝 𐴁𐴠𐴙𐴒𐴧𐴞𐴕 𐴌𐴝𐴏𐴧𐴝𐴌 𐴖𐴡𐴌𐴠 𐴀𐴥𐴞 𐴁𐴡𐴕 𐴃𐴥𐴝𐴑𐴞𐴁𐴡 𐴱 𐴁𐴠𐴐𐴥𐴞 𐴎𐴡𐴌𐴟𐴌𐴡𐴃𐴡𐴃 𐴸 𐴁𐴞 𐴃𐴟 𐴸 𐴀𐴥𐴝𐴣 𐴓𐴡𐴃 𐴒𐴝𐴌𐴞 𐴓𐴡𐴘 𐴏𐴥𐴝𐴀𐴔𐴝𐴕 𐴀𐴝𐴕𐴝 𐴕𐴞𐴎𐴝 𐴒𐴡𐴌𐴞𐴁𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴠 𐴱 𐴑𐴟𐴌𐴥𐴝𐴌 𐴁𐴝𐴎𐴝𐴌 𐴀𐴝𐴌 𐴈𐴥𐴝𐴙𐴁𐴝𐴌 𐴔𐴝𐴓𐴡𐴌 𐴊𐴟𐴖𐴝𐴕 𐴐𐴥𐴟𐴊𐴟 𐴌𐴦𐴡𐴘 𐴁𐴝𐴌 𐴀𐴝𐴌 𐴁𐴞𐴐𐴥𐴞𐴃 𐴁𐴝𐴌𐴠 𐴀𐴝𐴣𐴐𐴄𐴡 𐴒𐴤𐴡𐴕𐴄𐴝𐴌𐴓𐴝 𐴑𐴤𐴟𐴓𐴞𐴁𐴡 𐴔𐴡𐴕𐴃𐴡𐴌 𐴎𐴝𐴒𐴝 𐴀𐴥𐴞𐴕𐴡𐴃 𐴔𐴝𐴙𐴕𐴐𐴡𐴌𐴃𐴟 𐴊𐴟𐴌𐴥𐴠 𐴊𐴟𐴌𐴥𐴠 𐴀𐴝𐴓𐴡𐴒𐴢 𐴀𐴝𐴓𐴡𐴒𐴢 𐴃𐴥𐴝𐴑𐴝 𐴉𐴡𐴌𐴞𐴁𐴡 𐴱 𐴋𐴝𐴑𐴄𐴡𐴌 𐴈𐴥𐴝𐴕𐴝 , 𐴊𐴝𐴁𐴝𐴙𐴌 𐴊𐴟𐴖𐴝𐴕 , 𐴁𐴙𐴝𐴌𐴝𐴙𐴔𐴧𐴙𐴝𐴌 𐴒𐴝𐴌𐴥𐴞 𐴀𐴝𐴌 𐴏𐴠𐴇𐴠𐴃𐴡𐴌 𐴁𐴝𐴁𐴡𐴃𐴠 𐴈𐴝𐴔 𐴒𐴡𐴌𐴦𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 𐴓𐴡𐴑 𐴋𐴦𐴡𐴕𐴡𐴌 𐴂𐴝𐴁𐴡𐴕𐴊𐴞𐴌 𐴁𐴦𐴝𐴌𐴠 𐴱 𐴁𐴠𐴀𐴠𐴚 𐴀𐴝𐴌 𐴔𐴡𐴊𐴡𐴊 𐴒𐴡𐴌𐴠𐴊𐴠 𐴀𐴡𐴉𐴞𐴏𐴢 𐴀𐴥𐴡𐴑𐴧𐴡𐴓 𐴌𐴦𐴡𐴘 𐴁𐴝𐴌𐴠 𐴀𐴝𐴌 𐴁𐴞𐴐𐴥𐴞𐴃 𐴁𐴝𐴌𐴠 𐴑𐴤𐴟𐴓𐴝 𐴃𐴥𐴝𐴑𐴞𐴁𐴡 𐴱 𐴔𐴡𐴊𐴡𐴊 𐴀𐴝𐴌 𐴈𐴥𐴝𐴕𐴝 𐴁𐴝𐴍𐴞 𐴁𐴡𐴌𐴓𐴝 𐴘𐴥𐴡 𐴈𐴡𐴕𐴥𐴡 𐴀𐴠𐴕 𐴅𐴞 𐴀𐴡 𐴀𐴥𐴡𐴑𐴧𐴡𐴓𐴠 𐴔𐴝𐴕𐴟𐴙𐴐𐴢 𐴎𐴡𐴔𐴝 𐴒𐴡𐴌𐴞 𐴕𐴡𐴉𐴥𐴝𐴌𐴞𐴁𐴡 𐴱𐴱

Sources : https://swarajyamag.com/insta/bangladesh-declares-areas-near-rohingya-camps-in-coxs-bazar-as-covid-19-red-zone